Войти в систему
Войти с помощью соц. сетей:
Преподобной Евдокии, в инокинях Евфросинии, княгини Московской (1407).
О преподобная княгине Евфросиние, добляя в женах подвижнице, прехвальная угоднице Христова! Приими моление о нас, недостойных, с верою и любовию к раце мощей твоих припадающих, и твоим теплым к Богу ходатайством испроси граду твоему и людем от бед и напастей сохранение, обители тобою созданней утверждение и благоспеяние; подвизающимся же во обители твоей споспешествуй, яко во благодушии и терпении понести и ко исправлению жития своего добре подвизатися; в мире благочестно живущим испроси у Господа в вере твердость, во благочестии преуспеяние, и всем, с верою прибегающим к тебе и твоея просящим помощи и заступления, подавай всегда недугов исцеление, в скорбех утешение и во всем житии благопоспешение; наипаче же умоли Господа в мире и покаянии земное житие прейти нам, от мытарств же горьких и мук вечных избавитися и Царство Небесное твоим ходатайством получити, идеже ты со всеми святыми Господу предстоиши, да славим Отца и Сына и Святаго Духа, ныне и присно и во веки веков. Аминь.
По земнем вдовстве Небесному Жениху себе уневестивши и в княжестем чертозе подвижнически поживши, послежде и чертог, и чад твоих Бога ради оставила еси, преподобная Евфросиние, и, вшедше во обитель, тобою созданную, и в иночестем образе многи подвиги показала еси, и святое твое житие по благодати Божией блаженною кончиною увенчала еси. И ныне предстоиши Христу Богу, моли спастися душам нашим.
От юности предызбранная Богом угоднице, оставлыни светлый чертог княжеский, уклонилася еси во обитель, тобою созданную, и, пучину житейскаго моря преплывше, ныне со Ангелы песнословиши Христа Бога. Емуже непрестанно молися, преподобная, яко да сохраняет выну обитель, тобою созданную, и дарует нам мир и велию милость.
Вся красная мира сего, яко суетная, презревши и тело твое постом и бдением изнуривши, непрестанными молитвами Богу угодила еси, преподобная Евфросиние, и, дар исцелений от Него прияти сподобльшися, слепому прозрение и многим недужным исцеление даровала еси. Темже радостно взываем, глаголюще: слава Богу, прославляющему святыя Своя.
Ублажаем тя, преподобная мати Евфросиние, и чтим святую память твою, ты бо молиши за нас Христа Бога нашего.
Преподобной Евфросинии, в миру Евдокии, великой княгине Московской, молятся о прозрении очей и от паралича.
Явление иконы Пресвятой Богородицы во граде Казани (1579).
Праведного Прокопия, Христа ради юродивого, Устюжского чудотворца (1303).
Праведного Прокопия Устьянского (XVII).
Знамение от иконы Божией Матери «Благовещение» во граде Устюге (1290).
Чтимые списки с Казанской иконы Божией Матери: «Ярославская» (1588), «Тамбовская» (1695), «Песчанская» (1754), «Пензенская» (1717).
Коробейниковской (1904) и «Умиление» Новгородская (1352) икон Божией Матери.
О Пресвятая Госпоже Владычице Богородице! Со страхом, верою и любовию препадающе пред честною иконою Твоею, молим Тя: не отврати лица Твоего от прибегающих к Тебе. Умоли, Милосердая Мати, Сына Твоего и Бога нашего, Господа Иисуса Христа, да сохранит мирно страну нашу, Церковь Свою святую да незыблему соблюдет от неверия, ересей и раскола. Не имамы бо иныя помощи, не имамы иныя надежды разве Тебе, Пречистая Дево, Ты еси Всесильная христиан Помощница и Заступница. Избави всех, с верою Тебе молящихся, от падений греховных, от навета злых человек, от всяких искушений, скорбей, бед и от напрасныя смерти. Даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия Твоя, сподобимся Небеснаго Царствия и тамо со всеми святыми прославим Пречестное и Великолепое имя Отца и Сына и Святаго Духа. Аминь.
О Пречистая Владычице Богородице, Царице Небеси и земли, вышшая Ангел и Архангел и всея твари честнейшая, Чистая Дево Марие, миру Благая помощнице, и всем людем утверждение, и во всяких нуждах избавление! Призри и ныне, Госпоже Всемилостивая, на рабы Твоя, Тебе умиленною душею и сокрушенным сердцем молящияся, со слезами к Тебе припадающия и покланяющияся пречистому и цельбоносному образу Твоему и помощи и заступления Твоего просящия. О Всемилостивая и Премилосердная Дево Богородице Чистая! Воззри Госпоже, на люди Твоя: мы бо грешнии не имамы иныя помощи, разве Тебе и от Тебе рождшагося Христа Бога нашего. Ты еси заступница и предстательница наша, Ты еси обидимым защищение, скорбящим радование, сирым прибежище, вдовам хранительница, девам слава, плачущим веселие, больным посещение, немощным исцеление, грешным спасение. Сего ради, о Богомати, к Тебе прибегаем и на Твой пречистый образ с Предвечным на руку Твоею держимым Младенцем, Господем нашим Иисусом Христом взирающе, умиленное пение Тебе приносим и вопием: помилуй нас, Мати Божия, и прошение наше исполни, вся бо суть возможна ходатайству Твоему, яко Тебе слава подобает ныне и присно и во веки веков. Аминь.
Войти с помощью соц. сетей: