В четверг

Канон Пресвятой Богородице, глас 5-й

Песнь 1

Ирмос: Коня́ и вса́дника в мо́ре Чермно́е, сокруша́яй бра́ни, мы́шцею высо́кою Христо́с истрясе́, Изра́иля же спасе́, побе́дную песнь пою́ща.

Пресвятая Богородица, спаси нас.

Други́й рай зна́ем Тя́ мы́сленный без сравне́ния, Де́во Богоневе́сто, одолева́ющий и́же во Еде́ме раю́, Богома́ти: Ты́ бо нетле́ние челове́ком прозябла́ еси́.

Пресвятая Богородица, спаси нас.

Дре́во жи́зни объя́ти в раи́ Ада́м возбране́н бы́сть, от дре́ва причасти́вся разу́мнаго: безсме́ртие же подаде́, пло́ть от Тебе́, Де́во, Прие́мый.

Сла́ва Отцу́ и Сы́ну и Свято́му Ду́ху.

Пе́рвее от земли́ созда́н бы́сть Ада́м, пречи́стыма рука́ма Вседержи́теля: от Тебе́ же, Богоро́дице Де́во, роди́ся без се́мене но́вый Ада́м, Зижди́тель челове́чества.

И ны́не и при́сно и во ве́ки веко́в. Ами́нь.

Бе́здна после́дняя обы́де мя́ безме́рных прегреше́ний и во глубину́ низво́дит мя́ лю́таго отча́яния: ро́ждшая бе́здну милосе́рдия, ускори́ и спаси́ мя.

Песнь 3

Ирмос: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х Це́рковь Твою́ утверди́, еди́не Бла́же и Человеколю́бче.

Пресвятая Богородица, спаси нас.

И́же живо́тным садо́м зе́млю сотвори́вый роди́тельницу, не су́щим на не́й пе́рвее, от неискусому́жныя Жены́ а́бие, я́ко от земли́, безсе́менный воплоща́емь прише́л еси́, Сло́ве Бо́жий неизме́нный.

Пресвятая Богородица, спаси нас.

Ты́ еси́ земноро́дных наде́жда, и по́мощь, и ра́дость, и покро́в, и прибе́жище, Влады́чице Ма́ти Живота́. Те́мже мо́лим: Твою́ по́мощь низпосли́ все́м пою́щим Тя́.

Сла́ва Отцу́ и Сы́ну и Свято́му Ду́ху.

Неду́гующии, напа́стьми лю́тыми одержи́ми, Вседе́телю ще́дре, И́же вся́ческих Бо́же, Трисвяту́ю Твою́ Ски́нию приво́дим Ти́ вси́ в моли́тву и вопие́м Ти́: разреши́ обдержа́ния ра́б Твои́х.

И ны́не и при́сно и во ве́ки веко́в. Ами́нь.

Смуща́ет мя́ лю́те грехо́вная волна́, во глубину́ прегреше́ний низвлеча́, Пречи́стая, и бу́ря сопроти́вных помышле́ний обурева́ет ду́шу мою́: Окорми́теля ро́ждшая, ускори́ изъя́ти раба́ Твоего́.

Песнь 4

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Пресвятая Богородица, спаси нас.

Е́ва, повину́вшися зми́ю, роди́ печа́ль жена́м; Ты́ же, Де́во, ве́ровавши Бо́жиим веща́нием, всему́ ми́ру ра́дость процвела́ еси́.

Пресвятая Богородица, спаси нас.

Пе́рвее от ре́бр Ада́мовых рожде́на Е́ва; ны́не же Бо́г от Ма́тере Богоневе́сты, Его́же воплоще́нна Де́ва без отца́ родила́ е́сть.

Сла́ва Отцу́ и Сы́ну и Свято́му Ду́ху.

Е́ва ра́дуется, дре́вняго бо прама́терня осужде́ния свобожде́ну Отрокови́ца показа́, Я́же Судию́ заче́ншая нетле́нно и ро́ждшая Милосе́рдаго.

И ны́не и при́сно и во ве́ки веко́в. Ами́нь.

Житие́ мое́ прегреше́ний испо́лнися, по́мысл же стра́стен, и душа́ моя́ осужде́на; те́мже Твои́м благоутро́бием поми́луй, и спаси́ мя, Влады́чице.

Песнь 5

Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко еди́н Благоутро́бен.

Пресвятая Богородица, спаси нас.

Сто́лп и о́блак све́та Тя́ обре́тше, Де́во Ма́ти Светода́вца, и́же по пусты́ни ле́стней ходя́щии от лю́т избега́ем.

Пресвятая Богородица, спаси нас.

Ра́дуйся, ро́ждшая Бо́га пло́тию, пре́жде ве́к рожде́ннаго от Отца́ безпло́тне, яви́тися же а́бие на́м изво́лившаго.

Сла́ва Отцу́ и Сы́ну и Свято́му Ду́ху.

Со́лнце победи́ся Твое́ю све́тлостию, Мари́е: Ты́ бо свети́лы не́бо Украси́вшаго рука́ма объя́ла еси́ и от Твое́ю сосцу́ пита́ла еси́.

И ны́не и при́сно и во ве́ки веко́в. Ами́нь.

Да не осу́диши мене́ во о́гнь негаси́мый, Христе́ Спа́се мо́й, мольба́ми Чи́стыя, ро́ждшия Тя́.

Песнь 6

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Пресвятая Богородица, спаси нас.

И́же в ки́те спа́сшаго проро́ка дре́вле Ио́ну, невре́дно носи́ла еси́ во утро́бе Твое́ю чу́днаго Бо́га, Чи́стая Присноде́во.

Пресвятая Богородица, спаси нас.

Держа́щаго Го́спода моря́, Пречи́стая Де́во, Бо́га небу́рно, я́коже си́лы нося́щи, сла́ное возмуще́ния льсти́ успи́ла еси́.

Сла́ва Отцу́ и Сы́ну и Свято́му Ду́ху.

Вся́ческих тишину́ ро́ждши, Пре чи́стая, Христа́, я́же к Нему́ благоукроти́ моли́твами Твои́ми, ю́же на мя́ страсте́й непостоя́нную бу́рю.

И ны́не и при́сно и во ве́ки веко́в. Ами́нь.

В де́нь печа́ли, егда́ хощу́ теле́сных соу́з разреши́тися, предста́ни ми́ и обдержа́ния бесо́вскаго исхити́.

Седален,

глас 5-й

На Кресте́ зря́щи Тя́, Христе́, Ма́ти Твоя́, во́лею посреде́ разбо́йнику ви́сяща, растерза́ющися ма́терски утро́бою, глаго́лаше: безгре́шне Сы́не, ка́ко непра́ведно на Кресте́, я́коже злоде́й, распя́тся, И́же челове́ческий оживи́ти хотя́ ро́д я́ко Преблаги́й?

Песнь 7

Ирмос: Превозноси́мый отце́в Го́споди, пла́мень угаси́, о́троки ороси́, согла́сно пою́щия: Бо́же, благослове́н еси́.

Пресвятая Богородица, спаси нас.

И́же к пра́отцу Авраа́му прише́ствие Бо́г соверши́, Сы́н Тво́й бы́в; и се́мя его́ во язы́ки благослови́, Благослове́нная.

Пресвятая Богородица, спаси нас.

Ты́ Ле́ствица еси́ Иа́ковля нескве́рная: Ма́терь бо Еди́ну Тя́ Бо́г написа́, Ея́же ра́ди Бо́г совокупи́ о́наго исча́дия.

Сла́ва Отцу́ и Сы́ну и Свято́му Ду́ху.

Превозноси́мый со Отце́м и Ду́хом Сы́н, избра́в Тебе́, Чи́стая, зело́ возлюби́, в жили́ще Себе́ воплоща́емь.

И ны́не и при́сно и во ве́ки веко́в. Ами́нь.

Бо́га, Его́же родила́ еси́, всегда́ моли́, отча́яннаго мя́ спасти́ и улучи́ти просты́ню, ве́рою вопию́щему: Бо́же, благослове́н еси́.

Песнь 8

Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Пресвятая Богородица, спаси нас.

Испыта́ния Твое́ убега́ет Рождество́, Де́во, ве́рою же явля́ется вопию́щим: вся́ дела́ Госпо́дня, Го́спода по́йте и превозноси́те Его́ во ве́ки.

Пресвятая Богородица, спаси нас.

Вся́ко деви́ческия не отпа́дши сла́вы, ма́терскою обогати́лася еси́ че́стию, Безневе́стная: ве́сть и́же сия́ я́ве чудоде́йствовавый, Его́же превозно́сим во ве́ки.

Сла́ва Отцу́ и Сы́ну и Свято́му Ду́ху.

Ви́ждь, Блага́я Пречи́стая, смире́нныя моея́ души́ озлобле́ние и боле́знь премени́ вско́ре: да Тя́ сла́влю во ве́ки.

И ны́не и при́сно и во ве́ки веко́в. Ами́нь.

Приими́ ми́лостивно Твою́ Ма́терь, Сло́ве, моля́щуюся спасти́ Твоя́ лю́ди, Бла́же, я́же стяжа́л еси́ честно́ю Твое́ю кро́вию: да Тебе́ благослови́м во вся́ ве́ки.

Песнь 9

Ирмос: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́; Его́же велича́юще, Де́ву ублажа́ем.

Пресвятая Богородица, спаси нас.

Богоро́дице Влады́чице, умоли́ покланя́емую Тро́ицу, от Нея́же безстра́стно Еди́наго пло́тию на́м родила́ еси́, умири́ти су́щия на земли́ и разреше́нию прегреше́ний пою́щим Тя́ дарова́тися.

Пресвятая Богородица, спаси нас.

А́ще и Еди́н разуме́ется Лице́м Емману́ил, но Естество́м сугу́б: се́ бо две́ возвеща́я во́ли, я́же в Не́м и де́йства, Его́же Роди́тельницу Богоро́дицу испове́дуем.

Сла́ва Отцу́ и Сы́ну и Свято́му Ду́ху.

Себе́ рыда́ю, помышля́я мои́х грехо́в мно́жество и страсте́й возше́ствия, души́ моея́ уны́ния и ума́ моего́ изступле́ния, отча́яннаго мя́ спасе́ния сподо́би.

И ны́не и при́сно и во ве́ки веко́в. Ами́нь.

Врази́ мои́ наше́дше, Го́споди, я́коже разбо́йницы, вы́шнюю све́тлую и светови́дную оде́жду совле́кше и ра́ны ми́ наложи́ша мно́ги: Ты́, предста́вши, е́ле жи́ва возста́ви.