Каноны на повечерии

В понедельник

Канон Пресвятой Богородице, глас 2-й

Песнь 1

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь сла́вно бо просла́вися.

Пресвятая Богородица, спаси нас.

Похвале́ния Ти́ присноцвету́щий вене́ц, его́же прозябе́ Ду́хом Це́рковь, Чи́стая, прино́сит пе́сненно Тебе́ со Арха́нгелом Гаврии́лом Богоневе́стней, ра́дуяся, пою́щи, и Тя́ че́стно венча́ющи.

Пресвятая Богородица, спаси нас.

Возде́лавши живоно́сный Виногра́д, Ма́ти Бо́жия Препе́тая, Христа́ Бо́га, земле́ Свята́я О́тча яви́ся, па́че смы́сла, Богоблагода́тная, и ве́сь ми́р напои́ пи́ва живоно́снаго, Чи́стая.

Сла́ва Отцу́ и Сы́ну и Свято́му Ду́ху.

Волну́ющагося лю́те прегреше́нии всего́ ми́ра, и потопля́емаго, родила́ еси́, Пречи́стая, Бо́га и Го́спода все́х на́с, и окорми́теля Христа́, ко спаси́тельному приста́нищу на́с направля́юща ве́рно.

И ны́не и при́сно и во ве́ки веко́в. Ами́нь.

Прибе́жище и спасе́ния гра́де, вси́ ве́рно мо́лим Тя́, Мари́е Ма́ти Бо́жия, и ми́ли де́емся те́пле: приими́ мольбы́ на́ша, Твои́х ве́рных ра́б, и разреши́ вся́ ны́ от прегреше́ний осужде́ния.

Песнь 3

Ирмос: Утверди́ на́с в Тебе́, Го́споди, дре́вом умерщве́й гре́х, и стра́х Тво́й всади́ в сердца́ на́с пою́щих Тя́.

Пресвятая Богородица, спаси нас.

Нача́ло отвраще́ния Бо́га бы́сть к челове́ком Е́вино прельще́ние: Свята́я же Богоро́дица приведе́ па́ки Бо́га к на́м.

Пресвятая Богородица, спаси нас.

Жи́зни Тя́ Сокро́вище, Препе́тая, ражда́ет ми́рови, и ра́дуется благоча́дию сла́вный Иоаки́м о Тебе́, я́ко непло́дными отцы́ прише́дши наде́жда.

Сла́ва Отцу́ и Сы́ну и Свято́му Ду́ху.

От А́нны ра́дость ро́ду процвете́, ражда́еши Девою́ Царя́: и сра́дуются Рождеству́ Твоему́ жены́, разре́шшася Тобо́ю кля́твы.

И ны́не и при́сно и во ве́ки веко́в. Ами́нь.

Купина́ в Сина́и прообража́ше Твое́, Де́во, пресла́вное Рождества́: и́бо огне́м Божества́ не опали́ся, в ложесна́х прие́мши, Чи́стая.

Песнь 4

Ирмос: Услы́шах, Го́споди, сла́вное Твое́ смотре́ние и просла́вих, Человеколю́бче, непостижи́мую Твою́ си́лу.

Пресвятая Богородица, спаси нас.

Иа́ков Тя́ я́ко ле́ствицу боголе́пно прови́дяше, Де́во, на ея́же версе́ Бо́г утвержда́шеся.

Пресвятая Богородица, спаси нас.

А́нгельское сни́тие, е́же к на́м Сло́ва, прише́ствие Тобо́ю, Пречи́стая, прояви́ся.

Сла́ва Отцу́ и Сы́ну и Свято́му Ду́ху.

Утро́ба Твоя́ препе́тая, и сосца́ блаже́нна, Де́во: те́х бо ра́ди жи́знь вси́ обрето́хом.

И ны́не и при́сно и во ве́ки веко́в. Ами́нь.

Та́йно воспева́ем Тя́, Ма́ти Бо́жия, гла́сы правосла́вными, и́мже Це́рковь блюдо́ма е́сть, моли́твами Твои́ми.

Песнь 5

Ирмос: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м: ино́го бо ра́зве Тебе́ Бо́га не зна́ю.

Пресвятая Богородица, спаси нас.

Зако́на и ковче́га честне́йшу Тя́ воспева́ем, Богоро́дице Мари́е: и́бо все́х Зижди́теля и Бо́га я́ко скрижа́ли носи́ла еси́, Препе́тая.

Пресвятая Богородица, спаси нас.

Престо́л Тя Бо́жия Сло́ва прославля́ем, Богоро́дице, на не́мже я́ко Челове́к Бо́г седя́ яви́ся и бы́сть херуви́мов превы́шши.

Сла́ва Отцу́ и Сы́ну и Свято́му Ду́ху.

Разреши́ла еси́, Де́во, от го́рькия рабо́ты ве́сь ро́д челове́чь и свобо́дою Христо́вою естество́ же́нское почти́ла еси́ в Боже́ственнем Твое́м Рождестве́.

И ны́не и при́сно и во ве́ки веко́в. Ами́нь.

Родила́ еси́ Сы́на Де́ва, и побежда́ют жены́ врага́ я́ве: те́мже и притека́ют, Отрокови́це, де́вство держа́ще.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Пресвятая Богородица, спаси нас.

Я́же ми́ру ра́дость, Богоро́дице Чи́стая, ра́дуйся, Тебе́, Де́во, зове́м со А́нгелом ве́рно, Твоея́ ра́дости сподо́би и печа́ль на́шу разори́.

Пресвятая Богородица, спаси нас.

Ра́дости неоте́млемыя жили́ще Тя́ восхваля́юще ве́рно, Ма́ти Присноде́во, Твоея́ ра́дости сподо́би и печа́ль на́шу разори́.

Сла́ва Отцу́ и Сы́ну и Свято́му Ду́ху.

Не́бо небе́с вы́шшее яви́лася еси́, Богоневе́стная, Боже́ственною Твое́ю сла́вою: в Тя́ Бо́г на́ш всели́вся, яви́ся ми́.

И ны́не и при́сно и во ве́ки веко́в. Ами́нь.

Ны́не естество́ же́нское возра́довася, ны́не печа́ль преста́, ра́дость процвете́: я́ко Мари́я роди́ Ра́дость, Спа́са Христа́ Бо́га.

Седален,

глас 2-й

Души́ моея́ ле́ность лю́тую и се́рдца моего́ пренемога́ние, Ма́ти Бо́жия, воззре́вши, исцели́ моли́твами Твои́ми и спасе́нных мя́ ча́сти сподо́би, избавля́ющи мя́ тьмы́ и муче́ния, я́ко Еди́на упова́ние мое́ и утеше́ние.

Песнь 7

Ирмос: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси,́ Бо́же оте́ц на́ших.

Пресвятая Богородица, спаси нас.

Руно́ иногда́ Гедео́ново, е́же на Тя́, Чи́стая, Бо́жия Сло́ва прообрази́ сни́тие: я́коже бо ро́су зача́тие прия́т, нетле́нная Де́во. Те́мже вси́ Тебе́ зове́м: благослове́н Пло́д Твоего́ чре́ва, Чи́стая.

Пресвятая Богородица, спаси нас.

Но́ва и стра́шна, и ве́рна и чу́дна Твоя́ та́инства, Мари́е, Ма́ти Христа́ Бо́га на́шего, я́ко Тобо́ю примири́хомся вси́ Бо́гови и Влады́це и со А́нгелы ны́не пое́м: благослове́н Пло́д Твоего́ чре́ва, Чи́стая.

Сла́ва Отцу́ и Сы́ну и Свято́му Ду́ху.

И́же пре́жде Гедео́н предвеству́ет Тебе́, Чи́стая, Боже́ственное Рождество́ я́ве: окри́н приноша́ет, испо́лнен воды́ от оцежде́ния руно́внаго: ве́сь бо в Тя́ Боже́ственно всели́ся, Пречи́стая: благослове́н Пло́д Твоего́ чре́ва, Чи́стая.

И ны́не и при́сно и во ве́ки веко́в. Ами́нь.

Ро́ждши Бо́га и Спа́са вся́ческих, Мари́е, была́ еси́ отча́янных исправле́ние, гре́шников обновле́ние, и ненаде́жных наде́жда, и пою́щих по́мощь: благослове́н Пло́д Твоего́ чре́ва, Чи́стая.

Песнь 8

Ирмос: В пе́щь о́гненную ко отроко́м евре́йским снизше́дшаго и пла́мень на ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Пресвятая Богородица, спаси нас.

Но́в ра́й на́м яви́лася еси́, Пресвята́я Богоро́дице, не сме́ртное дре́во, но живо́тное, я́ко са́д без се́мене прорасти́вши Го́спода, И́мже безсме́ртною жи́знию пита́емся вси́.

Пресвятая Богородица, спаси нас.

Воспева́ет вся́ Христо́ва Це́рковь, Богоро́дице, Твое́ Рождество́, я́ко спаса́ются гре́шнии вси́ и ни́щии, и́же любо́вию к Тебе́ прибега́юще: прии́де бо Христо́с на зе́млю, челове́ки спасти́.

Сла́ва Отцу́ и Сы́ну и Свято́му Ду́ху.

Свобожда́ется осужде́ния пра́баба Тобо́ю, Богоро́дице Де́во; и се́ ны́не жены́ стра́ждут по Христе́, и ра́дуется естество́ же́нское, я́коже первому́ченица вопие́т Фе́кла.

И ны́не и при́сно и во ве́ки веко́в. Ами́нь.

Никто́же поги́бе, Чи́стая, и́же ве́ры наде́жду стяжа́ к Тебе́ правосла́вно, Де́во Ма́ти Бо́жия, ра́зве то́чию за́вистию отмета́яйся, Твоему́ не покланя́тися о́бразу начерта́нному.

Песнь 9

Ирмос: Я́же пре́жде со́лнца Свети́льника Бо́га возсия́вшаго, пло́тски к на́м прише́дшаго из боку́ Деви́чу, неизрече́нно воплоти́вшая, благослове́нная Всечи́стая, Тя́, Богоро́дице, велича́ем.

Пресвятая Богородица, спаси нас.

Приклони́ ми у́хо Твое́, Де́во Пресвята́я, воспева́ющему ве́рно похва́льными словесы́ Твое́ Рождество́: и я́ко да́ры вдови́чи песнь усте́н мои́х прие́мши, проси́ грехо́в мои́х проще́ния.

Пресвятая Богородица, спаси нас.

Сия́ет добро́та Твоя́, блиста́ет чистоты́ све́тлость, Чи́стая, и пресия́ет па́че си́х Твое́ Рождество́: Бо́г бо, Творе́ц со́лнца и тва́ри всея́, из Тебе́ роди́ся: те́мже Тя́ вси́ велича́ем.

Сла́ва Отцу́ и Сы́ну и Свято́му Ду́ху.

Све́т Тя́ чистоты́, и же́зл де́вства, и Ма́терь Бо́жию, боголе́пно в пе́снех пою́ще, Богоро́дице, со гла́сом хвале́ния мо́лимся Ти́: в де́встве утверди́ на́с и в чистоте́ сохрани́.

И ны́не и при́сно и во ве́ки веко́в. Ами́нь.

Те́ло и ду́шу нескве́рну Бо́гови соблю́дши, Чи́стая, Ца́рь восхоте́ Твоея́ добро́ты, Христо́с, и Ма́терь Своего́ воплоще́ния показа́, Мари́е пресла́вная, спасе́ние мое́ соверша́я.