Икона великомученицы Анастасии
Акафист великомученице Анастасии Узорешительнице
Кондак 1
Избра́нней угоднице Христовой, всеблаже́нней великому́ченице Анастаси́и похва́льное пение прино́сим, яко иму́щей многое дерзнове́ние ко Господу е́же от всяких бед, скорбе́й и болезней свобожда́ти ве́рныя, и с любо́вию взываем сице:
Ра́дуйся, всеблаже́нная великому́ченице Анастаси́е,
у́зников свята́я посети́тельнице и моли́твеннице о душа́х на́ших.
Икос 1
Ангелом уподо́билася еси разумом чистым, познавши Того, И́же есть всего ви́димаго и неви́димаго вечное начало и единый конец желаний всех благочестивых; мы же, восхваля́юще му́дрое обуче́ние твое от свята́го мученика Хрисого́на, с любовию вопием ти:
Радуйся, возлюбившая веру Христо́ву;
радуйся, после́довавшая благочестию ма́тере твоея́ Фа́всты.
Радуйся, соблю́дшая чистоту девства твоего;
радуйся, всегда невидимо охраняемая Ангелами.
Радуйся, чистотою твое́ю к Богу прибли́зившаяся;
радуйся, со Ангелы ныне лику́ющая.
Ра́дуйся, всеблаже́нная великому́ченице Анастаси́е,
у́зников свята́я посети́тельнице и моли́твеннице о душа́х на́ших.
Кондак 2
Ви́дящи святая Анастасия, яко мно́зи христиане стра́ждут в темни́цах за имя и учение Иисус Христово, нача́т со усердием служи́ти им, утеша́ти же и цели́ти я́, соде́йствующу Богу, со благогове́нием пою́щи: Аллилу́ия.
Икос 2
Уразуме́ богому́драя Анастасия, яко вся мира сего кра́сная тле́нию прича́стна суть, и того ра́ди презре́вши светлыя одежды и у́твари многоце́нны, тайно обо́лкшися во одежды нищих, вхожда́ше в темни́цы послужити испове́дником Христовым; мы же, мысленно спосле́дствующе ей, взываем к ней с любовию:
Радуйся, посети́тельнице заключенных в темницах;
радуйся, уте́шительнице исповедников Христовых.
Радуйся, зла́то и сребро́ твое на них расточившая;
радуйся, те́ми стяжа́вшая Царствие Небесное.
Радуйся, ру́це и но́зе святых омыва́вшая и власы́ их очища́вшая;
радуйся, подража́тельнице Христова.
Радуйся, неду́ги их врачева́вшая;
радуйся, телеса́ их че́стне погреба́вшая.
Ра́дуйся, всеблаже́нная великому́ченице Анастаси́е,
у́зников свята́я посети́тельнице и моли́твеннице о душа́х на́ших.
Кондак 3
Си́лою укрепля́ема свы́ше, святая му́ченице, послужи́ла еси благоче́стно святы́м и посрамила ненавистника вся́кия доброде́тели диа́вола, наусти́вшаго рабы́ню откры́ти дея́ния твоя́ пред мужем неверным; мы же, восхваля́юще благотворе́ния твоя́, Анастаси́е, поем вку́пе с тобою: Аллилу́ия.
Икос 3
Иму́щи вели́кую любовь о Го́споде ко всем, в темницах стра́ждущим за имя Христово, ея́же ра́ди мно́жицею бие́на бы́вши от невернаго мужа, напосле́док в дому́ его себе́ темницу обре́те; те́мже мужеству ея́ дивя́щеся, вопие́м к ней:
Радуйся, заповедей Христовых усердная храни́тельнице;
радуйся, не словом то́чию, но и делом сия́ испо́лнившая.
Радуйся, ду́шу свою за дру́ги положи́ти готовая;
радуйся, мно́гое озлобление за Христа прие́мшая.
Радуйся, терпением свои́м адама́нту крепкому уподо́бившаяся;
радуйся, терпением искусство, искусством же упо́вание обре́тшая.
Ра́дуйся, всеблаже́нная великому́ченице Анастаси́е,
у́зников свята́я посети́тельнице и моли́твеннице о душа́х на́ших.
Кондак 4
Бу́рю я́рости своея́ воздви́же на тя нечестивый мучитель муж твой, яко пле́нницу и рабу́ вмени́ тя, святая Анастасие; мы же, воспомина́юще озлобле́ния от него и страда́ния твоя́, поем укрепля́вшему тя Господу: Аллилу́ия.
Икос 4
Слы́шавши блаженная Анастасия, яко много претерпе́ святы́й учитель ея Хрисого́н за Христа, сему после́дова страда́ньми своими и тайно восписа́ ему си́це: «Учи́телю! Чаю умре́ти и ничто́же и́но остае́тся, то́чию да испусти́вши дух, паду́ мертва́». Мы же, чудя́щеся терпению твоему, глаго́лем си́це:
Радуйся, не пощадившая пло́ти своея́ честны́я;
радуйся, душу свою за ю́зники полага́вшая.
Радуйся, желавшая расточи́ти богатство твое Бога ради неимущим;
радуйся, мудро ку́плю де́ющая.
Радуйся, еди́но иму́щая попечение о страждущих во узах;
радуйся, с усердием им служившая.
Радуйся, небоя́зненно входившая в темницы;
радуйся, невозбра́нно вшедшая в Чертог Небесный.
Ра́дуйся, всеблаже́нная великому́ченице Анастаси́е,
у́зников свята́я посети́тельнице и моли́твеннице о душа́х на́ших.
Кондак 5
Яко боготе́чная звезда яви́лася еси в Ри́мстей стране́, великому́ченице Анастасие, посеща́ющи стра́ждущих за Христа в темницах и сердца́ их в ве́ре утвержда́ющи, да при́сно взывают с тобою Спасителю всех Богу: Аллилу́ия.
Икос 5
Ви́дев тя богоносный учитель твой Хрисого́н в смущении и волнении ми́ра сего су́щу, повеле́ с проро́ком взыва́ти тебе: «Вску́ю приско́рбна еси́, душе́ моя, и вску́ю смущаеши мя? Уповай на Бога»; мы же, помина́юще скорбь и печаль твою, я́же по Бо́зе, зовем ти:
Радуйся, возложи́вшая все упова́ние твое на Господа;
радуйся, претерпе́вшая тесноту́ Ца́рствия ради Небеснаго.
Радуйся, чистотою твоею со Ангелы жи́ти на небесе́х сподо́бившаяся;
радуйся, скорбьми́ твоими к Богу прибли́зившаяся.
Радуйся, сподо́бльшаяся зре́ти разумными очесы́ Господа Вседержи́теля;
радуйся, пред престолом Его вы́ну предстоящая.
Радуйся, молитвами твоими избавляющая нас от многих скорбе́й;
радуйся, хода́тайством твоим свобожда́ющая от искушений.
Ра́дуйся, всеблаже́нная великому́ченице Анастаси́е,
у́зников свята́я посети́тельнице и моли́твеннице о душа́х на́ших.
