В четверг

Канон святым славным и всехвальным Апостолам, глас 6-й

Песнь 1

Ирмос: Яко по су́ху пешеше́ствовав Израи́ль, по бе́здне стопа́ми, гони́теля фарао́на ви́дя потопля́ема, Бо́гу побе́дную песнь пои́м, вопия́ше.

Святи́и Апо́столи, моли́те Бо́га о нас.

Свет бы́вше ми́ру, богоглаго́ливии, све́тлыми блиста́ньми озари́те нас и страсте́й изба́вите но́щи и мглы искуше́ний, богоблаже́ннии.

Святи́и Апо́столи, моли́те Бо́га о нас.

Кня́зи честны́я по всей земли́ Дух вас че́стно поста́ви, Госпо́дни ученицы́; те́мже возду́шнаго кня́зя победи́вше, ве́рныя избавля́ете.

Святи́и Апо́столи, моли́те Бо́га о нас.

От огня́ невеще́ственнаго, я́ко светоза́рное разже́гшеся у́глие, веще́ственная моя, прему́дрии, стра́сти попали́те, к све́ту безстра́стия и живота́ наставля́юще мя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Апо́стол моли́твами, проро́к и му́ченик, и Ро́ждшия Тя Чи́стыя, Го́споди Иису́се, все́х Царю́, уще́дри лю́ди, согреши́вшия Ти.

Песнь 3

Ирмос: Несть свя́т, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.

Святи́и Апо́столи, моли́те Бо́га о нас.

Боже́ственный дух ва́ша язы́ки извари́в наше́ствием стра́шным, сокруше́нныя челове́ки к животу́ обновля́ет ва́ми, сла́внии Апо́столи.

Святи́и Апо́столи, моли́те Бо́га о нас.

В ра́зуме согреша́яй, ко́е обря́щу поми́лование, Сло́ве, в де́нь су́дный? Сего́ ра́ди вопи́ю Ти: Твои́х ра́ди учени́к уще́дри мя, самоосужде́ннаго.

Святи́и Апо́столи, моли́те Бо́га о нас.

Уподо́бльшиися Христо́вым спаси́тельным страсте́м, души́ моея́ стра́сти ле́тныя и лю́тыя исцели́те, вра́чеве су́ще, сла́внии Апо́столи.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Согреши́вшаго мя, Христе́, Богоро́дицы ра́ди и Твои́х Апо́стол, обрати́в, яко Бог, поми́луй и огня́ ве́чнаго, Спа́се, свободи́.

Песнь 4

Ирмос: Христо́с моя си́ла, Бог и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Святи́и Апо́столи, моли́те Бо́га о нас.

Приста́нища благоути́шная, приста́нища небу́рная, к ти́хому мя приста́нищу доведи́те, прегреше́ний лю́тых треволне́нием обурева́ема.

Святи́и Апо́столи, моли́те Бо́га о нас.

Душе́ моя́, воздохни́, душе́ моя́, прослези́ся, смире́нное се́рдце мое́ благо́му отню́дь прилепи́ся, я́ко да бу́дущаго тя пла́мене и му́ки изба́вит Бог.

Святи́и Апо́столи, моли́те Бо́га о нас.

Спа́са Го́спода моли́те, спаси́телие су́ще челове́ков, всеблаже́ннии Апо́столи, да нас спасе́т от искуше́ний злых я́ко Человеколю́бец.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Де́во Пречи́стая, Де́во Непоро́чная, со Апо́столы о нас мольбу́ сотвори́, я́ко да изба́вимся лю́тых искуше́ний и бед.

Песнь 5

Ирмос: Бо́жиим све́том Тво́им, Бла́же, у́тренюющих Ти ду́ши любо́вию озари́, молю́ся, Тя ве́дети, Сло́ве Бо́жий, И́стиннаго Бо́га, от мра́ка грехо́внаго взыва́юща.

Святи́и Апо́столи, моли́те Бо́га о нас.

Путь, вводя́щий в живо́т, зело́ тесне́йшим ше́ствием искуше́ний и скорбе́й, ученицы́ Cло́ва я́ве ходи́вшии, стезю́ души́ моея́ угла́дите.

Святи́и Апо́столи, моли́те Бо́га о нас.

Свети́льницы Боже́ственнаго Восто́ка, изба́вите мя от тьмы́ страсте́й, и сласте́й помраче́ния, и напа́стей, и обстоя́ний, и бу́ри, и бед, Христо́ви Апо́столи.

Святи́и Апо́столи, моли́те Бо́га о нас.

Сви́тцы Сло́ва богозра́чнии, в кни́зе мя живо́тней написа́тися моли́те, Апо́столи, грехо́в мои́х зло́е растерза́юще писа́ние моли́твами ва́шими.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Спасе́ние мое́ и упова́ние, спаси́ мя, упова́ющаго на Тя, всех упова́ние непосты́дное, Я́же к Сы́ну Твоему́ мольба́ми и Боже́ственных учени́к, Отрокови́це Еди́на Всепе́тая.

Песнь 6

Ирмос: Жите́йское мо́ре, воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Святи́и Апо́столи, моли́те Бо́га о нас.

Яко скрижа́ли Богопи́санная Ду́ха, я́ве честна́я законоположе́ния, сла́внии, в душа́х име́ете нело́жно: и́миже в писа́ниих упраздни́сте зако́н, мир спа́сше.

Святи́и Апо́столи, моли́те Бо́га о нас.

Душе́, согреша́ющи, обы́чаем же злым умовре́дно работа́ющи, обраще́нием обрати́ся и Го́сподеви ще́дрому возопи́й: Апо́стол ра́ди, Сло́ве, спаси́ мя.

Святи́и Апо́столи, моли́те Бо́га о нас.

Овца́м десны́м сочета́й мя, во ужа́сном и стра́шном прише́ствии Твое́м, избра́нным Твои́м, моли́твами боже́ственных пропове́дник Твои́х, закла́выйся за всех, А́гнче Незло́бивый.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Лик мо́лит Тя безпло́тных слуг, Сы́не Бо́жий Пребезнача́льне, мо́лит Тя собо́р ученико́в с Ро́ждшею Тя, лю́дем Твои́м пода́ждь ми́лости Твоя́.

Песнь 7

Ирмос: Росода́тельну у́бо пещь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Святи́и Апо́столи, моли́те Бо́га о нас.

У́дицею сло́ва, Апо́столи, извле́кше всех из глубины́ пре́лести, приведо́сте к закла́вшемуся Сло́ву нас ра́ди, пою́ще ему́: благослове́н еси Бог оте́ц на́ших.

Святи́и Апо́столи, моли́те Бо́га о нас.

Я́вльшемуся ве́щию теле́сною, Апо́столи, нехода́тайственне бесе́довавше, просвети́стеся светода́тельными блиста́ньми Его́. Те́мже мя просвети́те, вопию́ща: благослове́н Бог отец на́ших.

Святи́и Апо́столи, моли́те Бо́га о нас.

Па́стыря До́браго умоли́те, боже́ственнии ученицы́, в гора́х мя заблу́ждшаго преступле́ния взыска́ти и спасти́ вопию́щаго приле́жно: благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Со проро́ки, Апо́столы же и му́ченики, Де́во, Его́же родила́ еси́, моли́ земны́х мя изба́вити зол и прича́стника Небе́сных благ бы́ти мя сподо́би, Влады́чице.

Песнь 8

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́; вся бо твори́ши, Христе́, то́кмо е́же хоте́ти. Тя превозно́сим во вся ве́ки.

Святи́и Апо́столи, моли́те Бо́га о нас.

Моли́тв серпо́м очи́стите пле́велы вся мы́сли моея́, боже́ственнии де́латели Спа́совы, Апо́столи, я́ко да спаси́тельнаго пло́да принесу́ клас.

Святи́и Апо́столи, моли́те Бо́га о нас.

Олядене́вшая сердца́ обнови́сте ра́лом сло́ва и, все́явше уче́ние честно́е, клас стори́чествующ спа́сшихся пожа́сте, богови́дцы.

Святи́и Апо́столи, моли́те Бо́га о нас.

Вра́жию зло́бу успи́вше, усну́ли есте́ сном пра́ведных подо́бным, неусы́пнии о нас моли́твенницы бы́вше, ученицы́ Сло́ва, во вся ве́ки.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Огня́ негаси́маго изба́ви мя, Го́споди, проро́к, и му́ченик, и Апо́стол Твои́х, и во утро́бу вмести́вшия Тя неизрече́нно, Де́вы неискусому́жныя, Ще́дре, моли́твами.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельския взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя ублажа́ем.

Святи́и Апо́столи, моли́те Бо́га о нас.

Бо́га, челове́ком приобщи́вшася и ме́ртвенное совокупле́нием без сравне́ния обожи́вшаго, во всем ми́ре пропове́давше, всех безбо́жныя пре́лести свободи́сте: те́мже ублажа́еми есте́ при́сно, боже́ствении Апо́столи.

Святи́и Апо́столи, моли́те Бо́га о нас.

Христо́ву стра́сть изобрази́вше, Апо́столи, страстьми́ телесе́ разли́чными, пло́ти моея́ стра́сти умертви́те и изнемо́гшую, и бе́дствующую, и умерщвле́нную мою́ ду́шу оживотвори́те.

Святи́и Апо́столи, моли́те Бо́га о нас.

Путь бу́ди ми наставля́ющий мя к незаблу́дному пути́ за́поведей Твои́х, Человеколю́бче, в про́пасть грехо́вную впа́дшему, и заблужда́ющу, и укло́ншуся к путе́м луќавым, и бе́дствующу.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ли́ки А́нгел и Арха́нгел же, Вла́сти и Си́лы, Нача́ла, Госпо́дьствия, Херуви́ми и Серафи́ми и Пре́столи, Христе́, собо́р Апо́стол, с Ро́ждшею Тя, мо́лятся Тебе́: Еди́не Царю́, спаси́ рабы́ Твоя.