В субботу

Канон святым мученикам, иерархам, преподобным и об усопших, глас 7-й

Песнь 1

Ирмос: Поспе́шествовавшему Бо́гу во Еги́пте Моисе́ови извести́ Израиля, Тому́ еди́ному пои́м: я́ко просла́вися.

Вси святи́и, моли́те Бо́га о нас.

Лик му́ченик нельсти́вых, вся пре́лести победи́в борца́, лику́ет ра́дуяся пред лице́м Созда́вшаго и́.

Вси святи́и, моли́те Бо́га о нас.

Святи́телие Христо́вы и преподо́бнии вси подви́гшиися, сла́дости сподо́бишася ве́чныя благо да́тию.

Вси святи́и, моли́те Бо́га о нас.

Изба́ви нас, Христе́, от вся́кия я́рости моле́нием проро́к, и преподо́бных, и жен свяще́нных, и спаси́ ду́ши на́ша.

Сла́ва Отцу́ и Сы́ну и Свято́му Ду́ху.

Об усопших: Созда́вый мя от земли́, Слове, в зе́млю па́ки возврати́тися ми повеле́л еси́; упоко́й, и́же в ве́ре преста́вил еси́.

И ны́не и при́сно и во ве́ки веко́в. Ами́нь.

Богородичен: Пречи́стая Ма́ти, Я́же Бо́га Пресвято́е Сло́во Ро́ждшая, освяти́ вся, любо́вию Тя сла́вящия.

Песнь 3

Ирмос: Небеса́ утверди́вый сло́вом и земно́е основа́ние укрепи́вый на вода́х мно́гих, утверди́ мой ум в во́лю Твою́, Человеколю́бче.

Вси святи́и, моли́те Бо́га о нас.

Сокруша́еми ка́мением и в ров вмета́еми, сокруши́сте всю льсти́ваго си́лу и не сокруше́нии умо́м, му́ченицы, пребы́сте.

Вси святи́и, моли́те Бо́га о нас.

Заре́ю боже́ственных уче́ний и доброде́телей луча́ми, прему́дрии святи́телие, ве́рныя просвеща́юще, и ересе́й мглу всю отгна́сте.

Вси святи́и, моли́те Бо́га о нас.

Умертви́вшеся ми́ру преподо́бнии Твои́, Сло́ве, преми́рную вои́стинну жизнь насле́доваша: и́хже ра́ди, Ще́дре, всех нас уще́дри.

Сла́ва Отцу́ и Сы́ну и Свято́му Ду́ху.

Об усопших: О преста́вльшихся в ве́ре и наде́жди мо́лимся вси́ бла́гому Влады́це, поми́ловати их в час суда.

И ны́не и при́сно и во ве́ки веко́в. Ами́нь.

Богородичен: Не истощи́в не́др О́тчих, Сло́во во не́дрех Твоих, Пречи́стая, Младе́нец держи́мь яви́ся, нача́ло от Тебе́ прие́м Безнача́льный.

Песнь 4

Ирмос: Плотско́е прише́ствие Твое́, Христе́, уверя́я, проро́к Авваку́м взыва́ше: Сла́ва си́ле Твое́й, Го́споди.

Вси святи́и, моли́те Бо́га о нас.

Укрепля́еми е́же ко Го́споду любо́вию му́ченицы, обнемощи́ша вра́жию си́лу: те́мже ублажа́ются.

Вси святи́и, моли́те Бо́га о нас.

Я́ко овча́та Па́стыря и а́гнцы, блаже́ннии иера́рси, слове́сному ста́ду предста́сте боже́ственною Благо да́тию.

Вси святи́и, моли́те Бо́га о нас.

Многосве́тлыя я́ко зве́зды, доброде́тели све́тлостию озари́сте ве́рных исполне́ние, преподо́бнии отцы́ на́ши.

Сла́ва Отцу́ и Сы́ну и Свято́му Ду́ху.

Святым женам и пророкам: Еди́нственное торжество́ кре́пких жен и сосло́вие святы́х проро́к улучи́ша небе́сныя бла́гости.

И ны́не и при́сно и во ве́ки веко́в. Ами́нь.

Богородичен: Моли́, Его́же родила́ еси́ Сы́на, Всепе́тая, искуше́ний вся́ческих и скорбе́й изба́витися рабо́м Твои́м.

Песнь 5

Ирмос: У́тренюет дух мой к Тебе́, Бо́же, зане́ Свет еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Вси святи́и, моли́те Бо́га о нас.

О я́звах плотски́х неради́вше, кре́пцыи страда́льцы, и я́звы всех исцеля́ете и стра́сти, боже́ственными ва́шими я́звами.

Вси святи́и, моли́те Бо́га о нас.

Прия́сте вла́сть реши́ти и вяза́ти на земли́, святи́телие Христо́вы: те́мже на́ша грехо́вные плени́цы нереши́мыя разреши́те.

Вси святи́и, моли́те Бо́га о нас.

Умо́м чи́стым Бо́гу соедини́вшеся, ли́цы по́стничестии, проро́к, и пра́ведных, и жен честны́х лику́ют, ра́дующеся ликова́нием неразори́мым.

Сла́ва Отцу́ и Сы́ну и Свято́му Ду́ху.

Об усопших: Яко еди́н сый Многоми́лостив, ве́рою, Христе́, преста́вленныя от жития́ рая́ сотвори́ жи́тели, Человеколю́бче.

И ны́не и при́сно и во ве́ки веко́в. Ами́нь.

Богородичен: Черто́г неразори́м я́вльшися Бо́гу, моли́ Того́, Всесвя́тая Де́во, черто́га мя мы́сленнаго жи́теля соде́лати.

Песнь 6

Ирмос: Ио́на из чре́ва а́дова вопия́ше: возведи́ от тли живо́т мо́й. Мы же Тебе́ вопие́м: Всеси́льне Спа́се, поми́луй нас.

Вси святи́и, моли́те Бо́га о нас.

Низложи́сте вра́жия возвыше́ния, возвыша́еми к Бо́гу в страда́ниих, всесла́внии ору́жницы, и гра́ждане небе́снии бы́сте.

Вси святи́и, моли́те Бо́га о нас.

Ересе́й зи́му отгоня́юще, Христо́вы и́стиннии святи́телие, к весне́ и́стинней мно́жество благочести́вых приведо́ша.

Вси святи́и, моли́те Бо́га о нас.

Кре́постию Твое́ю, Христе́, преподо́бных мно́жество, и проро́к, и жен святы́х оправда́шася и незаходи́маго Све́та наслажда́ются.

Сла́ва Отцу́ и Сы́ну и Свято́му Ду́ху.

Об усопших: Преста́вил еси́, Ще́дре, от вре́менных рабы́ Твоя́; но сия́ ве́чнаго весе́лия и живота́ и́стиннаго прича́стники сподо́би.

И ны́не и при́сно и во ве́ки веко́в. Ами́нь.

Богородичен: Освяти́, все свята́я Де́во, рабы́ Твоя́, Пресвято́е Сло́во пло́тию ро́ждшая, Его́же пое́т вся́кое дыха́ние, освяща́ющи.

Песнь 7

Ирмос: В пещи́ су́ще халде́йстей, авраа́мстии о́троцы ликова́ху со А́нгелом, глаго́люще: оте́ц на́ших Бо́же, благослове́н еси́.

Вси святи́и, моли́те Бо́га о нас.

Тече́нии кро́вными, страстоте́рпцы, нече́стия угаси́ша пла́мень, пою́ще: оте́ц на́ших Бо́же, благослове́н еси́.

Вси святи́и, моли́те Бо́га о нас.

Иера́рхи восхваля́ем, просвети́тели ми́ра бы́вшия, пою́ще: оте́ц на́ших Бо́же, благослове́н еси.

Вси святи́и, моли́те Бо́га о нас.

Песньми да почту́тся про́рок и преподо́бных святы́й собо́р, пою́щих: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Об усопших: Изба́ви гее́нны, я́же прия́л еси, Христе́ ще́дрый, ве́рныя рабы́ Твоя́, вопию́щия: отец на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Яко А́нгел честне́йшую, Богоро́дицу песносло́вим, вопию́ще: оте́ц на́ших Бо́же, благослове́н еси.

Песнь 8

Ирмос: В пещи́ о́троки подража́юще, духо́вную ро́су прие́мшии, ве́рою зове́м: благослови́те, дела́ Госпо́дня, Го́спода.

Вси святи́и, моли́те Бо́га о нас.

Хра́мы и́дольския разверго́сте, всесла́внии, и хра́мы созда́сте себе́ Ду́ху, страстоте́рпцы, хра́брски тече́ние сконча́вше.

Вси святи́и, моли́те Бо́га о нас.

Яви́стеся яко цве́ти благоуха́ннии, святи́телие, ра́зумом ду́ши ве́рных веселя́ще благоче́стия: те́мже досто́йно блажи́ми есте́.

Вси святи́и, моли́те Бо́га о нас.

Зе́млю всю проше́дше, преподо́бнии, и Бо́жии прише́льцы проро́цы бы́сте, вы́шнее соблюда́юще наслажде́ние и сла́ву при́сно пребыва́ющую.

Сла́ва Отцу́ и Сы́ну и Свято́му Ду́ху.

Об усопших: Яко живы́х и ме́ртвых, Сло́ве Господи, иже ве́рою усо́пшия рабы́ Твоя́, лико́м сочета́й спаса́емых всех, яко Еди́н Человеко лю́бец.

И ны́не и при́сно и во ве́ки веко́в. Ами́нь.

Преподобным женам и Богородице: Жен всех сосло́вие, посто́м и страда́нием взыска́вших Го́спода, мо́лится непреста́нно боже́ственному лицу́ Твоему́, Пречи́стая.

Песнь 9

Ирмос: Па́че естества́ Ма́терь и по естеству́ Де́ву, еди́ну в жена́х Благослове́нную, песньми ве́рнии Богоро́дицу велича́ем.

Вси святи́и, моли́те Бо́га о нас.

Свяще́нных му́ченик, и проро́к, и пра́ведных, от ве́ка до́бре жи́вших, моли́твами их, Христе́, ду́ши на́ша поми́луй.

Вси святи́и, моли́те Бо́га о нас.

Яко служи́тели Влады́це, священнотаи́нницы я́вльшеся, совокупи́стеся слуга́м небе́сным: с ни́миже о нас моле́ния принеси́те.

Вси святи́и, моли́те Бо́га о нас.

С жена́ми блаже́нное сконча́вшия тече́ние, почти́м по́стническия ли́ки святы́я: яко да тех моли́твами улучи́м свяще́ние.

Сла́ва Отцу́ и Сы́ну и Свято́му Ду́ху.

Об усопших: Ея́же сподо́бишася сла́вы святы́х всех ликостоя́ния, Христе́, преста́вленныя сподо́би причасти́тися, православно́ Тебе́ послужи́вшия.

И ны́не и при́сно и во ве́ки веко́в. Ами́нь.

Богородичен: Грехолюби́в сый, суди́ща стра́шнаго трепе́щу Ро́ждшагося из Тебе́, Чи́стая, в не́мже мя, яко Блага́я, неосужде́на соблюди́.