Войти в систему
Войти с помощью соц. сетей:
К тебе, отче, известно спасеся еже по образу: приим бо крест, последовал еси́ Христу́, и дея учил еси́ презирати убо плоть, преходит бо, прилежати же о души, вещи безсмертней. Темже и со ангелы срадуется, преподобне, (имярек), дух твой.
Ублажаем тя, преподобномучениче (имярек), и чтим святую память твою, наставниче монахов и собеседниче ангелов.
Ирмос: Яко по суху пешешествовав Израиль, по бездне стопами, гонителя фараона видя потопляема, Бо́гу победную песнь поим вопияше.
Припев: Свя́тый преподобномучениче (имярек), моли Бо́га о нас.
От соблазн житейских и от страстей оскорбляющих мя, умири ум мой, страдальче преподобне, и в твою похвалу тихо память творити сподоби мя.
Страдальческия венцы я́ко страдалец прием, преподобне (имярек), преложен был еси́ от земли к миру нератному, и к свету и животу истинному, преблаженне.
Струями кровей палмень мучительский погасив, благочестне, мучениче, напоил еси́ души верных, сотворив прозябати желание живота вечнаго, преподобне.
Богородичен:
И́же невместимое Слово во чреве Твое́м вмещено порождши, Боговместимая Сень, утесняющия мя лютыя бури злых свободи, Чистая.
Ирмос: Несть свят, якоже Ты, Го́споди Бо́же мой, вознесый рог верных Твои́х, Бла́же, и утвердивый нас на камени исповедания Твое́го.
Укреплен был еси́ силою Божиею, отлучився к подвигом дерзновением, преблаженне, терпя болезни и муки гонительския, страстотерпче преподобне отче наш.
Крепость даде ти Христо́с подвигодавец великий, сокрушити прелесть, и посрамити врага, хвалящагося безстудно, и тщетно всуе шатающагося.
Твои краснеи нозе яве, преподобне, ко стези мучения входящия светло, и главы злочестивых сламляющыя, (имярек) многострадальне.
Богородичен:
Юже древле виде Иаков от земли простерту к небесней высоте, Бо́жественную лествицу яве, Марию Чистую Владыки воспоем палату.
Седален, глас 4:
Крещен бысть трегубо, треми крещении верно, водою и огнем, и Бо́жиим Ду́хом, первее слезами, второе воздержании многими подвизався крепко, пожив равноангельским житием на земли, блаженне (имярек): третие, я́ко агнец изряден заклан был еси́ Христу́ Бо́гу нашему. Того моли непрестанно, спастися душам нашим.
Сла́ва, и ныне.
Богородичен:
Удивися Иосиф еже паче естества зря, и внимаше мыслию иже на руно дождь, в безсеменном зачатии Твое́м, Богородице, купину огнем неопалимую, жезл Ааронов прозябший. И свидетельствуя обручник Твой и хранитель, священником взываше: Дева раждает, и по рождестве паки Девою пребывает.
Крестобогородичен:
Помышления от сердец многих открываются: копием страстей Твои́х уязвляющи мой ум, в распятии Твое́м вольном: чадо, кто узрит плача моего, и плоти терзания, разумеет вельми Бо́га Тя суща всеистинна; воспеваю, Слове, милосердие Твое́, Егоже ради терпиши распятие.
Ирмос: Христо́с моя сила, Бог и Господь, честная Це́рковь благолепно поет взывающи, от смысла чиста, о Господе празднующи.
Законно постился еси́, законно пострадал еси́, и законно венчан был еси́, Бо́жиим Словом укрепляем, и невредна себе соблюдая, преблаженне.
Не терпя, преподобне, лести возследовати, к Богоразумию я́ко разумен радуяся приступил еси́: свет мысленный восприим, светильник показался еси́.
Священнодействуем, якоже заколение вольное святое приведен был еси́, (имярек), тебе ради пожренному, и в храме первенец почил еси́ веселяся.
Богородичен:
Девою пребыла еси́ по рождестве, якоже бе и прежде рождества: я́ко Бо́га Слова родила еси́ избавльшаго нас от тли ходатайством Твои́м, Пренепорочная.
Ирмос: Бо́жиим светом Твои́м, Бла́же, утреннюющих Ти души любовию озари, молюся, Тя ведети, Слове Бо́жий, истиннаго Бо́га, от мрака греховнаго взывающа.
Оружием уязвися враг, многаго терпения доблемудраго мученика: и сего ногами попран бысть, и смех явися, посрамлен быв.
Ты злобу мучительскую отринув, незлобив и кроток явлься, мучениче всечестне, скончанием твоим кровным венцем нетленным увязлся еси́.
Мученическими венча тя честьми воистину, и постническими труды, преподобне (имярек), трудоположник един Бог наш, на убийцу укрепивый тя.
Богородичен:
Разумев издалеча тайно пророческий Богозрачный лик, Дево Богоневестная, Бо́жия рождества Твое́го глубину неизреченную, образы священными Тя прознамена.
Ирмос: Житейское море, воздвизаемое зря напастей бурею, к тихому пристанищу Твое́му притек, вопию ти: возведи от тли живот мой, Многомилостиве.
Всел еси́ на водах, окормляем рукою живоначальною, отче наш, и сохранен был еси́, в нихже погрузишася гонительская веления, молитвою прилежною священне.
Малыми изменяя великая, себе мукам предал еси́, преподобне: прельстителя змия Евина, Ду́хом умертвил еси́, Богоявленне.
Глагол твоихсилы, злобы обретатель претерпети не возможе: тем узам тя, (имярек), и ранам, смерти же лютей, сурово льстец предал есть.
Богородичен:
Се ныне из кровей Твои́х чистых Дево Мати, воплотися Господь, и человеком приединяется кроме обычая, за неизреченную милость, наше спасение содевая.
Яко постника благочестна, и искусна, и страдальца произволением честна, и пустыни жителя сообразна, в песнех достойно восхвалим, (имярек), приснохвальнаго: той бо змия попрал есть.
Икос:
Страстем Господним поревновав, преблаженне, за того умрети возжелел еси́, лесть идольскаго суетства разорил еси́, мужески подвигся противу врагов, тех злохитрственная ловления и козни низложил еси́, и венец почести приял еси́, (имярек), преподобне страдальче. Тем верою прибегаем в твой кров, и зовем ти: от враг видимых и невидимых избави нас, ты бо змия попрал еси́.
Ирмос: Росодательну убо пещь содела ангел преподобным отроком, халдеи же опаляющее веление Божие, мучителя увеща вопити: благословен еси́, Бо́же оте́ц на́ших.
Милования еже к плоти отлучив ум твой, блаженне, опаляем огнеми сожигаем мудре, отроческую воспевая песнь: благословен Бог оте́ц на́ших.
Отгоними бывают единым призыванием твоим, лукавии дуси, познавшии тя постника и мученика Христова, преподобне, поюща тепле: благословен Бог оте́ц на́ших.
Возвещен ти бысть конец преблаженне (имярек), вседетельною волею: тем вдался еси́ большему пощению, и от славы в славу преходиши, убиен был еси́ Христа́ ради над всеми Бо́га.
Богородичен:
Унынием мя одержима, воздвигни, Пречистая, к деланию Бо́жиих дел, укрепляющи мя на враги, присно борющия мя люте, и противными помыслы прельщаема.
Ирмос: Из пламене преподобным росу источил еси́, и праведнаго жертву водою попалил еси́: вся бо твориши, Христе́, токмо еже хотети. Тя превозносим во вся веки.
Постническими добротами украшаем, и ранными болезньми утомляем, Победотворцу показался еси́, преславне, победныя почести от Него приим.
Воспалився любовию Вседержителевою, (имярек), преславне, вражию возвышенную выю низложил еси́: и к Бо́гу желанием твоим, приял еси́ Того в тебе живуща во веки.
Милости Бо́жия, мучениче богоблаженне, сподоби мя, и искушений и бед избави, чтущаго тя, (имярек) преподобне, и под кров твой прибегающаго.
Богородичен:
Радуйся, Свя́тая Горо, и Богопроходная, радуйся, священных таин явление, и слышание страшное, и неудобь видимое зрение: радуйся, Дево, падших возведение.
Ирмос: Бо́га человеком невозможно видети, на Негоже не смеют чини ангельстии взирати: Тобо́ю же, Всечистая, явися человеком
Слово воплощенно, Егоже величающе, с небесными вои тя ублажаем.
Ты к последней красоте и сладости приспел еси́, богомудре отче наш (имярек), и близ Бо́га был еси́, поя со безплотными: свят, свят, свят еси́, Троице вседетельная, и всесильная.
Избыв от сетей ловящих тя, в доброте небесней почил еси́, преподобне (имярек), и с мученическими совокупился еси́ вои: со безплотными ныне молися о всех нас, я́ко да тя ублажаем.
Крепость и державу Христа́ положив, злую бесов прогонил еси́ молву, и ввышняя пристанища пристал еси́, украшен весь, Бо́жественным светолитии богатно облистаем.
Богородичен:
Разумети чудо непостижимое рождества Твое́го, Мати Дево, не могуще, молчанием сие паче славяще, Тебе́ славословим преблаженную, и едину добрую в женах, и пренепорочную.
О священная главо, преподобне отче, преблаженне авво ((имярек)), не забуди убогих твоих до конца, нопоминай нас всегда во святы́х твоих и благоприятных молитвах к Бо́гу. Помяни стадо твое, еже сам упасл еси́, и не забуди посещати чад твоих. Моли за ны, отче священный, за дети твоя духовныя, я́ко имеяй дерзновение к Небесному Царю́, не премолчи за ны ко Господу, и не презри нас, недостойных, у Престола Вседержителева, и не престай моляся о нас ко Христу́ Бо́гу, ибо дана тебе бысть благодать за ны молитися. Не мним бо тя суща мертва, аще бо телом и преставился еси́ от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со Ангельскими воинствы, со безплотными лики, с Небесными Силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Бо́гу, о пользе душ на́ших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу́, Емуже подобает всякая сла́ва, честь и поклонение, со Безначальным Его Отце́м и с Пресвятым и Благим и Животворящим Его Ду́хом, ныне и присно и во веки веков. Ами́нь.
Войти с помощью соц. сетей: