Канон о умерших без покаяния
Канон преподобному Паисию Великому, о избавлении от муки без покаяния умерших, глас 6
Песнь 1
Ирмо́с: Помо́щник и Покрови́тель бысть мне во спасе́ние, Сей мой Бог, и просла́влю Его́, Бог отца́ моего́, и вознесу́ Его́, сла́вно бо просла́вися.
Припе́в: Преподо́бне о́тче Паи́сие, моли́ Бо́га о нас.
И́же вся умудря́ющему Бо́гу моли́ся, преподо́бне о́тче, о рабе́ свое́м, да отве́рзет ми устне́ недосто́йнии и дви́гнет ми язы́к недоуме́нный, тесноту́ же и худогла́сие, о́тче, разве́рзи благода́тию, и́же в тебе́ Свята́го Ду́ха, к пе́нию чуде́с твои́х.
Преподо́бне о́тче Паи́сие, моли́ Бо́га о нас.
Начну́ у́бо достохва́льное и душеполе́зное житие́ твое́ от младе́нства, и́же дре́вле Еги́пет вели́каго во проро́цех произнесе́ Моисе́я, и́же к Бо́гу присвое́нием и вели́кими чудесы́ просла́вися, та́ко и ны́не втори́цею просла́влен показа́ся Еги́пет тебе́ ра́ди, о́тче Паи́сие, честны́м и́менем твои́м и мно́гими доброде́тельми обогати́ся, е́же дарова́ тебе́ Госпо́дь, Его́же моли́, да спасе́т ду́ши на́ша.
Сла́ва Отцу́ и Сы́ну и Свято́му Ду́ху.
В Ца́рство Небе́сное вшед у́зким путе́м и приско́рбным по за́поведи Влады́ки своего́, Христа́, преподо́бне о́тче Паи́сие, широ́кий и простра́нный путь возненави́дев, распростра́ньшийся мрак ума́ моего́ отжени́, да возмогу́ ма́лое мое́ моле́ние принести́ в пречестну́ю па́мять твою́.
И ны́не и при́сно и во ве́ки веко́в. Ами́нь.
Богоро́дичен: Дух сокруше́н пода́ждь ми, Блага́я, смире́нно се́рдце, уму́ же чистоту́ и житию́ исправле́ние и прегреше́нием оставле́ние.
Песнь 3
Ирмо́с: Утверди́, Го́споди, на ка́мени за́поведей Твои́х подви́гшееся се́рдце мое́, я́ко Еди́н Свят еси́ и Госпо́дь.
Преподо́бне о́тче Паи́сие, моли́ Бо́га о нас.
Ка́меню ве́ры – Петру́ апо́столу уподо́бился еси́, распя́тся ми́рови во всей жи́зни свое́й, преподо́бне Паи́сие, и но́зе свои́ невозвра́тно к небе́сному ше́ствию упра́вил еси́, и Го́рняго Иерусали́ма дости́гл еси́, со святы́ми предстоя́ Святе́й Тро́ице, моли́ о мне Еди́наго Блага́го Человеколю́бца.
Преподо́бне о́тче Паи́сие, моли́ Бо́га о нас.
Благочести́ваго ко́рене пресве́тлая о́трасль, тебе́ избра́ Госпо́дь, а́нгел рече́ ма́тери твое́й: сей Бо́гу уго́ден. Ты же, от младе́нства крест свой взем, невозвра́тным путе́м Тому́ после́дова, и возраста́ше ле́ты и ра́зумом, ку́пно и благода́тию Бо́жиею. Моли́ да́ти ми отпуще́ние грехо́в.
Сла́ва Отцу́ и Сы́ну и Свято́му Ду́ху.
О Влады́ко Го́споди, Иису́се Христе́, кто не удиви́тся Твоему́ человеколю́бию, егда́ прии́де жела́ние преподо́бному и́ноческое житие́ получи́ти к де́ланию за́поведей Твои́х, Твое́ю благода́тию, я́ко а́гнец непоро́чен, изведе́ся в пусты́ню, и дости́же слове́сных ове́ц, и введе́ся к па́стырю, блаже́нному Па́мве, и облече́ся в и́ноческий о́браз, в не́мже утверди́ и мене́, Го́споди, моли́твами преподо́бнаго Паи́сия, к де́ланию за́поведей Твои́х.
И ны́не и при́сно и во ве́ки веко́в. Ами́нь.
Богоро́дичен: Лю́тых мя мук, и тьмы кроме́шныя, и гее́нны Твои́ми моли́твами свободи́, Де́во, и́маши бо во́лю и си́лу, Го́спода ро́ждшая Еди́наго Преблага́го.
Седален, глас 2-й
Ду́шу связа́в любо́вию Христо́вою и земна́я возненави́дев вся, му́дре, водвори́лся еси́, о́тче преподо́бне, в пусты́нях и гора́х, ра́зумнаго дре́ва вкуси́в, сла́вне, а́нгельски просия́л еси́. Те́мже и мрак проше́д пло́ти своея́, тьму отгна́л еси́ бесо́в, Паи́сие, и́нокующим пе́рвый, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ско́рый покро́в, и по́мощь, и ми́лость покажи́ на рабе́ Свое́м, Чи́стая, и во́лны укроти́ су́етных помышле́ний, и па́дшую мою́ ду́шу возста́ви, Богоро́дице, вем бо, вем, я́ко мо́жеши, ели́ко хо́щеши.
Песнь 4
Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слух Твой и убоя́хся, сла́ва си́ле Твое́й, Го́споди.
Преподо́бне о́тче Паи́сие, моли́ Бо́га о нас.
Законострада́льческое житие́ от мя́гких ногте́й восприе́м, богому́дре Паи́сие, да́же до конца́ пребы́л еси́, я́ко боже́ственен до́блественник, вене́ц прия́л еси́ побе́ды от всех Ца́рствующаго, моли́твами свои́ми избавля́ти от му́ки гре́шники, от ни́хже пе́рвый есмь аз, не забу́ди мене́.
Преподо́бне о́тче Паи́сие, моли́ Бо́га о нас.
Иму́ще тя моли́твенника кре́пка, блаже́нне Паи́сие, и обе́щника печа́льным, предста́теля, и побо́рника, и хода́тая благоче́стна, от вся́ких спаса́емся бед, напа́стей и обстоя́ний.
Сла́ва Отцу́ и Сы́ну и Свято́му Ду́ху.
Ве́лию суде́б бе́здну име́яй, Той тебе́ рече́: се бо даю́ ти дар, да вся, е́же про́сиши от Отца́ Моего́ во и́мя Мое́, да́стся тебе́, о ко́ем-ли́бо гре́шнице помо́лишися, оста́вятся греси́ того́: сего́ ра́ди припа́даю тебе́, о́тче Паи́сие, име́я бе́здну согреше́ний, да отпу́стит твои́ми моли́твами, И́же тебе́ обетова́, я́ко Благ и Человеколю́бец.
И ны́не и при́сно и во ве́ки веко́в. Ами́нь.
Богоро́дичен: Глаго́л провеща́й, егда́ пра́во и́мам суди́тися, Богороди́тельнице, к Сы́ну Твоему́, Пренепоро́чная, да обря́щу Тя тогда́ прибе́жище и заступле́ние, мук всех избавля́ющи.
Песнь 5
Ирмо́с: От нощи у́треннююща, Человеколю́бче, просвети́, молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.
Преподо́бне о́тче Паи́сие, моли́ Бо́га о нас.
Посто́м удруча́я те́ло свое́, о́тче Паи́сие, иногда́ по причаще́нии Те́ла и Кро́ви Христо́вы, я́ко а́нгел се́дмьдесят дней без пи́щи теле́сныя пребы́л еси́, боже́ственную держа́ву неизрече́нную име́я, и возмо́г в себе́ живо́тную содержа́ти си́лу благода́тию, па́че пи́щнаго укрепле́ния, сла́ва держа́ве Твое́й, Го́споди.
Преподо́бне о́тче Паи́сие, моли́ Бо́га о нас.
Я́ко Иоа́нн Крести́тель, у́зким и приско́рбным путе́м ходи́ти произво́лил еси́, но той на Иорда́не, узре́в Зижди́теля своего́, устраши́ся и вопия́ше: не сме́ю приступи́ти, се́но, Огню́; ты же, о́тче Паи́сие, в пусты́ни иногда́ я́вльшагося Го́спода, не моги́й пречи́стаго лица́ Его́ зре́ти, паде́, тре́петом одержи́м. Он же ти рече́: не устраша́йся, сию́ пусты́ню напо́лню спо́стники тебе́. С ни́миже мо́лим тя, о́тче, не забу́ди нас, моли́твенник твои́х, поми́лованным быти.
Сла́ва Отцу́ и Сы́ну и Свято́му Ду́ху.
Аз бо в нача́ле моя́ пред Тобо́ю зрю согреше́ния и о мои́х беззако́ниих молю́ Твое́ милосе́рдие, да прости́ши и покры́еши благоутро́бием Твои́м мно́жество грехо́в мои́х, и даждь ми про́чее жи́зни сея́ вре́мя безгре́шно проводи́ти, да, удо́бь на спасе́ния стезю́ поте́к, безпреткнове́нно к до́брому концу́ дости́гну Твое́ю по́мощию, кроме́ бо Твоея́ по́мощи и наставле́ния ничто́же соверши́ти и ми́лость у Тебе́ получи́ти кто мо́жет.
И ны́не и при́сно и во ве́ки веко́в. Ами́нь.
Богоро́дичен: Ра́бское приношу́ Ти моле́ние, неразу́мный аз, и к Твоему́ прибега́ю благоутро́бному милосе́рдию, не отврати́ мене́, Чи́стая, посра́млена.
Песнь 6
Ирмо́с: Возопи́х всем се́рдцем мои́м к Ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.
Преподо́бне о́тче Паи́сие, моли́ Бо́га о нас.
Безду́шная тварь, Иорда́н, своего́ Творца́ устыде́ся, вопия́ше: не могу́ Безгре́шнаго омы́ти. Святы́й же, ви́де Го́спода, прие́м во́ду, прикосну́ся Неприкоснове́нному, умы́ но́зе Его́ и, пив во́ду, прия́ дар цели́ти неду́ги и прогони́ти от челове́к бе́сы. Сего́ ра́ди и мы припа́даем тебе́, о́тче: моли́твами твои́ми поми́луй нас от вся́ких бесо́вских наведе́ний.
Преподо́бне о́тче Паи́сие, моли́ Бо́га о нас.
По сло́ву Го́спода на́шего Иису́са Христа́, обрето́хом тя, о́тче Паи́сие, вели́кое прибе́жище и засту́пника и те́пла моли́твенника о гресе́х на́ших, я́коже пе́рвее не отве́рже и́нока преста́вльшася и христиа́нства отчужди́вшася, и во глуби́ну а́дову па́губным безве́рием низве́дся, и, егда́ ощути́вся, прите́кша к тебе́, да умо́лиши Всеми́лостиваго. Ще́дрый же Госпо́дь яви́ся тебе́ и глаго́ла: уго́дниче Мой, добро́ есть Мое́й любви́ подо́бяся, пече́шися о гре́шных, изво́ляй му́ки прия́ти за их избавление.
Преподо́бне о́тче Паи́сие, моли́ Бо́га о нас.
Принесе́ся моли́тва твоя́ и сле́зы к Бо́гу, я́ко благово́нный фимиа́м и же́ртва непоро́чна и благоприя́тна, и мене́ не забу́ди хода́тайством тво́им ко Пресвяте́й Богоро́дице, сле́зы умиле́ния да́ти ми, омы́й грехо́в мои́х бе́здну, изба́ви мя от сме́ртныя глубины́ и ненаде́ющимся пода́ждь ве́лию ми́лость и прости́ им согреше́ния.
Сла́ва Отцу́ и Сы́ну и Свято́му Ду́ху.
Весь недоуме́нием одержи́м есмь, егда́ прииму́ во уме́ той час стра́шный испыта́ния Судии́ и Бо́га, и пла́чуся, и се́тую, и рыда́ю, помина́я бе́здну зол мои́х. Те́мже спаси́, Человеколю́бче, моли́твами Твоего́ уго́дника преподо́бнаго Паи́сия и изба́ви мя му́ки, я́ко Благоутро́бен.
И ны́не и при́сно и во ве́ки веко́в. Ами́нь.
Богоро́дичен: От се́рдца стена́ния приноша́ю Ти, Пренепоро́чная, Твое́ прося́ благопребы́тное заступле́ние. Поми́луй всестра́стную мою́ ду́шу, умилосе́рдися, Ма́ти Многоми́лостиваго Бо́га, изба́вити мя суда́ и е́зера о́гненнаго.
Кондак, глас 2-й
Жите́йских молв оста́вль, безмо́лвное житие́ возлюби́л еси́, Крести́телю подо́бяся все́ми о́бразы, с ни́мже тя почита́ем, о́тче отце́в Паи́сие.
Икос
Христо́в глас услы́шав, ше́ствовал еси́ восле́д Того́ за́поведей, наг жития́ быв, отве́рг попече́ния, и вся стяжа́ния, и име́ния, и бра́тий свои́х, и любве́ ма́тере, богоно́се Паи́сие, еди́н в пусты́нях Бо́гови бесе́дуя ра́зумом, дарова́ния прия́л еси́, е́же ми посли́ в пе́снех пою́щему, отце́в нача́льниче, Паи́сие.
Песнь 7
Ирмо́с: Согреши́хом, беззако́нновахом, непра́вдовахом пред Тобо́ю, ниже́ соблюдо́хом, ниже́ сотвори́хом, я́коже запове́дал еси́ нам, но не преда́ждь нас до конца́, отце́в Бо́же.
Преподо́бне о́тче Паи́сие, моли́ Бо́га о нас.
Многи́х грехо́в испо́лнен аз, и твоя́ моли́тва, я́ко кади́ло благово́нно испра́вися, о́тче, бе́здну грехо́в мои́х потреби́, и бушу́ющее мо́ре зла́го жития́ изсуши́, и напое́ние гне́вное отжени́, и целому́дренный ум моли́твами твои́ми утверди́, о́тче Паи́сие.
Преподо́бне о́тче Паи́сие, моли́ Бо́га о нас.
Наста́вника тя и моли́твенника те́пла иму́ще, и ско́раго помо́щника, я́ко сте́ну тве́рду и забра́ло недви́жимо, и воево́ду кре́пка и непобеди́ма, мо́лим тя: не забу́ди моли́твенник твои́х, избавля́я от вся́кия печа́ли и наве́т вра́жиих.
Преподо́бне о́тче Паи́сие, моли́ Бо́га о нас.
О чу́до ве́лие, во еди́н от дней седя́щу ти, о́тче Паи́сие, в пеще́ре, бысть ти глас глаго́ляй: мир тебе́, возлю́бленному Моему́ уго́днику. Ты же, возста́в со стра́хом и тре́петом одержи́м, паде́, поклони́ся и рече́: се раб Твой, Го́споди. Сего́ ра́ди мо́лим тя: моли́ Человеколю́бца, да спасе́т ду́ши на́ша.
Сла́ва Отцу́ и Сы́ну и Свято́му Ду́ху.
Даждь ми, Христе́, ра́зум и терпе́ние, е́же не осужда́ти согреша́ющих с киче́нием фарисе́йским, но я́ко мытаре́во покая́ние приими́ и, я́ко блу́днаго сы́на, Бо́же, ве́чери Твоея́ досто́йна мя яви́, моли́твами преподо́бнаго Паи́сия, и грехо́в проще́ние ми да́руй.
И ны́не и при́сно и во ве́ки веко́в. Ами́нь.
Богоро́дичен: Возни́кни, о стра́стная душе́, возста́ни, окая́нная, бий из глубины́ в пе́рси и испусти́ слез исто́чники, да тя поми́лует, окая́нную, Милосе́рдая Ма́ти Христа́ Бо́га.
Песнь 8
Ирмо́с: Его́же во́инства небе́сная сла́вят и трепе́щут херуви́ми и серафи́ми, вся́ко дыха́ние и тварь, по́йте, благослови́те и превозноси́те во вся ве́ки.
Преподо́бне о́тче Паи́сие, моли́ Бо́га о нас.
Благода́рно приноси́мое тебе́ пе́ние сие́ не пре́зри, о́тче Паи́сие, но па́че приими́ и ра́дости духо́вныя испо́лни, да без закосне́ния поклоню́ся твоему́ о́бразу, иде́же есть напи́сан, исцеле́ния всем подава́ющ.
Преподо́бне о́тче Паи́сие, моли́ Бо́га о нас.
Всепреподо́бному житию́ поревнова́в богоуго́дных оте́ц, и́же от ве́ка пожи́вших, о́тче Паи́сие, во смире́нии и по́стничестве Христа́ ра́ди всю жизнь свою́ му́ченически сконча́л еси́, и от бесо́в нападе́ния много претерпе́л еси́, и сих победи́в. Сего́ ра́ди молю́ тя, о́тче: бу́йство, я́рость и небреже́ние моли́твами твои́ми отри́ни от мене́.
Преподо́бне о́тче Паи́сие, моли́ Бо́га о нас.
Влады́ко Христе́ Бо́же Всеще́дрый, и́миже ве́си судьба́ми даждь ми ненави́дети дея́ния лука́ваго, Ты бо еси Бог наш, реки́й: проси́те и прии́мете. Даждь любо́вь от всея́ души́ моея́, моли́твами преподо́бнаго отца́ Паи́сия, твори́ти во́лю Твою́ спаси́тельную.
Сла́ва Отцу́ и Сы́ну и Свято́му Ду́ху.
Молю́тися, на мне, гре́шнем, долготерпи́, Влады́ко, и не посецы́ мене́ я́ко непло́дное дре́во, посече́нием сме́ртным, во огнь отсыла́я, но плодоно́сна мя сотвори́, моли́твами преподо́бнаго умоле́н быва́я, вре́мя покая́ния ми даждь, я́ко Человеколю́бец.
И ны́не и при́сно и во ве́ки веко́в. Ами́нь.
Богоро́дичен: Струи́ низпосли́ слез и стена́ния от души́ сотвори́ ми, Чи́стая, внегда́ припада́ти Твоему́ покро́ву, я́ко да обря́щу разреше́ние грехо́в мои́х Твое́ю ми́лостию.
Песнь 9
Ирмо́с: Е́же ра́дуйся от а́нгела прии́мшая и ро́ждшая Созда́теля Своего́, Де́во, спаси́ Тя велича́ющия.
Преподо́бне о́тче Паи́сие, моли́ Бо́га о нас.
Ско́рый помо́щник был еси́, преподо́бне, еще́ в жи́зни сей, иногда́ у преподо́бнаго ста́рца ученику́ в преслуша́нии уме́ршу и веде́ну во ад, он же, припада́ше, прося́, да умо́лиши Всеще́драго о ученице́ его́.
Преподо́бне о́тче Паи́сие, моли́ Бо́га о нас.
Ты же, я́ко ско́рый послу́шник и любве́ храни́тель, наде́жду возложи́ ко Всеще́дрому Бо́гу, простре́ся на моли́тву, и Той, Многоми́лостив и во обе́тех нело́жный, во́лю к боя́щимся Его́ сотвори́ и, моли́тву твою́ услы́шав, изведе́ ду́шу от а́да. Того́ ра́ди и аз, недосто́йный, припа́дая, молю́ тя: о́тче преподо́бне, моли́твами твои́ми изба́ви мя му́ки и огня́ негаси́маго.
Преподо́бне о́тче Паи́сие, моли́ Бо́га о нас.
Бы́вша мя бе́сом смех, челове́ком уничиже́ние, пра́ведным рыда́ние, а́нгелом плач, оскверне́ние возду́ху, и земли́, и вода́м, те́ло окаля́х и ум оскверни́х па́че сло́ва дея́ньми, аз враг Бо́гу бых. Увы́ мне, согреши́х! Моли́твами преподо́бнаго Паи́сия прости́ мя.
Сла́ва Отцу́ и Сы́ну и Свято́му Ду́ху.
Я́ко впады́й в разбо́йники и уя́звен, так и аз впадо́х от мно́гих грехо́в, и уя́звена ми есть душа́. К кому́ прибе́гну пови́нный аз, то́кмо к Тебе́, Милосе́рдому душа́м Врачу́, приими́ моле́бника те́пла преподо́бнаго Паи́сия и моли́твами его́ изле́й на мя вели́кую Твою́ ми́лость.
И ны́не и при́сно и во ве́ки веко́в. Ами́нь.
Богоро́дичен: Прегреше́ния моя́ умно́жишася, преще́нию и суду́ досто́ин, Чи́стая, припа́дая зову́ Ти: пре́жде конца́ пода́ждь ми очище́ние, и умиле́ние, и нра́вом исправле́ние.
Тропари, глас 2-й
Боже́ственною любо́вию от ю́ности распаля́ем, преподо́бне, вся кра́сная я́же в ми́ре возненави́де, Христа́ еди́наго возлюби́л еси́, сего́ ра́ди в пусты́ню всели́ся, иде́же сподо́бися Боже́ственнаго посеще́ния, Его́же не удо́бь зре́ти и а́нгельскима очи́ма, паде́ поклони́ся. Вели́кий же Дарода́тель, я́ко Человеколю́бец, рече́ к тебе́: не ужаса́йся, возлю́бленный Мой, дела́ твоя́ уго́дна Мне. Се, даю́ тебе́ дар: о ко́ем-ли́бо гре́шнице помо́лишися, отпу́стятся ему́ греси́. Ты же в чистоте́ се́рдца твоего́ возгоре́ся, прие́м во́ду и прикосну́ся Неприкоснове́нному, умы́ но́зе Его́ и, во́ду пив, да́ром чуде́с обогати́ся, боля́щия исцеля́ти, бе́сы от челове́к отгоня́ти и гре́шники от му́ки моли́твою свое́ю избавля́ти. О, преподо́бне о́тче Паи́сие, молю́ тя, да умо́лиши и о мне, я́коже тебе́ Бог обетова́, и́бо от сих гре́шник пе́рвый аз есмь, да даст ми Госпо́дь вре́мя покая́ния и прости́т моя́ согреше́ния, я́ко Благи́й и Человеколю́бец, да со все́ми и аз воспою́ Ему́: Аллилу́иа.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Вся па́че смы́сла, вся пресла́вная Твоя́, Богоро́дице, та́инства, чистоте́ запеча́танной и де́вству храни́му, Ма́ти позна́лася еси́ нело́жно, Бо́га ро́ждши И́стиннаго, Того́ моли́ спасти́ся душа́м на́шим.
