В субботу

Канон Пресвятой Богородице, глас 8-й

Песнь 1

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко еди́н сла́вно просла́вися.

Пресвятая Богородица, спаси нас.

Прииди́те та́йно, бра́тие, я́ко от нача́ла святе́й Богоро́дице внесе́м ве́рнии песнь но́ву, дне́сь похваля́юще вели́чия Ея́.

Пресвятая Богородица, спаси нас.

Дре́вле боговиде́нием Моисе́й озари́вся умо́м, Твоему́ я́сно науча́шеся, Чи́стая, боголе́пному зача́тию, па́че естества́ Де́во, я́вльшуся ему́ в купине́ саду́.

Сла́ва Отцу́ и Сы́ну и Свято́му Ду́ху.

Тебе́ предлага́ю серде́чная дея́ния и прия́тно подаю́ писа́ние, бли́з су́щий Боже́ственный заступле́ния кро́в, ко Влады́це Христу́ Тебе́ предложи́в.

И ны́не и при́сно и во ве́ки веко́в. Ами́нь.

Приклони́ ми у́хо Твое́, Чи́стая, правосла́вною ве́рою в се́ни лица́ Твоего́ че́стно любо́вию Ти́ притека́ющему и стра́хом покланя́ющуся, моле́бный мо́й гла́с услы́ши.

Песнь 3

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Пресвятая Богородица, спаси нас.

Ле́ствица дре́вле патриа́рхова Тя́ прообража́ше, Пренепоро́чная: а́нгельско бо явля́ше сни́тие Бо́жие к на́м, Боже́ственное соше́ствие во утро́бе Твое́й.

Пресвятая Богородица, спаси нас.

Иу́дово коле́но всели́ся, е́же Иа́ков прорече́, от коле́на Его́ прорасти́ти избавле́ние, Иису́са Христа́; Его́же Ты́ ро́ждши, Пречи́стая, просла́вилася еси́.

Сла́ва Отцу́ и Сы́ну и Свято́му Ду́ху.

Грехми́ отча́ян, обрето́х Тя́ приста́нище спасе́ния, Пречи́стая Богоро́дице, упова́ние на́ше и по́моще; те́мже мя́ к покая́нию наста́ви.

И ны́не и при́сно и во ве́ки веко́в. Ами́нь.

Бли́з Тя́ су́щу Влады́ки и́мам, Пресла́вная Влады́чице, дея́ний мои́х кни́гу возложи́х на Тя́ ве́рою; не премолчи́ уще́дрити мя́.

Песнь 4

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́ и со стра́хом славосло́вяше си́лу Твою́.

Пресвятая Богородица, спаси нас.

Ты́ я́ко мони́сты златы́ми оде́яна Неве́ста О́тча, благода́ть прие́мши, укра́шшися добро́тою де́вства, Ма́ти яви́лася еси́ Сы́на Бо́жия.

Пресвятая Богородица, спаси нас.

Тя́, и́стинный Сио́н, Христо́с Сло́во изво́ли Себе́ в Боже́ственное селе́ние, я́ко избра́нну избра́в, Богоро́дице, на обновле́ние всего́ ми́ра.

Сла́ва Отцу́ и Сы́ну и Свято́му Ду́ху.

Ра́дуйся, кра́сная пала́то Сло́ва, де́вственный черто́же Царя́; ра́дуйся, похвало́ все́х безпло́тных; ра́дуйся, челове́ков по́моще.

И ны́не и при́сно и во ве́ки веко́в. Ами́нь.

Удаля́ются от Бо́га, те́мже и погиба́ют отмета́ющии о́бразы Сы́на Твоего́, Ма́ти Бо́жия Де́во Богоро́дице; и́миже спаса́ются чту́щии Тя́.

Песнь 5

Ирмос: Мра́к души́ моея́ разжени́, Светода́вче Христе́ Бо́же, началоро́дную тьму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя сла́влю Тя́.

Пресвятая Богородица, спаси нас.

С Боже́ственным соше́дшеся Гаврии́лом, возопии́м Богоро́дице ве́рно: ра́дуйся, Де́во Свята́я, Благода́тная, Госпо́дь с Тобо́ю, И́же Тебе́ ра́ди потреби́в печа́ль, подаде́ ра́дование.

Пресвятая Богородица, спаси нас.

Пречи́стое Твое́ чре́во Гедео́н ви́де, Де́во Чи́стая, в не́же я́ко до́ждь Сло́во соше́д, воплоти́ся Боже́ственным Ду́хом, О́тча неразлу́чен сы́й Божества́.

Сла́ва Отцу́ и Сы́ну и Свято́му Ду́ху.

Помо́щница ми́ра и Засту́пница еси́ челове́ков гре́шных, Богороди́тельнице Де́во; и ве́рою и любо́вию прибега́ющим к Тебе́ премене́ние спаси́тельное и реши́ло прегреше́ний мно́гих.

И ны́не и при́сно и во ве́ки веко́в. Ами́нь.

Прорасти́ла еси́ без се́мене И́же пре́жде вся́кия тва́ри, прозябе́ние Сы́на О́тча, безле́тно же и безнача́льно, Ду́хом Боже́ственным, Богороди́тельнице Чи́стая; Его́же подо́бие ви́да вси́ почита́ем.

Песнь 6

Ирмос: Содержи́ма мя́ приими́, Человеколю́бче, грехи́ мно́гими, и припа́дающа щедро́там Твои́м, я́ко проро́ка, Го́споди, и спаси́ мя.

Пресвятая Богородица, спаси нас.

Де́вства Тя́ зерца́ло су́що и прия́телище чи́сто Божества́ восхваля́ем, Де́во неискусобра́чная, песньми.

Пресвятая Богородица, спаси нас.

Бо́г во утро́бе Твое́й воплоти́ся безстра́стно и ужа́сно, Богоневе́сто, я́коже в сви́тце но́ве пи́сан пе́рстом О́тчим.

Сла́ва Отцу́ и Сы́ну и Свято́му Ду́ху.

Очище́ние и́мамы покро́в Тво́й, и изве́стную наде́жду, и заступле́ние, Де́во Чи́стая; не посрами́, Влады́чице, рабы́ Твоя́.

И ны́не и при́сно и во ве́ки веко́в. Ами́нь.

Страсте́й неуста́вное беше́ние, предста́нием Твои́м, Богоневе́сто, уста́ви в тишину́; и ко приста́нищу наста́ви на́с тишины́.

Кондак,

глас 8-й

Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти́, раби́ Твои́, Богоро́дице; но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́: ра́дуйся, Неве́сто Неневе́стная.

Песнь 7

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Пресвятая Богородица, спаси нас.

Ра́дости на́шея хода́таица яви́лася еси́, Де́во, и благода́ти принося́ще вене́ц любо́вию, ра́дуйся, вопие́м Ти́, Благослове́нная Чи́стая, похваля́юще.

Пресвятая Богородица, спаси нас.

Гора́ Свята́я еси́ Бо́жия приосене́нная, гора́ ту́чна Пренепоро́чная, гора́ усыре́нна Боже́ственными сия́нии, гора́, в не́йже Бо́г благоволи́ жи́ти.

Сла́ва Отцу́ и Сы́ну и Свято́му Ду́ху.

Побежда́яй благода́ть Твою́ не́сть гре́х, Ма́терне бо дерзнове́ние и во́лю и́маши, и реши́ши прегреше́ния моли́твами Твои́ми, и прево́диши вся́ стремле́ния.

И ны́не и при́сно и во ве́ки веко́в. Ами́нь.

От Тро́ицы родила́ еси́ Еди́наго, Богоро́дице, бы́вша непрело́жна плотски́м соедине́нием, сугу́ба су́ща Естество́м, Его́же ви́да о́браз почита́ем.

Песнь 8

Ирмос: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Пресвятая Богородица, спаси нас.

Кади́льница яви́лася еси́ проро́ку Боже́ственнаго У́гля су́щи, грехи́ отъе́млющаго, Богоро́дице Де́во, Ма́ти Бо́га на́шего.

Пресвятая Богородица, спаси нас.

Дании́л прови́де Тя́ го́ру ве́лию, Богоро́дице Де́во, из нея́же честны́й ка́мень Христо́с пло́тию облече́ся и ле́сти низложи́ и́дольския хра́мы.

Сла́ва Отцу́ и Сы́ну и Свято́му Ду́ху.

Вели́кий ки́т и́щет пожре́ти мя́, лю́таго греха́ и страсте́й мои́х отча́яния; но предвари́ и спаси́ раба́ Твоего́, Влады́чице.

И ны́не и при́сно и во ве́ки веко́в. Ами́нь.

И́же Тобо́ю бесе́довавый к челове́ком, Бо́г сы́й вся́ческих, зра́к челове́ка восприя́т; Его́же взо́р почита́ем, Де́во, в писа́ниих.

Песнь 9

Ирмос: Вои́стинну Богоро́дицу Тя́ испове́дуем спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Пресвятая Богородица, спаси нас.

Вертогра́д затворе́н Тя́, Де́во Богоро́дице, и запеча́тан исто́чник Ду́хом Боже́ственным прему́дрый в пе́снех пое́т: те́мже я́ко Са́д жи́зни, воплоща́ется Христо́с.

Пресвятая Богородица, спаси нас.

Твоего́ несказа́ннаго Рождества́ пропису́я, проро́к кни́гу запеча́тану прови́де, ея́же никто́же та́инство разуме́, вочелове́чения Рождества́ Твоего́.

Сла́ва Отцу́ и Сы́ну и Свято́му Ду́ху.

Тебе́ во умиле́нии души́ мо́лимся вси́: не пре́зри, Влады́чице, на́ша мольбы́, но бу́ди благоуве́тлив на́м покро́в и моли́тву на́шу услы́ши.

И ны́не и при́сно и во ве́ки веко́в. Ами́нь.

Твоему́ и Сы́на Твоего́ припа́даю образо́м и сомня́щихся почита́ти, я́ко ма́нентовы лжы́, отмета́ю, Богоро́дице Де́во; те́мже правосла́вно песнь скончава́ю.