В среду

Канон Честно́му и Животворящему Кресту, глас 2-й

Песнь 1

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Сла́ва, Го́споди, Кресту́ Твоему́ Честно́му.

Преступи́в пе́рвую за́поведь дре́вле первозда́нный, от сада́ сме́рть объе́м: воздви́гнувыйся же на дре́во Безсме́ртный и сме́рти вкуси́вый, безсме́ртие все́м челове́ком дарова́.

Сла́ва, Го́споди, Кресту́ Твоему́ Честно́му.

Кресту́ водрузи́вшуся на земли́, низпаде́ шата́ние врага́ и отню́д потреби́ся: пре́жде же отринове́нный челове́к па́ки в ра́й вхо́дит.

Сла́ва Тебе́, та́ко еди́ному благоизво́лившему Бо́гу на́шему.

Святи́и му́ченицы, моли́те Бога о нас.

Я́ко овни́, я́ко а́гнцы слове́снии, вси́ закала́еми и на у́ды неми́лостивно ссека́еми, прехва́льнии му́ченицы, и принесе́ни бы́сте Закла́ному я́ко овча́та: и ны́не Це́рковь святу́ю перворо́дных просвеща́ете.

Святи́и му́ченицы, моли́те Бога о нас.

Кре́пкое стоя́ние, му́дрии, всегда́ творя́ще, лука́выя враги́ низложи́сте, мечи́ ссека́еми и во о́гнь и в во́ду вмета́еми: те́мже блаже́нныя кончи́ны, страстоте́рпцы, сподо́бистеся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Свяще́нный Тя́ проро́ческий ли́к нарица́ше две́рь непрохо́дную, зе́млю избра́нную и го́ру несеко́мую, Пречи́стая Влады́чице: Влады́ку бо все́х родила́ еси́, во́лею распя́тие пло́тию прие́мшаго.

Песнь 3

Ирмос: Процвела́ е́сть пусты́ня, я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Сла́ва, Го́споди, Кресту́ Твоему́ Честно́му.

Распина́ем, поколеба́л еси́ всю́ тва́рь, Го́споди, и ве́рныя утверди́л еси́, воспева́ющия си́лу Твою́, и неизрече́нное, Сло́ве, снизхожде́ние Твое́.

Сла́ва, Го́споди, Кресту́ Твоему́ Честно́му.

Ра́й отве́рзл еси́ Кресто́м Твои́м, Влады́ко, и разбо́йника вве́л еси́, позна́вшаго Ца́рствие Твое́ и бога́тство Боже́ственнаго Твоего́ благоутро́бия.

Святи́и му́ченицы, моли́те Бога о нас.

Процвето́ша му́ченицы я́коже шипцы́ благоуха́ннии, в мы́сленных де́брех, и злосмра́дную пре́лесть отгна́ша, и ве́рных сердца́ облагоуха́ша.

Святи́и му́ченицы, моли́те Бога о нас.

Свети́льницы вселе́нныя, ве́рных спаси́телие святи́и, све́тлыми ду́ха заря́ми все́х просвети́те, ва́с по до́лгу ублажа́ющих.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Воздвиза́ема на Дре́во Жизнода́вца ви́дящи, и во́лею умира́юща, все́м жи́знь Подаю́щаго, боля́ше утро́бою, Всенепоро́чная.

Песнь 4

Ирмос: Прише́л еси́ от Де́вы, не хода́тай, ни А́нгел, но Са́м, Го́споди, вопло́щься, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Сла́ва, Го́споди, Кресту́ Твоему́ Честно́му.

Упраздни́л еси́ нача́ло лю́таго мироде́ржца, на Дре́во возноси́м, и кля́тву потреби́л еси́. Те́мже Тя́ сла́вим, и́же тобо́ю спасе́ни, Еди́не Го́споди.

Сла́ва, Го́споди, Кресту́ Твоему́ Честно́му.

Распросте́рта на Дре́ве ви́девшее Тя́ со́лнце скры́ све́т, го́ры и ка́мение распадо́шася, и заве́са церко́вная раздра́ся, Всеси́льне.

Святи́и му́ченицы, моли́те Бога о нас.

Умерщвля́еми, врага́ до конца́ умертви́сте, желе́зом стру́жеми, ко́жнаго умерщвле́ния дебельства́ совлеко́стеся, му́ченицы Госпо́дни, и сла́вою облеко́стеся.

Святи́и му́ченицы, моли́те Бога о нас.

Усека́емыми глава́ми му́ченицы ужа́сно лука́вых си́л главы́ отсеко́ша и пребыва́ющую сла́ву насле́доваша, ра́дующеся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Возсия́ из утро́бы Твоея́, Отрокови́це неискусобра́чная, О́тчее заре́ние Христо́с, и просвети́ вселе́нную, распина́ем, и бесо́вскую тьму́ потреби́л е́сть.

Песнь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику Отцу́ Твоему́ от но́щи неве́дения приведе́ние и́мамы.

Сла́ва, Го́споди, Кресту́ Твоему́ Честно́му.

На кресте́ пригвозди́вся, земна́я основа́ния поколеба́л еси́, и, копие́м пробода́ем, зми́я началозло́бнаго закла́л еси́, и то́ки спасе́ния все́м, Христе́, источи́л еси́.

Сла́ва, Го́споди, Кресту́ Твоему́ Честно́му.

Не терпе́л еси́ зре́ти заблужда́ема, Его́же рука́ма созда́в, ру́це распросте́рл еси́, Сло́ве, на Дре́ве умерщвля́ем, и оживи́л еси́ сего́ Дре́вом, дре́вле уме́ршаго.

Святи́и му́ченицы, моли́те Бога о нас.

Дру́зи христо́вы, те́плии челове́ком засту́пницы, цве́ти честни́и, преудо́бреннии сосу́ди ду́ха, му́дрии страстоте́рпцы, досто́йне ублажа́ются.

Святи́и му́ченицы, моли́те Бога о нас.

Зако́нно пострада́ ли́к святы́х Твои́х страда́лец, беззако́нных посрами́, Еди́не Законода́вче, си́лою Твое́ю и, сконча́в тече́ние, му́ченически венча́ся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Яви́лася еси́, Чи́стая, по рождестве́ нетле́нна, Бо́г бо из Тебе́ роди́ся воплоща́ем: Его́же усмотри́вши распина́ема, не терпя́щи, утро́бною боле́знию восклица́ла еси́.

Песнь 6

Ирмос: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю во гла́се хвале́ния, и́стины же ду́хом пожру́ Тебе́.

Сла́ва, Го́споди, Кресту́ Твоему́ Честно́му.

На ю́ныя главы́ поло́ж дла́ни иногда́ Иа́ков, кре́ст прописова́ше, на не́мже, Сло́ве, распросте́рл еси́ дла́ни; и от руки́ льсти́ваго борца́ изба́вил еси́, Христе́, челове́чество.

Сла́ва, Го́споди, Кресту́ Твоему́ Честно́му.

Распе́ншуся, Христе́, тебе́, Всецарю́, во́лею, ца́рствующий гре́х потреби́ся: Ада́м же, и́же иногда́ дре́вле из рая́ изгна́нный, в то́й вселя́ется па́ки, Тебе́ воспева́я.

Святи́и му́ченицы, моли́те Бога о нас.

Красны́ су́ще в ра́нах свяще́нныя, и́же благоле́пием украси́вшияся небе́сным, вои́стинну возлю́бленныя Госпо́дни му́ченики, несумне́нным се́рдцем воспои́м.

Святи́и му́ченицы, моли́те Бога о нас.

Неугаси́му свещу́ свою́ соблю́дше, Боже́ственнии му́ченицы, напои́ша бога́тно кровьми́ свои́ми и Боже́ственнаго черто́га получи́ша вхо́д, ра́дующеся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Пое́м Тя́, Всепе́тая, я́ко Бо́га ро́ждшую Препе́таго, на Дре́ве сопротивоборца́ врага́ погу́бльша и из тли́ изба́вльшаго воспева́ющих того́ страда́ния.

Песнь 7

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть, Христо́с же простре́ богочести́вым отроко́м ро́су духо́вную, Сы́й Благослове́н и Препросла́влен.

Сла́ва, Го́споди, Кресту́ Твоему́ Честно́му.

Ору́жие, е́же пре́жде обраща́емое, плещи́ мне́ дае́т, отне́леже копие́м прободе́ся, на Кресте́ воздви́женый, благоутро́бне Го́споди.

Те́мже велича́ю Тя́, Твое́ю честно́ю стра́стию обре́т безстра́стие.

Сла́ва, Го́споди, Кресту́ Твоему́ Честно́му.

Зми́й, и́же Моисе́ем возвыша́емый на Дре́во, Боже́ственное возвыше́ние прообража́ше Христо́во, льсти́ваго зми́я умертви́вшаго, все́х же оживи́вшаго на́с, умертви́вшихся преступле́нием.

Святи́и му́ченицы, моли́те Бога о нас.

Сы́нове быва́ете, Боже́ственным приобще́нием, безнача́льна Роди́теля Сы́ну Собезнача́льну, святи́и стра́сти Пречи́стей уподо́бльшеся, те́мже бра́тию ва́с нарица́ет и насле́дники Ца́рствия своего́.

Святи́и му́ченицы, моли́те Бога о нас.

На Кре́ст возвыша́еми, я́ко Влады́ка, и копие́м пробода́еми, и мечи́ ссеца́еми, на о́гнь же и во́ду разделя́еми, и сдробля́еми колесы́, богоно́снии ра́довахуся му́ченицы.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Гро́зд созре́вший, Его́же невозде́ланно, Чи́стая, возрасти́ла еси́ на Дре́ве, я́ко узре́ пове́шена, взыва́ше: Ча́до мое́ сла́дкое, мсто́ иска́пай, и́мже страсте́й пия́нство оти́мется.

Песнь 8

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Сла́ва, Го́споди, Кресту́ Твоему́ Честно́му.

Кро́вию из Твои́х ре́бр нетле́нных иска́павшею, Долготерпели́ве, тва́рь освяти́ся, ре́ки же многобо́жия изсуше́ны бы́ша, ту́чи же яви́шася благоче́стия, пре́лестей бездо́ждие потребля́ющия.

Сла́ва, Го́споди, Кресту́ Твоему́ Честно́му.

Распя́тия Твоего́ со́лнце устыде́ся и своя́ лучи́ сокры́, ка́мение же распадо́шася, и а́д ни́зу устраши́ся; пра́ведных же ду́си взыгра́шася, ча́юще всеконе́чнаго, Сло́ве, избавле́ния.

Святи́и му́ченицы, моли́те Бога о нас.

Исцеле́ния ве́рным то́чат оста́нки моще́й страстоте́рпец и всегда́ вре́ды неудобоисце́льных боле́зней исцелева́ют: я́ко ди́вен еси́, Го́споди, зове́м благода́рно, во святы́х Твои́х му́ченицех.

Святи́и му́ченицы, моли́те Бога о нас.

Уста́ звере́й и вре́ния коно́бная, померза́ния же и сту́дени, тя́жесть зно́я, ногте́й истерза́ния претерпе́сте тве́рдостию, и затворе́ния, и ну́ждную сме́рть, страстоте́рпцы; те́мже со Христо́м прославля́етеся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Пло́ть из Твоего́ чре́ва прие́млет хотя́й, и зри́мь быва́ет неви́димый, и распя́тие прие́млет, и кля́тва нарица́ется, от кля́твы изыма́я все́х Сы́н Тво́й, Богора́дованная Влады́чице.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная: те́м Всепе́тую Богоро́дицу велича́ем.

Сла́ва, Го́споди, Кресту́ Твоему́ Честно́му.

Исцели́ сокруше́ние и окая́нство мое́ Твое́ю ра́ною, Сло́ве неизсле́дованне, и погребе́нный о́браз лука́выми страстьми́ очи́сти стра́стию Твое́ю, Го́споди Бо́же спасе́ния моего́.

Сла́ва, Го́споди, Кресту́ Твоему́ Честно́му.

Ви́ден бы́л еси́ возноси́м на кипари́се, Влады́ко, и на пе́вке, и ке́дре ра́ди бла́гости, еди́н сы́й Святы́я Тро́ицы, еди́ну ипоста́сь имы́й во двою́ естеству́, да спасе́ши челове́чество.

Святи́и му́ченицы, моли́те Бога о нас.

Кресто́м я́коже щито́м обле́кшеся, му́ченицы, невреди́ми яви́стеся, все́ми стрела́ми соде́лателя зло́бы. Те́мже ны́не того́ попира́ете, тому́ руга́ющеся, я́ко худе́й пти́це всегда́.

Святи́и му́ченицы, моли́те Бога о нас.

Земля́ у́бо зи́нувши, кро́ви ва́ша прия́т, не́бо же Боже́ственныя прия́т ду́хи, и со о́гненными чи́нми Боже́ственному престо́лу предстоите́, страстоно́сны му́ченицы, церко́внии столпи́ непо колеби́мии.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Истле́вшее обнови́ла еси́ естество́ пра́отчее, па́че естества́ ро́ждши и де́вствующи естеству́ всему́ Созда́теля: Его́же на Кресте́ пове́шена дре́вле ви́дящи, восклица́ла еси́, Пречи́стая Ма́ти Де́во.