Войти в систему
Войти с помощью соц. сетей:
О, преизящный и великий угодниче Господень Савво! Похваляем твоя славная чудотворения, прославляем житие твое святое: никто́же возможет исчести терпение и подвиги твоя святыя: ты бо отечество и род оставил еси, в пустыню же достиг и ученики собрав, составил еси́ обитель, и воздвигнув столп, на нем подвизался еси, сохраняя стадо твое словесное: иже неправедно иногда нашедших разбойнически на обитель твою увидел еси́ и токмо жезла ударением устрашил еси. И ныне устраши, отче преподобне, все́х врагов, возстающих на нас: помолися о стране нашей Российстей и о всем Российстем воинстве: умоли милостиваго Бо́га, да отпустит нам прегрешения наша и сподобит нас наслаждатися радости вечныя купно со всеми святыми, ныне и присно и во веки веко́в. Ами́нь.
общая святителям – 1-го января.
Первопрестольницы Российстии, истиннии хранителие апостольских преданий, столпи непоколебимии, православния наставницы, Петре, Алексие, Ионо и Филиппе, Владыку все́х молите, мир вселенней даровати и душам нашим велию милость.
О, прекрасная невесто Христова, чистая голубице, позлащенная Ду́хом Святы́м, девственная похвало и пустынножительная собеседнице Ангелов, насадившая на земли мысленный рай твоими добродетелями, преподобная мати Параскево! Что принесем тебе достойнаго в дар, кроме смиренных и грешных молений наших, я́же приимши, очисти я святыми твоими молитвами и принеси к Жениху твоему, Христу Бо́гу нашему! Ублажаем тя, красото Сербскаго народа и наша заступнице и хранительнице, е́юже хвалятся царие и князи. Ты, яко храбрый воевода, крепостию, данною ти от Царя́ сил, обращала со студом вспять лица врагов страны твоея, и нашу страну Российскую силою молитв твоих огради от все́х навет видимых и невидимых врагов. Моли Бо́га о нас, о, преподобная мати, да не яростию Свое́ю обличит нас, ниже гневом Своим накажет нас за премногия грехи наша, но милостию Свое́ю да оградит нас и да дарует нам время на покаяние и исправление. О, преподобная Параскево, все́х, собравшихся в сем храме и с любовию чтущих святую память твою, осени твоим заступлением и испроси у Царя́ сил, Емуже со А́нгелы предстоиши, коему́ждо благопотребная во временной жизни сей, паче же помози нам в достижении Царства Небеснаго в будущем веце твоими теплыми молитвами и ходатайством ко Господу нашему Иисусу Христу, Емуже подобает всякая слава, честь и поклонение со Отце́м и Святы́м Ду́хом, ныне и присно и во веки веко́в.
Ами́нь.
Пустынное и безмолвное житие возлюбивши, и во след Христа, Жениха твоего, усердно потекши, и Того благое иго в юности твоей вземши, крестным знамением к мысленным врагом мужески вооружившися, постническими подвиги, постом и молитвами и слезными каплями, углие страстей угасила еси, достославная Параскево. И ныне в небесном чертозе с мудрыми девами предстоящи Христу, моли о нас, почитающих честную память твою.
О, велицыи угодницы Христо́вы и чудотворцы, святителие Феодоре и Иоанне! Се мы, недостойнии и грешнии, скорбьми многими угнетаемии, к вам усердно прибегаем и со упованием крепким молимся: отцы благомилостивии и благопослушливии, милостивно услышите ныне глас наш молебный, и потщитеся на помощь нашу, и яко при жизни вашей всем скорбящим и озлобленным помощницы и утешителие бы сте, тако и ныне любовь вашу к нам явите, благодатным действом благоприятных молитв ваших претворяюще скорбь нашу в радость, печальже на утешение: вся бо можете о укрепляющем вас Христа, Егоже вернии служители бысте: от Негоже приявше вся обетованная благая, ниспошлите и нам великую и богатую милость Господню, да воспоем и прославим дивнаго во святых Своих Бо́га, Отца́ и Сы́на и Свята́го Ду́ха, ныне и присно и во веки веко́в. Ами́нь.
Чудотворцы славнии, врачеве безмезднии, Косьмо и Дамиане! Вы от юности Христа Бо́га возлюбивше и Того повеления всем сердцем соблюдающи, аще и вдасте себе учению врачебному, но добродетельнаго ради жития и чистоты душевныя, силою Христа Бо́га, не врачевания током искусство, но паче неоскудную благодать исцеления всяких неисцельных недугов от Бо́га прияли есте. Отонудуже любовию и милосердием к недугующим подвизаеми, не токмо людем, но и скотом исцеления болезней подаваете, неисчетным множеством чудес ваших весь мир наполняете, и не телесныя токмо недуги исцеляете, но и верою Христовою души просвещаете, в терпении болезней укрепляете, в тяжких недузех о исправлении жития вразумляете и ко Христу покаянием привлекаете. Темже ныне и нас, припадающих к Вам пред честною иконою вашею, скоро услышите, юныя дети, вашей помощи во учении книжном просящия, вашими молитвами наставите, да вашему житию ревнующе, не земное точию научение приобрящут, но паче в благочестии и правой вере выну да преуспеют. На одре болезни лежащим, человеческия помощи отчаянным, к вам же тепле с верою и усердною молитвою прибегающим, исцеление болезней вашим милостивым, чудодейственным посещением даруйте. Многажды в болезни впадающия и от лютых недуг в уныние, малодушие и роптание пришедшия, данною вам от Бо́га благодатию в терпении утвердите, и наставите, да уразумеют волю о них Божию святую и благую и сами себе и живот свой воли Христа Бо́га предают. В недузех сущих, о исправлении же жития не радящих, во гресех не раскаивающихся, сердцем ожесточенных сокрушите во спасение и к покаянию призовите, да немощни суще телом, здрави пребудут душею, и причастницы соделаются Бо́жия спасительныя благодати. Братию Свята́го Храма сего, вашему Святому заступлению от Бо́га врученную, и все́х к вам усердно прибегающих невредимы сохраните от долгонедужия, от болезней лютых и неисцельных, от разслабления тела, от иступления ума, от смертоносныя язвы, от внезапныя смерти, и мощным ходатайством вашим к Бо́гу соблюдите в правой вере твердых, во благочестии преуспевающих, в добрых делах усердных, в молитве к Бо́гу прилежных, да с Вами вкупе сподобятся в будущем веце присно воспевати и славити всесвятое и великолепое имя Отца́ и Сы́на и Свята́го Ду́ха, во веки веко́в. Ами́нь.
Войти с помощью соц. сетей: