Пасхальные песнопения

Канон Воскресению Христову

преподобного Иоанна Дамаскина, глас 1-й

Песнь 1

Ирмос: Воскре́сения день, просвети́мся, лю́дие: Па́сха, Госпо́дня Па́сха! От сме́рти бо к жи́зни и от земли́ к Небеси́ Христо́с Бог нас преведе́, побе́дную пою́щия.

Христо́с воскре́се из ме́ртвых.

Очи́стим чу́вствия и у́зрим непристу́пным све́том воскресе́ния Христа́ блиста́ющася, и, ра́дуйтеся, реку́ща я́сно да услы́шим, побе́дную пою́ще.

Христо́с воскре́се из ме́ртвых.

Небеса́ у́бо досто́йно да веселя́тся, земля́ же да ра́дуется, да пра́зднует же мир, ви́димый же весь и неви́димый: Христо́с бо воста́, Весе́лие ве́чное.

Сла́ва Отцу́ и Сы́ну и Свято́му Ду́ху.

Умерщвле́ния преде́л сломи́ла еси́, ве́чную жизнь ро́ждшая Христа́, из гро́ба возсия́вшаго днесь, Де́во Всенепоро́чная, и мир просвети́вшаго.

И ны́не и при́сно и во ве́ки веко́в. Ами́нь.

Воскре́сшаго ви́девши Сы́на Твоего́ и Бо́га, ра́дуйся со Апо́столы, Богоблагода́тная Чи́стая; и е́же ра́дуйся пе́рвее, я́ко всех ра́дости вина́, восприя́ла еси́, Богома́ти Всенепоро́чная.

Песнь 3

Ирмос: Прииди́те, пи́во пие́м но́вое, не от ка́мене непло́дна чудоде́емое, но нетле́ния Исто́чник, из гро́ба одожди́вша Христа́, в Не́мже утвержда́емся.

Христо́с воскре́се из ме́ртвых.

Ны́не вся испо́лнишася све́та, Не́бо же и земля́ и преиспо́дняя: да пра́зднует у́бо вся тварь воста́ние Христо́во, в не́мже утвержда́ется.

Христо́с воскре́се из ме́ртвых.

Вчера́ спогребо́хся Тебе́, Христе́, совостаю́ днесь воскре́сшу Тебе́, сраспина́хся Тебе́ вчера́: Сам мя спросла́ви, Спа́се, во Ца́рствии Твое́м.

Сла́ва Отцу́ и Сы́ну и Свято́му Ду́ху.

На нетле́нную жизнь прихожду́ днесь бла́гостию ро́ждшагося из Тебе́, Чи́стая, и всем конце́м свет облиста́вшаго.

И ны́не и при́сно и во ве́ки веко́в. Ами́нь.

Бо́га, Его́же родила́ еси́ пло́тию, из ме́ртвых, я́коже рече́, воста́вша ви́девши, Чи́стая, лику́й, и Сего́ я́ко Бо́га, Пречи́стая, возвелича́й.

Песнь 4

Ирмос: На боже́ственней стра́жи богоглаго́ливый Авваку́м да ста́нет с на́ми и пока́жет светоно́сна А́нгела, я́сно глаго́люща: днесь спасе́ние ми́ру, я́ко воскре́се Христо́с я́ко всеси́лен.

Христо́с воскре́се из ме́ртвых.

Му́жеский у́бо пол я́ко разве́рзый Де́вственную утро́бу яви́ся Христо́с; я́ко Челове́к же Агнец нарече́ся; Непоро́чен же я́ко невку́сен скве́рны, на́ша Па́сха, и я́ко Бог и́стинен соверше́н рече́ся.

Христо́с воскре́се из ме́ртвых.

Я́ко единоле́тный а́гнец, благослове́нный нам Вене́ц Христо́с во́лею за всех за́клан бысть, Па́сха чисти́тельная, и па́ки из гро́ба кра́сное пра́вды нам возсия́ Со́лнце.

Христо́с воскре́се из ме́ртвых.

Богооте́ц у́бо Дави́д пред се́нным ковче́гом скака́ше игра́я, лю́дие же Бо́жии святи́и, образо́в сбытие́ зря́ще, весели́мся боже́ственне, я́ко воскре́се Христо́с я́ко Всеси́лен.

Сла́ва Отцу́ и Сы́ну и Свято́му Ду́ху.

Созда́вый Ада́ма, Твоего́ пра́отца, Чи́стая, зи́ждется от Тебе́, и сме́ртное жили́ще разори́ Свое́ю сме́ртию днесь, и озари́ вся Боже́ственными блиста́ньми Воскресе́ния.

И ны́не и при́сно и во ве́ки веко́в. Ами́нь.

Его́же родила́ еси́ Христа́, прекра́сно из ме́ртвых возсия́вша, Чи́стая, зря́щи, до́брая и непоро́чная в жена́х и кра́сная, днесь во спасе́ние всех, со Апо́столы ра́дующися, Того́ прославля́й.

Песнь 5

Ирмос: Утренюем у́треннюю глубоку́, и вме́сто ми́ра песнь принесе́м Влады́це, и Христа́ у́зрим, пра́вды Со́лнце, всем Жизнь возсия́юща.

Христо́с воскре́се из ме́ртвых.

Безме́рное Твое́ благоутро́бие а́довыми у́зами содержи́мии зря́ще, к Све́ту идя́ху, Христе́, весе́лыми нога́ми, Па́сху хва́ляще ве́чную.

Христо́с воскре́се из ме́ртвых.

Присту́пим, свещено́снии, исходя́щу Христу́ из гро́ба, я́ко жениху́, и спра́зднуим любопра́зднственными чи́нми Па́сху Бо́жию спаси́тельную.

Сла́ва Отцу́ и Сы́ну и Свято́му Ду́ху.

Просвеща́ется Боже́ственными луча́ми и живоно́сными Воскресе́ния Сы́на Твоего́, Богома́ти Пречи́стая, и ра́дости исполня́ется благочести́вых собра́ние.

И ны́не и при́сно и во ве́ки веко́в. Ами́нь.

Не разве́рзл еси́ врата́ де́вства в воплоще́нии, гро́ба не разруши́л еси́ печа́тей, Царю́ созда́ния: отню́дуже Воскре́сшаго Тя зря́щи, Ма́ти ра́довашеся.

Песнь 6

Ирмос: Снизше́л еси́ в преиспо́дняя земли́ и сокруши́л еси́ вереи́ ве́чныя, содержа́щия свя́занныя, Христе́, и тридне́вен, я́ко от ки́та Ио́на, воскре́сл еси́ от гро́ба.

Христо́с воскре́се из ме́ртвых.

Сохрани́в це́ла зна́мения, Христе́, воскре́сл еси́ от гро́ба, ключи́ Де́вы не вреди́вый в рождестве́ Твое́м, и отве́рзл еси́ нам ра́йския две́ри.

Христо́с воскре́се из ме́ртвых.

Спа́се мой, живо́е же и неже́ртвенное заколе́ние, я́ко Бог Сам Себе́ во́лею приве́д Отцу́, совоскреси́л еси́ всеро́днаго Ада́ма, воскре́с от гро́ба.

Сла́ва Отцу́ и Сы́ну и Свято́му Ду́ху.

Возведе́ся дре́вле держи́мое сме́ртию и тле́нием, воплоти́вшимся от Твоего́ пречи́стаго чре́ва к нетле́нней и присносу́щней жи́зни, Богоро́дице Де́во.

И ны́не и при́сно и во ве́ки веко́в. Ами́нь.

Сни́де в преиспо́дняя земли́, в ложесна́ Твоя́, Чи́стая, сше́дый, и всели́выйся, и воплоти́выйся па́че ума́, и воздви́же с Собо́ю Ада́ма, воскре́с от гро́ба.

Кондак,

глас 8-й

Аще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м Мироно́сицам веща́вый: ра́дуйтеся, и Твои́м Апо́столом мир да́руяй, па́дшим подая́й воскресе́ние.

Песнь 7

Ирмос: Отроки от пе́щи изба́вивый, быв Челове́к, стра́ждет, я́ко сме́ртен, и стра́стию сме́ртное в нетле́ния облачи́т благоле́пие, еди́н благослове́н отце́в Бог и препросла́влен.

Христо́с воскре́се из ме́ртвых.

Жены́ с ми́ры богому́дрыя вслед Тебе́ теча́ху, Его́же, я́ко ме́ртва, со слеза́ми иска́ху; поклони́шася, ра́дующияся Живо́му Бо́гу, и Па́сху та́йную Твои́м, Христе́, ученико́м благовести́ша.

Христо́с воскре́се из ме́ртвых.

Сме́рти пра́зднуем умерщвле́ние, а́дово разруше́ние, ино́го жития́ ве́чнаго нача́ло и игра́юще пое́м Вино́внаго, еди́наго Благослове́ннаго отце́в Бо́га и Препросла́вленнаго.

Христо́с воскре́се из ме́ртвых.

Я́ко вои́стинну свяще́нная и всепра́зднственная сия́ спаси́тельная нощь и светоза́рная, светоно́снаго дне воста́ния су́щи провозве́стница, в не́йже Безле́тный Свет из гро́ба пло́тски всем возсия́.

Сла́ва Отцу́ и Сы́ну и Свято́му Ду́ху.

Умертви́в Сын Твой смерть, Всенепоро́чная, днесь, всем сме́ртным пребыва́ющий живо́т во ве́ки веко́в дарова́, еди́н благослове́нный отце́в Бог и препросла́вленный.

И ны́не и при́сно и во ве́ки веко́в. Ами́нь.

Всем ца́рствуяй созда́нием, быв челове́к, всели́ся в Твою́, Богоблагода́тная, утро́бу, и распя́тие претерпе́в и смерть, воскре́се боголе́пно, совозста́вив нас, я́ко Всеси́лен.

Песнь 8

Ирмос: Сей нарече́нный и святы́й день, еди́н суббо́т царь и госпо́дь, пра́здников пра́здник и торжество́ есть торже́ств, во́ньже благослови́м Христа́ во ве́ки.

Христо́с воскре́се из ме́ртвых.

Прииди́те, но́ваго виногра́да рожде́ния, боже́ственнаго весе́лия в наро́читом дни воскресе́ния, Ца́рствия Христо́ва приобщи́мся, пою́ще Его́ я́ко Бо́га во ве́ки.

Христо́с воскре́се из ме́ртвых.

Возведи́ о́крест о́чи твои́, Сио́не, и виждь: се бо приидо́ша к тебе́, я́ко богосве́тлая свети́ла, от за́пада, и се́вера, и мо́ря, и восто́ка ча́да твоя́, в тебе́ благословя́щая Христа́ во ве́ки.

Пресвятая Троице Боже наш, слава Тебе.

О́тче Вседержи́телю и Сло́ве и Ду́ше, треми́ соединя́емое во Ипоста́сех Естество́, Пресу́щественне и Пребоже́ственне, в Тя крести́хомся и Тя благослови́м во вся ве́ки.

Сла́ва Отцу́ и Сы́ну и Свято́му Ду́ху.

Прии́де Тобо́ю в мир Госпо́дь, Де́во Богоро́дице, и чре́во а́дово расто́рг, сме́ртным нам воскресе́ние дарова́; те́мже благослови́м Его́ во ве́ки.

И ны́не и при́сно и во ве́ки веко́в. Ами́нь.

Всю низложи́в сме́рти держа́ву, Сын Твой, Де́во, Свои́м Воскресе́нием, я́ко Бог кре́пкий, совознесе́ нас и обожи́. Те́мже воспева́ем Его во ве́ки.

Песнь 9

Ирмос: Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́; лику́й ны́не и весели́ся, Сио́не; Ты же, Чи́стая, красу́йся, Богоро́дице, о воста́нии Рождества́ Твоего́.

Христо́с но́вая Па́сха,

Же́ртва жива́я, Агнец Бо́жий, взе́мляй грехи́ ми́ра.

О Боже́ственнаго, о любе́знаго, о сладча́йшаго Твоего́ гла́са! С на́ми бо нело́жно обеща́лся еси́ бы́ти до сконча́ния ве́ка, Христе́; Его́же ве́рнии утвержде́ние наде́жди иму́ще, ра́дуемся.

Возбуди́л еси́, усну́в, ме́ртвыя от ве́ка, ца́рски рыка́вый, я́ко от Иу́ды лев.

О Па́сха ве́лия и свяще́ннейшая, Христе́! О Му́дросте, и Сло́ве Бо́жий, и Си́ло! Пода́вай нам и́стее Тебе́ причаща́тися в невече́рнем дни Ца́рствия Твоего́.

Сла́ва Отцу́ и Сы́ну и Свято́му Ду́ху.

Согла́сно, Де́во, Тебе́ блажи́м ве́рнии: ра́дуйся, две́ре Госпо́дня, ра́дуйся, гра́де одушевле́нный; ра́дуйся, Ея́же ра́ди нам ны́не возсия́ свет, из Тебе́ Рожде́ннаго из ме́ртвых воскресе́ния.

И ны́не и при́сно и во ве́ки веко́в. Ами́нь.

Весели́ся и ра́дуйся, Боже́ственная две́ре Све́та: заше́дый бо Иису́с во гроб, возсия́, просия́в со́лнца светле́е и ве́рныя вся озари́в, Богора́дованная Влады́чице.

Эксапостиларий

Пло́тию усну́в я́ко мертв, Царю́ и Го́споди, тридне́вен воскре́сл еси́, Ада́ма воздви́г от тли, и упраздни́в смерть: Па́сха нетле́ния, ми́ра Спасе́ние.

Стихиры Пасхи

Глас 5-й

Да воскре́снет Бог, и расточа́тся врази́ Его́.

Па́сха свяще́нная нам днесь показа́ся, Па́сха но́ва свята́я, Па́сха та́инственная, Па́сха всечестна́я, Па́сха Христо́с Изба́витель, Па́сха непоро́чная, Па́сха вели́кая, Па́сха ве́рных, Па́сха, две́ри ра́йския нам отверза́ющая, Па́сха, всех освяща́ющая ве́рных.

Я́ко исчеза́ет дым, да исче́знут.

Прииди́те от виде́ния, жены́ благове́стницы, и Сио́ну рцы́те: приими́ от нас ра́дости благове́щения воскресе́ния Христо́ва; красу́йся, лику́й и ра́дуйся, Иерусали́ме, Царя́ Христа́ узре́в, из гро́ба, я́ко жениха́, происходя́ща.

Та́ко да поги́бнут гре́шницы от лица́ Бо́жия, а пра́ведницы да возвеселя́тся.

Мироно́сицы жены́, у́тру глубоку́, предста́вша гро́бу Живода́вца, обрето́ша А́нгела, на ка́мени седя́ща, и той провеща́в им, си́це глаго́лаше: что́ и́щете Жива́го с ме́ртвыми? Что́ пла́чете Нетле́ннаго во тли? Ше́дше, пропове́дите ученико́м Его́.

Сей день, его́же сотвори́ Госпо́дь, возра́дуемся и возвесели́мся вонь.

Па́сха кра́сная, Па́сха, Госпо́дня Па́сха, Па́сха всечестна́я нам возсия́. Па́сха: ра́достию друг дру́га обы́мем. О Па́сха! Избавле́ние ско́рби, и́бо из гро́ба днесь, я́ко от черто́га, возсия́в Христо́с, жены́ ра́дости испо́лни, глаго́ля: пропове́дите Апо́столом.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Воскресе́ния день, и просвети́мся торжество́м, и друг дру́га обы́мем; рцем: бра́тие, и ненави́дящим нас прости́м вся воскресе́нием; и та́ко возопии́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Пасхальные часы

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. (Трижды)

Песнь Воскресению Христову,

глас 6-й

Воскресе́ние Христо́во ви́девше, поклони́мся Свято́му Го́споду Иису́су, еди́ному Безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те, вси ве́рнии, поклони́мся свято́му Христо́ву Воскресе́нию: се бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́. (Трижды)

Ипакои Святой Пасхи,

глас 4-й

Предвари́вшия у́тро я́же о Мари́и и обре́тшия ка́мень отвале́н от гро́ба, слы́шаху от А́нгела: во све́те присносу́щнем Су́щаго с ме́ртвыми что́ и́щете, я́ко челове́ка? Ви́дите гро́бныя пелены́: тецы́те и ми́ру пропове́дите, я́ко воста́ Госпо́дь, умертви́вый смерть, я́ко есть Сын Бо́га, спаса́ющаго род челове́ческий.

Кондак,

глас 8-й

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м Мироно́сицам веща́вый: ра́дуйтеся, и Твои́м Апо́столом мир да́руяй, па́дшим подая́й воскресе́ние.

И тропари Воскресению,

глас тот же

Во гро́бе пло́тски, во а́де же с душе́ю я́ко Бог, в раи́ же с разбо́йником и на Престо́ле был еси́, Христе́, со Отце́м и Ду́хом, вся исполня́яй, неопи́санный.

Сла́ва Отцу́ и Сы́ну и Свято́му Ду́ху.

Я́ко живоно́сец, я́ко рая́ красне́йший вои́стинну и черто́га вся́каго ца́рскаго пока́зася светле́йший, Христе́, гроб Твой, исто́чник на́шего воскресе́ния.

И ны́не и при́сно и во ве́ки веко́в. Ами́нь.

Вы́шняго освяще́нное Боже́ственное Селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́нна Ты в жена́х еси́, Всенепоро́чная Влады́чице.

Го́споди, поми́луй. (40 раз)

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Трижды)

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. (Трижды)

И нам дарова́ живо́т ве́чный, покланя́емся Его́ тридне́вному Воскресе́нию.