Войти в систему
Войти с помощью соц. сетей:
Пропове́даннаго законом и пророки яко человека осмодне́вна обре́зал еси, и хранимое в Тро́ичном Сове́те имя Иису́с, яко драгоценный бисер от сокровищ пренебе́сных принесе́нный, во откровение всех людей по́дал еси, Иосифе, имже Ангелов удивив, человеков обрадовав, демонов устрашив, и яко миром благово́нным всю вселенную облагоух́ав, возопил еси к Богу: Аллилу́ия.
Возсия́вший тебе, праведный Иосифе, в младенце Иисусе прорече́нием Симео́на свет во откровение языков и славу людей Израилевых, а́бие облаком скорби покрывается: народ бо смущается, Ирод бесну́ется, души́ Отроча́те ища, в сердце Ма́тере оружие проити́ предрека́ется, да вера и терпение твое я́вны будут всем. Темже тебе, яко крепкому в терпении и в вере непоколеби́мому, взываем:
Радуйся, яко злато в горни́ле, очищаемый непрестанно искуше́ньми;
радуйся, в радости смиренный, в скорби же терпеливый.
Радуйся, всегда верный тайнам, вве́ренным тебе;
радуйся, в мужестве непоколебимый.
Радуйся, верою, яко звездою, в мрачных путе́х жизни руководи́мый;
радуйся, упование на Бога, яко якорь, в бурях житейскаго плавания име́вый.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Хотя́й спасти от злобы Иродовы Пришедшаго спасти мир, не вопроша́л еси, дивный Иосифе, Ангела, дающаго ти повеление о бегстве в Египет: «Иныя спасаяй, Себе ли не может спасти?», но яко муж веры, яко новый Авраа́м, вы́ну готов сый на послушание, не помышля́я о трудах пути, ниже́ испытуя вре́мене возвраще́ния, а́бие же с Мариею и Младенцем устреми́лся еси во Египет, радостно вопия Богу: Аллилу́ия.
Новый во Египте показался еси Иосиф паче о́наго древняго патриарха, спасшаго люди еги́петския от глада: ты бо спасл еси от смерти Спаси́теля мира и людем египетским, гла́дом нечестия гибнущим, хлеб животный прине́сл еси и семена вечной жизни насеял еси, от них же возрасте дивное прозябение в пустынях египетских. Темже вопием ти:
Радуйся, скорби и труды Христа ради в пути радостно терпе́вый;
радуйся, детоводи́телю Отрока Иисуса, в пустыни водившаго иногда Израиля столпо́м огненным и облачным.
Радуйся, пита́телю Питавшего люди Своя ма́нною;
радуйся, носивший на руках Творца и Носителя всея твари.
Радуйся, спасы́й от Иродовы злобы Спа́сшаго иногда люди Божия от го́рькия работы фарао́новы;
радуйся, Египту за рабство благодать сыноположе́ния предуказа́вый.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Стра́нное видев чудо, еже о Иисусе, Бога по предрече́нию роди́тися во пло́ти имеюща, и младенца повита в яслех, Деву Матерь, Ангелов славословие и плоти обрезание, волхвов с востока пришествие с дары на поклонение и бегство во Египет от Иродова неи́стовства, спасение всех людей и Свет языков, якоже рече́ Симеон, и оружие в сердце родившей, познал еси Его Бога и́стинна быти и и́стинна человека и сего ради возопил еси Ему: Аллилу́ия.
Всего себе преда́в Богу, чрез Ангела воззва́вшему Сына Своего из Египта, последовал еси велению Его и вселился еси с Иисусом и Материю Его в Назаре́те, да сбудется слово пророка о нем, яко назоре́й наречется. Темже и мы тебе, яко верному слуге Божию, вопием:
Радуйся, споспе́шниче Божия изволе́ния;
радуйся, соуча́стниче Божия домострои́тельства.
Радуйся, при́сный собеседниче Ангелов;
радуйся, на земли́ в глуби́ны таин небесных посвяще́нный.
Радуйся, пророков прорече́ния о Иисусе слы́шавый;
радуйся, вся благоговейно в глубине́ сердца сохрани́вый, никому́же поведая.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Вся́ко колено небесных, земных и преиспо́дних покланя́ется о имени Иису́совом, тебе же, чудный Иосифе, повину́яся бе Отроча Иисус, яко отцу. Таково́му у́бо к тебе снисхожде́нию Господа чудя́щеся, вопием Ему: Аллилу́ия.
Вити́я многовеща́нныя недоумеют по достоянию восхвалити тя, праведный Иосифе: Матерь Божия, Царица небесе́ и земли, именует тя господи́ном своим, воплоти́вшийся Сын Божий нарица́ет тя отцем, и дом твой на земли бысть вмести́лище святыни пренебе́сныя, яко в нем обиташе Царь неба и земли. Темже мы смиренно вопием ти:
Радуйся, избра́нниче Божий, иже храня́ше кивот святыни пренебесныя;
радуйся, дивный те́ктоне, в егоже доме живя́ше Творец неба и земли.
Радуйся, пита́телю и попечи́телю Отрока Иисуса, иже, яко Бог, дает бытие всем тварям и промышляет о всем мире, видимом и невидимом;
радуйся, яко на земли́ сподобился еси лицезре́ти Сына Божия и держати Его в объятиях, и лобыза́ти Его.
Радуйся, яко и по отшествии в го́рния оби́тели во свете лица Его, Царя славы, блаже́нствуеши;
радуйся, яко вы́ну прославляеши Его со Отце́м и Святым Духом в Царствии Небесном.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Спасти́ можеши всякаго, твоего ходатайства взыскующаго, блаженне Иосифе: како бо, Иже на земли бе повинуяся тебе во всем, не услышит тя предстояща ныне пред Ним на небе и вопиюща с ангельскими лики: «Аллилу́ия!»?
Войти с помощью соц. сетей: