Рекомендовано к публикации Издательским советом Русской Православной Церкви ИС Р21-019-0505

Исключительно для келейного пользования

© Издательство «ДАРЪ», 2020

© ООО ТД «Белый город», 2020

Предисловие

В этой книге собраны акафисты, которые христиане могут читать, молясь о создании семьи и о семейном благополучии.

Первым в сборнике мы разместили акафист Святой Троице. Триипостасное Божество – сама Любовь и образ любви для всех христиан. Мы призваны подражать тому единству, которое являют нам Отец, Сын и Святой Дух. Акафист Святой Троице известен по униатским изданиям по меньшей мере с конца XVII века. В середине XIX века он был переработан святителем Иннокентием Херсонским (1800—1857). В свою очередь, в качестве редактора переработанного текста выступил святитель Филарет Московский (1782—1867). Точная дата одобрения акафиста Святейшим Синодом Православной Греко-Российской Церкви нам неизвестна, однако мы знаем, что в новой редакции акафист издавался с 1850-х годов. День Святой Троицы (Пятидесятница) празднуется в восьмое воскресенье (то есть на 50-й день) после Пасхи.

Название иконы «Млекопитательница» говорит само за себя. Многие справедливо полагают, что грудное вскармливание – залог глубокой связи, возникающей между матерью и младенцем. Читая этот акафист, православные христианки могут молиться о здравии своих чад, равно как и о своем собственном здоровье. Акафист в честь иконы Божией Матери, именуемой «Млекопитательница», был официально утвержден Священным Синодом Русской Православной Церкви в 2019 году. Празднование в честь иконы совершается 12 (25) января.

В состав утреннего и вечернего молитвенного правила, печатаемого в молитвослове, среди прочих включены молитвы ангелу-хранителю, который дается каждому христианину в таинстве крещения и к которому мы обращаемся во всех наших повседневных нуждах, как духовных, так и бытовых. Кроме того, существует канон ангелу-хранителю – он входит в состав традиционного последования, читаемого перед причащением. А в середине XIX века был составлен и акафист ангелу-хранителю. Акафист был написан иеромонахом Филуменом, насельником Николаевского Луховского монастыря Костромской епархии (в настоящее время это Свято-Николо-Тихонова пустынь Кинешемской епархии), и одобрен Синодом в 1864 году. Особый день в году, когда христиане могут почтить хранящих их ангелов, – это 8(21) ноября, день празднования архистратигу Михаилу и всем бесплотным небесным силам.

Святых праведных Иоакима и Анну мы называем богоотцами, поскольку они стали родителями Пречистой Девы Марии, а значит – дедом и бабушкой Господа Иисуса. Это была прекрасная, благочестивая супружеская пара, и христиане могут молиться этим двум святым о мире в своих семействах. Акафист праведным супругам был одобрен Синодом не позднее 1912 года. Память праведных Иоакима и Анны совершается 9 (22) сентября.

Симон Кананит, называемый также Зилотом, был одним из двенадцати апостолов Господа Иисуса Христа. Церковное предание сообщает, что Симон был тем самым женихом, что справлял свою свадьбу в Кане Галилейской. Как мы знаем из Евангелия от Иоанна, гостям не хватило вина, и тогда Иисус, по просьбе Своей Пречистой Матери, которая также присутствовала на этом торжестве, претворил воду в вино, тем самым положив начало Своим чудесам. Акафист апостолу Симону был составлен известным акафистописателем XIX века Андреем Федоровичем Ковалевским, одобрен Синодом в1895 году. Память апостола совершается 10 (23) мая.

Святые мученики Адриан и Наталия Никомидий-ские, совершившие свой подвиг в начале IV века, явили несокрушимую любовь ко Христу и друг к другу. Акафист мученикам был написал московским священником Иоанном Васильевичем Арсеньевым (1863—1930), одобрен Синодом около 1901 года. Память мучеников Адриана и Наталии совершается 26 августа (8 сентября).

С давних пор на Руси известна Повесть о Петре и Февронии. В 2008 году ко дню памяти благоверных супругов, совершающейся 25 июня (8 июля), был приурочен праздник – День семьи, любви и верности. Поскольку, однако, эта дата всегда приходится на Петровский пост, что порождает известные неудобства (например, согласно богослужебному уставу, венчание в этот день невозможно), в 2012 году в церковный календарь был внесен еще один день празднования памяти этих двух святых – в воскресенье перед 6 (19) сентября (в этот день в 1992 году состоялось перенесение их мощей). Акафист святым князю Петру и княгине Февронии Муромским был одобрен Синодом в 1885 году.

Преподобные Кирилл и Мария Радонежские жили семь веков назад, они родили и вырастили несколько детей, среди которых был один из самых известных и любимых русских святых – преподобный Сергий, игумен Радонежский. Акафист святым супругам был предположительно написан протоиереем Владимиром Кучерявым (1940—2010), одобрен Синодом в 1997 году. Память преподобных Кирилла и Марии Радонежских совершается 18 (31) января и 28 сентября (11 октября).

Праведного Алексия Мечёва, пресвитера Московского, в масштабах церковной истории можно считать нашим современником – он скончался менее столетия назад. Этот любимый москвичами пастырь, совершавший свое служение в первой четверти XX века, как перед революцией, так и после нее, был семейным человеком, имел несколько детей (среди них – священномученик Сергий Мечёв) и внуков. Акафист праведному Алексию Московскому был одобрен Синодом в 2019 году.

Ака́фист Пресвято́й и Животворя́щей Тро́ице

Кондак 1, глас 8.

Подобен: Избранной Воево́де:

Предве́чный Царю́ веко́в и Го́споди, всея́ тва́ри ви́димыя и неви́димыя Соде́телю,

Ему́же, в Тро́ице Святе́й сла́вимому Бо́гу,

вся́ко коле́но покланя́ется небе́сных, земны́х и преиспо́дних:

е́мже и мы, я́ко креще́ннии в Трисвято́е и́мя Твое́,

а́ще и недосто́йнии, хвале́бное сие́ дерза́ем принести́ Тебе́ пе́ние:

Ты же, я́ко Творе́ц, Промысли́тель и Судия́ наш,

вонми́ гла́су раб Твои́х, и не отста́ви ми́лости Твоея́ от нас,

да из глубины́ души́ вы́ну зове́м Ти:

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Икона Пресвятой и Животворящей Троицы

Икос 1

Арха́нгели и А́нгели, Нача́ла и Вла́сти, Престо́ли и Госпо́дствия, предстоя́ще самому́ Престо́лу Сла́вы Твоея́, не довле́ют изрещи́ вели́чия соверше́нств Твои́х: многоочи́тии же Херуви́ми и шестокрила́тии Серафи́ми, закрыва́юще ли́ца своя́, то́чию с тре́петом и любо́вию взыва́ют друг ко дру́гу: Свят, Свят, Свят Госпо́дь Савао́ф! Нам у́бо, и́же прах и пе́пел есмы, кольми́ па́че удо́бее люби́ти молча́ние: но, да не толи́ких щедро́т, в созда́нии и искупле́нии на нас излия́нных, непа́мятливы яви́мся и неблагода́рни, подража́юще го́рнему славосло́вию, с ве́рою и любо́вию взыва́ем:

Свят, Свят, Свят еси́ Го́споди Бо́же наш, неисповеди́мая соверше́нств Высото́ и неизсле́димая та́ин Пучи́но!

Свят еси́ Го́споди Бо́же наш, везде́ сый и вся исполня́яй, Еди́ный и То́йжде вчера́, днесь и во ве́ки!

Свят еси́ Го́споди Бо́же наш, вся моги́й, нарица́яй не су́щая я́ко су́щая, низводя́й да́же до а́да и па́ки возводя́й!

Свят еси́ Го́споди Бо́же наш, испыту́яй сердца́ и утро́бы челове́ческия, исчита́яй зве́зды и всем им имена́ нарица́яй!

Свят еси́ Го́споди Бо́же наш, Его́же вси путие́ и́стинны и все судьбы́ оправда́ны вку́пе и вожделе́нны!

Свят еси́ Го́споди Бо́же наш, отдая́ грехи́ отце́в на ча́да, ми́луяй же и награжда́яй в ро́ды родо́в!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 2

Ви́дев Тя Иса́иа на Престо́ле высо́це и превознесе́нне, глаго́лаше: о, окая́нный аз, я́ко челове́к сый и нечи́сты устне́ имы́й, и Го́спода Савао́фа ви́дех очи́ма мои́ма! Егда́ же угль горя́щий, носи́мый от А́нгела, прикосну́ся усто́м его́, чи́сте восхваля́ше Тебе́ Отца́, и Сы́на, и Свята́го Ду́ха, Еди́наго Бо́га. Попали́ у́бо, о, Пресвята́я Тро́ице, огне́м Божества́ Твоего́ те́рние и на́ших мно́гих беззако́ний, да чи́стым се́рдцем возопие́м Тебе́: Аллилу́иа!

Икос 2

Ра́зум неуразуме́нный разуме́ти ищя́ вели́кий во проро́цех Моисе́й, глаго́лаше: яви́ мне лице́ Твое́, да разу́мно ви́жду Тя! Ты же к нему́: за́дняя Моя́ у́зриши, лице́ же Мое́ не яви́тся тебе́: не бо у́зрит челове́к лице́ Мое́ и жив бу́дет. Нам же, а́ще и недосто́йным, благоволи́л еси́ яви́ти Себе́ в лице́ Единоро́днаго Сы́на Твоего́: те́мже благода́рне вопие́м:

Свят, Свят, Свят еси́ Го́споди Бо́же наш, Серафи́мов пламенногоря́щая любы́ и Херуви́мов вы́ну светя́щая прему́дросте!

Свят еси́ Го́споди Бо́же наш, Небе́сных Престо́лов превы́шний Царю́ и преми́рных Госпо́дствий всеи́стинный Го́споди!

Свят еси́ Го́споди Бо́же наш, Вы́шних Сил непобеди́мая Кре́посте и Го́рних Власте́й всемогу́щий Власти́телю!

Свят еси́ Го́споди Бо́же наш, Арха́нгелов всера́достное благове́стие и А́нгелов неумолка́ющая про́поведь!

Свят еси́ Го́споди Бо́же наш, разу́мных Нача́л верхо́вное Всенача́ло, и всех про́чих небе́сных чино́в держа́вный повели́телю;

Свят еси́ Го́споди Бо́же наш, Еди́н име́яй безсме́ртие и живы́й во Све́те Непристу́пнем, со избра́нными же Твои́ми, я́ко со дру́ги, лице́м к лицу́ бесе́дуяй!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 3

Си́лою неизрече́ннаго могу́щества Твоего́ вся содержи́ши, Сло́вом неизсле́димыя Прему́дрости Твоея́ вся стро́иши, Ду́хом уст Твои́х вся живи́ши и ра́дуеши, о, Трисо́лнечне Вседе́телю! Изме́рил еси́ не́бо дла́нию и зе́млю пя́дию, но́сиши и пита́еши всю тварь, вся по и́мени призыва́еши, и несть моги́й утаи́тися власти́тельныя десни́цы и взо́ра Твоего́: сего́ ра́ди со все́ми вы́шними и ни́жними си́лами, со умиле́нием припа́дающе, зове́м Ти: Аллилу́иа!

Икос 3

Име́яй вся́кое созда́ние рабо́тно повеле́нию Твоему́, всю́ду явля́еши следы́ Про́мысла и неизче́тных соверше́нств Твои́х: те́мже неви́димая Твоя́ и присносу́щную Си́лу и Божество́, творе́ньми помышля́ема, ви́дяще, со удивле́нием и ра́достию зове́м:

Свят, Свят, Свят еси́ Го́споди Бо́же наш, власти́тельный Соде́телю ви́димых и неви́димых, и любвеоби́льный Строи́телю настоя́щих и гряду́щих!

Свят еси́ Го́споди Бо́же наш, от четы́рех стихи́й соста́вивый тварь и четы́рьми времены́ круг ле́та венча́вый!

Свят еси́ Го́споди Бо́же наш, повеле́вый со́лнцу свети́ти во дни, и луне́ со зве́здами просвеща́ти нощь!

Свят еси́ Го́споди Бо́же наш, изводя́й ве́тры от сокро́вищ, одева́яй не́бо о́блаки, и посыла́яй дождь и ро́су в прохлажде́ние зно́я!

Свят еси́ Го́споди Бо́же наш, препоясу́яй хо́лмы ра́достию и до́лы весе́лием, украша́яй кри́ны се́льныя и венча́яй поля́ кла́сами!

Свят еси́ Го́споди Бо́же наш, посыла́яй пи́щу птенце́м вра́новым, напая́яй вся зве́ри се́льныя, и полага́яй щедро́ты Своя́ на всех де́лех Свои́х!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 4

Бу́рю внутрь име́я душепа́губныя е́реси, вторы́й Иу́да, А́рий безу́мный, отве́ржеся Тебе́ Сы́на Бо́жия, Еди́наго от Пребоже́ственныя Тро́ицы быти; мы же а́ще и и́но лице́ О́тчее, и́но Сыно́внее, и́но Свята́го Ду́ха глаго́лем: но О́тчее, Сыно́внее и Свята́го Ду́ха Еди́но Божество́, ра́вну си́лу, соприсносу́щно вели́чество, се́рдцем и устны́ испове́дуем, и я́ко Трисо́лнечным све́том в купе́ли креще́ния озаре́ннии, Отцу́, и Сы́ну, и Свято́му Ду́ху, Еди́ному Бо́гу покланя́емся, зову́ще: Аллилу́иа!

Икос 4

Слы́шавше па́стырие и учи́телие Святы́я Це́ркви А́рия, я́ко лю́таго зве́ря, вто́ргшася в слове́сное Христо́во ста́до, и восхища́юща о́вцы от и́стиннаго испове́дания правосла́вныя ве́ры, соше́дшеся в Нике́и на собо́ре, Бо́га, а не тварь, Христа́ испове́даша, и ра́вна Отцу́ Сы́на и Свята́го Ду́ха чту́ще, громогла́сне возгласи́ша:

Свят, Свят, Свят еси́ Го́споди Бо́же наш, Бо́же О́тче, Бо́же Сы́не, Бо́же Ду́ше Святы́й, Еди́ный И́стинный Бо́же, а не три бо́зи!

Свят еси́ Го́споди Бо́же наш, несозда́нный О́тче, несозда́нный Сы́не, несозда́нный Ду́ше Святы́й, Еди́не вку́пе несозда́нне, а не три осо́бь несозда́нны!

Свят еси́ Го́споди Бо́же наш, Оте́ц ражда́яй предве́чно Сы́на, Сын ражда́емый безле́тно от Отца́, Дух Святы́й из Него́ же от век происходя́й, но не ражда́яся!

Свят еси́ Го́споди Бо́же наш, Оте́ц, воззва́вый нас от небытия́, Сын, искупи́вый нас па́дших Кресто́м Свои́м, Дух Святы́й, освяща́яй и животворя́й всех Свое́ю благода́тию!

Свят еси́ Го́споди Бо́же наш, в ду́хе, душе́ и те́ле на́шем трехча́стную ски́нию на вселе́ние Свое́ основа́ти благоволи́вый, и всеконе́чне грехо́м разру́шитися ей в нас не попусти́вый!

Свят еси́ Го́споди Бо́же наш, зна́мение Триипоста́снаго Существа́ Своего́ на всех де́лех рук Свои́х, в ми́ре ви́димом и неви́димом, положи́вый!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 5

Пребезнача́льная и Вседе́тельная Тро́ице, созда́в нас по о́бразу и по подо́бию Твоему́, запове́дала еси́ твори́ти уго́дная пред Тобо́ю: мы же, окая́ннии, злу́ю во́лю на́шу возлюби́вше, обе́ты креще́ния отверго́хом, о́браз Твой помрачи́хом; ны́не же па́ки к Тебе́ прибега́ем и мо́лимся, пода́ждь нам благода́ть Твою́, исхи́ти нас из руки́ враг, ви́димых и неви́димых, и спаси́ ны, и́миже ве́си судьба́ми, да во ве́ки веко́в зове́м Тебе́: Аллилу́иа!

Икос 5

Ви́дя ра́зум превосходя́щая соверше́нства Твоя́ и неизрече́нная благодея́ния к бе́дным сына́м Ада́млим (в Тя бо, Триеди́наго Бо́га и́стинно ве́руяй, ме́ртвый ду́хом оживля́ется, оскверне́нный со́вестию очища́ется, поги́бший спаса́ется), благода́рным умо́м, благода́рным се́рдцем, благода́рными усты́, от Тебе́ созда́нными, прекло́ньше коле́на, глаго́лем:

Свят, Свят, Свят еси́ Го́споди Бо́же наш, в Триипоста́сном Сове́те Твое́м положи́вый сотвори́ти челове́ка, и в те́ло его́, от пе́рсти взя́тое, дыха́ние жи́зней из уст Твои́х вдохну́вый!

Свят еси́ Го́споди Бо́же наш, о́бразом и подо́бием Твои́м в лице́ Ада́ма всех нас почты́й, и рая́ сла́дости насле́дники учини́вый!

Свят еси́ Го́споди Бо́же наш, ра́зумом превы́ше всего́ ви́димаго вознесы́й нас, и тварь всю до́льнюю под но́зе на́ши покори́вый!

Свят еси́ Го́споди Бо́же наш, дре́во жи́зни в пи́щу нам дарова́вый и да́ром безсме́ртия ны обогати́вый!

Свят еси́ Го́споди Бо́же наш, преслу́шавших за́поведь прароди́телей на́ших и по грехопаде́нии не оста́вивый, но на упова́нии спасе́ния пря́мо Еде́ма всели́вый!

Свят еси́ Го́споди Бо́же наш, изведы́й и нас из чре́ва ма́тере на́шея и благода́тию Ева́нгелия, по рожде́нии, освяти́вый!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 6

Пропове́дник пра́вды и ревни́тель Свята́го и́мени Твоего́, Илиа́ досточу́дный, воззва́н от А́нгела, ста в горе́ Хори́ве: бысть же дух кре́пок, низлага́яй го́ры, бысть трус ве́лий и огнь паля́щ, но не в сих Тя ви́де, и по огни́ глас хла́да то́нка, и та́мо Госпо́дь; покры́в у́бо лице́ ми́лотию, с весе́лием и стра́хом взыва́ше: Аллилу́иа!

Икос 6

Возсия́л еси́ в просвеще́ние всему́ ми́ру сия́ние Трисве́тлаго Божества́ Твоего́, отгна́л еси́ вся и́дольская заблужде́ния, Триипоста́сный Бо́же и Го́споди; весь же род челове́ческий от до́лгия тмы язы́чества в чу́дный свет Ева́нгелия приве́л еси́, и́мже озаре́ннии, сла́вим вседержа́вный Про́мысл Твой о нас, зову́ще:

Свят, Свят, Свят еси́ Го́споди Бо́же наш, до конца́ растле́нную грехо́м тварь вода́ми пото́пными потреби́вый и в лице́ Но́я обнови́вый весь род челове́чь!

Свят еси́ Го́споди Бо́же наш, отлучи́вый отца́ ве́рующих Авраа́ма от смеше́ния язы́к и в пото́мстве его́ и́стинную Це́рковь основа́вый!

Свят еси́ Го́споди Бо́же наш, изведы́й лю́ди Своя́ из Еги́пта, препита́вый их ма́нною в пусты́не и введы́й в зе́млю, кипя́щую ме́дом и мле́ком!

Свят еси́ Го́споди Бо́же наш, воздви́гий Дави́да, испо́лнивый Ду́хом Свои́м проро́ки и те́ми среди́ Изра́иля ве́ру в обетова́ннаго Искупи́теля сохрани́вый!

Свят еси́ Го́споди Бо́же наш, пле́ном Вавило́нским согре́шшыя лю́ди Своя́ наказа́вый и, по сконча́нии его́, па́ки Иерусали́му возгради́тися повеле́вый!

Свят еси́ Го́споди Бо́же наш, Маккаве́и в ве́ре и преда́ниих оте́ческих непоколеби́мыми до сме́рти показа́вый, и Це́рковь подзако́нную, я́ко неве́сту, до прише́ствия возлю́бленнаго Жениха́, це́лу соблюды́й!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 7

Хотя́ прояви́ти вели́чие любве́ и милосе́рдия Твоего́ к па́дшему ро́ду челове́ческому, егда́ прии́де кончи́на ле́та, посла́л еси́ Единоро́днаго Сы́на Твоего́, ражда́ема от Жены́, быва́ема под зако́ном, да подзако́нныя искупи́т, И́же, пожи́в на земли́ я́ко челове́к и искупи́в ны Кресто́м Свои́м, вознесе́ся на не́бо, отню́дуже, исполня́яй обетова́ние, низпосла́ нам Пресвята́го Ду́ха Своего́, да зове́м вси: Аллилу́иа!

Икос 7

Ди́вное вои́стинну и но́вое показа́л еси́ чу́до, ди́вный в высо́ких, Го́споди, егда́ по низпосла́нии Пресвята́го Ду́ха на избра́нныя ученики́ и апо́столы, изве́л еси́ их на про́поведь всему́ ми́ру, да возвестя́т вели́кое и́мя Пресвяты́я Тро́ицы и пленя́т вся язы́ки в послуша́ние ве́ры: тем же, чудя́щеся си́ле и де́йствию богодухнове́нных слове́с их, с ра́достию зове́м:

Свят, Свят, Свят еси́ Го́споди Бо́же наш, избра́вый немощна́я, худоро́дная и бу́ия ми́ра, да посрамя́т кре́пкия, сла́вныя и прему́дрыя!

Свят еси́ Го́споди Бо́же наш, воодушеви́вый безчи́сленныя со́нмы му́чеников, да тма́ми муче́ний и смерте́й запечатле́ют и́стину Ева́нгелия и си́лу благода́ти Христо́вой!

Свят еси́ Го́споди Бо́же наш, се́рдце равноапо́стольнаго Константи́на зна́мением Креста́ преклони́вый, и тем коне́ц лю́тым гоне́нием на христиа́н положи́вый!

Свят еси́ Го́споди Бо́же наш, седмию́ Вселе́нскими Собо́ры богоно́сных оте́ц, я́ко седмию́ столпы́, Це́рковь огради́вши и ерети́ческим треволне́нием непристу́пну сотвори́вый!

Свят еси́ Го́споди Бо́же наш, богому́дрым учи́телем и вели́ким подви́жником благоче́стия, я́ко пресве́тлым зве́здам на тве́рди Це́ркви, возсия́ти дарова́вый!

Свят еси́ Го́споди Бо́же наш, и влады́ку земли́ Росси́йския Влади́мира к све́ту и́стинныя ве́ры наста́вивый, и тем всю страну́ на́шу от пре́лести многобо́жия свободи́вый!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 8

Стра́нно и чу́дно у ду́ба Мамври́йска узре́в Тя Авраа́м во о́бразе трие́х муже́й, а́ки к еди́ному бесе́доваше, глаго́ля: Го́споди, а́ще обрето́х благода́ть пред Тобо́ю, не мини́ раба́ Твоего́! Трие́м у́бо, в Трие́х я́вльшихся ему́ Ли́цех, Отцу́, и Сы́ну, и Свято́му Ду́ху, Еди́ному же в существе́ Бо́гу, до земли́ поклони́ся, зовы́й: Аллилу́иа!

Икос 8

Весь еси́ везде́ и всегда́, не то́чию могу́ществом неизче́тныя си́лы Твоея́, но и бога́тством вседе́тельнаго промышле́ния Твоего́ о вся́цем созда́нии Твое́м: нам же, я́коже рече́ Сын Твой, и власи́ главни́и вси изочте́ни суть у Тебе́, да ни еди́н из них паде́т без во́ли Твоея́: те́мже, упова́юще на Про́мысл Твой, со дерзновением и любо́вию зове́м:

Свят, Свят, Свят еси́ Го́споди Бо́же наш, благоволи́вый всему́ ро́ду челове́ческому раздели́тися на племена́ и язы́ки, и коему́ждо их ме́сто и вре́мя жи́тельства указа́вый!

Свят еси́ Го́споди Бо́же наш, И́мже ца́рие ца́рствуют и си́льнии пи́шут пра́вду, соблюда́яй избра́нных Свои́х, я́ко зени́цу о́ка!

Свят еси́ Го́споди Бо́же наш, от Него́же исхо́дит вся́ка прему́дрость и ра́зум, вся́ка кре́пость и си́ла, вся́ко здра́вие и ле́пота!

Свят еси́ Го́споди Бо́же наш, наводя́й и отъе́мляй бра́ни, венча́яй побе́дою пра́вое ору́жие, непра́вое же, посреде́ са́мых побе́д, предопределя́яй к сокруше́нию!

Свят еси́ Го́споди Бо́же наш, дая́й зна́мения на небеси́ и на земли́, посыла́яй огнь, я́зву и глад на лю́ди, да не до конца́ заблудя́т от путе́й Твои́х!

Свят еси́ Го́споди Бо́же наш, вознося́й смире́нныя от земли́, е́же посади́ти со кня́зи люде́й Свои́х, и низлага́яй го́рдыя, я́ко не обрести́ся ме́сту их!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 9

Вся́кое естество́, горе́ и ни́зу, непреста́нно сла́вит Тя, предве́чнаго Творца́ и Бо́га: на небеси́ еди́ни, Свят, Свят, Свят, день и нощь взыва́ют, друзи́и же венцы́ своя́ к подно́жию ног Твои́х полага́ют: на земли́ же со все́ю тва́рию мы, я́ко укра́шеннии о́бразом присносу́щныя Твоея́ сла́вы, к Тебе́ мо́лимся и от Тебе́ вели́кия и бога́тыя ми́лости ча́ем, зову́ще: Аллилу́иа!

Икос 9

Вети́я многовеща́нныя, а́ще и мно́го тружда́ются мы́слию во испыта́нии, о Та́инстве Пресвяты́я Тро́ицы, но не мо́гут разуме́ти, ка́ко естество́м Еди́н есть Бог, в Трие́х же соверше́нных Ли́цех: мы же ве́руем то́чию сему́ и испове́дуем, ка́коже, не испыту́ем, и неизче́тная благодея́ния к нам коего́ждо из Трие́х Боже́ственных Лиц до́бре ве́дуще, с ве́рою и благодаре́нием зове́м:

Свят, Свят, Свят еси́ Го́споди Бо́же наш, пра́ведным судо́м Твои́м всем нам в зе́млю, от нея́же взя́ты есмы, возврати́тися, и па́ки в день воскресе́ния из нея́ воста́ти положи́вый!

Свят еси́ Го́споди Бо́же наш, со́лнцу, луне́ и зве́здам не́когда поме́ркнути. земле́ и всему́, е́же на ней, огне́м преобрази́тися предопредели́вый, да вме́сто их яви́тся не́бо но́во и земля́ нова́, в ни́хже пра́вда живе́т!

Свят еси́ Го́споди Бо́же наш, уста́вивый день, во́ньже предста́нут на суд вся племена́ и язы́цы, да восприи́мет ки́йждо по дело́м свои́м!

Свят еси́ Го́споди Бо́же наш, име́яй в день воздая́ния рещи́ пра́ведным: прииди́те благослове́ннии Отца́ Моего́, и насле́дуйте Ца́рствие, угото́ванное вам от сложе́ния ми́ра!

Свят еси́ Го́споди Бо́же наш, от Него́ же нераска́яннии гре́шницы услы́шат тогда́ со стра́хом: отъиди́те от Мене́ прокля́тии во огнь ве́чный, угото́ванный диа́волу и а́ггелом его́!

Свят еси́ Го́споди Бо́же наш, обеща́вый Це́рковь Свою́ до конца́ ми́ра непоколеби́му соблюсти́, во е́же неодоле́нней быти ей и от врат а́довых!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 10

Спасти́ хотя́ мир, яви́лася еси́ на Иорда́нстей реце́, Пресвята́я и Пребоже́ственная Тро́ице: Оте́ц во гла́се с не́ба, свиде́тельствуяй о возлю́бленнем Сы́не, Сын во о́бразе челове́честем, прие́мляй Креще́ние от раба́, Дух Святы́й, сходя́й на Креща́емаго в ви́де голуби́не: те́мже во и́мя Еди́наго Бо́га, в Три же Лица́, Отца́, Сы́на и Свята́го Ду́ха, научи́хомся просвеща́ти Креще́нием вся́каго гряду́щаго в мир челове́ка, зову́ще: Аллилу́иа!

Икос 10

Царю́ Преве́чный, сия́яй со́лнце Свое́ на благи́я и злы́я, пра́ведныя любя́й, гре́шныя же ми́луяй, скве́рну душе́вную и теле́сную на́шу омы́й, оби́тель Свою́ в нас, а́ще и недосто́йных рабе́х Твои́х, сотвори́ти благоволи́, потреби́ нечи́стая на́ша помышле́ния, изгла́ди неподо́бная дея́ния, напра́ви язы́к глаго́лати благоуго́дная пред Тобо́ю, да чи́стым се́рдцем и устны́ со умиле́нием зове́м:

Свят, Свят, Свят еси́ Го́споди Бо́же наш, о Не́мже апо́стольский лик я́ве глаго́лет, к Нему́ же проро́ческий собо́р вы́ну взира́ет!

Свят еси́ Го́споди Бо́же наш, Его́ же полк му́ченический боголе́пно испове́дует, и преподо́бных во́инство Пресвято́е и́мя славосло́вит!

Свят еси́ Го́споди Бо́же наш, о Нем же пусты́нников мно́жество при́сно воздыха́ет, от Него́ же по́стников по́двиги венча́ются!

Свят еси́ Го́споди Бо́же наш, Ему́ же святи́тели и па́стыри благода́рственное прино́сят пе́ние, И́мже вселе́нстии учи́тели во спасе́ние на́ше богому́дрствуют!

Свят еси́ Го́споди Бо́же наш, приими́ мольбу́ о нас и предста́тельство всех святы́х, па́че же простира́ющую к Тебе́ о нас ру́це Своя́, Де́ву Пречи́стую!

Свят еси́ Го́споди Бо́же наш, огради́ нас святы́ми Твои́ми А́нгелы, и отжени́ от нас духо́в зло́бы поднебе́сных!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 11

Пе́ние вся́кое изнемога́ет, тща́щееся принести́ до́лжное благодаре́ние Тебе́ о всех и за вся, в Тро́ице сла́вимому Бо́гу: не обрета́ется бо ни ра́зума, могу́ща сраспростре́тися мы́слию ко мно́жеству щедро́т Твои́х на нас, ни сло́ва, во е́же досто́йне изрещи́ я: оба́че за вся, на́ми ви́димая и нам подае́мая, бу́ди Тебе́, Пресвята́я Тро́ице, благодаре́ние от нас, честь и сла́ва, яковы́ же Ты Сама́ Твоего́ вели́чества досто́йны и Тебе́ уго́дны ве́си: мы же, покланя́ющеся Тебе́, со смире́нием и любо́вию зове́м: Аллилу́иа!

Икос 11

Я́ко светопода́тельна Тя во обетова́ниих Твои́х свети́льника, су́щым нам во тме неве́дения о бу́дущем жре́бии на́шем я́вльшася, благода́рне испове́дующе и поне́ еди́наго из блаже́нств, Единоро́дным Сы́ном Твои́м возвеще́нных, улучити жела́юще, всеуми́льно с ве́рою вопие́м:

Свят, Свят, Свят еси́ Го́споди Бо́же наш, угото́вавый избра́нным Свои́м бла́га, и́хже о́ко не ви́де, у́хо не слы́ша, и я́же на се́рдце челове́ку не взыдо́ша!

Свят еси́ Го́споди Бо́же наш, Его́ же вси чи́стии се́рдцем у́зрят, я́коже есть, и позна́ют, я́коже от Него́ са́ми позна́ни суть!

Свят еси́ Го́споди Бо́же наш, в Не́мже вси а́лчущии и жа́ждущии пра́вды обрету́т, николи́же оскудева́ющее насыще́ние!

Свят еси́ Го́споди Бо́же наш, от Него́ же миротво́рцы, я́ко подража́тели вся умиротвори́вшаго Единоро́днаго Сы́на Твоего́, возлю́бленными сына́ми нареку́тся!

Свят еси́ Го́споди Бо́же наш, у Него́ же кро́тцые насле́дят зе́млю, и ни́щии ду́хом улучат неконча́емое Ца́рствие!

Свят еси́ Го́споди Бо́же наш, обеща́вый ве́чное поми́лование ми́лующым, и безконе́чное ра́дование пла́чущым!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 12

Благода́ть Твою́ всеси́льную пода́ждь нам, Пресвята́я Тро́ице: приими́ испове́дание грехо́в на́ших пред вели́чеством сла́вы Твоея́, при́зри на воздыха́ния на́ша, низпосли́ нам ду́ха умиле́ния и щедро́т, да, очище́ннии душе́ю и се́рдцем, сподо́бимся неосужде́нно зва́ти к Тебе́ на земли́, я́коже взыва́ют А́нгели на небеси́: Аллилу́иа!

Икос 12

Пою́ще Твое́ всечеловеколю́бное смотре́ние, сла́вим Тя вси, Пребезнача́льная Тро́ице, ве́руем во Еди́наго Бо́га Отца́, Бо́га Сы́на и Бо́га Ду́ха Свята́го, ино́го, ра́зве Тебе́, Го́спода не ве́мы, к Тебе́ припа́даем и Тебе́ мо́лимся, вопию́ще:

Свят, Свят, Свят еси́ Го́споди Бо́же наш, бу́ди нам во спасе́ние, да не убои́мся никоего́же зла, и в защище́ние живота́ на́шего, да не устраши́мся никоего́же врага́!

Свят еси́ Го́споди Бо́же наш, гре́шныя ка́ющыяся спаса́яй, спаси́ у́бо и нас многогре́шных!

Свят еси́ Го́споди Бо́же наш, умножа́яй всем ми́лость Твою́, умно́жи ю и на нас, и поми́луй ны, я́ко не́мощни есмы!

Свят еси́ Го́споди Бо́же наш, продолжи́ нам век к покаянию и не осуди́ нас на посече́ние с смоко́вницею безпло́дною!

Свят еси́ Го́споди Бо́же наш, изба́ви ны искуше́ний, от ми́ра, пло́ти и диа́вола находя́щих, и укрепи́ в ве́ре и любви́ к Тебе́!

Свят еси́ Го́споди Бо́же наш, сподо́би ны лице́м к лицу́ узре́ти Тя, и вни́ти в све́тлый черто́г Твой на брак А́гнчий!

Свят, Свят, Свят еси́ Го́споди Бо́же наш, поми́луй ны, па́дшее созда́ние Твое́, И́мене ра́ди Свята́го Твоего́!

Кондак 13

О, Пресвята́я, Животворя́щая, Нераздели́мая и Вседе́тельная Тро́ице, О́тче, Сы́не и Ду́ше Святы́й, Еди́не и́стинный Бо́же и Тво́рче наш! Ны́нешнее на́ше прие́мши благодаре́ние, низпосли́ нам благода́ть и си́лу от высоты́ Свята́го Престо́ла Твоего́, да, попра́вше вся плотски́я по́хоти, во вся́ком благоче́стии и чистоте́ поживем до конца́ дней на́ших, вы́ну восхваля́юще Пресвято́е И́мя Твое́ и зову́ще: Аллилу́иа!

Этот кондак читается трижды, затем икос 1 и кондак 1.

Моли́тва

О Пресвята́я Тро́ице, Единосу́щная держа́во, всех благи́х Вина́, что воздади́м Тебе́ за вся, я́же воздала́ еси́ нам, гре́шным и недосто́йным, пре́жде, не́же на свет произыдо́хом, за вся, я́же воздае́ши коему́ждо нас по вся дни и я́же угото́вала еси́ нам в веце гряду́щем? Подоба́ше у́бо за толи́кия благодея́ния и щедро́ты благодари́ти Тя не словесы́ то́чию, но па́че де́лы, храня́ще и исполня́юще за́поведи Твоя́: мы же, страсте́м на́шим и злым обы́чаем вне́мше, в безчи́сленныя от ю́ности низверго́хомся грехи́ и беззако́ния. Сего́ ра́ди, я́ко нечи́стым и оскверне́нным, не то́чию пред трисве́тлое Лице́ Твое́ безсту́дно яви́тися, но ниже́ И́мене Твоего́ Пресвята́го изрещи́ довле́яше нам, а́ще бы не Ты Сама́ благоизво́лила, во отра́ду на́шу возвести́ти, я́ко чи́стыя и пра́ведныя лю́биши, гре́шники ка́ющияся ми́луеши и благоутро́бне прие́млеши. При́зри у́бо, о, Пребоже́ственная Тро́ице, с высоты́ Святы́я Сла́вы Твоея́ на нас, многогре́шных, и благо́е произволе́ние на́ше вме́сто благи́х дел приими́: и пода́ждь нам ду́ха и́стиннаго покая́ния, да возненави́девше вся́кий грех, в чистоте́ и пра́вде, до конца́ дней на́ших поживем, творя́ще пресвяту́ю во́лю Твою́ и сла́вяще чи́стыми по́мыслы и благи́ми дея́ньми сладча́йшее и великоле́пое И́мя Твое́. Ами́нь.