Войти в систему
Войти с помощью соц. сетей:
Днесь светло празднуем, вернии людие, преславныя Троицкия обители торжество, се бо великий собор святых чудотворцев Радонежских, яко дивныя птицы небесныя, являет нам Церковь Российская, стезями честнаго их жития шествовати всех призывающи, к нимже, с верою и любовию притекающе, воззовем: молитеся о нас ко Пресвятей Троице, преподобнии отцы наши с Богоносным аввою Сергием, мир мирови даровати и душам нашим велию милость.
Плоды добродетелей на земли принесше, преподобнии отцы, в Небесных чертозех ныне благоухаете, яко райстии цвети, и лицем к лицу зрите Пресвятую Троицу, Юже дерзновенно молите, спастися душам нашим.
Приидите, вси концы отечества нашего, прославим святый лик угодников Радонежских, яко звезды, украсивших небо церковное подвиги земнаго жительства, тех бо предстательством теплым ко Господу многия нам милости Его низпосылаются, бедствия отгоняются и злые страсти укрощаются. Ихже всесвятую память ныне празднующе, тако возопиим: радуйтеся, Сергие и Никоне и вси Радонежстии чудотворцы, усерднии служителие Живоначальныя Троицы.
Величаем вас, вси святии земли Радонежския, и чтим святую память вашу, вы бо молите за нас Христа Бога нашего.
О Преблагословенная и Многомилостивая, Покровительнице всея Уфимския земли! Се мы, чада Твои, на святый Богородско-Уфимский образ Твой взирающе и на нем Тя зряще, како о нас, грешных, к Сыну и Богу нашему молишися, усердно вопием Ти: не остави нас без Твоего Матернего покрова ныне, в час испытаний и скорбей, огради нас от врагов видимых и невидимых, и даждь нам силу во еже всесовершенную и благую волю Творца и мира Владыки творити. Зриши бо, Милостивая Уфимския земли Заступнице наша, колико грехом всяческим подвержени есмы: не токмо бо волею согрешаем, но и неволею в многоразличныя прегрешения впадаем. Сего бо ради к Тебе, о Мати, прибегаем и молимся: ум наш познанием Божественныя истины просвети, сердце наше теплотою христианския любве и спасительных желаний согрей, волю же нашу в нелицемернем заповедей Господних исполнении утверди.
Ей, Госпоже Премилостивая, приникни с высоты Небесныя к воздыханиям и молитве нас, грешных: исцели болезни недужных, умири сердца озлобленных, даждь терпение страждущим, внуши страх Божий обидящим, укрепи гонимыя за правду, сироты и вдовицы защити, подаждь утешение плачущим, испроси прощение кающимся, демонскую же бурю страстей во грешных душах утиши и в сердцах, чтущих Богородско-Уфимский образ Твой, Христову кротость и любовь вкорени и духом милосердия и сострадания утверди; отпадшия же от веры еретики и отступники к познанию истины направи и уста нечестивых, хулящих Церковь Святую и поносящих веру православную загради. И братиям, и сестрам нашим, о Мати Божия, прощения грехов и блаженства вечнаго испроси. Егда же и нашея кончины час приближится, тогда убо, о Владычице, приими души наша и в сонме праведных сии упокой, идеже лицы Ангел и святых угодник немолчно славословят державу и милость Отца и Сына и Святаго Духа и Твое Матернее о нас предстательство и заступление, ныне и присно и во веки веков. Аминь.
О Пресвятая Госпоже Владычице Богородице! Со страхом, верою и любовию припадающе пред честною иконою Твоею, молим Тя, не отврати лица Твоего от прибегающих к Тебе, умоли, Милосердная Мати, Сына Твоего и Бога нашего, Господа Иисуса Христа, да сохранит мирну Уфимскую страну нашу, да утвердит Церковь Свою святую, да непозыблему соблюдет ее от неверия, ересей и раскола. Не имамы бо иныя помощи, не имамы иныя надежды, разве Тебе Пречистая Дево, Ты бо еси всесильная христиан Помощница и Заступница. Избави всех с верою Тебе молящихся от падений греховных, от навета злых человек, от всяких искушений, скорбей, бед и от напрасныя смерти. Даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия Твоя, сподобимся Небеснаго Царствия и тамо со всеми святыми прославим Пречестное и Великолепое имя Отца и Сына и Святаго Духа. Аминь.
Заступнице Усердная, Надеждо ненадежных, Помощнице нищих и сирых, плачущих Утешение, согрешающих очищение, Путеводительнице заблуждших, болящих Целебнице и исправление падающих, Ты бо еси Похвало земли Уфимския, Дево Богородице.
О Милосердная Мати, не отрини слез и воздыханий наших, с верою и любовию к Тебе приносимых: пред иконою Богородскою услыгни ныне молящихся, и на путь спасения настави, и душ наших грехи исцели, от земли Уфимския вся пагуби потреби, Ты бо еси людем сокровище вечнаго спасения и источниче Божественныя благодати.
Достойно есть величати Тя, Богородице, честнейшую Херувим и славнейшую без сравнения Серафим.
Величаем Тя, Богородице Дево, и почитаем чудотворную икону Твою, еюже благоволила еси спасти землю Уфимскую от всегубительных болезней и людских нестроений.
Богородско-Уфимская икона Пресвятой Богородицы почитается покровительницей Уфимской земли.
Войти с помощью соц. сетей: