Икос 8

Весь освящен благодатию Духа Святаго, Церковь Иерусалимскую добре упасл еси, святе Иакове, день и нощь укрепляя новопросвещенныя в благодати Христовой. Мы же восхваляем тя, горнюю премудрость стяжавшаго, пении сими:

Радуйся, яко Божественный разум стяжал еси;

радуйся, яко словесы богомудрыми люди, от неведения избавляя, ко Христу руководил еси.

Радуйся, яко труды твоими к водам спасения овцы словесныя приводил еси;

радуйся, яко жребий пастырскаго о душа́х попечения праведно ти дадеся.

Радуйся, коегождо к безропотному несению креста его наставляяй;

радуйся, солнце миру учении твоими возсиявый.

Радуйся, искусный ловителю душ человеческих;

радуйся, Божественныя благодати светило.

Ра́дуйся, апо́столе Иа́кове, Це́ркве Иерусали́мския пе́рвый иера́рше.

Кондак 9

Всем сердцем возлюбивый Христа Бога, яко брат Его по плоти, и о спасении творения Его ревновавый, наставлял еси народ Божий в вере христианстей: яко быти во испытаниих терпеливу, на Бога уповая и во смирении тяготы нося. Мы же, тобою наученнии, милосердному Человеколюбцу Богу непрестанно взываем: Аллилу́ия.

Икос 9

Вития многовещанныя не возмогут воспети твоея, богоблаженне Иакове, мудрости, егда вразумлял еси, яко не во единем книжнем научении и внешнем исповедании вера есть спасительная, обаче должна есть вера наша поспешеству́ема любовию и де́лы во имя Христово быти. Мы же, тебе, яко Богомудрому наставнику, благодарно воспеваем:

Радуйся, якоже бо тело без духа мертво есть, тако и вера без дел мертва есть, возвещаеши;

радуйся, яко во искушения различная впадающия радость имети научаеши.

Радуйся, яко блажен муж, иже претерпит искушения, зане приимет венец жизни, реки́й;

радуйся, яко «искушение вашея веры соделовает терпение», – мудро нам глаголеши.

Радуйся, яко ве́дущему убо добро творити и не творящему – грех есть, нас умудряеши;

радуйся, яко любы́ мира сего – вражда Богу есть, нас вразумляеши.

Радуйся, яко молитися друг за друга, много бо может молитва праведнаго поспешествуема, нас призываеши;

радуйся, яко обративый грешника от заблуждения пути его, спасает душу от смерти, нам взываеши.

Ра́дуйся, апо́столе Иа́кове, Це́ркве Иерусали́мския пе́рвый иера́рше.

Кондак 10

Спасти хотяй всякаго человека, грядущаго в мир, Всевидец Господь дарова ти, Иакове славне, благодать велию укрепляти обращенныя в вере: ты бо на страдания предстоящия коегождо приуготовляя, призывал еси всех к терпению и упованию на Бога, всех и вся содержащему в деснице Своей. И нас, недостойных, сподоби молитвами твоими разумно пети Богу: Аллилу́ия.

Икос 10

Стена необоримая Церкви Иерусалимстей был еси, священномучениче преславне, и тако научал еси люди твоя спасительней вере Христовой: «Вера чиста и нескверна пред Богом есть, еже посещати сирых и вдовиц в скорбех их и нескверна блюсти себе от мира». Мы же, тебе, о нас молящемуся, неустанно взываем:

Радуйся, яко «суд без милости не сотворшему милости», – рекий;

радуйся, яко «гнев мужа правды Божия не соде́ловает», – вразумляяй.

Радуйся, яко «плод правды в мире сеется творящим мир», – научаяй;

радуйся, яко «Господь гордым противится, смиренным же дает благодать», – глаголяй.

Радуйся, яко «смиритеся пред Господем, и вознесет вы», – взываяй;

радуйся, путеводителю наш к Небеси.

Радуйся, слова Божия истолкователю неложный;

радуйся, на подвиг деятельныя любве подвизаяй.

Ра́дуйся, апо́столе Иа́кове, Це́ркве Иерусали́мския пе́рвый иера́рше.

Кондак 11

Пение всеумиле́нное приносил еси Пресвятей Троице во вся дни земнаго жития твоего; отпа́дшии же от благодати вожди иудейстии, видевше, яко множество мужей и жен к Церкви Христовой прилагается твоими, всеславне апостоле, трудами, злоумы́слиша конец положити сему: нестерпим бо бысть им праведник истинный, Господеви верно служай. Нас же, святителю Иакове, благослови, укрепи и настави в вере спасительней возрастати, поюще Богу: Аллилу́ия.

Икос 11

Светло Пасху Христову празднуя, во дни ты́я неустанно проповедал еси, Иакове, глаголы жизни вечныя во граде Иерусалимстем собравшимся коленом иудейским и язычников множеству; начальницы же иудейстии совет положиша убити тя, пастыря Града Святаго. Мы же, тебе, яко мужественному воину Христову, усердно вопием:

Радуйся, истину Христову пред вожди небоязненно вещавый;

радуйся, блистанием твоим тьму неведения просветивый.

Радуйся, правил церковных нелицеприятный блюстителю;

радуйся, яко тобою Церковь Христова дивно красуется.

Радуйся, яко Богомудрыми ученьми умы верных к небеси возводиши;

радуйся, яко крепостию проповеди твоея прелесть лжеучи́телей разрушил еси.

Радуйся, святый иера́рше и проповедниче, многия в послушание веры уловивый;

радуйся, луче, от Солнца Правды исходяй, всю землю просвещающая.

Ра́дуйся, апо́столе Иа́кове, Це́ркве Иерусали́мския пе́рвый иера́рше.

Кондак 12

Благодатию Божиею и силою, от Бога тебе дарова́нною, облеклся еси, страстотерпче Иакове, Христа ради готовый мучения всяческая претерпети, егда лестию поставлен был еси на криле́ храма святаго нечестивыми, вопрошающими тя: «Рцы нам о Распятом». Мы же Богу, в мученичестем подвизе тя укрепившему, гласом велиим воспеваем: Аллилу́ия.