Войти в систему
Войти с помощью соц. сетей:
Ирмо́с: На земли́ Неви́димый яви́лся еси́, и челове́ком во́лею сожи́л еси́, Непостижи́мый, и к Тебе́ у́тренююще, воспева́ем Тя, Человеколю́бче.
Припев: Ми́лостиве Го́споди, услыгши моли́тву раб Своих, молящихся Тебе́.
Дщерь Иаи́рову, уже́ уме́ршую, я́ко Бог оживи́л еси́, и ны́не возведи́, Христе́ Бо́же, от врат сме́ртных боля́щаго, Ты бо еси́ Путь и Живо́т всем.
Припев: Ми́лостиве Го́споди, услыгши моли́тву раб Своих, молящихся Тебе́.
Сы́на вдови́ча оживи́в, Спа́се, тоя́ сле́зы преложи́л еси́ на ра́дость: и ны́не спаси́ от неду́га тле́ющаго раба́ Твоего́, да и на́ша скорбь и боле́знь на ра́дость пре́йдет.
Сла́ва: Огненная боле́знь иногда́, Христе́, те́щи Петро́ве прикоснове́нием Твоея́ руки́ исцеле́, и ны́не та́яжде всеси́льная Твоя́ десни́ца да воста́вит боля́щаго раба́ Твоего́, да воста́в, я́коже и сия́, послу́жит Тебе́.
И ны́не: В ско́рби су́щи гре́шнии, и не иму́ще к Бо́гу дерзнове́ния, к Тебе́, Пречи́стая Богома́ти, вопие́м: моли́ Сы́на Твоего́ пода́ти боля́щему здра́вие.
Ирмо́с: Бе́здна после́дняя грехо́в обы́де мя, и исчеза́ет дух мой; но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.
Припев: Ми́лостиве Го́споди, услыгши моли́тву раб Своих, молящихся Тебе́.
Бе́здну ми́лости име́яй, Христе́ Бо́же, услы́ши моле́ния раб Твои́х, и я́коже Петро́м Тави́фу воскреси́л еси́, си́це и ны́не в боле́зни лежа́щаго воздви́гни, послу́шав церко́вныя моли́твенники.
Припев: Ми́лостиве Го́споди, услыгши моли́тву раб Своих, молящихся Тебе́.
Врачу́ душа́м и телесе́м на́шим, понесы́й неду́ги всего́ ми́ра, Христе́, Ене́я Петро́м исцели́вый и Евти́ха Па́влом воскреси́вый, и ны́не боля́щаго исцели́ святы́х апо́стол моли́твами.
Сла́ва: Преложи́, Христе́, на ра́дость рыда́ние о неду́жнем ны́не скорбя́щих, да Твою́ получи́вше ми́лость, вни́дем в дом Твой со обетова́нными да́ры, сла́вяще Тя со Отце́м и Ду́хом во Еди́ном существе́ Неразде́льнаго Бо́га.
И ны́не: Прииди́те, о дру́зи, припаде́м к Бо́жией Ма́тери. Та бо и́мать власть неду́жныя исцеля́ти, со безме́здникома вку́пе, духо́вным помазу́юще моли́тв Свои́х богоприя́тных еле́ем.
Душу мою, Господи, во гресе́х всяческих, безместными деяньми разслаблену воздвигни божественным Своим человеколюбием, яко же и разслабленнаго воздвигл еси древле, да зову Ти спасаем: щедре Христе, даждь ми исцеление.
Иже руки́ Своея́ го́рстию содержа́й концы́, Иису́се Бо́же, Иже Отцу́ собезнача́льный и Ду́ху Свято́му совлады́чествуяй, я́ко пло́тию яви́лся еси́ неду́ги исцеля́я и стра́сти очи́стил еси́, слепы́я просвети́л еси́, и разсла́бленнаго сло́вом Боже́ственным совоста́вил еси́, сего́ пра́во ходя́ща сотвори́в, и одр повеле́л еси́ на ра́му взя́ти. Те́мже вси с ним воспева́ем и пое́м: ще́дре Христе́, даждь ми исцеле́ние.
Ирмо́с: Пре́жде о́бразу злато́му, перси́дскому чти́лищу, о́троцы не поклони́шася, трие́ пою́ще посреде́ пе́щи: отце́в Бо́же, благослове́н еси́.
Припев: Ми́лостиве Го́споди, услыгши моли́тву раб Своих, молящихся Тебе́.
Креста́ Твоего́, Го́споди, Животво́рнаго, и́мже смерть поги́бе, и ме́ртвии оживотворе́ни бы́ша, Боже́ственным зна́мением ны́не боля́щаго воздви́гни, я́коже при Еле́не уме́ршую деви́цу.
Припев: Ми́лостиве Го́споди, услыгши моли́тву раб Своих, молящихся Тебе́.
До́лгую и лю́тую боле́знь Иовлю, на гно́ищи в че́рвех седя́щаго и благода́рне моля́щагося, сло́вом исцели́л еси́, Го́споди. И ны́не боле́знующаго и на́ми моля́щагося Тебе́ я́ко Благ исцели́ неви́димо моли́твами святы́х Твои́х.
Сла́ва: Вси ве́мы, я́ко вся́ко умре́ти нам есть, Тебе́ Бо́гу та́ко изво́лившу, но на ма́ло вре́мя, Ми́лостиве, здра́вия про́сим боля́щему, премени́ от сме́рти того́ на живо́т, пода́ждь скорбя́щим утеше́ние.
И ны́не: Посо́бствуй и помози́ на́шей нищете́, Богоро́дице, Ты бо ве́си вре́мя и час, когда́ умоли́ти Сы́на Твоего́ и Бо́га на́шего, пода́ти боля́щему здра́вие и проще́ние всех грехо́в.
Ирмо́с: Служи́ти Живо́му Бо́гу в Вавило́не о́троцы претерпе́вше, о мусики́йских орга́нех неради́ша, и посреде́ пла́мене стоя́ще, боголе́пную песнь воспева́ху, глаго́люще: благослови́те, вся дела́ Госпо́дня, Го́спода.
Припев: Ми́лостиве Го́споди, услыгши моли́тву раб Своих, молящихся Тебе́.
Милость покажи, Владыко, в болезни раба Твоего, и скоро исцели, милостиве Христе Боже, и еще смерти не предаждь судней, да Ти покаяние воздаст. Сам бо рекл еси́: не хощу́ сме́рти гре́шничи.
Припев: Ми́лостиве Го́споди, услыгши моли́тву раб Своих, молящихся Тебе́.
Го́споди ми́лостиве, Твоя́ пресла́вная чудеса́ и до нас ны́не да дости́гнут: бе́сы прожени́, неду́ги и ра́ны исцели́, боле́зни уврачу́й, и потво́ра и чародея́ния, и вся́кия я́звы изба́ви ны.
Сла́ва: Запрети́вый, Христе́, морски́м ве́тром, и страх ученико́в на ра́дость преложи́вый, запрети́ и ны́не тя́жким боле́знем, тружда́ющим раба́ Твоего́, да вси возвесели́мся, хва́ляще Тя во ве́ки.
И ны́не: Изба́ви, Богоро́дице, от обыше́дших ны печа́лей, бед же и скорбе́й, и всех разли́чных неду́гов, отра́вы же и чародея́ний, и бесо́вскаго мечта́ния, и от наве́та злых челове́к, и от напра́сныя сме́рти, мо́лимся.
Войти с помощью соц. сетей: