Войти в систему
Войти с помощью соц. сетей:
Ирмос: Во́ду проше́д я́ко су́шу, / и еги́петскаго зла избежа́в, / изра́ильтянин, вопия́ше: / Изба́вителю и Бо́гу на́шему пои́м.
Припев: Поми́луй мя, Боже, поми́луй мя.
Ны́не приступи́х аз гре́шный и обремене́нный / к Тебе́, Влады́це и Богу моему; / не сме́ю же взира́ти на не́бо, / то́кмо молю́ся, глаго́ля: / да́ждь ми, Го́споди, ум, да пла́чуся дел моих горько.
О, го́ре мне, гре́шному! / Па́че всех челове́к окая́нен есмь, / покая́ния несть во мне; / да́ждь ми, Го́споди, сле́зы, / да пла́чуся дел мои́х го́рько.
Слава: Безу́мне, окая́нне челове́че, / в ле́ности время губи́ши; / помы́сли житие́ твое́ и обрати́ся ко Господу Богу, / и пла́чися о де́лех твои́х горько.
И ныне: Мати Божия Пречистая, / воззри́ на мя гре́шнаго, / и от се́ти диа́воли изба́ви мя, / и на путь покаяния наста́ви мя, / да пла́чуся дел мои́х горько.
Ирмос: Небе́снаго кру́га Верхотво́рче Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / еди́не Человеколю́бче.
Внегда́ поста́влени будут престо́ли на суди́щи стра́шнем, / тогда́ всех челове́к дела́ облича́тся; / го́ре та́мо бу́дет гре́шным, в му́ку отсыла́емым; / и то ве́дущи, душе́ моя́, / пока́йся от злых дел твои́х.
Пра́ведницы возра́дуются, а грешнии воспла́чутся, / тогда́ никто́же возмо́жет помощи́ нам, / но дела́ на́ша осу́дят нас; / те́мже пре́жде конца́ покайся от злых дел твои́х.
Слава: Увы́ мне великогре́шному, / и́же де́лы и мы́сльми осквернився, / ни ка́пли слез имею от жестосе́рдия; / ны́не возни́кни от земли́, душе́ моя́, / и покайся от злых дел твои́х.
И ныне: Се, взыва́ет, Госпоже́, Сын Твой, / и поуча́ет нас на до́брое, / аз же гре́шный добра́ всегда бе́гаю; / но Ты, Ми́лостивая, поми́луй мя, / да пока́юся от злых мои́х дел.
Катава́сия, та́же ма́лая ектения́. По возгласе поем:
Помышля́ю день стра́шный / и пла́чуся дея́ний мои́х лука́вых: ка́ко отвеща́ю Безсмертному Царю, / или́ ко́им дерзнове́нием / воззрю́ на Судию́, блу́дный аз? / Благоутро́бный Отче, / Сыне Единоро́дный и Ду́ше Святы́й, поми́луй мя.
Слава, и ныне: Богородичен
Свя́зан мно́гими ны́не плени́цами грехо́в / и содержи́мь лю́тыми cтрастьми́ и беда́ми, / к Тебе́ прибега́ю, моему спасению, / и вопию́: помози́ ми, Дево, Мати Божия.
Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.
Широ́к путь зде и уго́дный сла́сти твори́ти, / но го́рько бу́дет в последний день, / егда́ душа́ от тела разлуча́тися бу́дет: / блюди́ся от сих, челове́че, Царствия ра́ди Божия.
Почто́ убо́гаго оби́диши, / мзду нае́мничу уде́ржуеши, / брата твоего́ не лю́биши, / блуд и гордость го́ниши? / Оста́ви у́бо сия́, душе́ моя́, / и покайся Царствия ради Божия.
Слава: О, безу́мный челове́че, доко́ле углеба́еши, я́ко пчела́, / собира́ющи бога́тство твое́? / Вско́ре бо погибнет, я́ко прах и пе́пел: но / бо́лее взыщи́ Царствия Божия.
И ны́не: Госпоже́ Богоро́дице, поми́луй мя грешнаго, / и в доброде́тели укрепи́, и соблюди́ мя, / да на́глая смерть не похи́тит мя негото́ваго, / и доведи́ мя, Дево, Царствия Божия.
Ирмос: Просвети́ нас повеле́нии Твои́ми, Го́споди, / и мы́шцею Твое́ю высо́кою / Твой мир пода́ждь нам, / Человеколю́бче.
Воспомяни́, окая́нный челове́че / ка́ко лжам, клевета́м, / разбо́ю, не́мощем, лютым звере́м, / грехо́в ради порабоще́н еси́; / душе́ моя́ грешная, того́ ли восхоте́ла еси́?
Трепещу́т ми у́ди, / всеми бо сотвори́х вину́: / очи́ма взира́яй, уши́ма слы́шай, язы́ком злая глаго́ляй, / всего себе гее́нне предая́й; / душе́ моя грешная, сего́ ли восхотела еси́?
Слава: Блудника́ и разбойника ка́ющася прия́л еси́, Спасе, / аз же еди́н ле́ностию грехо́вною отягчихся/ и злым дело́м порабо́тихся; / душе́ моя́ грешная, сего́ ли восхотела еси́?
И ныне: Дивная и скорая помощнице все́м челове́ком, / Ма́ти Бо́жия / помози́ мне недостойному, / душа́ бо моя́ грешная того́ восхоте́.
Ирмос: Моли́тву пролию́ ко Го́споду, / и Тому́ возвещу́ печа́ли моя́, / я́ко зол душа́ моя́ испо́лнися, / и живо́т мой а́ду прибли́жися, / и молю́ся я́ко Ио́на: / от тли, Бо́же, возведи́ мя.
Житие́ на земли́ блу́дно пожи́х / и ду́шу во тьму преда́х, / ны́не у́бо молю Тя, Ми́лостивый Влады́ко: / свободи́ мя от рабо́ты сея́ вра́жия, / и даждь ми ра́зум твори́ти во́лю Твою.
Кто творит такова́я, я́коже аз? / Я́коже бо свиния́ лежит в калу́, / та́ко и аз греху́ служу́. / Но Ты, Господи, исто́ргни мя от гну́са сего́/ и да́ждь ми се́рдце твори́ти за́поведи Твоя.
Слава: Воспряни́, окая́нный челове́че, к Богу, / воспомяну́в своя согреше́ния, / припа́дая ко Творцу, слезя́ и стеня́; / Той же, я́ко милосе́рд, / даст ти ум зна́ти волю Свою.
И ныне: Богородице Дево, / от видимаго и невидимаго зла сохрани мя, Пречи́стая, / и приими́ молитвы моя́, и донеси́ я Сыну Твоему, да даст ми ум твори́ти волю Его.
Катавасия, та́же малая ектения. По возгласе абие чтется акафист.
Предве́чный Царю́ веко́в, Тво́рче и Го́споди, Судие́ Пра́веднейший и нелицеприя́тный, мно́жество соде́янных мно́ю лю́тых помышля́я, окая́нный аз, трепе́щу Стра́шнаго Дне́ Су́днаго, но, наде́яся на ми́лость неизрече́ннаго благоутро́бия Твоего́, дави́дски молю́ Тя: по вели́цей Твое́й ми́лости прости́ мя недосто́йнаго, и не осуди́ мя по дея́нием мои́м, яко да благо́ю со́вестию очище́н, на всяк день и час! Ангельскую песнь приношу́ Ти: Свят, Свят, Свят еси, Го́споди, Бо́же Вседержи́телю, Иже бе и сы́й и гряды́й, поми́луй мя!
Арха́нгельския трубы́ возглаше́ние, на Суд Госпо́день Стра́шный и После́дний, живы́я и ме́ртвыя от всех коне́ц земли́ собира́ющее, уже́ во ушесе́х предно́сится. Душе́ моя́, душе́ моя́, воста́ни, что спи́ши? Коне́ц приближа́ется, и и́маши смути́тися. Воспряни́ у́бо, я́ко ма́ло есть еще́ вре́мя на покая́ние; бо́дрствуй, моли́ся и трезви́ся и дела́ до́брая твори́, непреста́нно вопию́щи ко Влады́це своему́ такова́я:
Свят еси́, Го́споди, Боже наш, и Пресвя́т, и да святи́тся и в сем гре́шном и во зле лежа́щем ми́ре имя Твое́, па́че всякаго и́мене.
Свят еси́, Го́споди, Боже наш, да прии́дет Твое́ сла́вное Ца́рствие.
Свят еси́, Го́споди, Боже наш, да бу́дет во всем во́ля Твоя́ святая на земли́, я́коже пребыва́ет и на небеси́.
Свят еси́, Го́споди, Бо́же наш, хлеб земны́й насу́щный дая́й нам, па́че же небе́сный да́ждь ми на всяк день.
Свят еси́, Го́споди, Боже наш, оста́ви ми согреше́ния моя, я́коже и аз оставля́ю бра́ту своему́ согреше́ния его́.
Свят еси́, Го́споди, Бо́же наш, не введи́ мя в напа́сть, но изба́ви мя от сете́й лука́ваго миродержи́теля тьмы́ ве́ка сего́, и́бо пои́стине опа́сно хо́дим и дни́е на́ша лука́ви суть.
Свят, Свят, Свят еси́, Го́споди, Бо́же Вседержи́телю, Иже бе и сы́й и гряды́й, поми́луй мя!
Ви́жду, Го́споди мой, Го́споди, я́ко вся зна́мения кончи́ны ве́ка сего́ уже́ исполня́ются: ве́ра свята́я в лю́дех оскуде́, беззако́ния умно́жишася, и любо́вь охладе́; востаю́т бо наро́д на наро́д, ца́рство на ца́рство, оте́ц на сы́на и сын на отца́, гла́ды и тру́сы и па́губы изоби́луют по ме́стом, прельсти́тели и преда́тели яви́шася, и гоне́ния на ве́рных Твои́х воздвиго́шася, та́же и пропове́дание Ева́нгелия во свиде́тельство всем язы́ком уже́ соверша́ется, и скорбь вели́кая посреди́ ве́рных по вселе́нней распространя́ется, и по сих всех, разуме́я, я́ко близ е́сть кончи́на ве́ка сего́, со стра́хом вопию́ Ти: Аллилу́иа.
Ра́зум неуразуме́нный вре́мени стра́шнаго и неизглаго́ланнаго прише́ствия Твоего́ откры́ти ве́рным хотя́, Всеблаги́й Го́споди, дал еси́ нам в подо́бие того́ при́тчу смоко́вницы, глаго́ля: егда́ бо ва́ия ея́ бу́дут мла́ди и ли́ствие прозя́бнет, ве́дите, я́ко близ есть ле́то. Та́ко и вы, егда́ ви́дите сия́ вся, – бо́дрствуйте, я́ко близ есть, при две́рех. Тем же и мы, прише́д на коне́ц веко́в, со умиле́нием зове́м Ти:
Свят еси́, Го́споди, Бо́же наш, при́тчами тайноводя́ нас во Ца́рствие Свое́, да всяк име́яй у́ши духо́вныя слы́шати, да слы́шит, да́руй и мне уразуме́ние Твоего́ ева́нгельскаго пропове́дания, да плотски́я по́хоти попра́ше, духо́вно жи́тельствую и к жа́тве всеми́рной уготовля́юся.
Свят еси́, Го́споди, Бо́же наш, при́тчею жерно́вною поуча́й нас, я́ко от двои́х, вку́пе тружда́ющихся и живу́щих, в той день еди́н пое́млется и еди́н оставля́ется, – не оста́ви мене́ тогда́ со гре́шники, де́лающими беззако́ние, но очище́ние да́руй и введи́ во Твое́ сла́вное Ца́рствие.
Свят еси́, Го́споди, Бо́же наш, глаго́ляй: моли́теся, да не бу́дет бе́гство ва́ше в зиме́ и́ли в суббо́ту, о ве́це кончи́ны ми́ра, я́ко о зиме́ гада́тельствуя; да́ждь ми, в сие́ осьмо́е тысячеле́тие живу́щему, стопы́ моя́ к бе́гству вели́кому в сре́тение Твое́ угото́вати и непреста́нно помышля́ти гряду́щее помози́ ми.
Свят еси́, Го́споди, Бо́же наш, реки́й: в чем заста́ну, в том и сужду́, – возбуди́ мя, мно́жицею во грехи́ впада́юща, к ча́стому покая́нию, да не обря́щеши, прише́д, мя негото́ваго.
Свят еси́, Го́споди, Бо́же наш, Пра́ведный и Ми́лостивый, не вни́ди в суд с рабо́м Твои́м, я́ко не оправди́тся пред Тобо́ю всяк живы́й, – от ли́ца же Твоего́ судьба́ моя́ изы́дет.
Свят еси́, Го́споди, Бо́же наш, реки́й: не всяк глаго́ляй Ми: Го́споди, Го́споди, вни́дет в Ца́рствие Небе́сное, но творя́й во́лю Отца́ Моего́, – научи́ мя твори́ти во́лю Твою́.
Свят, Свят, Свят еси, Го́споди, Бо́же Вседержи́телю, Иже бе и сый и гряды́й, поми́луй мя!
Си́лою Божества́ Твоего́, Го́споди, воздви́гл еси́ из гро́ба Ла́заря, бездыха́нна четверодне́вна, и телеса́ усо́пших святы́х в час сме́рти и кре́стных страда́ний Твои́х возста́вил еси́; последи́ же и Сам тридне́вен воскре́сл еси́ от ме́ртвых то́ю же си́лою Твое́ю. Ве́руем, я́ко гряде́т час и ны́не уже́ е́сть, егда́ по гла́су Твоему воскре́снут ме́ртвии, и воста́нут су́щии во гробе́х, и изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда. Не осуди тогда́ и мя, Владыко, по деянием моим, но поми́луй со всеми в вере и надежде жизни вечныя усопшими, и пети не возбрани: Аллилу́ия.
Име́яй ключи ада и смерти, аще и глаго́лал еси́, Го́споди, верному рабу Твоему́ Иоанну тайновидцу, стоявшему посреде седми светильников: Аз есмь Первый и Последний, и живый, и бых мертв, и се жив есмь во веки веко́в, аминь, – повелел же еси́ ему́ написати имже подобает быти вскоре. Сия страшная и близкая скончания мира сего быти помышляя, не с су́етным любопытством, но со страхом и трепетом взываю Ти:
Свят еси́, Го́споди, Боже наш, Свидетелю верный, Первенец из ме́ртвых, и Княже царей земных; любяй ны и омываяй ны от грех наших Кровию Своею, и ключи Царствия Небеснаго человеком вручивый, – укрепи мя в вере Твое́й, да николиже отрекуся Тебе́, но, аще понудитися, до крове постою за имя свято́е Твое́.
Свят еси́, Го́споди, Боже наш, гряды́й на облацех небесных, да узрят Его́ всяко око и иже прободоша Его́, и плачь сотворят о Нем тогда́ вся́ колена земная, – даруй и мне прежде дне того страшнаго плачь за грехи моя́.
Свят еси́, Го́споди, Боже наш – Альфа и Омега, начало и конец, Первый и Последний – скажи ми кончину мою и число дней мои́х возвести ми.
Свят еси́, Го́споди, Бо́же наш, давый Откровение великому Иоанну, да уразумеем и мы, имже подобает быти вскоре. Того моли́твами спаси́ мя в день великий гнева Твоего́, егда́ ни горы, ни ущелья, ни камение возмогут укрыти грешники, бежащия от лица Твоего́.
Свят еси́, Го́споди, Бо́же наш, апостолом Твои́м Павлом поучаяй, я́ко аще имам пророчествия и тайны вся́ и ве́ру, якоже и горы преставляти, любве же не имам, кая ми польза есть? Даждь ми любо́вь нелицемерну, да тяготу брата моего́, я́коже и свою, понесу, и душу мою положу за дру́ги своя.
Свят еси, Го́споди, Бо́же наш, Любы́ неизреченная, даруй ми возлюбити Тя, я́коже иногда возлюбих грех свой, и принеся плоды покаяния, сподоби поработати Тебе́, я́коже поработах прежде сатане льстивому, да из глубины души воспою:
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Бу́ря ве́лия, разруша́ющая го́ры, предъидя́ше, трус и мрак, гро́мы и мо́лнии быва́ху, егда́ явля́лся Господь Илии́ в Хори́ве и Моисе́ю на Сина́е; но сей страх ма́лый е́сть проо́браз после́дняго дне ми́ра, о не́мже глаго́лал Господь ученико́м на горе́ Елео́нстей и Иоа́нну на Па́тмосе. Тогда́ бо вся вселе́нная сотрясе́тся: огнь, вода́ и вся стихи́и смяту́тся; и свет, и мрак, и кровь, и дым, и тру́бы Ангельския, и мертвеце́в воста́ние, и вопль люде́й соединя́тся, возвеща́я Второ́е прише́ствие и Стра́шный Суд Его́, и час отмще́ния. О, ужа́снаго зре́лища и испыта́ния! Невозмо́жно есть нам и изобрази́ти сие́: го́ре – гре́шным, и сла́ва – пра́ведным тогда́. Милосе́рде Го́споди! Спаси́ мя тогда́, молю́ся, да пою́ Ти: Аллилу́иа.
Слы́шах Тя, Го́споди, усты́ Петро́вы глаго́люща: я́ко ны́нешняя небеса́ и ны́нешняя земля́ Сло́вом Твои́м содержи́мы и огню́ блюдо́мы на День Суда́ и поги́бели нечести́вых челове́к, аз содрога́юся, но на неизрече́нное милосе́рдие Твое дерза́я, но́ваго небеси́ и но́выя земли́ по нело́жному Твоему обетова́нию ча́ю, в них же вся́ пра́вда живе́т. Сия́ у́бо жела́нныя земли́ жи́теля мя сотвори́ тогда́, Спасе, зову́ща:
Свя́т еси́, Го́споди, Бо́же наш, неизсле́димый и непремени́мый вчера́ и днесь и во ве́ки Той же еси́, и ле́та Твоя́ не оскуде́ют; име́яй небеса́ и зе́млю, я́ко ри́зу ве́тху сняти, в ри́зу но́ву и нетле́нну облецы́ мя.
Свят еси́, Го́споди, Бо́же наш, стоя́й у две́ри и стуча́яй, и к слы́шащему глас Твой, и две́ри се́рдца отверза́ющему – входя́щий к нему́ и свечеря́ющий с ним. Вни́ди в дом смире́нныя и гре́шныя души́ моея́ и свечеря́й со мно́ю, я́коже с Луко́ю и Клео́пою, и́бо преклони́лся уже́ есть день жи́зни моея́.
Свят еси́, Го́споди, Бо́же наш, Путь, Истина и Живо́т мой, наста́ви мя на путь Твой, и пойду́ во и́стине Твое́й.
Свят еси́, Го́споди, Бо́же наш, реки́й дре́вле: Ма́рфо, Ма́рфо, пече́шися и мо́лвиши о мно́зе, еди́но же есть на потре́бу, – даждь и ми ни о еди́ном земно́м пещи́ся, но и о небе́сном помышля́ти.
Свят еси́, Го́споди, Бо́же наш, реки́й бога́тому: безу́мне! В сию́ же нощь ду́шу твою́ истя́жут от Тебе́, а е́же угото́вал еси́ кому́ бу́дет? Помози́ ми сокро́вище не земно́е, а небе́сное собира́ти, иде́же ни червь, ни тля тлит, ни та́тие подка́пывают и кра́дут.
Свят еси́, Го́споди, Бо́же наш, освяти́ мя во всей полноте Своей, да всесоверше́н дух мой и душа́ и те́ло непоро́чно в прише́ствие Твое́ да сохраня́тся.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Бо́же, Бо́же мой, прише́дый взыска́ти и спасти́ поги́бшаго, – при́зри на скорбь души́ моея́: век бо мой скончава́ется, и Стра́шный Твой Престо́л предуготовля́ется, житие́ мое́ мимои́дет, Суд же мне предлежи́т, грозя́ мне о́гненною му́кою и пла́менем неугаси́мым. Вонми́, у́бо, моли́тве мое́й и не отри́ни слез мои́х, я́ко су́етных: кто у́бо прии́де к Тебе́ пла́ча и не а́бие спасе́н бысть? Ве́ру мою́ вместо дел вмени́ мне, Го́споди, и не взыщи́ дел, отнюдь оправда́ющих мя, я́ко тщу́ся твори́ти ты́я, но не и́мам их; но та ве́ра моя́ да довле́ет вме́сто всех, та да отвеща́ет, та да оправди́т, та да пока́жет мя прича́стника сла́вы Твоея́ ве́чныя в невече́рнем дни Ца́рствия Твоего́, воспева́юща: Аллилу́ия.
Прови́дя Дании́л проро́к, муж жела́ний, дре́вле я́сно Боже́ственное Твое́ Второ́е прише́ствие, Влады́ко Го́споди, глаго́ла: до́ндеже престо́лы поста́вишася, и Ве́тхий де́нми се́де, оде́жди Его́ белы́, а́ки снег, и власы́ главы́ Его́, а́ки во́лна, чисты́, и Престо́л Его́ пла́мень паля́щь; река́ о́гненная тече́т исходя́щи пред Ним; ты́сяща ты́сящ служа́ху Ему́, и тмы тем предстоя́ху Ему́, на суди́щи седя́щему, и кни́ги отверзо́шася. Пощади́ у́бо, пощади́, Спа́се, тогда́ Твое́ созда́ние, сле́зно вопию́щее Ти такова́я:
Свят еси, Го́споди, Бо́же наш, на Престо́ле Сла́вы почива́яй, Ему́ же даде́ся власть и честь, и Ца́рство, и вси лю́дие; племена́ и язы́цы Тому́ рабо́тают; Его́ же власть – власть ве́чная, я́же не пре́йдет, и Ца́рство Его́ не разсы́плется.
Свят еси́, Го́споди, Бо́же наш, Вели́кий и Стра́шный, Его́ же Дании́л проро́к святы́й ви́дев, ду́хом вострепета́ и смутися, – аз же, гре́шный, ка́ко дерзну́ узре́ти Тя и отвеща́ти Тебе́?
Свят еси́, Го́споди, Бо́же наш, Бо́же ми́лости и щедро́т и человеколю́бия, – моли́твами Проро́ка Твоего́ изба́ви мя пото́ка стра́шнаго реки́ о́гненныя, хотя́щаго поглоти́ти мя за грехи́ моя́.
Свят еси́, Го́споди, Бо́же наш, пра́ведныя любя́й и гре́шныя ми́луяй, го́ры ме́рилом ра́зума поста́вивый, лик звезда́м исчита́яй и ка́пли ро́сныя ко ветро́в дыха́нию приложи́вый, – услы́ши стена́ние души́ моея́, и вопль се́рдца моего́ к Тебе да приидет.
Свят еси́, Го́споди, Бо́же наш, Се́рдцеве́дче, Ему́ же вся́, не то́кмо словеса́, но чу́вствия и помышле́ния соде́янныя и несоде́янныя на́ша ве́домы суть, – не осуди́ мя по бла́гости Твое́й за вся́кое слово пра́здное и по́мыслы скве́рныя, я́же аз изреко́х и помы́слих в житии́ мое́м.
Свят еси́, Го́споди, Бо́же наш, продо́лжи ми век к покая́нию и на посече́ние со смоко́вницею безпло́дною не осуди́ мене́.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Пропове́дник Твой, Го́споди, духоно́сный Иоа́нн Богосло́в, ви́дев во открове́нии сла́вный Престо́л Небе́сный и под Престо́лом ду́ши убие́нных за сло́во Бо́жие, от вели́кия ско́рби прише́дших, иже́ и возопи́ша велегла́сно глаго́люще: доко́ле, Влады́ко Святы́й и Истинный, не осуди́ши и не отмсти́ши за кровь на́шу живу́щим на земли́? и даны́ бы́ша коему́ждо им ри́зы бе́лы, и запове́дано бысть им пожда́ти еще вре́мя ма́ло, до́ндеже сконча́ются сора́тницы их, подо́бно им иму́щия избие́ны бы́ти, я́ко да воспо́лнится предопределе́нное число́. О, вели́каго и неизрече́ннаго долготерпе́ния Твоего́, Влады́ко! Яко и до сего́ дне отмще́ние нечести́вым отлага́еши. Но го́ре ми́ру, егда́ Судия́ внеза́пу прии́дет и коего́ждо дея́ния обнажа́тся, тогда́ поги́бнут гре́шницы от лица́ Бо́жия, а пра́ведницы возвеселя́тся и возра́дуются пред Бо́гом во ве́ки зову́ще Ему́: Аллилу́ия.
Возсия́л еси́ на Фаво́ре, Христе́ Бо́же наш, и ученицы́ Твоя́, ели́ка вмеща!ху, сла́ву Твою́ ви́деша; но и убоя́шася, и вострепета́ша, и ниц падо́ша. С то́ю же неизрече́нною, но пребо́льшею все́ю сла́вою прии́деши на о́блацех в день он суди́ти живы́х и ме́ртвых, и яви́ши зна́мение вели́кое, и́же есть Крест Твой Честны́й, от коне́ц земли́ и до коне́ц небе́с простира́яйся; его́же узре́вше, воспла́чут вся коле́на земна́я, и́бо страх явле́ния Лица́ Твоего́ земноро́дным страшне́е по премно́гу есть вся́каго в ми́ре сем разруше́ния и премене́ния. Ка́ко сре́ту Тя тогда́, Бо́же мой, кий плач и отве́т возда́м Ти, не моги́й, бе́дный, вмести́ти и ио́ты сла́вы Твоея́. Но на Твое́ несказа́нное милосе́рдие упова́я, вся́кий грех и́стинно ка́ющагося побежда́ющее, дерза́ю пре́жде конца́ возопи́ти Ти:
Свят еси́, Го́споди, Бо́же наш, во све́те живы́й непристу́пнем, – осени́ мя, гре́шнаго, све́том Лица́ Твоего́, и не опали́ огне́м Божества́ Твоего́, егда́ прии́деши во Сла́ве святе́й Своей.
Свят еси́, Го́споди, Бо́же наш, дая́й зна́мения на небеси́ и на земли́, посыла́яй о́гнь, я́зву и глад на лю́ди за мно́жество беззако́ний их, – сохрани́ мя от язв бу́дущих и от ча́ши гне́ва Твоего́ прокля́тия, приключи́тися иму́щих в после́днии дни ми́ра сего́.
Свят еси́, Го́споди, Бо́же наш, Сло́ве необыме́нный, да́руй ми сло́во бла́го отвеща́ти на Стра́шнем Суде́ Твое́м.
Свят еси́, Го́споди, Бо́же наш, глаго́ляй: побежда́яй насле́дит вся, и бу́ду Ему́ Бог, и той мне бу́дет в сы́на, – помози́ мне греха́ победи́телем яви́тися.
Свят еси́, Го́споди, Бо́же наш, реки́й: я́ко страшли́вых и неве́рных, скве́рных, уби́йц и блудоде́йц, идолослужи́телей и всех лжи́вых часть в е́зере, горя́щем огне́м и се́рою, ожида́ет, – спаси́ и изба́ви мя от ча́сти тоя́.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Хотя́щу Ти, о, Преблагослове́нный Го́споди Иису́се Христе́, Бо́же наш, в день па́кибытия́, во Второ́е прише́ствие, яви́тися ми́ру на о́блацех я́ко Суди́и и Мздовоздая́телю, – о, каковы́й Стра́шный Суд бу́дет тогда́,!Ангелом во тьмах и ты́сящах предстоя́щим, Апо́столом председя́щим, челове́ком во у́жасе вводи́мым, кни́гам разгиба́емым и дело́м и помысло́м истязу́емым? Кий суд бу́дет мне, зача́тому во гресе́х? Кто ми пла́мень, жгу́щий мя, угаси́т? Кто ми тьму просвети́т? Кто мя тогда́ защити́т, а́ще не Ты Сам – Любы́ и Ми́лость бе́зконечная! Моли́твами Пречи́стыя Ма́тери Твоея́ и Ангела-храни́теля моего́ спаси́ мя тогда́, зову́ща: Аллилу́ия.
Но́вое и после́днее торжество́ яви́ти сатане́ льсти́вому в ми́ре попусти́вый, Влады́ко мой Го́споди, егда́ пред кончи́ною ве́ка сего́ откры́ется челове́к безза́кония, сын поги́бели, си́речь – анти́христ, его́же прише́ствие со вся́кою си́лою и зна́мениями и чудесы́ ло́жными бу́дет; и́же, число́ звери́ное име́яй, соврати́т мно́гия лю́ди от пути́ пра́ваго, и печа́ть свою́ стра́шную на ты́я положи́т, гоне́ние на ве́рныя вели́кое воздви́гнет и ме́рзость запусте́ния на ме́сте свя́те поста́вит, и три ле́та с полови́ною влады́чествовати бу́дет, его́же и последи́ убие́ши Ду́хом уст Свои́х. О, го́ре мне, гре́шному, в день той тогда! Ка́ко спасе́ние обря́щу и отцу́ лжи противоста́ну, когда́ избра́нных часть прельсти́тся и пра́ведник едва́ спасе́тся?! Но, о, Преми́лостиве! Аще и не понесо́х тяготы́ и зно́я дневна́го, оба́че с нае́мники единона́десятаго часа́ сопри́чти мя и ве́ру кре́пку во дни искуше́ний во мне утверди́, да зову́ Ти такова́я:
Свят еси́, Го́споди, Бо́же наш, по неизрече́нному промышле́нию Твоему́ попусти́ти име́яй в после́днии дни воцари́тися сы́ну го́рдому и поги́бельному, да ве́рныя просла́вятся, неве́рныя же в коне́ц посрамя́тся.
Свят еси́, Го́споди, Бо́же наш, два свиде́теля тогда́ с небесе́ посла́ти име́яй, да избра́нныя укрепя́т и анти́христу окая́ннному противоста́нут, и и́стину Твою́ сме́ртию свое́ю засвидете́льствуют.
Свят еси́, Го́споди, Бо́же наш, пре́жде всех предреки́й нам сия́, бы́ти подоба́ющая, да зрим и не ужаса́емся, и, избра́нных ра́ди, сократи́ти дни о́ныя хотя́й.
Свят еси́, Го́споди, Бо́же наш, в терпе́нии ду́ши нам стяжа́ти запове́давый и до конца́ сия́ претерпе́вшему спасе́ние обеща́вый, – посли́ и мне дух кро́тости и терпе́ния с упова́нием перенести́ напа́сти ты́я.
Свят еси́, Го́споди, Бо́же наш, изми́ мя тогда́ от сете́й лука́вого ве́ка сего́ и печа́ти анти́христовы изба́ви мя.
Свят еси́, Го́споди, Бо́же наш, сохрани́ мя в ма́лом ста́де Твое́м, имже дати Ца́рство благоволи́л еси́.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Стра́ннаго и стра́шнаго Втора́го Твоего́, Го́споди, прише́ствия помышля́я сре́тение, трепе́щу, преще́ния Твоего́ бою́ся и гне́ва Твоего́. Егда́ прии́диши гре́шныя му́чити, пра́ведныя же спасти́, – пла́чу и рыда́ю, день о́ный воспомина́я, и молю́ Тя пре́жде сего́: Спа́се мой, спаси́ мя! Да не прии́ду тогда́ в зе́млю пла́ча, да не ви́жду ме́ста тьмы́, Христе́ Спа́се мой! Ниже́ свя́зан бу́ду рука́ма и нога́ма вне черто́га Твоего́ изверже́нный, оде́жду нетле́ния имы́й оскверне́нную и не моги́й проглаго́лати, я́коже глаго́лю Ти ны́не: Аллилу́иа.
Весь еси́ жела́ние и сла́дость моя́, Сладча́йший Го́споди Иису́се, Упова́ние всех конце́в земли́. Поуча́еши ны́не о дне сла́внаго прише́ствия Твоего́, глаго́ля: бди́те и моли́теся, не ве́сте бо дне и ча́са, во́ньже Сын Челове́ческий прии́дет. Сие́ же ве́дите: я́ко а́ще ве́дал бы домовлады́ка, в ку́ю стра́жу но́щи тать прии́дет – бдел бых у́бо и не бы дал подкопа́ти хра́ма своего́; сего́ ра́ди и вы бу́дите гото́ви. Внима́я у́бо сему́ словеси́ Твое́му, благода́рне взыва́ю Ти:
Свят еси́, Го́споди, Бо́же наш, на вся́кое вре́мя и на вся́кий час бде́ти и ожида́ти дне вели́каго прише́ствия Твоего́ ве́рным повеле́вый.
Свят еси́, Го́споди, Бо́же наш, о дне том и ча́се никому́ не откры́вый: ни лю́дем пра́ведным, ниже́ Ангелом Свои́м. Но я́коже мо́лния исхо́дит от восто́к и явля́ется до за́пад, та́ко прише́ствие Свое́, иму́щее бы́ти я́ве и внеза́пу, изобрази́вый.
Свят еси́, Го́споди, Бо́же наш, обнови́вый водо́ю во дни Но́я мир, греха́ми растле́вший, егда́ внеза́пу потопи́ лю́ди нечести́выя, ны́не же огне́м попали́ти хотя́й зе́млю беззако́нную с челове́ки неве́рными.
Свят еси́, Го́споди, Бо́же наш, пра́вы пути́ Твоя́ и словеса́ Твоя́ и́стинны и непрело́жны и не ми́мо и́дут они́, а́ще не́бо и зе́мля пре́йдут.
Свят еси́, Го́споди, Бо́же наш, не да́ждь ми отягчи́ти се́рдце мое́ объяде́нием, пия́нством и печа́льми жите́йскими, и́ли ины́м непотре́бством, да не внеза́пу на́йдет на мя день той.
Свят еси́, Го́споди, Бо́же наш, ре́кий: я́ко на Свята́го Ду́ха хули́вшему не оста́вится ни в сем ве́це, ни в бу́дущем, – соблюди́ мя не износи́ти хулу́ ни слове́сную, ни мы́сленную на имя Свято́е Твое́.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Все естество́ земны́х и преиспо́дних у́жасом мно́гим содрогне́тся, и Си́лы Небе́сныя подви́гнутся в той час, егда́ со́лнце поме́ркнет, луна́ не даст све́та своего́ и зве́зды спаду́т с небе́с; небе́са же с шу́мом ми́мо и́дут земли́, пла́менем горя́щей, и челове́ком, рыда́ющим, и ко Влады́це вся́ческих, к Бо́гу Стра́шному, со тре́петом вопию́щим: Аллилу́иа.
Вити́и ми́ра безумству́ют, я́коже и во дни Дави́да царя́ глаго́люще: несть Бог, не ви́дим Его́! О, слепи́и! Почто́ не помышля́ете, я́ко неве́рием окамене́ннаго се́рдца своего́ себе́ о́гнь ве́чный гото́вите, и богоотступле́нием и про́чими беззако́ниями кончи́ну ми́ра приближа́ете? Не слы́шасте ли из Писа́ний: я́ко неви́димая Его́ от созда́ния ми́ра творе́ньми помышля́ема, ви́дима суть: и присносу́щная си́ла Его́ и Божество́. Очи́стите, у́бо, сердца́ своя́ и Бо́га у́зрите. Но пощади́, Го́споди, от такова́го ожесточе́ннаго заблужде́ния и неве́рия ум, се́рдце и ду́шу мою́, да с ве́рою, упова́нием и любо́вию о́браз прише́ствия Твоего́ всегда́ себе́ представля́ю и зову́ Ти:
Свят еси́, Го́споди, Боже наш, пра́ведным судо́м Твои́м всем нам в зе́млю, от нея́же взя́ты есмы́, возврати́тися повеле́вый и па́ки в день всео́бщаго Воскресе́ния из нея́ воста́ти положи́вый.
Свят еси́, Го́споди, Боже наш, со́лнцу, луне́ и зве́здам не́когда поме́ркнути, а земли́ и всему́, я́же на ней, огне́м преобрази́тися предопредели́вый, да вме́сто их яви́тся не́бо но́во и земля́ но́ва, в нихже пра́вда живе́т.
Свят еси́, Го́споди, Бо́же наш, утаи́вый день, в оньже предста́нут на суд вся племена́ и язы́цы, да восприи́мет ки́йждо по дело́м свои́м.
Свят еси, Го́споди, Бо́же наш, Па́стырю до́брый и Судие́ Пра́веднейший, име́яй се́сти в день воздая́ния Твоего́ на Престо́ле разсужде́ния, во е́же разлучи́ти же вся́ наро́ды друг от дру́га, я́коже па́стырь разлуча́ет о́вцы от ко́злищ; да поста́виши о́вцы одесну́ю себе́, а ко́злища ошу́юю, и рече́ши пра́ведным сла́дкий глас: прииди́те, благослове́ннии Отца Моего́, и насле́дуйте Ца́рствие, угото́ванное вам от сложе́ния ми́ра.
Свят еси́, Го́споди, Бо́же наш, от Него́ же нераска́янные гре́шницы услы́шат тогда́ со стра́хом: отъиди́те от Мене́, прокля́тии, во огнь ве́чный, угото́ванный диа́волу и а́ггелом его́.
Свят еси́, Го́споди, Бо́же наш, обеща́вый Це́рковь Свою́ до конца́ ми́ра непоколеби́му соблюсти́, во е́же неодоле́нней бы́ти ей от всех врат а́довых.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Спасти́ хотя́ дре́вле Ло́та пра́веднаго от запале́ния с содо́млянами нечести́выми, Влады́ко Го́споди, изве́л еси́ его́ вон из гра́да и рекл еси́ рабу́ Своему́ Авраа́му: я́ко а́ще бы и де́сять пра́ведник име́л град сей, не бы тогда́ поги́бл бысть, но оскуде́ния ра́ди святы́х в нем и ме́рзости гре́шных огню́ предае́тся. Последи́ же и ученико́м Свои́м в при́тче пле́вел се́льных глаго́лал еси́, я́ко пле́велы и пшени́ца обоя́ ку́пно и́мут расти́ до жа́твы, да никогда́ пре́жде жа́твы восторга́юще пле́велы восто́ргнется ку́пно с ни́ми и пшени́ца. От сего́ у́бо и назида́емся: я́ко то́кмо пра́ведники Твои́ми мир сей стои́т досе́ле, и ра́ди святы́х Твои́х, в ми́ре живу́щих, дае́ши еще́ вре́мя и мне, гре́шному, пока́ятися, сего́ ра́ди, неизследи́ме Бо́же, благода́рно вопию́ Ти: Аллилу́иа.
Царю́ царе́й, Го́споди Спа́се, Агнче непоро́чный, на Престо́ле Сла́вы седя́й, я́ко лев, от коле́на Иу́дова и ко́рене Дави́дова возсия́вый и мир победи́вый. Ты еди́н достоин еси́ разгну́ти Кни́гу Жи́зни вели́кую и разреши́ти печа́ти ея! Ты, я́ко! Агнец закла́нный, досто́ин еси́ прия́ти си́лу, бога́тство и прему́дрость, кре́пость и честь, и сла́ву, и благоволе́ние – ихже воспева́ют Ти чи́ны !Ангельстии и ду́си пра́ведных на небеси́. Сподо́би у́бо и мя́, недосто́йнаго, с ни́ми сла́вити Тя в день вели́кий и в сей час зва́ти та́ко:
Свят еси́, Го́споди, Бо́же наш, Соде́телю и Промысли́телю наш, сия́яй све́том со́лнечным и одождя́й на до́брыя и злы́я; наказу́яй и ми́луяй, нарица́яй не су́щая, я́ко су́щая; низводя́й да́же до а́да и па́ки возводя́й.
Свят еси́, Го́споди, Бо́же наш, име́яй пра́ведники просия́ти, я́ко со́лнце во Ца́рствии Свое́м, – не погуби́ мя ра́ди святы́х Твои́х, но в Кни́зе Живо́тней напи́ши мя и и́мя Твое́ начерта́й на челе́ мое́м.
Свят еси́, Го́споди, Бо́же наш, день весь жития́ моего́ соверше́н, свят, ми́рен и безгре́шен да́руй ми.
Свят еси́, Го́споди, Бо́же наш, Ангела ми́рна, ве́рна наста́вника и храни́теля души́ и те́ла моего́ на вся́ко вре́мя неотлу́чна посли́ ми.
Свят еси́, Го́споди, Бо́же наш, по благода́ти Твое́й, изоби́льно на ны излия́нной, пре́зри моя́ прегреше́ния и пода́ждь вся до́брая и поле́зная души́ мое́й.
Свят еси́, Го́споди, Бо́же наш, про́чее вре́мя живота́ моего́ сподо́би мя в ми́ре и покая́нии сконча́ти, ожида́ющу дне сла́внаго явле́ния Твоего́.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Пе́ние всеумиле́нное приношу́ Ти, Го́споди, Спа́се и Соде́телю мой, и молю́ Тя, егда́ прии́деши суди́ти ми́ру всему́ на о́блацех, не постыди́ мя, сту́дныя дела́ сотво́ршаго, и не погуби́ мя, я́коже погуби́л еси́ Вавило́н – вели́кую блудни́цу, но, ве́ры ра́ди моея́ и любве́ к Тебе́, жи́теля Сио́на Го́рняго соде́лай мя, иде́же есть глас ве́лий наро́да мно́гаго, я́ко глас вод мно́гих и я́ко глас гро́ма кре́пкаго, глаго́лющих: Аллилу́иа.
Свети́льник мой угасе́, еле́я же благи́х дел, во е́же возжещи́ той, несть ми; и где обря́щуся окая́нный, сном грехо́вным отягче́нный, егда́ пости́гнет мя внеза́пу полу́нощь – час кончи́ны моея́, или Суд Бо́жий, я́ко тать на́йдет на вся живуща́я на земли́? Но да не услы́шу аз, я́коже юро́дивыя де́вы, гро́знаго гла́са Жениха́: не вем тя. Помози́ ми, о, Го́споди, напо́лнити сосу́ды души́ моея́ еле́ем благи́х дел, па́че же милосе́рдия и смире́ния, и зва́ти Ти:
Свят еси́, Го́споди, Бо́же наш, да́ждь ми послужи́ти ме́ньшей бра́тии Твое́й, я́коже Самому́ Тебе́: а́лчущии и жа́ждущии насы́тити, стра́нныя приюти́ти, наги́я оде́яти, больны́я и в темни́цех стра́ждущия посеща́ти, да сподо́блюся ча́сти десны́я стоя́ния на Суде́ Твое́м.
Свят еси́, Го́споди, Бо́же наш, отъими́ от мене́ дух го́рдости, пра́здности и уны́ния бесо́вскаго и пода́ждь ми дух смиренному́дрия, целому́дрия, кро́тости и ра́дости духо́вныя.
Свят еси́, Го́споди, Бо́же наш, вложи́ в мысль мою́ му́дрость сы́на Сира́хова: по́мнити после́дняя моя́, да́бы во ве́ки не согреши́ти.
Свят еси́, Го́споди, Бо́же наш, Женише́, кра́сный добро́тою па́че всех челове́к, гряды́й в полу́нощи, – с му́дрыми де́вами в рай введи́ мя.
Свят еси́, Го́споди, Бо́же наш, приими́ мольбу́ о нас и предста́тельство всех святы́х Твои́х па́че же простира́ющую к Тебе́ всегда́ о нас ру́це Своя́ Де́ву Пречи́стую, Тебе́ ро́ждшую.
Свя́т еси́, Го́споди, Бо́же наш, огради́ нас святы́ми Твои́ми Ангелы и отжени́ от нас духо́в зло́бы поднебе́сных.
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
Благода́ть Твою́, Го́споди Бо́же наш, гре́шныя ми́лующую, све́дуще, а́ще и недосто́йное житие́ яви́хом; оба́че наде́жду Воскресе́ния и жи́зни ве́чныя иму́ще, христиа́нския кончи́ны живота́ на́шего, безболе́знены, непосты́дны, ми́рны, Боже́ственных Та́ин прича́стны, и до́браго отве́та на Стра́шнем Суди́щи Твое́м всегда́ про́сим, во умиле́нии зову́ще: Аллилу́иа.
Пою́ще Твое́ непостижи́мое о лю́дех и о ми́ре, Тобо́ю сотворе́нном, промышле́ние, Вседержи́телю Отче, Сы́не и Ду́ше, Го́споди наш, сла́влю Тя, созда́ние и раб Твой, и, я́ко ча́до Це́ркве Правосла́вныя, ча́ю Воскресе́ния ме́ртвых и жи́зни бу́дущаго ве́ка; в ве́це же настоя́щем молю́ Тя, Бла́же: изба́ви мя искуше́ний, от ми́ра, пло́ти и диа́вола находя́щих на мя, и укрепи́ в ве́ре несумне́нней и любви́ к Тебе́; да благоче́стне, чи́сто и свя́то про́чее вре́мя живота́ поживу и сподо́блюся ча́сти пра́выя в день пакибытия́, зову́ща Ти:
Свят еси́, Го́споди, Бо́же наш, Мздовоздая́телю Пра́ведный, суди́ти име́яй на вели́цем Престо́ле Свое́м, от Его́же Лица́ побе́гнут не́бо и земля́, и ме́сто их не обрете́тся.
Свят еси́, Го́споди, Бо́же наш, все́м нам яви́тися пред Суди́ще Твое́ положи́вый, да возда́ши коему́ждо я́же с те́лом соде́ла: блага́я или зла́я; е́же предопредели́л еси́ мне пре́жде дне того́ сконча́тися, – да́ждь ми безбе́дно прейти́ мыта́рства возду́шныя бесо́вския и оправда́тися на пе́рвом, ча́стном, суде́ Твое́м.
Свят еси́, Го́споди, Бо́же наш, сатану́ и а́ггелы его́, зве́ря и лжепроро́ка во е́зеро о́гненное на муче́ния ве́чныя Арха́нгелом Твои́м Михаи́лом вве́ргнути име́яй; того́ предста́тельством изба́ви мя му́ки стра́шныя, та́ртара и тьмы́ кроме́шныя и гее́нны о́гненныя, иде́же че́рвь не умира́ет и огнь не угаса́ет.
Свят еси́, Го́споди, Бо́же наш, всех Твои́х ра́ди святы́х, изря́днее же святы́х Твои́х щедро́т и Кро́ве Твоея́, за ны пролия́нныя, жи́теля мя сотвори́ Иерусали́ма Небе́снаго, иде́же несть ни сме́рти, ни пла́ча, ни во́пля, ни боле́зни, ни скве́рны не́кия, но жизнь безконе́чная, и сла́ва Твоя́ при́сно осеня́ет его́.
Свят еси́, Го́споди, Бо́же наш, пре́жде сих всех помози́ ми соблюда́ти словеса́ ева́нгельския, твори́ти во́лю Твою́ и приле́жно внима́ти проро́честву Открове́ния Иоа́ннова, яко вре́мя близ есть.
Свят еси́, Го́споди, Бо́же наш, реки́й в коне́ц Богосло́ву: я́ко, до́ндеже суд прии́дет, скве́рный – да скверни́тся еще́, а святы́й – да святи́тся еще́. Ей, гряду́ ско́ро, и мзда Моя́ со Мно́ю есть. Аминь! Ей, гряди́, Го́споди Иису́се, мо́лит Тя Це́рковь Твоя́, зову́щи:
Свят, Свят, Свят еси́, Го́споди, Бо́же Вседержи́телю, Иже бе и сый и гряды́й, поми́луй мя!
О Вели́кий и Непости́жимый Боже! Альфа и Оме́га, нача́ло и коне́ц всему́ су́щему, Иже вчера́, днесь и во ве́ки То́й же, и у Него́ же не́сть премене́ния, Его́же и ле́та не оскуде́ют. Приими́ сие́ ма́лое ака́фистное моле́ние мое́ в па́мять гряду́щаго и Стра́шнаго Суда́ Твоего́, всегда́ мно́ю Тебе́ приноси́мое, и, по мно́жеству щедро́т Твои́х, очи́сти беззако́ния моя́, и и́мя мое́ в Кни́зе Живота́ напиши́, и в юдо́ль пла́ча не осуди́, егда́ суди́ти ся́деши; и от пресве́тлаго лица́ Твоего́ не отлучи́ мене́. Да егда́ сконча́ются дни ве́ка сего́, и небеса́ и земля́ сия́ ми́мо иду́т, и свети́ла, я́ко воск иста́ят, тогда́, о, Всеми́лостиве, да узрю́ и аз сте́ны Го́рняго Иерусали́ма, и ку́пно со избра́нными десны́ми Твои́ми овца́ми вни́ду во святы́й град сей и тамо насы́щуся сла́вы Твоея́ и бу́ду пе́ти Ти песнь но́ву во вся веки веко́в: Аллилу́иа.
Сей кондак читается трижды, та́же:
Арха́нгельския трубы́ возглаше́ние, на Суд Госпо́день Стра́шный и После́дний, живы́я и ме́ртвыя от всех коне́ц земли́ собира́ющее, уже́ во ушесе́х предно́сится. Душе́ моя́, душе́ моя́, воста́ни, что спи́ши? Коне́ц приближа́ется, и и́маши смути́тися. Воспряни́ у́бо, я́ко ма́ло есть еще́ вре́мя на покая́ние; бо́дрствуй, моли́ся и трезви́ся и дела́ до́брая твори́, непреста́нно вопию́щи ко Влады́це своему́ такова́я:
Свят еси́, Го́споди, Боже наш, и Пресвя́т, и да святи́тся и в сем гре́шном и во зле лежа́щем ми́ре имя Твое́, па́че всякаго и́мене.
Свят еси́, Го́споди, Боже наш, да прии́дет Твое́ сла́вное Ца́рствие.
Свят еси́, Го́споди, Боже наш, да бу́дет во всем во́ля Твоя́ святая на земли́, я́коже пребыва́ет и на небеси́.
Свят еси́, Го́споди, Бо́же наш, хлеб земны́й насу́щный дая́й нам, па́че же небе́сный да́ждь ми на всяк день.
Свят еси́, Го́споди, Боже наш, оста́ви ми согреше́ния моя, я́коже и аз оставля́ю бра́ту своему́ согреше́ния его́.
Свят еси́, Го́споди, Бо́же наш, не введи́ мя в напа́сть, но изба́ви мя от сете́й лука́ваго миродержи́теля тьмы́ ве́ка сего́, и́бо пои́стине опа́сно хо́дим и дни́е на́ша лука́ви суть.
Свят, Свят, Свят еси́, Го́споди, Бо́же Вседержи́телю, Иже бе и сы́й и гряды́й, поми́луй мя!
Предве́чный Царю́ веко́в, Тво́рче и Го́споди, Судие́ Пра́веднейший и нелицеприя́тный, мно́жество соде́янных мно́ю лю́тых помышля́я, окая́нный аз, трепе́щу Стра́шнаго Дне́ Су́днаго, но, наде́яся на ми́лость неизрече́ннаго благоутро́бия Твоего́, дави́дски молю́ Тя: по вели́цей Твое́й ми́лости прости́ мя недосто́йнаго, и не осуди́ мя по дея́нием мои́м, яко да благо́ю со́вестию очище́н, на всяк день и час! Ангельскую песнь приношу́ Ти: Свят, Свят, Свят еси, Го́споди, Бо́же Вседержи́телю, Иже бе и сы́й и гряды́й, поми́луй мя!
Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Стих: Услы́ши, Бо́же, глас мой, внегда́ моли́ти ми ся к Тебе́.
Евангелие от Матфея, зачало 106, глава 25, стихи 31–46.
Сла́ва: Моли́твами Апо́столов, Милостиве, очисти множество согрешений наших.
И ны́не: Моли́твами Богоро́дицы, Милостиве, очисти множество согрешений наших.
Поми́луй мя, Бо́же, по вели́цей милости Твое́й, и по мно́жеству щедро́т Твои́х очи́сти беззако́ние мое́.
Возгла́сят тру́бы, и истоща́тся гро́бы, и воскре́снет челове́ческое все естество́ трепе́щущее, до́брая соде́явшии, в ра́дости ра́дуются, ча́юще мзду восприя́ти: согреши́вшии же трепе́щут, лю́те рыда́юще, в му́ку посыла́еми, и от избра́нных разлуча́еми. Го́споди Сла́вы, уще́дри нас я́ко благи́й, и ча́сти сподо́би возлюби́вших Тя.
Диакон: Господу помолимся.
Лик: Го́споди помилуй.
И чтем молитву сию:
Яко на Страшнем Твоем, и нелицеприемнем предстояй Судилищи, Христе Боже, и осуждения подъемля, и слово творя о содеянных мною злых: сице днесь, прежде даже не приити́ дневи осуждения моего, у святаго Твоего Жертвенника предстоя пред Тобою, и пред страшными и святыми Ангелы Твоими, преклонен от своея совести, приношу лукавая моя и беззаконная деяния, являяй сия и обличаяй. Виждь, Господи, смирение мое, и остави вся грехи моя, виждь яко умножишася паче влас главы моея беззакония моя. Кое убо не содеях зло? Кий грех не сотворих? Кое зло не вообразих в души моей? Всякое мое чувство и всякий уд оскверних, растлих, непотребен сотворих, делателище быв всячески диаволе. И вем, Господи, яко беззакония моя превзыдоша главу мою. Но безмерно есть множество щедрот Твоих, и милость неизреченна незлобивыя Твоея благости, и несть грех, побеждающь человеколюбие Твое. Темже, Пречудный Царю, незлобиве Господи, удиви и на мне, грешнем, милости Твоя, покажи благости Твоея силу и яви крепость благоутробнаго милосердия Твоего, и обращающася приими мя, грешнаго. Приими мя, якоже приял еси блуднаго, разбойника, блудницу. Приими мя, пребезмерне и словом, и делом, и похотию безместною, и помышлением безсловесным согрешивша Тебе. И якоже во единонадесятый час пришедших приял еси, ничтоже достойно соделавших, тако приими и мене, грешнаго: много бо согреших, и осквернихся, и опечалих Духа Твоего Святаго, и огорчих человеколюбную утробу Твою, и делом, и словом, и помышлением, в нощи и во дни, явленне же и неявленне, волею же и неволею. И вем, яко представиши грехи моя предо мною таковы, яковы же мною содеяшася, и истяжеши слово со мною, о ихже разумом непрощенно согреших. Но, Господи, Господи, да не праведным судом Твоим, ниже яростию Твоею обличиши мя, ниже гневом Твоим накажеши мя. Помилуй мя, Господи, яко не токмо немощен есмь, но и Твое есмь создание. Ты убо, Господи, утвердил еси на мне страх Твой, аз же лукавое пред Тобою сотворих, Тебе убо единому согреших. Но молю Тя, не вниди в суд с рабом Твоим. Аще бо беззакония назриши, Господи, Господи, кто постоит? Аз бо есмь пучина греха и несмь достоин, ниже доволен воззрети и видети на высоту небесную от множества грехов моих, ихже несть числа. Киими бо не растлихся грехи? Киими не содержахся злыми? Всяк грех содеях, всякую нечистоту вложих в душу мою: непотребен бых Тебе, Богу моему, и человеком. Кто возставит мя, в сицевая злая и толикая падшаго согрешения? Господи Боже мой, на Тя уповах: аще есть ми спасения упование, аще побеждает человеколюбие Твое множества беззаконий моих, буди ми Спаситель, и по щедротам Твоим и милостем Твоим, ослаби, остави, прости ми вся, елика Ти согреших, яко многих зол исполнися душа моя, и несть во мне спасения надежды. Помилуй мя, Боже, по велицей милости Твоей, и не воздаждь ми по делом моим, и не осуди мя по деянием моим, но обрати, заступи, избави душу мою от совозрастающих ей зол и лютых восприятий. Спаси мя ради милости Твоея: да идеже умножится грех, преизобилует благодать Твоя. Даруй ми слезы сокрушения и умиления сердечнаго, возводящая падшия ко своему наследию, ими же очищуся от всякаго греха, ибо страшно и грозно место имам проити́, тела разлучився: множество тогда, мрачное и безчеловечное демонов срящет мя, и никтоже в помощь спутствуяй или избавляяй, но дела моя осудят мя. Сего ради прежде конца в покаянии приими мя и никогдаже отлучайся мене, раба Твоего, но всегда во мне почивай, не предаждь мене крамоле змиине и желанию сатанину не остави мене, яко семя тли во мне есть. Ты убо, Господи Боже покланяемый, Царю Святый, Иисусе Христе, сохрани мя Духом Твоим Святым, Имже освятил еси Твоя ученики. Даждь, Господи, и мне, недостойному рабу Твоему, спасение Твое: ум мой светом разумения Святаго Евангелия Твоего просвети, душу любовию Креста Твоего озари, сердце чистотою словесе Твоего убели, тело мое Твоею страстию безстрастною исцели, мысль мою Твоим смирением сохрани, и воздвигни мя к деланию заповедей Твоих, и даруй ми бодренным сердцем и трезвенной мыслию всю настоящаго жития нощь прейти, ожидающему пришествия светлаго и явленнаго дне Твоего. Ты убо еси, Господи, Свет, паче всякаго света, Радость, паче всякия радости, Упование, паче всякаго упования, Жизнь истинная и Спасение, пребывающее во веки веков. Аминь!
Ирмос: От Иуде́и доше́дше о́троцы, / в Вавило́не иногда́, / верою Тро́ическою пламень пе́щный попра́ша, поюще: / отце́в Бо́же, благослове́н еси.
Не наде́йся, ду́ше моя́, / на тле́нное бога́тство и на непра́ведное собра́ние, / вся́ бо сия́ не ве́си, кому́ оста́виши, / но возопи́й: поми́луй мя, Христе́ Бо́же, недосто́йнаго.
Не упова́й, душе́ моя́, / на теле́сное здра́вие / и на скоромимоходя́щую красоту́, / ви́диши бо, я́ко си́льнии и млади́и умира́ют; / но возопи́й: поми́луй мя, Христе́ Бо́же, недосто́йнаго.
Слава: Воспомяни́, душе́ моя́, ве́чное житие́, / Ца́рство Небе́сное, угото́ванное святы́м, / и тьму кроме́шную и гнев Бо́жий злым, / и возопи́й: поми́луй мя, Христе́ Бо́же, недосто́йнаго.
И ныне: Припади́, душе́ моя́, к Бо́жией Ма́тери и помоли́ся Той, / е́сть бо ско́рая помо́щница ка́ющимся, / умо́лит Сы́на Христа́ Бо́га, / и поми́лует мя недосто́йнаго.
Ирмос: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся́ ве́ки.
Ка́ко не и́мам пла́катися, егда́ помышля́ю смерть, / ви́дех бо во гро́бе лежа́ща бра́та моего́, / безсла́вна и безобра́зна? / Что́ у́бо ча́ю, и на что́ наде́юся? / То́кмо да́ждь ми, Го́споди, пре́жде конца́ покая́ние. (Дважды)
Слава: Ве́рую, / я́ко прии́деши суди́ти живы́х и ме́ртвых, / и вси во свое́м чи́ну ста́нут, / ста́рии и млади́и, влады́ки и кня́зи, / де́вы и свяще́нницы; / где обря́щуся аз? / Сего́ ра́ди вопию́: / да́ждь ми, Го́споди, пре́жде конца́ покая́ние.
И ныне: Пречи́стая Богоро́дице, / приими́ недосто́йную моли́тву мою́ / и сохрани́ мя от на́глыя сме́рти, / и да́руй ми пре́жде конца́ покая́ние.
Катавасия, та́же пое́м: Честнейшую…
Ирмос: Вои́стинну Богоро́дицу Тя испове́дуем, / спасе́ннии Тобо́ю, Де́во Чи́стая, / с безпло́тными ли́ки Тя велича́юще.
Ны́не к вам прибе́гаю, Ангели, Арха́нгели / и вся́ Небе́сныя Си́лы, / у Престо́ла Бо́жия стоя́щии, / моли́теся ко Творцу́ своему́, / да изба́вит ду́шу мою́ от му́ки ве́чныя.
Ны́не пла́чуся к вам, / святи́и патриа́рси, ца́рие и Проро́цы, / Апо́столи и святи́телие / и вси избра́ннии Христо́вы: / помози́те ми на су́де, / да спасе́т ду́шу мою́ от си́лы вра́жия.
Слава: Ны́не к вам воздежу́ ру́це, / святи́и му́ченицы, / пусты́нницы, де́вственницы, / пра́ведницы и вси святи́и, / моля́щиися ко Го́споду за весь мир, / да поми́лует мя в час сме́рти моея́.
И ныне: Ма́ти Бо́жия, / помози́ ми, на Тя си́льне наде́ющемуся, / умоли́ Сы́на Своего́, / да поста́вит мя недосто́йнаго одесну́ю Себе́, / егда́ ся́дет судя́й живы́х и ме́ртвых, ами́нь.
Таже: Достойно есть… Малая ектения.
И по возгласе стихиры на хвалитех, глас 6:
Стих: Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа.
Помышля́ю день о́ный и час, егда́ и́мамы вси на́зи и я́ко осужде́ни, неумы́тному Судии́ предста́ти, тогда́ труба́ возшуми́т вельми́, и основа́ния земли́ подви́жатся, и ме́ртвии от гробо́в воскре́снут, и во́зрастом еди́нем вси бу́дут, и всех та́йная явле́нна предста́нут пред Тобо́ю и возрыда́ют, и воспла́чутся, и во огнь кроме́шный отъи́дут, и́же николиже пока́яшася: и в ра́дость и весе́лие пра́ведных жре́бий внидет в черто́г небе́сный.
Стих: Испове́мся Тебе́, Го́споди, все́м се́рдцем моим, повем вся чудеса Твоя.
Дании́л проро́к, муж жела́ний быв, власти́тельное Бо́жие ви́дев, си́це вопия́ше: Судия́ се́де и кни́ги разгну́шася. Блюди́, душе́ моя́, пости́ши ли ся? бли́жняго твоего́ не пре́зри; от бра́шен возде́ржиши ли ся? бра́та твоего́ не осужда́й, да не в огнь отсыла́ема сгори́ши, я́ко воск, но да без преткнове́ния веде́т тя Христос в Ца́рствие Свое́.
Сла́ва, и ны́не, глас 8:
Егда́ поста́вятся престо́ли и отве́рзутся кни́ги, и Бог на Суде́ ся́дет, о кий страх тогда́!Ангелом, предстоя́щим в стра́се, и реце́ о́гненней влеку́щей! Что́ сотвори́м тогда́, во мно́гих гресе́х пови́ннии челове́цы? Егда́ же услы́шим зову́ща Его́ благослове́нныя Отца́ в Ца́рство, гре́шныя же отсыла́юща в му́ку, кто потерпи́т стра́шнаго о́наго изрече́ния? Но, еди́не Человеколю́бче Спасе́, Царю́ веко́в, пре́жде да́же кончи́на не приспе́ет, покая́нием обрати́в, поми́луй мя.
Славословие великое и отпуст.
Войти с помощью соц. сетей: