Во вторник

Канон покаянный и святому великому пророку Иоанну Предтече, глас 1-й

Песнь 1

Ирмос: Песнь побе́дную пои́м вси Бо́гу, сотво́ршему ди́вная чудеса́ мы́шцею высо́кою и спа́сшему Изра́иля: я́ко просла́вися.

Поми́луй мя, Бо́же, поми́луй мя.

Порабоща́емь страстьми́ греха́, припа́даю Ти, Го́споди, я́ко да яви́ши мя от сих свобо́дна, сла́вяща приле́жно Твою́ благосты́ню.

Поми́луй мя, Бо́же, поми́луй мя.

Уязви́хся окая́нный грехо́вным копие́м и умро́х, и, зря мя лежа́ща, враг весели́тся: И́же воскреша́яй ме́ртвыя, оживи́в, спаси́ мя.

Крести́телю Спа́сов Иоа́нне, моли́ Бо́га о нас.

Глас был еси́ Сло́ва, блаже́нне, те́мже гла́сы на́ша, я́же тебе́ твори́м, приими́, Предте́че, свобожда́я нас от злых хода́тайством твои́м.

Крести́телю Спа́сов Иоа́нне, моли́ Бо́га о нас.

Я́ко у́тро, я́ко со́лнце возсия́в, просвеща́еши концы́ и помрача ́еши ду́хи лука́выя. Те́мже мрак от душ на́ших отжени́.

Крести́телю Спа́сов Иоа́нне, моли́ Бо́га о нас.

Ме́ртвым Живо́т наш гряду́щ пропове́дал еси́, Предте́че. Те́мже умерщвля́ющия мя стра́сти умертви́, и покажи́, блаже́нне, боже́ственныя све́тлости прича́стника.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Еди́на безле́тнаго Сы́на в ле́то ро́ждши, воплоща́ема, Пречи́стая Влады́чице, вселе́тныя преокая́нныя моея́ души́ стра́сти исцели́.

Песнь 3

Ирмос: Ка́мень, его́же небрего́ша зиждущии, сей бысть во главу́ у́гла: той е́сть ка́мень, на не́мже утверди́ Це́рковь Христо́с, ю́же от язы́к искупи́.

Поми́луй мя, Бо́же, поми́луй мя.

Виждь мою́ не́мощь, Оболки́йся в ню, виждь души моея́ лю́тое безобра́зие, и вонми́ гла́су моему́, Христе́ многоми́лостиве, и претвори́ сея́ неле́поту во благообра́зие, Спа́се.

Поми́луй мя, Бо́же, поми́луй мя.

Спасы́й, Иису́се, блу́днаго, спаси́ мя, еди́наго Твоя́ спаси́тельныя престу́пльша зако́ны, и вся́кий грех безслове́сно сконча́вша, и отведе́на помышле́ньми, от Тебе́, Бла́же, чу́жда мя творя́щими.

Крести́телю Спа́сов Иоа́нне, моли́ Бо́га о нас.

От непло́дове и неражда́ющия, Предте́че, свяще́нно прозябы́й, яви́лся еси́ плодоно́сен де́ланий боже́ственных. Те́мже се́рдце мое́ вся́чески непло́дствующее, благопло́дно сотвори́ до́брым: я́ко да ве́рно всегда́ прославля́ю тя.

Крести́телю Спа́сов Иоа́нне, моли́ Бо́га о нас.

Хле́бом небе́сным утверди́ мое́ се́рдце, блаже́нне, разсла́бленное лука́выми мы́сльми, и даждь ми усе́рдно твори́ти хоте́ния всеще́драго Бо́га: я́ко да ве́рно при́сно сла́влю тя.

Крести́телю Спа́сов Иоа́нне, моли́ Бо́га о нас.

Ми́ра грехи́ взе́млющаго А́гнца пропове́дал еси́, блаже́нне проро́че: грехо́в мои́х тя́жкое бре́мя облегчи́, молю́ся, умиле́ние ми подая́, скве́рны страсте́й очища́ющее.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Во всего́ Ада́ма облече́ся из Тебе́, Богоро́дице, все плотоно́сное произше́дшее Сло́во: Того́ у́бо моли́, Богоро́дице, изба́вити нас от напа́стей вся́ческих и огня́ ве́чнующаго.

Песнь 4

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися, сла́ва си́ле Твое́й, Го́споди.

Поми́луй мя, Бо́же, поми́луй мя.

Е́же ми дал еси́, Христе́, бога́тство, расточи́х зле, скончава́я безме́стная, и бых наг, облече́н в дела́ безче́стия. Те́мже вопию́ Ти: оде́ждею мя украси́ пе́рвою, боже́ственною мя умиля́я благода́тию.

Поми́луй мя, Бо́же, поми́луй мя.

Низведо́хся безу́мием, и падо́хся лю́те, и на земли́ лежу́ неисце́льно боля́й, воздви́гни мя, па́дших Воста́ние, и на ка́мени спаси́тельнаго покая́ния утверди́, Христе́, се́рдце мое́.

Крести́телю Спа́сов Иоа́нне, моли́ Бо́га о нас.

Истка́в спасе́ния ри́зу себе́ во обнаже́нии теле́снем, Госпо́день Крести́телю, обнаже́ннаго от вся́каго благотворе́ния, облецы́ мя, молю́ся, пра́вды и весе́лия оде́ждею.

Крести́телю Спа́сов Иоа́нне, моли́ Бо́га о нас.

Ка́плю спасе́ния одожди́ мне, Предте́че, истаява́ему разждиза́нием по́хотей, погрузи́вый во струя́х иорда́нских сла́дости пото́ка, Иису́са Жизнода́вца: я́ко да по до́лгу тя сла́влю.

Крести́телю Спа́сов Иоа́нне, моли́ Бо́га о нас.

Ни а́нгел, ни хода́тай спасе́ нас, но сам Госпо́дь прише́дый на зе́млю: Ему́же пра́выя пути́ угото́вал еси, блаже́нне. Его́же ны́не моли́, показа́ти ми стезю́, к Ца́рствию наставля́ющую.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Храм освяще́н яви́лася еси Бо́жий, в Тя все́льшагося, Де́во, па́че ума́: Того́ моли́ грехо́вных скверн нас очи́стити, я́ко да хра́м яви́мся и вселе́ние Боже́ственнаго Ду́ха.

Песнь 5

Ирмос: Твой мир даждь нам, Сы́не Бо́жий, ино́го бо ра́зве Тебе́ бо́га не зна́ем, и́мя Твое́ имену́ем, я́ко Бог живы́х и ме́ртвых еси.

Поми́луй мя, Бо́же, поми́луй мя.

Испо́лнихся грехопаде́ний мно́гих и лю́тых, Влады́ко ще́дрый и дол го тер пели́вый: уще́дри мя осужде́ннаго и не отве́ржи мене́ от лица́ Твоего́.

Поми́луй мя, Бо́же, поми́луй мя.

Мытаря́ оправда́л еси́, Христе́, воздохну́вша, тому́ у́бо и аз подо́бяся, бию́ в пе́рси, и зову́ Ти: очи́сти мя, Еди́не благоутро́бне и ще́дрый.

Крести́телю Спа́сов Иоа́нне, моли́ Бо́га о нас.

В пусты́ню всели́вся, Предте́че Христо́в, я́коже дре́вле Илия́: те́мже се́рдце мое́ опусте́вшее прегреше́ньми, прилежа́нием боже́ственным утверди́, всеблаже́нне.

Крести́телю Спа́сов Иоа́нне, моли́ Бо́га о нас.

Я́ко столп непрело́жен и забра́ло ве́рных быв, вели́кий Христо́в Предте́че, помышле́ние мое́, коле́блемо ко́зньми льсти́ваго, непрело́жно покажи́.

Крести́телю Спа́сов Иоа́нне, моли́ Бо́га о нас.

Ме́ртвым благовести́ся свет, и́же от Све́та возсия́вый на земли́, гла́сом твои́м, блаже́нне, и су́щии во тьме́ просвети́хомся: те́мже просвети́ мя, лю́те омраче́ннаго.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Цари́цу Де́ву Тя пропове́дает Дави́д, Пречи́стая, Чи́стую: те́мже молю́ Тя, Небе́снаго мя Ца́рствия сотвори́ насле́дника, я́ко да ублажа́ю Тя.

Песнь 6

Ирмос: Проро́ка Ио́ну подража́я, вопию́: живо́т мой, Бла́же, свободи́ из тли и спаси́ мя, Спа́се ми́ра, зову́ща: сла́ва Тебе́.

Поми́луй мя, Бо́же, поми́луй мя.

Сокруши́шася ко́сти окая́нныя моея́ души́, и тягото́ю сляко́хся мно́гих сласте́й: но помози́ ми, Христе́, еди́не всем помога́ние.

Поми́луй мя, Бо́же, поми́луй мя.

В пучи́ну лю́тых и бу́рю страсте́й впадо́хся, вопию́ Ти, всеси́льне Христе́: возведи́ мя кре́пкою Твое́ю руко́ю и спаси́ мя.

Крести́телю Спа́сов Иоа́нне, моли́ Бо́га о нас.

И́же покая́ние на земли́ пропове́давый, Крести́телю, покая́ния ми пути́, наставля́ющия мя к све́ту, покажи́ и от про́пасти пре́лести изба́ви.

Крести́телю Спа́сов Иоа́нне, моли́ Бо́га о нас.

Я́ко бе́здну во струя́х ре́чных погрузи́в, бе́здну изсуши́ мои́х страсте́й, подая́ ми слез исто́чник, Предте́че пропове́дниче Христо́в.

Крести́телю Спа́сов Иоа́нне, моли́ Бо́га о нас.

От неду́г душе́вных и страсте́й плотски́х, жития́ напа́стей и вся́ких искуше́ний и скорбе́й спаси́ мя, Госпо́день Предте́че.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ма́терь Бо́жию и до́брую в жена́х молю́ Тя приле́жно: не пре́зри мене́, Чи́стая, но уще́дри и от вся́каго вре́да це́ла соблюди́.

Песнь 7

Ирмос: Су́щим в пещи́ отроко́м Тво и́м, Спа́се, не прикосну́ся ниже́ стужи́ огнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бог оте́ц на́ших.

Поми́луй мя, Бо́же, поми́луй мя.

Терпе́нию извы́че И́ов и пребы́сть все́ми прило́ги лука́ваго непреклони́мь, я́коже столп до́блественный.

Сему́ ревну́й всегда́, о душе́, и ника́коже уныва́й в лю́тых.

Поми́луй мя, Бо́же, поми́луй мя.

Теле́сными победи́хся сластьми́ и бых безслове́сен, сый слове́сен; Сло́ве Бо́жий, И́же сло́вом блудни́цу спасы́й, спаси́ мя окая́ннаго, да пою́ благословя́ Твою́ благосты́ню.

Крести́телю Спа́сов Иоа́нне, моли́ Бо́га о нас.

Я́ко ве́тхому и но́вому быв, преизя́щне, сла́вный хода́тай, Крести́телю, хода́тайствуй, обетша́вшаго грехми́ всего́ обнови́ти мя, обнови́теля вся́ческих моля́ Иису́са.

Крести́телю Спа́сов Иоа́нне, моли́ Бо́га о нас.

Законополага́я покая́ние, на земли́ яви́лся еси́, Предте́че Христо́в и Крести́телю, его́же соверши́ти всех укрепи́ моли́твами твои́ми, я́ко да изба́вимся от безме́рных зол, я́же согреша́ем при́сно.

Крести́телю Спа́сов Иоа́нне, моли́ Бо́га о нас.

Ты тесны́й проше́л еси́ путь, воздержа́ние вся́ко проходя́ му́дре, и широто́ю боговиде́ний све́тлых весь озари́вся: и́хже наслади́тися и нам да́руй, Христа́ моля́.

Сла́ва Отцу́ и Сы́ну и Свято́му Ду́ху.

Троичен: Еди́но естество́ Тро́ицу ве́рнии сла́вим: Безнача́льнаго Отца́ и Сы́на и Ду́ха а́бие, еди́но ца́рствующее Существо́, еди́но Госпо́дьство, еди́но Нача́ло и Живо́т, животворя́щий нас.

И ны́не и при́сно и во ве́ки веко́в. Ами́нь.

Богородичен: Мольбу́, Пречи́стая, Бо́гу принеси́, я́ко да пре́зрит на́ша прегреше́ния и безчи́сленныя грехи́ и ве́чнаго свободи́т нас огня́ му́чащаго.

Песнь 8

Ирмос: Его́же ужаса́ются а́нгели и вся во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся ве́ки.

Поми́луй мя, Бо́же, поми́луй мя.

На́га мя соде́ла вся́ческих доброде́телей зми́й льсти́вый злы́м сове́том: ри́зою доброде́телей украси́ мя ны́не, обнажи́вый, Спа́се мой, сего́ зло́бы.

Поми́луй мя, Бо́же, поми́луй мя.

Хотя́й приити́ суди́ти ро́ду челове́ческому, Суди́е пра́ведный, в час стра́шный осужде́на су́ща, не посли́ мене́ во огнь гее́нский, но уще́дри и спаси́ мя.

Крести́телю Спа́сов Иоа́нне, моли́ Бо́га о нас.

Еди́н па́че все́х согреши́х на земли́ ро́ждшихся, еди́н бых престу́пник Твои́х зако́нов, Го́споди: те́мже Предте́чи ра́ди уще́дри и спаси́ мя.

Крести́телю Спа́сов Иоа́нне, моли́ Бо́га о нас.

А́нгел нра́вы яви́лся еси́, Крести́телю Иоа́нне, Сове́та Вели́каго А́нгела пропове́даяй конце́м: те́мже тя песньми сла́вим во вся ве́ки.

Крести́телю Спа́сов Иоа́нне, моли́ Бо́га о нас.

Во главу́ усе́чен был еси́ без пра́вды, блаже́нне, погрузи́вый главу́ Христо́ву в вода́х. Укрепи́ всех нас моли́твами твои́ми, главу́ попира́ти льсти́ваго воистинну губи́тельную.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Изба́ви мя безме́стных грехо́в, и пла́меннаго томле́ния, и тьмы́ му́чащия, скре́жета зу́бнаго и че́рвия, Де́во, еди́на предста́тельнице ро́ду челове́ческому.

Песнь 9

Ирмос: Светоно́сный о́блак, во́ньже всех Влады́ка я́ко дождь с небесе́ на руно́ сни́де и воплоти́ся нас ра́ди, быв Челове́к, Безнача́льный, велича́ем вси я́ко Ма́терь Бо́га на́шего Чи́стую.

Поми́луй мя, Бо́же, поми́луй мя.

Се вре́мя покая́ния и чи́ста де́лания, се день све́тла соде́лай дела́: бежи́ тьмы страсте́й, отжени́ сон зла́го уны́ния, душе́ моя́, я́ко да бу́деши боже́ственнаго све́та прича́стна.

Поми́луй мя, Бо́же, поми́луй мя.

Я́ко мыта́рь воздыха́ю, я́ко блудни́ца слезю́ и я́ко разбо́йник вопию́ Ти: помяни́ мя, Ще́дре, и я́ко блу́дный сын взыва́ю: согреши́х, припа́даю Ти я́ко ханане́а: ми́лостиве, не пре́зри мене́, Христе́.

Крести́телю Спа́сов Иоа́нне, моли́ Бо́га о нас.

Се свети́льник сия́я су́щим во тьме́ жития́, се доброглаго́ливая ла́стовица, весну́ всем возвеща́ющая, Христо́в вели́кий Предте́ча, хода́тай ве́тхому и но́вому: его́же моли́твами да сохранимся при́сно.

Крести́телю Спа́сов Иоа́нне, моли́ Бо́га о нас.

Я́ко жениху́ тя дру́га ны́не предлага́ю моли́твенника, име́яй мно́жество грехо́в, и вопию́ ти, Крести́телю: отсече́ние ми долго́в, преблаже́нне, пода́ждь, и возжзи́ души́ моея́ свети́льник, уга́сший ле́ностию до конца́.

Крести́телю Спа́сов Иоа́нне, моли́ Бо́га о нас.

Со безпло́тными А́нгелы, с честны́ми Апо́столы, со страстоте́рпцы свяще́нными и со проро́ки, Предте́че, Преблага́го моли́ всегда́, улучи́ти нам благ ве́чных, обога́щшимся всегда́ тобо́ю, предста́телем благи́м.

Крести́телю Спа́сов Иоа́нне, моли́ Бо́га о нас.

Ла́стовице кра́сная, сла́вие честны́й, го́лубе предо́брый, пустынелю́бная го́рлице, Госпо́день Крести́телю, пусты́нное прозябе́ние, запусте́вшую безпло́дием ду́шу мою́ покажи́ плодоно́сну до́брым.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Но́сиши Нося́щаго вся́ческая, я́коже Престо́л херуви́мский, и пита́еши Пита́ющаго на́с: Его́же непре́станно моли́, Богора́дованная Чи́стая, тру́са, паде́жа, плене́ния и вся́кия ну́жды Твоему́ ста́ду изба́витися при́сно.