Во имя Отца и Сына и Святаго Духа. Се аз раб Божий пишу сию духовную грамоту, своим целым умом, государю преосвященному Архиепископу Великаго Новагорода и Пскова Владыке Макарию. Нынеча, государь, Божиим посещением в болезнь впадох, и чаях к Богу своего отшествия; и старцы, государь, святыя Живоначальныя Троицы обители, видя меня приспевша к концу, и начаша ми докучати о игумене: «Кого де ты нам прикажешь на свое место игумена?»; и аз, государь, положу ли упование на Бога да на тебя; а есть, государь, у Живоначальныя Троицы во обители, в нашей пустынке, 4 священники, и аз приказываю, государь, Богу да тебе, которого, государь, ты благословишь в тех 4 священницех, то им игумен. Да тебе же, государю, приказываю преосвященному Архиепископу Владыке Макарию обители Живоначальныя Троицы священноиноки и всю свою братию: Бога ради, государь, и Пречистей Его Матери, побереги и оборони от силных людей, после моего живота. А братии своей приказываю жити в любви о Христе, да пития бы пиянственаго в нашей пустынке отнюдь не держали; а вражды бы не имели и не розчитали бы ся ни о чем, занеже Бог дал посяместа розчитатися не о чем, казны монастырьские нет, а что Бог послал при моем животе, христолюбец которой что дал или вклад в монастырь, ино то все пошло в дом Живоначальной Троице и Боголепному Преображению на храм да в теплую церковь, да на иной монастырьской росход. А вкладчики, которые прийдут в монастырь к своим вкладом, и аз тех братие приимати приказываю, как прежних вкладчиков, да и беречи; а всем нашим делом Бог Сердцеведец. Мир тебе, государю, преосвященому Архиепископу Великаго Новаграда и Пскова Владыке Макарию о Христе; а меня, государь, грешнаго прости и благослови, а тебя, государя, правителя истинному слову Отца и Сына и Святаго Духа и наставника заблуждшим, еже к спасению, Бог прощает.