Молитвы болящего
Во время болезни
Господи, небесе и земли Творче, аще призирая призриши на мое смирение и даруеши ми Твоея премудрости и Божества познание, измеши же мя и настоящия болезни и обстояния, Твой буду весь, Твой воин буду, жительствовати буду чрез все житие Твоею волею и Твоим повелением, Твоя даже до конца сохраню заповеди. Аминь.
О покорении воле Божией
Господи Иисусе Христе, Сыне и Слове Бога и Отца, пострадавый на Кресте за моя согрешения, любве ради моея, и да укрепиши и мене на страдания. Укрепи мя ныне, о, сладчайший мой Иисусе, яко да возмогу понести болезни сея немощи моея. Аминь.
Благодарственная о обретении здравия
Боже Вседержителю, небесный Отче, Источниче жизни и Подателю всякого блага, буди благословенно всесвятое Имя Твое. Приими еже из глубины сердечныя благодарение мое, яко свободил мя еси от немощи моея и возставил еси здравие мое. Приими мою молитву и подаждь ми Твою благодать и укрепи мя, да соблюду яже Тебе исповеданная моя обещания и исправлю прежняго жития моего злая, преспевати буду в добродетели, обновлю мою жизнь страхом Твоим, творяй волю Твою во всех деяниях моих, и освящу новую жизнь, юже дал ми еси, посвящая себя на Твое служение и живый Тебе ради, зван же буду во Твое пришествие по Твоему благоволению, благодатию и человеколюбием единороднаго Твоего Сына, Господа нашего Иисуса Христа и Всесвятаго и благаго и животворящаго Твоего Духа, с Ним же Тебе подобает всякая слава, честь и поклонение, ныне и присно и во веки веков. Аминь.
