Икона праведного Иосифа Обручника
Акафист праведному Иосифу, обручнику Пресвятой Девы Марии
Кондак 1
Избра́нный храни́телю Пресвяты́я Де́вы Мари́и, пе́стуне и корми́телю Богочелове́ка, пра́ведный Ио́сифе, прославля́юще служе́ние твое́ неизрече́нной та́йне воплоще́ния Бо́га Сло́ва, похва́льная воспису́ем ти. Ты же, ны́не предстоя́ престо́лу Христа́ Бо́га на́шего и име́я ве́лие дерзнове́ние к Не́му, моли́ся о нас, взы́вающих ти:
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Икос 1
Ангелом непостижи́мую та́йну рожде́ния Бо́га Сло́ва от Пренепоро́чныя Де́вы соблюда́я чи́сту от клеветы́ люде́й и кова́рства диа́вола, тебе́, пра́ведный Ио́сифе, смиреннаго те́ктона, избра́ Бог бы́ти храни́теля и свиде́теля де́вства Пресвятыя Марии. Темже прославля́юще тя, яко избра́ннаго таи́нника Бо́жия, взыва́ем ти:
Ра́дуйся, честна́я о́трасле от ко́рене Иессе́ова;
радуйся, внутрь украше́нный ца́рским вели́чием.
Радуйся, ску́достию в земно́м духо́вное стяжа́вый бога́тство;
радуйся, безве́стностию сла́ву ве́чную обреты́й.
Радуйся, сла́вный па́че царе́й;
радуйся, пра́ведный па́че патриа́рхов и пра́отцев.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Кондак 2
Ви́дя Деву Марию, при храме воспита́вшуюся, совершенноле́тню су́щу, первосвяще́нник Захария возопи ко Господу: «Господи, покажи мужа, достойнаго обручитися с Девою!»; егда́ же процвете́ жезл Иосифа, вручая ему Деву, воспеваше Богу: Аллилу́ия.
Икос 2
Разу́мна есть всем конце́м земли праведность твоя, святы́й Ио́сифе, яко несравненныя чести сподобился еси обручником быти Преблагослове́нныя Девы, из Нея́же безмужно произы́де Христос Бог, ты бо крепкия ради веры, чистоты, смирения и преспе́яния во всех добродетелех на сие избра́н был еси. Темже взываем ти:
Радуйся, пра́ведне Чисте́йшей обручивыйся;
радуйся, му́же веры, прие́мый под кров свой Святую Деву Марию, верою соде́лавшуюся престолом Божиим.
Радуйся, смиренный духом;
радуйся, просты́й сердцем.
Радуйся, доброде́тельми преукраше́нный;
радуйся, святый, Святейшей послужи́вший.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Кондак 3
Си́ла Вы́шняго осени тогда к зачатию неискусобрачную, дивныя тайны не ве́дущу Иосифу, да от самого́ Бога науче́нный, возопие́т к Нему: Аллилу́ия.
Икос 3
Иму́щую богоприя́тную утробу Деву видев, Иосиф смяте́ся, зря не к бра́чней и бракоокра́дованную помышля́я; но праведен сый, восхоте́ ю тай пустити, Богу, ве́дущему вся, суд вверяя и нас научив взывати:
Радуйся, целомудрия ревни́телю;
радуйся, изра́ильтянине, в немже льсти несть.
Радуйся, благи́й сердцем;
радуйся, кро́ткий нравы;
Радуйся, все упование на Бога полага́яй;
радуйся, промышлению Его себе и других вверя́яй.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Кондак 4
Бурю помышлений сумни́тельных целомудреннаго Иосифа укроща́я, Ангел открывает тайну рождения от безневе́стныя Марии Сына Божия, Спасителя мира, якоже глагола: «И наречеши имя Ему Иисус, Той бо спасет люди Своя от грех их», Емуже вопием вси: Аллилу́ия.
Икос 4
Слы́шав в писании Господа, глаго́лющаго: «Се Дева в чреве приимет и родит сына Эммануила», веровал еси, пра́ведный Иосифе, глаго́ланному от Ангела, яко книгу запечатле́нную, в нейже пе́рстом Отчим написа́ся Слово, приял еси Марию в дом свой, яко раб, служа Непорочней со страхом и ревностию. Сего ради взываем ти:
Радуйся, яко приложил еси сердце твое к познанию закона Божия;
радуйся, яко открыл еси смысл твой к принятию таин Божиих.
Радуйся, яко прежде всех людей сподобился еси уве́дети ве́лию благочестия тайну, яко на земли́ явися Бог;
радуйся, яко познал еси пришествие Его быти ради спасения людей от грех их.
Радуйся, яко несомненно уверовал еси, яже бы́ша тебе открове́на;
радуйся, яко вера вмени́ся тебе в правду.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
Кондак 5
Богоизбра́нную Отрокови́цу прием в дом свой, блаженне Иосифе, любил еси Ю, яко обру́чницу, почитал еси Ю, яко Пречистую Деву и Матерь Спасителя мира, и служил Ей со страхом и благоговением, вседушно подвиза́яся, да соверша́тся вся в Законе и проро́цех пи́санная, и купно с Мариею вопия Богу: Аллилу́ия.
Икос 5
Видев в я́слех вифлее́мских звезду, возсиявшую от Иакова, первый поклонился еси Рожде́нному, и егда́ небо звезду, Ангели пение, па́стыри испове́дание и волсви поклонение и да́ры приноша́ху Ему, ты же, праведный Иосифе, всего себе прине́сл еси в дар Господу, и жизнь и попечения и труды отдавая на служение Ему. Сего ради вопием ти:
Радуйся, узре́вший прежде всех восхождение на земли́ незаходимаго Солнца правды;
радуйся, первый на земли́ свидетелю и служителю воплощения Сына Божия, прежде век от Отца рожденнаго.
Радуйся, те́ктоне земный, сподо́бивыйся имене отца Архите́ктона Небеснаго;
радуйся, храни́телю и попечи́телю Отроча́те, Емуже со страхом служат чи́ни ангельстии.
Радуйся, благогове́йный служителю Матере Бога Слова;
радуйся, верный сопу́тниче Девы Богоотрокови́цы.
Ра́дуйся, пра́ведный Ио́сифе,
ско́рый помо́щниче и моли́твенниче о душа́х наших.
