В пятницу

Канон Честному и Животворящему Кресту, глас 5-й

Песнь 1

Ирмос: Спасителю Богу, в мо́ри лю́ди немо́крыми нога́ми наста́вльшему и фарао́на со всево́инством пото́пльшему, Тому́ Еди́ному пои́м, я́ко просла́вися.

Сла́ва, Го́споди, Кресту́ Твоему́ Честно́му.

Страстоуби́йственную, Христе́, хоте́нием Твои́м претерпе́л еси́ стра́сть и уби́л еси́ в раи́ дре́вле нас уби́вшаго: те́мже Твою́ сла́вим Благосты́ню.

Сла́ва, Го́споди, Кресту́ Твоему́ Честно́му.

Воздви́глся еси́ на Кре́ст, и низпаде́ся вра́г: и па́дшии воздвиго́хомся, и ра́йстии жи́тели, Христе́, бы́хом, держа́ву сла́вяще Ца́рствия Твоего́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: Но́во Отроча́ нам Ве́тхаго де́ньми, Чи́стая Де́во, родила́ еси, обетша́вшее естество́ челове́ческое обновля́юща, Всенепоро́чная, Боже́ственною стра́стию свое́ю.

Песнь 3

Ирмос: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити спаси́тельное Твое́ вознесе́ние.

Сла́ва, Го́споди, Кресту́ Твоему́ Честно́му.

Увяда́еши плода́ тлю́, на Дре́во, Спа́се, воздвиза́емь, и нетле́ния исто́чники нам от ребр источа́еши, Влады́ко.

Сла́ва, Го́споди, Кресту́ Твоему́ Честно́му.

Закла́ся на Кресте́ я́коже А́гнец, пра́ги назна́менуя душ на́ших Боже́ственною Твое́ю кро́вию, Влады́ко: те́мже Тя со стра́хом сла́вим.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: Жи́зни на́м Хода́тай, Чи́стая, умира́я на Дре́ве яви́ся Твой Сын же и Госпо́дь, прославля́яй пою́щия Тя.

Песнь 4

Ирмос: Услы́шах слух си́лы Креста́, я́ко рай отве́рзеся им, и возопи́х: сла́ва си́ле Твое́й, Го́споди.

Сла́ва, Го́споди, Кресту́ Твоему́ Честно́му.

Егда́ заше́л еси́ на Кресте́, пра́вды Со́лнце, Христе́, свет невече́рний возсия́л еси́ нам, пою́щим Твое́, Сло́ве, стра́шное смотре́ние.

Сла́ва, Го́споди, Кресту́ Твоему́ Честно́му.

Стоя́щу Ти, Судие́, иногда́ пред суди́щем, Христе́, осуди́л еси́ непра́веднаго врага́, и распя́лся еси́ посреде́ непра́ведных, нас оправда́я.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: Егда́ узре́ла на Кресте́ Христа́, Его́же роди́ла еси́, Чи́стая, диви́лася еси́ неизрече́нному Его́ долготерпе́нию: те́мже Тя с Ним прославля́ем.

Песнь 5

Ирмос: У́тренююще вопие́м Ти: Го́споди, спаси́ ны, Ты бо еси́ Бог наш, ра́зве бо Тебе́ ино́го не зна́ем.

Сла́ва, Го́споди, Кресту́ Твоему́ Честно́му.

Ка́мение Тя на ка́мени ощути́вшее, Христе́, воздви́жена, распадо́шася, и земли́ потрясо́шася основа́ния.

Сла́ва, Го́споди, Кресту́ Твоему́ Честно́му.

Отложи́ све́тлость со́лнце, воздви́жену Тебе́ на Дре́во, Со́лнце пра́ведное, Долготерпели́ве.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: Ви́девши на Крест воздви́жена Спа́са, рыда́ющи восклица́ше, Де́во Ма́ти Всенепоро́чная.

Песнь 6

Ирмос: Обы́де мя бе́здна, гроб мне кит бысть, аз же возопи́х к Тебе́, Человеколю́бцу, и спасе́ мя десни́ца Твоя́, Го́споди.

Сла́ва, Го́споди, Кресту́ Твоему́ Честно́му.

Крест на земли́ водружа́шеся, и паде́ние бесо́м быва́ше; и ве́ра утвержде́ния нача́ло приима́ше, и зло́ба от среды́ отгони́ма быва́ше.

Сла́ва, Го́споди, Кресту́ Твоему́ Честно́му.

Со́лнце угасе́, пло́ть Твою́ я́коже свещу́ возже́гшу Ти на Дре́ве, Го́споди: дра́хма же обрета́шеся, погребе́ная мра́чными страстьми́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: Ору́жие про́йде се́рдце Твое́, Де́во Всенепоро́чная, егда́ распина́ема Зижди́теля ви́дела еси́ и копие́м Боже́ственная ре́бра ископава́ема.

Песнь 7

Ирмос: В пещи́ о́гненней песносло́вцы спасы́й о́троки, благослове́н Бог оте́ц на́ших.

Сла́ва, Го́споди, Кресту́ Твоему́ Честно́му.

Да изба́вимся мы сла́стнаго греха́, же́лчи вкуси́л еси́, Христе́, Сла́досте жи́зненная.

Сла́ва, Го́споди, Кресту́ Твоему́ Честно́му.

Тебе́ на Дре́ве, Христе́, уя́звену, исцеле́ша я́звы Ада́мовы многоле́тныя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: По рождестве́, Чи́стая, я́коже и пре́жде рождества́ пребыва́еши: Бог бо бе рожде́йся, да обожи́т челове́ки.

Песнь 8

Ирмос: Из Отца́ пре́жде век рожде́ннаго Сы́на и Бо́га и в после́дняя ле́та воплоще́ннаго от Де́вы Ма́тере, свяще́нницы, по́йте, лю́дие, превозноси́те во вся ве́ки.

Сла́ва, Го́споди, Кресту́ Твоему́ Честно́му.

И́же кля́тву дре́ва Дре́вом исцели́вый и благослове́ние источи́вый челове́ком, Преблаги́й, Тебе́, Спа́се, пое́м и Тебе́ славосло́вим во ве́ки.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: Невестоводи́тель тебе́, Де́во, Гаврии́л по́слан бы́сть, ра́дуйся, вопия́ше Ти, глаго́ля, светле́йшая Пала́то Всех Царя́ Христа́, в Ню́же всели́вся, обожи́ вся челове́ки.

Песнь 9

Ирмос: Тя, па́че ума́ и слове́се Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.

Сла́ва, Го́споди, Кресту́ Твоему́ Честно́му.

Кре́пость вра́жия и держа́ва отъ я́та бы́сть, держа́вный еди́не Го́споди, на Крест вознесе́ну Ти и пе́рсты на нем окровави́вшу.

Сла́ва, Го́споди, Кресту́ Твоему́ Честно́му.

Ископа́ша, Христе́ мой, ру́це и но́зе Твои́, и ко́сти Твоя́ изочто́ша распе́ншии беззако́нницы, и же́лчи со о́цтом тебе́ напои́ша.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогородичен: Свет нам, Чи́стая, из Тебе́ возсия́ Иису́с, и просвети́ тва́рь всю распя́тием, и бесо́вскую тьму́ прогна́л есть.