В пятницу

Канон Пресвятой Богородице, глас 6-й

Песнь 1

Ирмос: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́, Бо́г отца́ моего́, и вознесу́ Его́: сла́вно бо просла́вися.

Пресвятая Богородица, спаси нас.

Не отри́ни, Блага́я, не омерзи́ мене́, не пре́зри мене́ под Твое́ милосе́рдие, Чи́стая, те́пле прите́кшаго, но да́ждь ми́ е́же в Тебе́ напита́тися благода́тию.

Пресвятая Богородица, спаси нас.

Богоро́дице Блага́я, скорбя́щих Засту́пнице, приими́ мое́ от души́ стена́ние и изба́ви мя́ от все́х безме́рных зо́л, я́же лю́те соде́ях.

Сла́ва Отцу́ и Сы́ну и Свято́му Ду́ху.

Тебе́ припа́даю, Блага́я, ско́рбных Предста́тельнице: изба́ви мя́ огня́ ве́чнующаго, и тьмы́, и про́пасти, во вся́ком житии́ зле́ пожи́вшаго.

И ны́не и при́сно и во ве́ки веко́в. Ами́нь.

Увы́ мне́, ка́ко Тя́, Изба́вителю, умолю́, Иису́се мо́й, безме́рно к Тебе́ согреши́в? Про́чее Хода́таицу Ти́ приноша́ю ро́ждшую Тя́, Чи́стую, поми́луй и спаси́ мя.

Песнь 3

Ирмос: Утверди́, Го́споди, на ка́мени за́поведей Твои́х подви́гшееся се́рдце мое́, я́ко еди́н Свя́т еси́ и Госпо́дь.

Пресвятая Богородица, спаси нас.

Припа́даю Ти́, Ма́ти Сло́ва, приими́ мя щедро́тами Твои́ми; прося́щему же прегреше́ний проще́ние пода́ждь, те́плыми моли́твами Твои́ми.

Пресвятая Богородица, спаси нас.

Поми́луй мя́, Влады́чице, поми́луй и изба́ви от вся́каго лука́вствия, и озлобле́ния бесо́в, и ве́чнаго муче́ния.

Сла́ва Отцу́ и Сы́ну и Свято́му Ду́ху.

Укроти́, Влады́чице, сласте́й мои́х го́рькое пия́нство, трезве́ние боже́ственное ми́ подаю́щи покая́ния и обраще́ние спаси́тельное.

И ны́не и при́сно и во ве́ки веко́в. Ами́нь.

Вся́ческих Го́спода и Содержи́теля, Богороди́тельнице, неизглаго́ланно ро́ждши, умоли́ Сего́, е́же спасти́ ста́до Твое́.

Песнь 4

Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слу́х Тво́й и убоя́хся, сла́ва си́ле Твое́й, Го́споди.

Пресвятая Богородица, спаси нас.

Я́звы души́ моея́ не престая́ чешу́ любосла́стьми, и приложи́шася мне́ стру́пов боле́зни, и пребыва́ю нечу́вствен и неисцели́мь; поми́луй, Богороди́тельнице, и исцели́, и спаси́ мя моли́твами Твои́ми.

Пресвятая Богородица, спаси нас.

Тьма́ грехо́вная покры́ ду́шу мою́, Богороди́тельнице, я́ко в нощи́ си́це хожду́ во све́те, не ве́дый Христо́вы за́поведи. Све́т ро́ждшая Боже́ственный, поми́луй мя́ и просвети́, молю́ся.

Сла́ва Отцу́ и Сы́ну и Свято́му Ду́ху.

Сло́во Бо́га Жива́го сни́де во утро́бу Твою́, Ма́ти Де́во, и прие́м от Твои́х крове́й пречи́стых все́ мое́ смеше́ние, прихо́дит сугу́б во еди́ной Ипоста́си, Его́же моли́ спасти́ ду́ши на́ша.

И ны́не и при́сно и во ве́ки веко́в. Ами́нь.

Теле́сная хоте́ния приле́жно преидо́х и сла́сти вся́, и растле́н бы́х ве́сь, и скве́рнен и ме́рзок; Пречи́стая Богороди́тельнице, поми́луй и спаси́ мя милосе́рдием Твои́м.

Песнь 5

Ирмос: От но́щи у́тренююща, Человеколю́бче, просвети́, молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.

Пресвятая Богородица, спаси нас.

О́гнь гее́нский себе́ разжего́х, де́я неподо́бная, и гне́в Бо́жий лю́те привлеко́х; помози́ ми, Чи́стая, и не оста́ви мене́.

Пресвятая Богородица, спаси нас.

Прегреше́ний оставле́ния прося́ при́сно, де́яти не престаю́ пребеззако́нная, и Тебе́, Пречи́стая, огорчева́ю; очище́ние ве́рных, уще́дри мя́.

Сла́ва Отцу́ и Сы́ну и Свято́му Ду́ху.

Его́же от Твои́х крове́й родила́ еси́, Чи́стая, соверше́нна Челове́ка и Бо́га и́стинна Иису́са, умоли́ Того́ изба́витися на́м огня́ ве́чнаго.

И ны́не и при́сно и во ве́ки веко́в. Ами́нь.

Две́ре непроходи́мая, молю́ся, отве́рзи ми́ две́ри покая́ния и́стиннаго, и покажи́ ми стези́ покая́ния, Чи́стая, Я́же все́х наста́вница.

Песнь 6

Ирмос: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.

Пресвятая Богородица, спаси нас.

Во́лны неподо́бных помышле́ний погружа́ют мя́ ны́не; но Ты́, Влады́чице, к ти́хому приста́нищу наста́ви покая́ния и́стиннаго Твои́м милосе́рдием.

Пресвятая Богородица, спаси нас.

Наде́жду, и сте́ну необори́мую, и Предста́тельницу тве́рду стяжа́вше Тя́, Отрокови́це, избавля́емся прегреше́ний и страсте́й лю́тых и вся́каго вре́да.

Сла́ва Отцу́ и Сы́ну и Свято́му Ду́ху.

Припа́даю Ти́, Чи́стая Де́во, и вопию́ с пла́чем, Богоро́дице: изба́ви ду́шу мою́ окая́нную бу́дущаго суда́ и огня́ ве́чнаго.

И ны́не и при́сно и во ве́ки веко́в. Ами́нь.

Кре́пость Ты́ еси́, Пречи́стая, немощны́х душе́ю, Твои́ми мольба́ми: те́мже мя́ я́ко боля́ща душе́ю не пре́зри, но исцели́.

Седален,

глас 6-й

За милосе́рдие щедро́т, Христе́, соше́л еси́ на зе́млю и, от Де́вы вопло́щься, вся́ освяти́л еси́, я́же от земли́, и к Небеси́ все́х призва́л еси́.

Те́мже упова́юще на Тя́, никогда́же погреши́м, но избавля́емся Тобо́ю настоя́ний: Ты́ бо еси́ Спа́с на́ш, Созда́телю Бо́же на́ш.

Песнь 7

Ирмос: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ на́м; но не преда́ждь на́с до конца́, отце́в Бо́же.

Пресвятая Богородица, спаси нас.

Егда́ душа́ окая́нная моя́ от телесе́ стерпе́ти хо́щет разлуче́ние, и не бу́дет избавля́яй ю́ или́ утеша́яй ю́, тогда́, Влады́чице, предста́ни и изба́ви мя́ бесо́в озлобле́ния.

Пресвятая Богородица, спаси нас.

Припа́даю Ти́ и приношу́ сле́з те́плыя ка́пли; ве́м Твое́ человеко лю́бное, ве́м долготерпе́ние и незло́бие, Ты́ мя ны́не поми́луй, Чи́стая, прости́ и спаси́ мя.

Сла́ва Отцу́ и Сы́ну и Свято́му Ду́ху.

Поми́луй, Де́во, стра́стную и окая́нную мою́ ду́шу, ви́ждь страсте́й смуще́ние, ви́ждь и разгоре́ние пло́ти непостоя́нное, и по́мощь да́ждь ми́ спаси́тельную и избавле́ние.

И ны́не и при́сно и во ве́ки веко́в. Ами́нь.

Отцу́ Единосу́щный, Собезнача́льный Сы́н и Сло́во, пло́ть от Тебе́ прия́т ра́вну, у́мну и одушевле́нну непрело́жно, я́ко ве́сть Са́м; и естество́ на́ше обнови́ в не́й лу́чше, Де́во Чи́стая.

Песнь 8

Ирмос: Его́же Во́инства Небе́сная сла́вят и трепе́щут херуви́ми и серафи́ми, вся́ко дыха́ние и тва́рь, по́йте, благослови́те и превозноси́те во вся́ ве́ки.

Пресвятая Богородица, спаси нас.

Недоуме́ю, помышля́я дея́ния моя́, и трепе́щу Судии́ Стра́шнаго Суди́ща: ки́й отве́т, окая́нный, принесу́ тогда́? Влады́чице ми́ра, бу́ди ми́ засту́пница.

Пресвятая Богородица, спаси нас.

Не отве́ржи у́бо мене́ Сама́, Влады́чице, от лица́ Твоего́, егда́ к Твоему́ воззрю́ о́бразу, но ми́лостива бу́ди ми́ и настоя́щаго премени́ мя осужде́ния.

Сла́ва Отцу́ и Сы́ну и Свято́му Ду́ху.

Неве́сто Бо́жия, Мари́е безневе́стная, от вся́каго лука́ваго вре́да изба́ви мя́, вопию́ Ти́, твоего́ раба́, и в бу́дущей при́ предста́ни ми́, еди́на христиа́н Предста́тельнице.

И ны́не и при́сно и во ве́ки веко́в. Ами́нь.

Да челове́ки Сы́н Тво́й, Влады́чице, обожи́т, яви́ся из Тебе́ соверше́н Челове́к: Сего́ у́бо моли́, соверше́нно очи́щшася показа́ти прича́стника мя́ Боже́ственному Его́ Ца́рствию.

Песнь 9

Ирмос: Е́же, ра́дуйся, от А́нгела прии́мшая и ро́ждшая Созда́теля Твоего́, Де́во, спаси́ Тя велича́ющия.

Пресвятая Богородица, спаси нас.

Ты́ еди́на Предста́тельница челове́ков еси́, Пречи́стая, Ты́ еси́ стена́ христиа́н, Чи́стая, Тя́ ны́не предлага́ю ко Христу́ хода́таицу о мне́ смире́нном, да Твои́ми моли́твами поми́лует мя́ окая́ннаго.

Пресвятая Богородица, спаси нас.

Но́щи дела́ соде́лах, и но́щь муче́ния хо́щет мя́ ны́не покры́ти пра́ведно, су́етнаго, и вся́ко томле́ние прия́ти а́дово; но ро́ждшая Судию́ и Бо́га, Чи́стая Де́во, изба́ви мя́ вся́каго муче́ния.

Сла́ва Отцу́ и Сы́ну и Свято́му Ду́ху.

Вре́мя живота́ моего́ во злы́х изжи́х, и к две́рем а́да прибли́жихся, и ве́сь не гото́в иду́ та́мо; помози́ ми, блага́я Богоро́дице, на Тя́ бо наде́жду возложи́х.

И ны́не и при́сно и во ве́ки веко́в. Ами́нь.

Благолюби́вая Влады́чице, А́нгелов украше́ние, му́чеников сла́во, с си́ми помоли́ся обрести́ на́м ми́лость и разреше́ние долго́в и возмощи́ все́м до́бре жи́зни на́шея тече́ние сконча́ти, боже́ственная де́ющим.