В среду

Канон Пресвятой Богородице, глас 4-й

Песнь 1

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Пресвятая Богородица, спаси нас.

Вои́стинну и вресноту́ родила́ еси́ Бо́га и Го́спода, и Богоро́дица Еди́на вои́стинну и вресноту́ нарекла́ся еси́, Чи́стая. Те́мже Тя́ ве́рно воспева́ем и по до́лгу сла́вим.

Пресвятая Богородица, спаси нас.

Звезда́, я́же от Иа́кова, возсия́ из Тебе́, Пречи́стая, изчита́яй мно́жество зве́зд, я́ко Бо́г. Те́мже Того́ сия́ньми отыми́ мои́х грехо́в тьму́.

Сла́ва Отцу́ и Сы́ну и Свято́му Ду́ху.

Неве́стник слове́сен ве́м Тя́ я́ве Бо́жия воплоще́ния, Чи́стая и Всенепоро́чная: молю́ Тя изба́вити мя́ страсте́й плотски́х, и скорбе́й, и искуше́ний, и обстоя́ний.

И ны́не и при́сно и во ве́ки веко́в. Ами́нь.

Я́ко Ле́ствица, я́же к на́м прише́ствия Вседержи́телева, Е́юже Бо́г сни́де на зе́млю, от землены́х страсте́й плотски́х к Небеси́ вознеси́ мя́ и к Бо́гу приведи́.

Песнь 3

Ирмос: Не му́дростию, и си́лою, и бога́тством хва́лимся, но Тобо́ю, О́тчею ипоста́сною му́дростию, Христе́: не́сть бо Свя́т, па́че Тебе́, Человеколю́бче.

Пресвятая Богородица, спаси нас.

Теку́щий исто́чник, скорбя́щих утеше́ние еси́: те́мже, Влады́чице, и мне́ моли́твенных Твои́х во́д исто́чник источи́ и угаси́ страсте́й пе́щь.

Пресвятая Богородица, спаси нас.

Уя́звена мя́ по́мыслы безме́стными исцели́, Чи́стая, Я́же естества́ на́шего исцели́вшая я́зву лю́тую, ро́ждши Зижди́теля и Го́спода.

Сла́ва Отцу́ и Сы́ну и Свято́му Ду́ху.

В пучи́не мно́гих мои́х прегреше́ний, и страсте́й, и искуше́ний обурева́ема, к ти́хому зело́ приста́нищу, Всенепоро́чная, устреми́ Твои́м заступле́нием.

И ны́не и при́сно и во ве́ки веко́в. Ами́нь.

И́же я́ко на руно́ дожде́м Боже́ственным, во утро́бу Твою́ соше́дшим, опламене́нное огне́м страсте́й мое́ се́рдце ороси́ Твои́ми мольба́ми.

Песнь 4

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Пресвятая Богородица, спаси нас.

От ми́р Сы́на Твоего́ теку́щих, благоуха́нием жи́зни все́х, ми́ро безстра́стия источи́ души́ мое́й, Чи́стая, и ве́сь ка́л стра́сти ея́ потреби́.

Пресвятая Богородица, спаси нас.

Оскверне́ннаго мя́ ка́лом греха́, моли́тв Твои́х окропи́ иссо́пом, и омы́й, и скве́рну страсте́й мои́х очи́сти, Влады́чице, и яви́ Христу́ жили́ще.

Сла́ва Отцу́ и Сы́ну и Свято́му Ду́ху.

Напи́сану Тя́ кни́гу пе́рстом Боже́ственным, запеча́тану, Пречи́стая, молю́, пе́рсты Твои́х моли́тв напиши́ мне́ прегреше́ний оставле́ние и напа́стей изба́ви.

И ны́не и при́сно и во ве́ки веко́в. Ами́нь.

И́же от коне́ц го́р святы́х все́х, хра́м Бо́гу бы́вши, я́коже пре́жде проро́к рече́, Христу́ чи́ст покажи́ мя хра́м, Влады́чице, Твои́ми заступле́ньми.

Песнь 5

Ирмос: Ты́, Го́споди мой, све́т в ми́р прише́л еси́, Све́т святы́й, обраща́яй из мра́чна неве́дения ве́рою воспева́ющия Тя́.

Пресвятая Богородица, спаси нас.

Тя́ ро́су Аермо́нску, на Сио́н соше́дшую, ве́дый, Богороди́тельнице, молю́ угаси́ти пло́ти моея́ запале́ние.

Пресвятая Богородица, спаси нас.

Рай жи́зни су́щи, Богоро́дице, сме́рти грехо́вныя и страсте́й многообра́зных изба́ви мя́ вско́ре.

Сла́ва Отцу́ и Сы́ну и Свято́му Ду́ху.

Алава́стр мы́сленный, Чи́стая, Ты́ еси́, Ми́ра, излия́вшагося на зе́млю с Небесе́, мене́ ны́не благоуха́ния испо́лни.

И ны́не и при́сно и во ве́ки веко́в. Ами́нь.

Прекло́ньшагося ко тле́нию обнови́ла еси́ челове́ка, изведи́ у́бо и мене́ ны́не, Богоневе́сто, из глубины́ прегреше́ний и страсте́й.

Песнь 6

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Пресвятая Богородица, спаси нас.

Пала́та прекра́сна, сла́вная Влады́чице, Царя́ Сла́вы бы́вши, просла́вила еси́ челове́ки: те́мже сла́вы нетле́нныя и мене́ сподо́би.

Пресвятая Богородица, спаси нас.

Ути́шила еси́ тлю́ поро́чную естества́ чи́стым нетле́нием, но изсуши́, Пречи́стая, страсте́й мои́х пото́ки и плотски́я му́дрости ре́ки.

Сла́ва Отцу́ и Сы́ну и Свято́му Ду́ху.

Успи́ страстна́я движе́ния телесе́, и взыгра́ния моя́ плотска́я уму́ повини́ я́ко жребя́, успи́вши, Чи́стая, сно́м Твои́х моли́тв.

И ны́не и при́сно и во ве́ки веко́в. Ами́нь.

Пою́ Тя, Бо́га препе́таго ро́ждшую, и молю́ Тя, Отрокови́це: стра́шныя мя́ при́ и ве́чнаго, Богоро́дице, осужде́ния изба́ви и спаси́ мя.

Седален,

глас 4-й

Предста́тельнице нера́тная, Богороди́тельнице, и моли́твеннице гото́вая притека́ющим к Тебе́, от бе́д мя́ изба́ви: да не пре́зриши мене́, все́х Засту́пнице.

Песнь 7

Ирмос: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Пресвятая Богородица, спаси нас.

Я́ко огнено́сна и Богоприе́мна су́щи купина́ Чи́стая, попали́ помышле́ний те́рние лука́вых, души́ моея́ озари́ мы́сль и страсте́й бе́здну изсуши́.

Пресвятая Богородица, спаси нас.

Вели́чествие от ве́ка и Боже́ственную сла́ву Ты́ Еди́на я́ве обрела́ еси́ на земли́, Не́бо я́вльшися второ́е: Ты́ у́бо упраздни́ велере́чивыя враги́ моя́, бе́сы.

Сла́ва Отцу́ и Сы́ну и Свято́му Ду́ху.

Боже́ственный окри́не милосе́рдия и бла́гости, источи́ ми оби́льно бога́тство Твои́х щедро́т и, скве́рну прегреше́ний мои́х омыва́ющи, плотско́е угаси́ разжже́ние.

И ны́не и при́сно и во ве́ки веко́в. Ами́нь.

Да́нное ми́ от Бо́га бога́тство духо́вное пре́жде, жи́в блу́дно всегда́, сластьми́ изжди́х теле́сными: но я́ко блу́днаго Твои́ми моли́твами, Де́во, оправди́.

Песнь 8

Ирмос: Ру́це распросте́р, Дании́л льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Пресвятая Богородица, спаси нас.

Расто́ргни прегреше́ний мои́х плени́цу, и теле́сная стремле́ния утиши́, лука́вствия же умышле́ний посецы́, и очи́сти от та́йных помышле́ний ско́ро раба́ Твоего́, Богоро́дице, все́х Предста́тельнице ве́рных и заступле́ние.

Пресвятая Богородица, спаси нас.

Гора́ Бо́жия явле́на, и несеко́ма, и ту́чна, Пречи́стая, часта́ и осене́нная, покры́й мя́ се́нию Твои́х моли́тв, и от се́ти лове́ц изба́ви, и сохрани́ от стре́л бесо́вских, и скве́рных помышле́ний.

Сла́ва Отцу́ и Сы́ну и Свято́му Ду́ху.

Стра́х боже́ственный прия́ти ми́, Влады́чице, и ду́х умиле́ния во утро́бе мое́й, и роди́ти житие́ доброде́тельно, и стра́шна лука́вым бесо́м, Пречи́стая, сотвори́, и Боже́ственныя сла́вы а́нгельских ли́к собесе́дника.

И ны́не и при́сно и во ве́ки веко́в. Ами́нь.

Отве́рзи ми́ две́ри жи́зненныя вско́ре, врата́ упова́ния моего́, и наста́ви, Пречи́стая, к жи́зни неконча́емей, и Ца́рствия Небе́снаго покажи́ мя раба́ Твоего́ насле́дника, и Боже́ственныя сла́вы святы́х соприча́стника.

Песнь 9

Ирмос: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́: те́м Тя́ вси́ велича́ем.

Пресвятая Богородица, спаси нас.

Воззри́ моли́твами Твои́ми, Чи́стая, на раба́ Твоего́, и вско́ре предвари́, и оскорбля́ющих и озлобля́ющих вра́г неви́димых изба́ви мя́: спаси́ от бе́д, и скорбе́й, и многообра́зных обстоя́ний.

Пресвятая Богородица, спаси нас.

Всего́ мя, я́звами грехо́вными су́ща уя́звлена и осужде́на, исцели́, Де́во, и изба́ви лука́вых помышле́ний, Я́же Сло́во Всеси́льное ро́ждшая, Блага́го же и Человеколю́бца.

Сла́ва Отцу́ и Сы́ну и Свято́му Ду́ху.

Па́дшаго ра́ди пре́жде Ада́ма в сме́рть, сме́рти причасти́ся, И́же живото́м и сме́ртию облада́яй, Тво́й Сы́н, Преблага́я: те́мже мя́ страсте́й и паде́ния Твои́ми мольба́ми воздви́гни.

И ны́не и при́сно и во ве́ки веко́в. Ами́нь.

Спаси́, Богоро́дице, к Тебе́ прибега́ющих от бе́д и паде́жа, греха́ и бу́ри, и теле́сных страсте́й и волне́ния, и жития́ ну́ждных печа́лей и зло́бы лука́вствия.