Во вторник

Канон Пресвятой Богородице, глас 3-й

Песнь 1

Ирмос: Во́ды дре́вле, ма́нием Боже́ственным, во еди́но со́нмище совокупи́вый и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Пресвятая Богородица, спаси нас.

Я́ко исто́чник милосе́рдия и ми́лости ве́дый Тя́ Бо́жию Ма́терь, присту́пль, молю́ся Твое́й бла́гости, да́ти ми́ умиле́ние: я́ко да се́тую и пла́чуся прегреше́ний мои́х, Всечи́стая Влады́чице.

Пресвятая Богородица, спаси нас.

Душе́вных ми́ сле́з да́ждь ка́плю, омыва́ющу скве́рну всю́ мои́х дея́ний и лука́вая помышле́ния, и очища́ющую души́ моея́ нечистоту́, и це́рковь творя́щую мя́ Бо́жия Ду́ха.

Сла́ва Отцу́ и Сы́ну и Свято́му Ду́ху.

Обурева́емь волно́ю и треволне́нием мои́х прегреше́ний, и лю́те всегда́ борца́ рабо́тами потопля́емь, и во глубину́ поги́бели ны́не отпуще́н, вопию́ Ти, Пренепоро́чная: спаси́ мя.

И ны́не и при́сно и во ве́ки веко́в. Ами́нь.

Милосе́рдия ра́ди ми́лости, Влады́чице все́х, поми́луй окая́нную мою́ ду́шу и огня́ изба́ви мя́ ве́чнующаго и бесо́вскаго напа́дания, под кро́в Тво́й, Богоро́дице, ны́не прибега́ющаго.

Песнь 3

Ирмос: И́же от несу́щих вся́ приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

Пресвятая Богородица, спаси нас.

Све́том Боже́ственным озари́, Всепе́тая, омраче́нный у́м мой злы́ми по́мыслы: Ты́ бо Све́т родила́ еси́, возсия́вший от Отца́ присносу́щный.

Пресвятая Богородица, спаси нас.

Запе́н души́ мое́й стопы́, и́же пра́ведных вра́г к земли́ прирази́: но Твое́ю десни́цею, Влады́чице Чи́стая, возста́ви мя́.

Сла́ва Отцу́ и Сы́ну и Свято́му Ду́ху.

Мытаре́выми гла́сы, окая́нный а́з зову́ Ти: очи́сти мя́, Влады́чице, и прегреше́ний оставле́ние, Твое́ю моли́твою, пода́ждь рабу́ Твоему́.

И ны́не и при́сно и во ве́ки веко́в. Ами́нь.

Исцели́ я́звы душе́вныя и многому́тное помышле́ний волне́ние, Влады́чице, утиши́, и ми́рное ми́ устрое́ние да́ждь.

Песнь 4

Ирмос: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Пресвятая Богородица, спаси нас.

Пло́ть сластьми́ и сладостра́стием оскверни́х, и души́ моея́ чистоту́ скве́рными мы́сльми окаля́х, и у́м помрачи́х, не пре́зри у́бо, Влады́чице, раба́ Твоего́.

Пресвятая Богородица, спаси нас.

Избавле́ние ми́ бу́ди, и прибе́жище, и держа́ва, ро́г же спасе́ния, Чи́стая, и засту́пница, вся́кия мя́ ско́рби избавля́ющи всегда́, и враги́ моя́ вся́ посрамля́ющи.

Сла́ва Отцу́ и Сы́ну и Свято́му Ду́ху.

Мно́гими напа́стьми ны́не одержи́мь е́смь окая́нный и бесо́вскими кова́рствы при́сно погружа́емь, прибега́ю Ти́ ны́не: те́плою Твое́ю моли́твою спаси́ мя, раба́ Твоего́.

И ны́не и при́сно и во ве́ки веко́в. Ами́нь.

Но́щь мя́ несветла́ страсте́й одержи́т окая́ннаго: но све́том Твои́м, Блага́я, души́ моея́ о́блаки разжени́ и к све́ту наста́ви повеле́ний Бо́жиих, Всенепоро́чная.

Песнь 5

Ирмос: Я́ко ви́де Иса́ия обра́зно на престо́ле превознесе́на Бо́га, от А́нгел сла́вы дориноси́ма, о окая́нный, вопия́ше, а́з, прови́дех бо воплоща́ема Бо́га, Све́та невече́рня, и ми́ром влады́чествующа.

Пресвятая Богородица, спаси нас.

Вре́мя живота́ моего́ я́ко ды́м исчезе́, и к сме́ртным две́рем прибли́жихся, и ужаса́юся бесо́вскаго напа́дания: дела́ бо те́х де́ях всегда́, Всенепоро́чная, уще́дри и спаси́ мя.

Пресвятая Богородица, спаси нас.

Изсуша́ющи, Де́во, зо́л мои́х бе́здну, пода́ждь ми́ ре́ки сле́з, и угаси́ ве́сь страсте́й мои́х пла́мень, Отрокови́це, и сподо́би изба́витися огня́ и про́чих муче́ний в де́нь су́дный.

Сла́ва Отцу́ и Сы́ну и Свято́му Ду́ху.

Боле́вшую ду́шу мою́ грехи́, Пречи́стая, исцели́ Твои́м ми́лованием и сподо́би мя́ твори́ти во смире́нии Сы́на Твоего́ повеле́ния при́сно, я́ко да восприиму́ Сего́ бла́гость.

И ны́не и при́сно и во ве́ки веко́в. Ами́нь.

Овдове́вшая, Сы́не Мо́й, неве́стныя оде́жды, Боже́ственная Це́рковь Твоя́ от ре́бр святы́я Кро́ве оде́яся. Аз же боле́зную, вся́ боле́зни Твоя́ зря́щи на Кресте́, я́же Сло́ва Ма́ти, рыда́ющи, глаго́лаше.

Песнь 6

Ирмос: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Пресвятая Богородица, спаси нас.

Вели́кое Тя́ Бо́жий Сы́н гре́шником прибе́жище показа́, вопло́щся, Богоневе́сто, от чи́стых крове́й Твои́х: те́м ми́лостива Твои́м рабо́м бу́ди.

Пресвятая Богородица, спаси нас.

Просвети́ заре́ю Твое́ю, Блага́я, омраче́нныя се́рдца моего́ о́чи по́мыслы неподо́бными; и све́ту сы́на сотвори́, и в ме́сто све́тло мя́ всели́.

Сла́ва Отцу́ и Сы́ну и Свято́му Ду́ху.

Во́лны стра́стных помышле́ний всегда́ мя смуща́ют, Пречи́стая, лука́вых же духо́в бу́ря погружа́ет; но утверди́ мя на ка́мени безстра́стия.

И ны́не и при́сно и во ве́ки веко́в. Ами́нь.

Усну́х к сме́рти душе́вней и во гро́бе лежу́ отча́яния; но да́ждь ми́ ру́ку и воздви́гни, молю́ся, к покая́нию жи́зни наставля́ющи мя́.

Седален,

глас 3-й

Же́зл си́лы стяжа́вшии, Кре́ст Сы́на Твоего́, Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

Песнь 7

Ирмос: Пре́жде о́бразу злато́му, перси́дскому чти́лищу о́троки не поклони́шася, трие́ пою́ще посреде́ пе́щи: отце́в Бо́же, благослове́н еси́.

Пресвятая Богородица, спаси нас.

Кре́постию препоя́ши, Чи́стая, ду́шу мою́, изнемо́гшую грехи́, и, вопию́ща Сы́ну Твоему́, спаси́ мя: оте́ц на́ших Бо́же, благослове́н еси́.

Пресвятая Богородица, спаси нас.

Сме́ртнаго часа́ убоя́вся, безсме́ртнаго ра́ди и ве́чнаго муче́ния, Тебе́ припа́даю: спаси́ мя, Отрокови́це, от се́ти ловя́щих, Богороди́тельнице.

Сла́ва Отцу́ и Сы́ну и Свято́му Ду́ху.

Я́же невмести́маго Бо́га во чре́во вмести́вшая, мно́гими прегреше́нии утесня́емый у́м мо́й, Богоро́дице, свободи́ си́х осужде́ния.

И ны́не и при́сно и во ве́ки веко́в. Ами́нь.

Ро́д челове́ческий Тя́ мо́лит, Богоро́дице: Влады́чице, поми́луй рабы́ Твоя́, ве́рою Сы́ну Твоему́ вопию́щия: оте́ц на́ших Бо́же, благослове́н еси́.

Песнь 8

Ирмос: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, боже́ственную песнь поя́ху: благослови́те, вся́ дела́ Госпо́дня, Го́спода и превозноси́те во вся́ ве́ки.

Пресвятая Богородица, спаси нас.

Позави́дев блу́дному вои́стинну и житие́ мое́ все́ сконча́в во гресе́х, ны́не зову́: согреши́х Ти́, сотвори́ мя, Отрокови́це, я́ко еди́наго от нае́мник Сы́на и Зижди́теля Твоего́, да Тя́ сла́влю во вся́ ве́ки.

Пресвятая Богородица, спаси нас.

Напо́лнися зо́л душа́ моя́, и привмене́н бы́х со все́ми в ро́в низходя́щими; но Ты́ мя, Богоро́дице Де́во, изведи́ из я́мы стра́стныя и от бре́ния тиме́ния зо́л мои́х.

Сла́ва Отцу́ и Сы́ну и Свято́му Ду́ху.

Моли́ся Христу́, ро́ждшая Сего́ от святы́х Твои́х чре́сл, Богоро́дице, мно́гих ми́ прегреше́ний да́ти проще́ние, да пою́: вся́ дела́ Госпо́дня Го́спода по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Егда́ Бо́жиим повеле́нием хо́щет душа́ моя́ от жития́ сего́ отыти́, от се́ти ловя́щих исхити́, Пречи́стая, Тебе́ вопию́щих: вся́ дела́ Госпо́дня Го́спода по́йте и превозноси́те Его́ во ве́ки.

Песнь 9

Ирмос: В зако́не се́ни и писа́ний о́браз ви́дим ве́рнии: вся́к му́жеский по́л, ложесна́ разверза́я, свя́т Бо́гу; те́м перворожде́нное Сло́во Отца́ Безнача́льна, Сы́на, первородя́щася Ма́терию неискусому́жно, велича́ем.

Пресвятая Богородица, спаси нас.

Ро́д челове́ческий, Всенепоро́чная, Твое́ю непобеди́мою моли́твою ны́не обога́щься, вопие́т де́нь и но́щь: не преста́й всегда́ моля́щися Творцу́ и Сы́ну Твоему́, уще́дрити пою́щия Тя́.

Пресвятая Богородица, спаси нас.

Стре́лы страсте́й безме́стных ду́шу мою́ уязви́ша бесо́вскими прило́ги, сопроти́вными стрела́ми помышле́ний, всегда́ у́м мо́й смуща́ют: те́мже исцели́ Отрокови́це, неисце́льныя моя́ я́звы.

Сла́ва Отцу́ и Сы́ну и Свято́му Ду́ху.

Отыми́, Чи́стая Богоневе́сто, от мене́ борю́щих вра́г ра́ны вско́ре, воста́ния бо те́х и мно́гаго лука́вства и на́глости ктому́ не терплю́ окая́нный; но потщи́ся изба́вити мя́.

И ны́не и при́сно и во ве́ки веко́в. Ами́нь.

Ты́ неможе́ние ве́си смире́ннаго моего́ телесе́, я́звы души́ моея́, се́рдца моего́ стена́ние и ума́ моего́ заблужде́ние и пре́лести: те́мже Твои́м милосе́рдием обою́ду да́ждь исцеле́ние.