Чин молитвеннаго утешения сродников живот свой самовольне скончавшаго

Иерей начинает: Благосло́вен Бог наш, всегда́, ны́не и при́сно и во ве́ки веко́в. Ами́нь.

Чтец: Святы́й Бо́же, Святы́й Кре́пкий, Святы́й Безсме́ртный, поми́луй нас (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Аллилу́иа, глас 6

Лик: Аллилу́иа, аллилу́иа, аллилу́иа.

Чтец, стих 1: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Лик: Аллилу́иа, аллилу́иа, аллилу́иа.

Чтец, стих 2: Помилу́й мя, Го́споди, я́ко не́мощен есмь.

Лик: Аллилу́иа, аллилу́иа, аллилу́иа.

Тропари:

Поми́луй нас, Го́споди, поми́луй нас, вся́каго бо отве́та недоуме́юще, сию́ Ти моли́тву, я́ко Влады́це, гре́шнии приносим: поми́луй нас.

Сла́ва Отцу́ и Сы́ну и Свято́му Ду́ху.

Го́споди, поми́луй нас, на Тя бо упова́хом; не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враг на́ших; Ты бо еси Бог наш, и мы лю́дие Твои́, вси дела́ руку́ Твое́ю, и и́мя Твое́ призыва́ем.

И ны́не и при́сно и во ве́ки веко́в. Ами́нь.

Милосе́рдия две́ри отве́рзи нам, благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да христиа́нскаго.

Чтец:

Псалом 50

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю, и грех мой предо мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н: се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

И абие антифон, глас 3:

Стих: Поми́луй нас, Го́споди, поми́луй нас, я́ко помно́гу испо́лнихомся уничиже́ния.

О́тче Небе́сный, Любвеоби́льне, Человеколю́бче, Ми́лостиве: ми́лостив, ми́лостив бу́ди нам, о, вся Объе́млющий и всех Прие́млющий!

Стих: Рече́ безумен в се́рдце свое́м: несть Бог.

Сла́ва Отцу́ и Сы́ну и Свято́му Ду́ху.

Егда́, Судие́, ся́деши я́ко Благоутро́бен, и пока́жеши стра́шную сла́ву Твою́, Спа́се: о, каковы́й страх тогда́, пещи́ горя́щей, всем боя́щимся нестерпи́маго суди́ща Твоего́!

И ны́не и при́сно и во ве́ки веко́в. Ами́нь.

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты нам помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.

Го́споду помо́лимся.

Го́споди, поми́луй.

Молитва

Влады́ко, Го́споди, Ми́лостивый и Человеколюби́вый, к Тебе́ взыва́ем: согреши́хом и беззако́нновахом пред Тобо́ю, преступи́хом спаси́тельныя Твоя́ за́поведи и любве́ ева́нгельския отча́явшемуся бра́ту на́шему (отча́явшейся сестре́ на́шей) не яви́хом. Но не я́ростию Твое́ю обличи́ ны, ниже́ гне́вом Твои́м накажи́ ны, Человеколю́бче Влады́ко, осла́би, исцели́ серде́чную скорбь на́шу, да победи́т мно́жество щедро́т Твои́х грехо́в на́ших бе́здну, и Твоея́ безчи́сленныя бла́гости пучи́на да покры́ет го́рькое слез на́ших мо́ре.

Ей, Иису́се Сладча́йший, еще́ мо́лимтися, пода́ждь рабо́м Твои́м, сро́дником живо́т свой самово́льне сконча́вшаго, в ско́рби их утеше́ние и на ми́лость Твою́ тве́рдое упова́ние.

Я́ко Ми́лостив и Человеколю́бец Бог еси́, и Тебе́ сла́ву возсыла́ем со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.

Прему́дрость.

Пресвята́я Богоро́дице спаси́ нас.

Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

И́менем Госпо́дним благослови́, о́тче.

Обычный (малый) отпуст.

Молитва преподобного Льва Оптинского для келейного чтения

Взыщи́, Го́споди, поги́бшую ду́шу раба́ Твоего́ (имя): а́ще возмо́жно есть, поми́луй. Неизсле́димы су́дьбы Твои́. Не поста́ви мне в грех моли́твы сей мое́й, но да бу́дет свята́я во́ля Твоя́.