Молитвы, произносимые иереем

Господи Боже сил, призри на брата нашего милостию и щедротами и даруй ему присущее здравие и целость, избавляя его от одра болезненнаго, путеводя ко святому Твоему храму молитвенному, соединяя паки его священному и словесному Твоему стаду во Христе Иисусе Господе нашем, с Ним же славу и молитву возсылаем Отцу [и Сыну] и Святому Духу, ныне и присно и во веки веков. Аминь.

Царю и Целителю страждущих, Тебе беси трепещут и Твоим повелением отходит всяка болезнь и всякое искушение. Ты еси разслабленныя члены утверждаяй, смерть отгоняяй, телеса от века лежащая во мгновение воздвизаяй. Темже молим Тя, Владыко, даждь рабу Твоему (имярек) здравие и болезни сея свободи. Сильне и Человеколюбче, да не к тому повелиши ему на одр быти, но якоже онаго тридесять и восемь лет лежащаго на ноги воздвигни, вземляй мира грех. Яко Твоя держава и Твое есть царство, ныне и присно и во веки веков. Аминь.

Господи Боже наш, Врачу душ и телес наших, призри на раба Твоего (имярек) и исцели его от всякия немощи плотския, о имени Господа и Спаса нашего Иисуса Христа, с Нимже благословен еси, со Всесвятым и благим и животворящим Твоим Духом, всегда, ныне и присно и во веки веков. Аминь.

Благословен еси, Господи Иисусе Христе Боже наш, творяй великая и чудная, славная же и ужасная чудеса на небеси и на земли, исцеляяй всяку болезнь. Иже святым Твоим седми отроком, Максимилиану, Иамвлиху, Мартиниану, Дионисию, Иоанну, Ексакустодиану и Антонину, сон спасения подательный даровавый, еже убежати беззаконнаго царя Декия прещения, Сам и рабу Твоему (имярек) сон сладок и здравие телесное и душевное посли. Аще же и яко человек заповеди Твоя преступи, прости, Господи, и возстави и просвети его душу, и очисти его от всякия скверны плоти и духа, молением Приснодевы Богородицы и всех святых. Аминь.

Отче Святый, Едине воистину Целитель душ и телес наших, смиряяй и возносяяй, приими мя приходяща во всяком смирении и приносяща славословие и благодарение сие о спасении раба Твоего (имярек) силою Твоея благодати и новосодеяннаго врачебнаго действа.

Благодарим Тя, яко благословил еси действования врачей и целительная их врачевания и возставил еси здравие раба Твоего и даровал еси его дому и приходу его цела и невредима, отвратив всяку беду от телесе и души его.

Возстави его скоро, молим Тя, от одра болезни сея, да возвратится в дом свой и на делание свое. Сподоби его, да настоящее испытание сбудется ему во очищение души и во обращение в благодарении ко Господу Иисусу Христу, Целителю души же и телесе, и делам руку Его слава. Аминь.