Канон о упокоении лишенных церковного поминовения
Канон святому мученику Уару об избавлении от муки во иноверии умерших и некрещенных сродников, глас 8
Песнь 1
Ирмо́с: Колесницегони́теля фарао́на погрузи́, чудотворя́й иногда́ Моисе́йский жезл, крестообра́зно порази́в и раздели́в мо́ре, Изра́иля же беглеца́ пешехо́дца спасе́, песнь Бо́гови воспева́юща.
Припе́в: Святы́й му́чениче Уа́ре, моли́ Бо́га о нас.
Умоле́н бу́ди, Го́споди, святы́м Твои́м Уа́ром му́чеником и облецы́ся в ми́лость и щедро́ты; и сия́ да́же до а́да излию́тся, Человеколю́бче, и уще́дрят, я́же от нас проси́мыя бога́тным Твои́м милосе́рдием.
Святы́й му́чениче Уа́ре, моли́ Бо́га о нас.
Му́чениче Христо́в вели́кий, озло́бленныя и безпо́мощныя воспомяни́, седя́щия во мра́це тьмы непросвети́мыя, и непреста́ни, припа́дая ко ще́дрому Го́споду, до́ндеже уте́шит я́ бога́тным Свои́м милосе́рдием.
Сла́ва Отцу́ и Сы́ну и Свято́му Ду́ху.
О ро́де Клеопа́тры ди́вныя умоли́ти возмо́гл еси́, сла́вный страстоте́рпче, у́бо и днесь, возмога́я, возмо́жеши свободи́ти от мук, и́же от нас воспомина́емыя, а́ще приле́жно о них ко Го́споду помо́лишися, тебе́ бо ра́ди уте́шит я́ Влады́ка бога́тным Свои́м милосе́рдием.
И ны́не и при́сно и во ве́ки веко́в. Ами́нь.
Богоро́дичен: Безпо́мощным Блага́я Помо́щнице, при́зри от сла́вы Своея́, Влады́чице, ко мра́ку а́дову и виждь бе́ды умиле́нных, пред Тобо́ю на́ми воспомина́емых, и не преста́ни о них умоля́я Своего́ Сы́на и ще́драго Го́спода и Влады́ку, до́ндеже уте́шит я́ бога́тным Свои́м милосе́рдием.
Песнь 3
Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя, Христе́, за́поведей Твои́х утверди́, я́ко несть свят, па́че Тебе́, еди́не Человеколю́бче.
Святы́й му́чениче Уа́ре, моли́ Бо́га о нас.
Лик святы́х Сил Небе́сных подви́гни с собо́ю на моли́тву, му́чениче, и сотвори́ де́ло пречу́дно, и вели́ко, и че́стно, па́че же ра́дость неиму́щим наде́жды и утеше́ния неупова́ющим, го́рьким на́шим неве́рно уме́ршим прароди́телем и е́же с ни́ми воспомина́емым, е́же дарова́ти сим от Го́спода проще́ние и ве́лию ми́лость.
Святы́й му́чениче Уа́ре, моли́ Бо́га о нас.
Изря́дный страстоте́рпче и Христу́ люби́мый, уве́ждь, коль жела́тельна свобо́да му́чимым и отра́да, си́це у́бо и на́ша сро́дники и и́же с ни́ми неве́рия ра́ди ве́чныя му́ки притяжа́вшия ме́ры не обря́щут свои́м ра́достем, а́ще испро́сиши сим от Го́спода проще́ние и ве́лию ми́лость.
Сла́ва Отцу́ и Сы́ну и Свято́му Ду́ху.
Уа́ре, добропобе́дный страда́льче, ми́лостив бу́ди и к на́шим моле́нием, и зри удруче́нных несказа́нную нужду́, и сам, от жа́лости понужде́н, неотсту́пно моли́ся к Человеколю́бцу Влады́це, да пода́ст им проще́ние и ве́лию ми́лость.
И ны́не и при́сно и во ве́ки веко́в. Ами́нь.
Богоро́дичен: Всеми́рная наде́ждо, Богоприя́тное селе́ние, на́ше к Бо́гу примире́ние, Мари́е Влады́чице, приими́ проше́ния настоя́щаго предстоя́ния и не преста́ни моля́ся к Сы́ну Своему́ и вся́ческих Го́споду, да пода́ст безнаде́жным Тебе́ ра́ди проще́ние и ве́лию ми́лость.
Седален, глас 5-й
А́ще мо́лишися за весь мир, великому́чениче, и не престае́ши, прося́ всем ми́лости и вся́ким престу́пником все́ми о́бразы лю́то Влады́це досади́вшим и непреста́нно досажда́ющим, и́же ме́ртвыми де́лы себе́ до конца́ умертви́вшим и ничто́же приобре́тшим, я́ко зло сотво́ршим, та́коже, страстоте́рпче, предста́ни и о на́ших уме́рших сро́дницех, я́ко возмо́жная начина́я, не отступи́, моля́ся и припа́дая к ми́лующему всех Го́споду, да прости́т и поми́лует, и́же во тьме седя́щия и лю́те зело́ огорче́нныя.
Другой седален, глас 3-й
Ра́дости ве́чныя насе́льниче, Небе́сному поко́ю тезоимени́тый, Уа́ре вели́кий, дерза́я, да дерзне́ши воспомяну́ти пред Го́сподем умиле́нныя четы́ на́ших прароди́телей, а́ще бо и не в гро́бе о́ных полага́ем тя, усе́рдным же проше́нием к жа́лости, е́же от них, совокупля́ем тя. Те́мже припади́ и моли́ся, не отри́нет бо предстоя́ния твоего́ Влады́ка, но от безме́рныя благосты́ни преклоне́н, пошле́т преогорче́нным избавле́ние и ве́лию ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Пресве́тлая Госпоже́, от Небе́сных Сил превоспева́емая и вы́ну возвелича́емая, Ма́ти Царя́ вся́ческих. Где у́бо и когда́ хо́щет умно́житися Твоя́ сла́ва и вели́чество? не тогда́ ли, егда́ гре́шныя заступа́еши и весь мир моли́твами Свои́ми покрыва́еши? Те́мже и днесь умно́жи, Влады́чице, велеле́поту Твоего́ превосхожде́ния, изба́ви те́плыми Твои́ми моли́твами от лю́тых мук неве́рныя на́ша и некреще́нныя сро́дники и с я́же о них и с ни́ми воспомина́емыя и пода́ждь о́ным избавле́ние и ве́лию ми́лость.
Песнь 4
Ирмо́с: Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра О́тча и на́шу нищету́ посети́в, тем с проро́ком Авваку́мом зову́ Ти: си́ле Твое́й сла́ва, Человеколю́бче.
Святы́й му́чениче Уа́ре, моли́ Бо́га о нас.
Так как, страстоте́рпче, всех лю́биши с ве́рою к тебе́ прибега́ющих, то и люби́м бы́ти от моля́щих тя благопоспеши́. Что же и́но с жела́нием просла́вити тя Человеколю́бный сотвори́т, не пода́нием ли проси́мыя ми́лости умиле́нным и вся́кия отра́ды лише́нным ве́чным у́зником, та́ко и впредь, о до́блий му́чениче, не оскуде́й о сих моля́ся.
Святы́й му́чениче Уа́ре, моли́ Бо́га о нас.
Зима́ лю́та и спасе́ния безпло́дие облежи́т в нече́стиих уме́ршия и плач безотра́ден, зде у́бо вочте́ни суть, и́же от нас воспомина́емыя. Ты же, страстоте́рпче, соедини́ти сих к ро́ду пра́ведных потщи́ся и не оскуде́й о них моля́ся.
Сла́ва Отцу́ и Сы́ну и Свято́му Ду́ху.
А́дова мра́чная темни́ца во ве́ки да не обы́мет прароди́тели и сро́дники на́ша и вся, воспомина́емыя с ни́ми: тебе́, ди́вному страда́льцу, си́лу неве́рия и грехо́вную мощь низложи́вшу, та́ко и впредь сих е́же с Клеопа́триным ро́дом прости́ти не оскуде́й, му́чениче, моля́ся.
И ны́не и при́сно и во ве́ки веко́в. Ами́нь.
Богоро́дичен: Тобо́ю, Пречи́стая, позна́хом сла́вити вся́ческих Соде́теля, и от Тебе́ Плотоно́сца непреле́стна Спа́са велича́ти навыко́хом, и Тя, Влады́чицу, хва́лим, и Тебе́ поклоня́емся, и мо́лим, поми́луй уме́ршия в неве́рии на́ша сро́дники и е́же изба́вити сих не оскуде́й, к Сы́ну моля́ся.
Песнь 5
Ирмо́с: Вску́ю мя отри́нул еси́ от лица́ Твоего́, Све́те незаходи́мый, и покры́ла мя есть чужда́я тьма, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.
Святы́й му́чениче Уа́ре, моли́ Бо́га о нас.
Вся́ко дарова́ние, му́чениче, и вся́ка ми́лость от ми́лостиваго Го́спода излива́емы, а́ще и преди́вны и пречуде́сны суть, слага́еми же к проще́нию в нече́стии уме́рших, вели́чество преизя́щно сему́ оставля́ют. Те́мже и днесь вели́кая сотвори́ти потщи́ся, Влады́ку, му́чениче, умоли́ти.
Святы́й му́чениче Уа́ре, моли́ Бо́га о нас.
Не отврати́ся, Го́споди, от на́шего умиле́ния, ниже́ помяни́ мно́жество грехо́в на́ших, па́че же помяни́ дре́вния Своя́ ми́лости и ра́ди щедро́т Твои́х и ра́ди Уа́ра страда́льца до́бляго не оскуде́й в бога́тстве безме́рнаго Твоего́ милосе́рдия, но изле́й ми́лости и проще́ние, е́же от нас воспомина́емым.
Сла́ва Отцу́ и Сы́ну и Свято́му Ду́ху.
Есть у́бо, великому́чениче, и достиза́ет человеколю́бие Влады́чне и к су́щим в мо́ри дале́че, те́мже предста́ни и днесь и, припа́дая, умоли́ Его́ е́же поми́ловати удале́нныя и ве́ры, и креще́ния отчужде́нныя уме́ршия на́ша сро́дники и всем, и́же с ни́ми воспомина́емым, дарова́ти проще́ние и ве́лию ми́лость.
И ны́не и при́сно и во ве́ки веко́в. Ами́нь.
Богоро́дичен: Предста́ни, Влады́чице, на́шему изнеможе́нию и бу́ди вы́ну в ну́ждах, помога́я нам всю́ду и при́сно, Ты бо еси́ христиа́нская наде́жда и упова́ние, те́мже не отри́ни на́ша проше́ния, но сотвори́ соверше́на и испо́лнена неиспи́санною Твое́ю благода́тию.
Песнь 6
Ирмо́с: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.
Святы́й му́чениче Уа́ре, моли́ Бо́га о нас.
Шата́ния вра́жия да не возра́дуются, ду́ши в коры́сть получи́вши, ты же, му́чениче, те́плыми свои́ми моли́твами разру́ши хоте́ния его́, умоля́я Го́спода е́же прости́ти на́ми воспомина́емыя и от ве́чныя му́ки тоя́ и нас изба́вити.
Святы́й му́чениче Уа́ре, моли́ Бо́га о нас.
Нача́ло на́шему по́двигу Клеопа́трина ро́да проще́ние, отсю́ду у́бо вино́вное восприя́хом возста́вити тя на моли́тву, и о е́же на́ми помина́емых не пре́зри, великому́чениче, и не отри́ни гре́шных предстоя́ние, но, потща́вся, испроси́ у Влады́ки Христа́ о́ным проще́ние и от го́рьких мук избавле́ние.
Сла́ва Отцу́ и Сы́ну и Свято́му Ду́ху.
И́же неве́рия ра́ди сре́те коне́ц зол и ча́яние благи́х весьма́ поги́бе прогне́вания Бо́жия ра́ди, ты же, страстоте́рпче, дерзнове́ние прие́м, ра́дость отпуще́ния вме́сто стра́шнаго томле́ния от Небе́снаго Царя́ испроси́ и, изве́д от го́рести, соблюди́ во Влады́чней ми́лости.
И ны́не и при́сно и во ве́ки веко́в. Ами́нь.
Богоро́дичен: Ка́я, Влады́чице, зло́ба превозмо́жет Твоя́ Ма́терния моли́твы? Вои́стину у́бо, а́ще предста́неши и днесь, моля́ за проси́мыя Тобо́ю, сотвори́ши о́ным ра́достное проще́ние, избавле́ние и ве́лию ми́лость.
Кондак, глас 4-й
Христу́ после́дуя, му́чениче Уа́ре, Того́ испи́в ча́шу, и венце́м муче́ния увязе́ся, и со а́нгелы ликовству́еши, моли́ непреста́нно за ду́ши на́ша.
Икос
Воспомяни́ на́ша глаго́лы, све́тлый жи́телю небе́сный, Христо́в сла́вный великому́чениче Уа́ре, ве́чному поко́ю тезоимени́тый, и вели́кими твои́ми страда́нии непроходи́мое и све́тлое поко́ище приобреты́й от непрехо́дныя темни́цы, и томле́ния непреста́ннаго, и ну́жды потщи́ся богоприя́тными твои́ми моли́твами изба́вити рабы́ умиле́нныя, и́хже ра́ди мо́лим тя, предстоя́ще и во усе́рдии взыва́юще, испо́лни на́ша проше́ния, свя́те, и Христа́ Бо́га моли́ непреста́нно за ду́ши на́ша.
Песнь 7
Ирмо́с: Бо́жия снизхожде́ния огнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.
Святы́й му́чениче Уа́ре, моли́ Бо́га о нас.
Я́коже со́лнце, Го́споди, всех просвеща́еши, и всем дождь незави́стно излива́еши, и прогне́вающим Тя ми́лость непреста́нно да́руеши, и ны́не послу́шай Уа́ра, Твоего́ страда́льца, и проле́й ми́лость Твою́ до конца́ о́ныя отчужде́нным сро́дником на́шим и я́же с ни́ми неве́рным, Человеколю́бче.
Святы́й му́чениче Уа́ре, моли́ Бо́га о нас.
Ны́не, я́коже и пре́жде, щедр бу́ди, Го́споди, и умоле́н яви́ся, Влады́ко, я́коже о Клеопа́тре соде́я, си́це и о нас, Ми́лостиве, сотвори́; посли́ Своя́ щедро́ты и милосе́рдие ко е́же на́ми воспомина́емым, Исто́чник бо еси́ ми́лости неисчерпа́емый.
Сла́ва Отцу́ и Сы́ну и Свято́му Ду́ху.
А́ще проро́к, восперя́яся, пое́т ми́лости Твоя́, Го́споди, во ве́ки, у́бо не оскуде́вша Тя в щедро́тах ве́руем, я́ко милосе́рдия Твоего́ преде́лы неизмери́мы, и от пучи́ны во глубину́ пото́пшим излия́ти ми́лости Тя умоля́ем, испо́лни у́бо ра́ди му́ченика сие́, о Влады́ко наш.
И ны́не и при́сно и во ве́ки веко́в. Ами́нь.
Богоро́дичен: Го́ру Тя сказу́ет прему́дрый во проро́цех, мы же тому́ и е́же от Тебе́ Ка́меню Богоро́дия изыти́ без примеше́ния му́жеска ве́руем; И́мже на́ше спасе́ние и от глуби́н а́довых возведе́ние получи́хом, Влады́чице, возведи́ и днесь от а́да воспомина́емыя на́ми, да Тя, Всеми́лостивую, непреста́нно велича́ем.
Песнь 8
Ирмо́с: Мусики́йским орга́ном согласу́ющим и лю́дем безчи́сленным, покланя́ющимся о́бразу в Деи́ре, три о́троцы не повину́вшеся, Го́спода воспева́ху и славосло́вляху во вся ве́ки.
Святы́й му́чениче Уа́ре, моли́ Бо́га о нас.
Кра́сны да бу́дут словеса́ дре́вния Твоя́ ми́лости, Го́споди, сказу́ющия и на́шу наде́жду воздви́жущия, я́ко послу́шал еси́ святы́я Твоя́, Го́споди, е́же поми́ловати неве́рныя уме́ршия, и́хже и днесь приво́дим Ти на мо́литву, да проше́ния их ра́ди уще́дриши иносла́вно уме́ршия, ве́дением и неве́дением Тебе́, Влады́ко, досади́вшия.
Святы́й му́чениче Уа́ре, моли́ Бо́га о нас.
А́гнче Бо́жий, Пречи́стою Свое́ю Кро́вию нас искупи́вый, Фе́клино и блаже́ннаго Григо́рия моле́ние услы́шав, Мефо́дия со мно́гими и Мака́рия прие́м проше́ния, и отра́ду, и изба́ву злове́рным пода́в уме́ршим, и Златоу́стаго о сих моли́тися написа́ти воздви́гнув, приими́ у́бо, Влады́ко, с си́ми сла́внаго Уа́ра и моли́твами их воспомина́емыя от нас прости́ и поми́луй.
Сла́ва Отцу́ и Сы́ну и Свято́му Ду́ху.
Ра́дость нам испроси́, великому́чениче, возвесели́мся бо, а́ще обря́щем твои́ми моли́твами изба́вленныя от ве́чных мук на́ша сро́дники; всегда́ бо твоя́ моли́твы Влады́ка слы́шит и проше́ния исполня́ет, ты же у́бо не оскуде́й о сих и ны́не моля́ся, да тя вы́ну прославля́ем.
И ны́не и при́сно и во ве́ки веко́в. Ами́нь.
Богоро́дичен: Пренепоро́чная Влады́чице, обилуй мно́жеством милосе́рдия и щедро́т, ди́вная и Безневе́стная Ма́ти Царе́ва, нам бо ми́лости взыска́ющим, где и́нде сию́ обря́щем, а́ще не к Тебе́ поспеши́м, припа́дающе, Ты бо пото́к сла́дости преизоби́лен нам родила́ еси́, Преблагослове́нная.
Песнь 9
Ирмо́с: Ужасе́ся о сем не́бо и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с, тем Тя, Богоро́дицу, а́нгелов и челове́к чинонача́лия велича́ют.
Святы́й му́чениче Уа́ре, моли́ Бо́га о нас.
О Бо́зе да возмо́жеши, Уа́ре сла́вный, богоприя́тными твои́ми моли́твами восприя́ти и излия́ти ми́лости, и́же до конца́ о́ныя отчужде́нным, Еди́н бо есть щедро́т и милосе́рдия Роди́тель, и вся Ему́ возмо́жна я́ко Влады́це, к Нему́же неотсту́пно, страда́льче, моли́ся прости́ти и поми́ловати я́же от нас воспомина́емыя.
Святы́й му́чениче Уа́ре, моли́ Бо́га о нас.
Де́ло соверши́ преди́вно, о великому́чениче, и сла́ве твое́й прикла́дно, е́же от Го́спода проще́ние и пра́веднаго Его́ гне́ва премене́ние испроси́ти огорче́нным те́мнаго злове́рия ра́ди на́шим прароди́телем и е́же сих, в го́рести и во ожида́нии люте́йших су́щих, да во́змеши в безстра́шное избавле́ние, иде́же ве́си Влады́ка проще́нныя положи́ти.
Сла́ва Отцу́ и Сы́ну и Свято́му Ду́ху.
И ко́е у́бо чу́до яви́тся сего́ дивне́йши, ка́я сла́ва знамени́тейши и ко́е милосе́рдие такова́го бо́льши, а́ще ты, му́чениче, сожале́в, умо́лиши ми́лостиваго Го́спода отпусти́ти грех нече́стия и́же от нас помина́емых и лю́таго томле́ния о́ных изба́вити.
И ны́не и при́сно и во ве́ки веко́в. Ами́нь.
Богоро́дичен: Влады́чице ми́лостивая, человеколюби́вая и зло не по́мнящая, приими́ жа́лость на́шего проше́ния и хода́тайствуй неотсту́пно о ми́лости к ми́лостивому Твоему́ Сы́ну и Влады́це, е́же поми́ловати и прости́ти грех иносла́вия уме́ршим сро́дником на́шим и я́же с ни́ми помя́нутым, отпуще́ние и ме́сто сим ми́лости неотъе́млемо пода́ти.
Тропарь, глас 8-й
Во́инством святы́х страстоте́рпец, стра́ждущих зако́нне, зря о́нех, показа́л еси́ му́жески кре́пость свою́. И устреми́ся на страсть во́лею и умре́ти вожделе́ за Христа́, И́же прия́л еси́ по́честь побе́ды твоего́ страда́ния, Уа́ре, моли́ спасти́ся душа́м на́шим.
