Войти в систему
Войти с помощью соц. сетей:
Во всю зе́млю изы́де веща́ние твое́, я́ко прие́мшую сло́во твое́, и́мже боголе́пно научи́л еси́, естество́ су́щих уясни́л еси́, челове́ческия обы́чаи украси́л еси́, ца́рское свя́щение, о́тче преподо́бне: моли́ Христа́ Бога спасти́ся душа́м на́шим.
Яви́лся еси́ основа́ние непоколеби́мое Це́ркве, подая́ всем некра́домое госпо́дство челове́ком, запечатле́я твои́ми веле́ньми, небоявле́нне Васи́лие преподо́бне.
Велича́ем тя, святи́телю Христо́в Васи́лие, благоче́стно Це́рковь Христо́ву сохра́ншаго.
От ю́ности Христа́ возлюби́л еси́, блаже́нне, и Тому́ Еди́ному рабо́тати пла́менне вожделе́в, непреста́нною моли́твою и трудо́м в пусты́ни подвиза́лся еси́, умиле́нным же се́рдцем любо́вь Христо́ву стяжа́в, избра́нник возлю́блен Бо́жия Ма́тере яви́лся еси́. Сего́ ра́ди вопие́м ти: спаса́й нас моли́твами твои́ми, Серафи́ме, преподо́бне о́тче наш.
Ми́ра красоту́ и я́же в нем тле́нная оста́вив, преподо́бне, в Саро́вскую оби́тель всели́лся еси́, и, та́мо а́нгельски пожи́в, мно́гим путь был еси́ ко спасе́нию: сего́ ра́ди и Христос тебе́, о́тче Серафи́ме, просла́ви и да́ром исцеле́ний и чуде́с обогати́. Те́мже вопие́м ти: ра́дуйся, Серафи́ме, преподо́бне о́тче наш.
Просвети́вшися Боже́ственною благода́тию, и по сме́рти све́тлость жития́ твоего́ яви́ла еси́: источа́еши бо ми́ро благово́нное всем боля́щим на исцеле́ние, с ве́рою приходя́щим к моще́м твои́м, пра́ведная ма́ти Иулиани́е, Христа́́ Бо́га моли́ спасти́ся душа́м на́шим.
Скоропослу́шливую помо́щницу вси, су́щии в беда́х и боле́знех, воспое́м Иулиани́ю святую, та бо в ми́ре богоуго́дно поживе́ и ми́лостыню к ни́щим безме́рну показа́, сего́ ра́ди обре́те благода́ть чу́дес Бо́жиим ве́дением.
Апо́столи святи́и, моли́те Ми́лостиваго Бога, да прегреше́ний оставле́ние пода́ст душа́м на́шим.
Христо́вых ученико́в лик се́дмьдесят Боже́ственно, ве́рнии, в пе́снех восхва́лим, те́ми бо вси навыко́хом Тро́ицу почита́ти Неразде́льную, и пребыва́ют свети́льницы Боже́ственныя веры.
Первопресто́льников прее́мниче, сто́лпе Правосла́вия, и́стины побо́рниче, но́вый испове́дниче, святи́телю Фили́ппе, положи́вый ду́шу за па́ству твою́, те́мже, я́ко име́я дерзнове́ние ко Христу́, моли́ за град же и лю́ди, чту́щия досто́йно святу́ю па́мять твою́.
Правосла́вия наста́вника и и́стины провозве́стника, Златоу́стаго ревни́теля, росси́йскаго свети́льника, Фили́ппа прему́драго восхва́лим, пи́щею слове́с свои́х разу́мно ча́да своя́ пита́юща, той бо язы́ком хвале́ния поя́ше, устна́ма же пе́ние веща́ше, я́ко таи́нник Бо́жия благода́ти.
Правосла́вия наста́вниче, благоче́стия учи́телю и чистоты́, Вы́шенский подви́жниче святи́телю Феофа́не богому́дре, писа́ньми твои́ми сло́во Бо́жие изъясни́л еси́ и всем ве́рным путь ко спасе́нию указа́л еси́. Моли́ Христа́́ Бо́га спасти́ся душа́м на́шим.
Богоявле́нию тезоимени́тый, святи́телю Феофа́не, уче́нии твои́ми мно́гия лю́ди просвети́л еси́, со Ангелы ны́не предстоя́ Престо́лу Святы́я Тро́ицы, моли́ непреста́нно о всех нас.
Боже́ственною любо́вию от ю́ности распала́емь, Па́вле преподо́бне, вся, я́же в ми́ре кра́сная, возненави́дев, Христа́ еди́наго возлюби́л еси́ и сего́ ра́ди во вну́треннюю пусты́ню всели́лся еси́, со зверьми́ жи́ти весь Христу́. Отону́дуже и
Всеви́дящее Око, твоя́ труды́ ви́дев, да́ром чуде́с и по преставле́нии обогати́ тя. Те́мже вопие́м ти: моли́ непреста́нно о всех нас, честну́ю па́мять твою́ при́сно в пе́снех почита́ющих.
Все твое́ у́мное жела́ние к Богу впери́в, и Тому невозвра́тно от души́ после́довал еси́, в пусты́ню всели́вся, и та́мо а́нгельски пожи́в, мно́гим путь был еси́ ко спасе́нию. Сего́ ра́ди и Христо́с тя просла́ви и да́ром чуде́с обогати́. Те́мже вси вопие́м ти: ра́дуйся, Па́вле преподо́бне, пусты́нный жи́телю.
Слез твои́х тече́ньми пусты́ни безпло́дное возде́лал еси́, и я́же из глубины́ воздыха́ньми во сто трудо́в уплодоноси́л еси́, и был еси́ свети́льник вселе́нной, сия́я чудесы́, о́тче наш, моли́ Христа́ Бо́га спасти́ся душа́м на́шим.
Насажде́н во дво́рех Го́спода твоего́, преподо́бными твои́ми доброде́тельми кра́сно процве́л еси́ и умно́жил еси́ ча́да твоя́ в пусты́ни, слез твои́х ту́чами напая́емая, стадонача́льниче Бо́жий боже́ственных дворо́в. Те́мже зове́м: ра́дуйся, о́тче Феодо́сие.
Пути́, вводя́щаго в жизнь, наста́вник и первопресто́льник и учи́тель был еси́; пе́рвее бо прише́д, святи́телю Са́вво, оте́чество твое́ просвети́л еси́ и, породи́в то́е Ду́хом Святы́м, я́ко древа́ ма́слинная, в мы́сленнем раи́ насади́л еси́ всеосвяще́нная твоя́ ча́да. Тем, я́ко апо́столом и святи́телем сопресто́льна чту́ще тя, мо́лим: моли́ Христа́ Бога, дарова́ти нам ве́лию ми́лость.
Яко первосвяти́теля вели́каго и апо́столов соо́бщника, Це́рковь прославля́ет тя люде́й твои́х, преподо́бне. Но я́ко име́я дерзнове́ние ко
Христу́ Бо́гу, моли́твами твои́ми от вся́ких нас бед спаса́й, да зове́м ти: ра́дуйся, о́тче Са́вво, богому́дре.
Агнцу Пречи́стому и Па́стырю после́дуя, а́гнице слове́сная Татиа́но мы́сленных звере́й не убоя́лася еси́, но зна́мением кре́стным вооружи́вшися, до конца́ тех низложи́ла еси́ и вошла́ еси́ в Небе́сную огра́ду, иде́же помяни́ и нас, му́ченице Христо́ва многому́драя.
Све́тло во страда́нии твое́м возсия́ла еси́, страстоте́рпице, от крове́й твои́х преиспещре́на, и, я́ко кра́сная голуби́ца, к небеси́ возлете́ла еси́, Татиа́но: те́мже моли́ при́сно за чту́щия тя.
Сло́ва Бо́жия служи́тельнице, во апо́стольстей про́поведи Первозва́нному Андре́ю и про́чим апо́столом подража́вшая, просвети́тельнице Иве́рии и Ду́ха Свята́го цевни́це, свята́я равноапо́стольная Ни́но, моли́ Христа́ Бо́га спасти́ся душа́м на́шим.
Прииди́те днесь вси́, воспои́м избра́нную от Христа́́ равноапо́стольную пропове́дницу Бо́жия сло́ва, му́друю благове́стницу, лю́ди Картали́нии приве́дшу на путь живота́ и и́стины, Богома́тере учени́цу, усе́рдную засту́пницу и неусыпа́ющую храни́тельницу на́шу, Ни́ну прехва́льную.
Велича́ем Тя, свята́я равноапо́стольная Ни́но, всю страну́ Иверскую све́том Ева́нгелия просвети́вшую и ко Христу́ приве́дшую.
Ревни́теля Илию́ нра́вы подра́жая, Крести́телю пра́выми стезя́ми после́дуя, о́тче Анто́ние, пусты́ни был еси́ жи́тель и вселе́нную утверди́л еси́ моли́твами твои́ми. Те́мже моли́ Христа́ Бо́га, спасти́ся душа́м на́шим.
Жите́йския молвы́ отри́нув, безмо́лвно житие́ сконча́л еси́, Крести́теля подража́яй вся́ким о́бразом преподо́бнейший, с ним у́бо тя почита́ем, отце́в нача́льниче Анто́ние.
Доброде́телей ревни́телю, пусты́нный жи́тель, подви́жник ве́ры Христа́ Бо́га на́шего, поще́нием и труды́ умертви́вый плотска́я вожделе́ния, тезоимени́те вели́кому Анто́нию, его́же житию́ поревнова́л еси́ и во его́же имя Боже́ственный храм воздви́гл еси́, ку́пно с ним, преподо́бне Анто́ние, моли́ Спаси́теля всех, да и нас сотвори́т победи́тели плотски́х по́хотей и хра́мы Ду́ха Свята́го, по ве́лицей Его́ ми́лости.
Све́рстник и подража́тель преподо́бному Варлаа́му, послуша́ние к нему́ и́стинное стяжа́в, досто́ин яви́лся ему́ прее́мник, упа́сши до вре́мене ста́до его́, доброде́телем же его́ поревнова́в, в ту́южде ме́ру во́зраста дости́гл еси́, безмо́лвие пусты́нное возлюби́в, и уго́ден Го́сподеви показа́лся еси́, первонача́льник быв пусты́ни при е́зере Ды́мском, тем ти вопие́м: с преподо́бным Варлаа́мом, о́тче Анто́ние, моли́ о нас Бо́га, да даст нам та́кожде угоди́ти Ему́, я́коже и ты, о́бразе послуша́ния и безмо́лвия ти́хий рачи́телю.
Неусы́пный моли́твы ко Христу ревни́телю, подвигополо́жнику святы́я пу́стыни и́скренне подража́вый, обнови́телю и устрои́телю ея благоле́пия, богомы́слие и ста́рчество та́мо насади́вый, доброде́тельми мно́гими, я́ко ри́зою украше́нный, по́стническое житие́ яви́вый, преподо́бне о́тче Ге́рмане, приими́ нас, чту́щих любо́вию честну́ю па́мять твою́, да отве́ргнем льсти́вую пре́лесть мира сего́ те́плым предста́тельством твои́м у Престо́ла Вседержи́теля.
В преподо́бстве и пра́вде му́жественно пожи́в, пустынножи́телю, отче Ге́рмане, мно́гим путь ко спасе́нию, я́ко звезда́ я́ркая, озари́л еси́, всем был для всех, служа́ Бо́гу и лю́дем.
Де́лы возсия́вше Правосла́вия, все погаси́вше злосла́вие, победи́телие, победоно́сцы бы́сте, благоче́стием вся обогати́вше, Це́рковь вельми́ украси́вше, досто́йно обрето́сте Христа́ Бо́га, да́рующаго нам ве́лию ми́лость.
Священнонача́льницы велича́йшии благоче́стия и до́блии побо́рницы Це́ркве Христо́вы, вся соблюди́те, пою́щия: спаси́, Ще́дре, ве́рою чту́щия Тя.
Блаже́нств Христо́вых прича́стницы, честна́го супру́жества и попече́ния о ча́дех до́брый о́бразе, пра́веднии Кири́лле и Мари́е, плод благоче́стия, Се́ргия преподо́бнаго, нам яви́вшии, с ни́мже усе́рдно моли́те Го́спода низпосла́ти нам дух любве́ и смиренному́дрия, да в ми́ре и единомы́слии просла́вим Тро́ицу Единосу́щную.
Днесь, ве́рнии, соше́дшеся, восхва́лим дво́ицу блаже́нную, благове́рнаго Кири́лла и Мари́ю добронра́вную, ти́и бо мо́лятся вку́пе со возлю́бленным сы́ном свои́м преподо́бным Се́ргием ко Еди́ному во Святе́й Тро́ице Бо́гу Оте́чество на́ше в правове́рии утверди́ти, до́мы ми́ром огради́ти, ю́ныя от напа́стей и собла́знов изба́вити, ста́рость укрепи́ти и спасти́ ду́ши на́ша.
Правосла́вия наста́вниче, но́вшеств противобо́рниче, степе́нь ве́ры, Це́ркве свети́льниче, учи́телей Богодухнове́нная печа́те, Ма́рко всему́дре, писа́нии твои́ми вся просвети́л еси́, цевни́це духо́вная, моли́ Христа́ Бо́га спасти́ся душа́м на́шим.
Прему́дрыми слове́с твои́х исплете́нии, всеблаже́нне, вся́кая уста́ ху́льная загради́л еси́ и ве́рныя Боговеща́нии просвети́л еси́ чести́ Тро́ицу в то́ждестве естества́.
Пусты́нный жи́тель и в телеси́ а́нгел, и чудотво́рец яви́лся еси́, богоно́се о́тче наш; посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою притека́ющих ти. Сла́ва Да́вшему ти кре́пость, сла́ва Венча́вшему тя, сла́ва Де́йствующему тобо́ю всем исцеле́ния.
Блаже́нную жизнь сконча́в в житии́ с му́ченическими ли́ки, в земли́ кро́тких досто́йно водворя́ешися, Богоно́сне Мака́рие, и пусты́ню, я́коже град, насе́лив, благода́ть прия́л еси́ от Бо́га чуде́с, те́мже тя почита́ем.
Весели́ся, пусты́ня неражда́ющая, благоду́шствуй, неболя́щая, я́ко умно́жи тебе́ ча́да муж жела́ний духо́вных, благоче́стием насади́в, воздержа́нием воспита́в в доброде́телей соверше́нство. Того́ моли́твами, Христе́ Бо́же, умири́ живо́т наш.
В честне́м рождестве́ твое́м ра́дость тварь обре́те и в боже́ственней па́мяти твое́й, преподо́бне, благоду́шие прия́т мно́гих твои́х чуде́с, от ни́хже пода́ждь бога́тно в ду́ши на́ша и очи́сти грехо́в скве́рны, я́ко да пое́м: Аллилу́ия.
Заре́ю Ду́ха облиста́емь, вити́йствующих богому́дренно сподо́бился еси́ разуме́ния, неве́дением омраче́нная сердца́ челове́ков све́том благоче́стия просвеща́я, пресве́тел яви́лся еси́ Правосла́вия свети́льник, Макси́ме преподо́бне, отону́дуже ре́вности ра́ди Всеви́дящаго, оте́чества чужд и стра́нен, Росси́йския страны́ был еси́ пресе́льник, страда́ния темни́ц и заточе́ния от самодержа́внаго претерпе́в, десни́цею Вы́шняго венча́ешися и чудоде́йствуеши пресла́вная. И о нас хода́тай бу́ди непрело́жен, чту́щих любо́вию святу́ю па́мять твою́.
Богодухнове́нным Писа́нием и богосло́вия пропове́данием неве́рствующих суему́дрие обличи́л еси́, всебога́те, па́че же, в Правосла́вии исправля́я, на стезю́ и́стиннаго позна́ния наста́вил еси́, я́коже свире́ль богогла́сная, услажда́я слы́шащих ра́зумы, непреста́нно весели́ши, Макси́ме досточу́дне. Сего́ ра́ди мо́лим тя: моли́ Христа́ Бо́га грехо́в оставле́ние низпосла́ти ве́рою пою́щим всесвято́е твое́ успе́ние, Макси́ме, о́тче наш.
Правосла́вия наста́вниче, благоче́стия учи́телю и чистоты́, вселе́нныя свети́льниче, мона́шествующих богодухнове́нное удобре́ние, Макси́ме прему́дре, уче́ньми твои́ми вся просвети́л еси́, цевни́це духо́вная. Моли́ Христа́ Бо́га спасти́ся душа́м на́шим.
Свет Трисия́нный, все́льшийся в ду́шу твою́, сосу́д избра́н показа́ тя, всеблаже́нне, явля́юща Боже́ственная конце́м, неудобопости́жных разуме́ний ты сказу́яй, блаже́нне, и Тро́ицу всем, Макси́ме, возпропове́дуяй я́сно, Пресу́щную, Безнача́льную.
Яко пустыннолюби́вая го́рлица, от су́етнаго и многомяте́жнаго ми́ра в пусты́ню удали́вся, чистото́ю и гове́нием, моли́твами и тружде́нием просла́вил еси́ Бо́га в душе́ и телеси́ свое́м. И та́ко благоче́стно пожи́в, яви́лся еси́, преподо́бне Генна́дие, пусты́ни Любимогра́дския украше́ние, и́ноком честна́го жития́ о́браз и те́плый моли́твенник за всех, притека́ющих к тебе́ с ве́рою.
Моли́твою и посто́м, тружде́нием и терпе́нием умертви́вый вся́кое пло́ти мудрова́ние, чистоты́ сосу́д благоле́пен, Боже́ственных даро́в и чуде́с прича́стник, и́ноком же до́блий наста́вник был еси́, сподвиза́яся блаже́нному Корни́лию, о́тче богому́дре. Сего́ ра́ди вопие́м: моли́ся ко Го́споду, да моли́твами твои́ми да́рует мир и спасе́ние душа́м на́шим.
Ублажа́ем вас, преподо́бне о́тче наш Генна́дие и всех святы́х отце́в собо́р, Костромска́го края покрови́телей, вы бо мо́лите за нас Христа́ Бо́га на́шего.
Нищету́ Христо́ву возлюби́вши, безсме́ртныя трапе́зы ны́не наслажда́ешися, безу́мием мни́мым безу́мие ми́ра обличи́вши, смире́нием кре́стным си́лу Бо́жию восприя́ла еси́. Сего́ ра́ди дар чудоде́йственныя по́мощи стяжа́вшая, Ксе́ние блаже́нная, моли́ Христа́ Бога изба́витися нам от вся́каго зла покая́нием.
На земли́ я́ко стра́нна пребы́вши, о небе́снем же оте́чествии воздыха́ющи, юро́да от бу́йих и неве́рных, прему́дра же и свя́та от ве́рных познава́ешися, и от Бо́га сла́вою и че́стию венча́ешися, Ксе́ние мужеу́мная и богоу́мная, сего́ ради зове́м ти: ра́дуйся, я́ко по стра́нствии земне́м в дому́ Отчем водворя́ешися.
Па́стырская свире́ль богосло́вия твоего́ ри́торов победи́ трубы́, я́коже бо глубины́ ду́ха изыска́вшу, и добро́ты веща́ния приложи́шася тебе́. Но моли́ Христа́ Бо́га, о́тче Григо́рие, спасти́ся душа́м на́шим.
Богосло́вным язы́ком твои́м сплете́ния ри́торская разруши́вый, сла́вне, Правосла́вия оде́ждею, свы́ше истка́нною, Це́рковь украси́л еси́, ю́же и нося́щи, с на́ми зове́т, твои́ми ча́ды: ра́дуйся, о́тче, богосло́вия у́ме кра́йнейший.
Ве́ру правосла́вную непоро́чно соблю́д, по́двигом до́брым во святи́тельстве подвиза́лся еси́, священному́чениче о́тче Влади́мире, и убива́ющим тя рекл еси́: Госпо́дь да прости́т вас. Сего́ ра́ди угото́вася ти вене́ц пра́вды от Христа́́, Бо́га на́шего, Его́же, я́ко име́яй дерзнове́ние, моли́ оправда́ние дарова́ти нам в День Су́дный.
Образ Христо́ва милосе́рдия явля́я, покро́в и защище́ние па́стве твое́й был еси́, святи́телю о́тче Влади́мире, в кро́тости стра́дания прие́мля, безбо́жных мучи́телей, благословля́я, прости́л еси́. Те́мже и нам испроси́ у Христа́ Бо́га дух ми́рен и ве́лию ми́лость.
Ве́рою пла́менною апо́столу Петру́ подо́бяся, та́же и трикра́тным слы́шанием воззва́ния Христо́ва, ду́шу твою́ за Того́ положи́л еси́, святи́телю о́тче Пе́тре, ка́меню тве́рдый Це́ркве правосла́вныя: свети́льниче во мра́це беззако́ний, доброде́тельми сия́яй, ра́достию страда́ния за Христа́ претерпе́ти изво́лил еси́, со испове́дники и страстоте́рпцы росси́йскими. Моли́ся с ни́ми о нас, архиере́ю Бо́жий, священному́чениче Солове́цкий.
Во святи́тельстве твое́м до́бре подвиза́лся еси́, богому́дре, и му́ченичества венце́м све́тло украси́лся еси́, преще́ния враго́в Христо́вых не устраши́вся, кровьми́ твои́ми зе́млю во ото́це Анзерстем освяти́л еси́: сего́ ра́ди Си́лы Небе́сныя удиви́шася терпе́нию твоему́, мы́ же с ве́рою и любо́вию притека́ем ко святы́м моще́м твои́м, досточу́дне. Ны́не со все́ми новому́ченики росси́йскими моли́ о нас Христа́ Бога, всеблаже́нне Пе́тре, да зове́м ти: ра́дуйся, о́тче приснопа́мятне.
Слез твои́х тече́ньми пусты́ни безпло́дное возде́лал еси́, и я́же из глубины́ воздыха́ньми во сто трудо́в уплодоноси́л еси́, и был еси́ свети́льник вселе́нной, сия́я чудесы́, Ефре́ме о́тче наш, моли́ Христа́ Бо́га спасти́ся душа́м на́шим.
Час при́сно прови́дя Суда́, рыда́л еси́ го́рько, Ефре́ме, я́ко любобезмо́лвный, де́лателен же был еси́ в де́лех учи́тель, преподо́бне. Те́мже, о́тче все́мирный, лени́выя воздвиза́еши к покая́нию.
Яко апо́столов единонра́внии и вселе́нныя учи́телие, Влады́ку всех моли́те мир вселе́нней дарова́ти и душа́м на́шим ве́лию ми́лость.
Свяще́нныя и боговеща́нныя пропове́дники, верх учи́телей, Го́споди, прия́л еси́ в наслажде́ние благи́х Твои́х и упокое́ние: тру́ды бо о́нех и смерть прия́л еси́ па́че вся́каго всепло́дия, еди́не Прославля́яй святы́я Твоя́.
Чудеса́ святы́х Твои́х му́ченик, сте́ну необори́му нам дарова́вый, Христе́ Бо́же, тех моли́твами сове́ты язы́ков разори́, Це́рковь Святу́ю укрепи́, я́ко Еди́н Благ и Человеколю́бец.
От Боже́ственныя благода́ти дар чуде́с прие́мше святи́и, чудоде́йствуете непреста́нно, вся на́ша стра́сти рукоде́йством секу́ще невиди́мым, Ки́ре богому́дре со Иоа́нном сла́вным: вы бо боже́ственнии вра́чеве есте́.
Пи́щи Боже́ственныя, треблаже́нне, наслажда́яся на небесе́х неоску́дно, сла́вящих пе́сньми па́мять твою́ покры́й и сохрани́ от вся́кия ну́жды, отжени́ вредя́щих ни́вам живо́тных, да тебе́ от любве́ вопие́м всегда́: ра́дуйся, Три́фоне, му́чеников укрепле́ние.
Тро́йческою тве́рдостию многобо́жие разруши́л еси́ от коне́ц, всесла́вне, че́стен во Христе́
быв, и, победи́в мучи́тели во Христе́ Спаси́теле, вене́ц прия́л еси́ му́ченичества твоего́ и дарова́ния Боже́ственных исцеле́ний, я́ко непобеди́мь.
Ра́дуйся, Богоприи́мче ста́рче Симео́не, прие́мый во объя́тия Спа́са Го́спода. Весели́ся и ты честна́я проро́чице Анно, возвести́вшая прише́ствие в мир Христа́ Бо́га на́шего, сокруши́вшаго держа́ву вра́жию и подаю́щаго ми́рови ве́лию ми́лость.
Во избра́нных Бо́жиих, блаже́нне ста́рче Симео́не, на Небеси́ предстои́ши пред лице́м Христа́́ Бо́га, Его́же во хра́ме, яко Младе́нца руконоси́маго, во объя́тия своя́ от всепречи́стых рук прия́л еси́ и со Анною проро́чицею я́ко Бо́га испове́дал еси́. Те́мже похва́льными гла́сы ублажа́ем вас: ра́дуйся, Богоприи́мче ста́рче Симео́не, ра́дуйся, проро́чице честна́я Анно, ра́дуйтеся, Бо́га во пло́ти позна́вшии.
Апо́столов единонра́вне и сопресто́льне, служи́телю Христо́в ве́рный и богому́дрый, цевни́це избра́нная Боже́ственнаго Ду́ха, сосу́де преизлива́ющийся любве́ Христо́вы, Япо́нския земли́ просвети́телю, святы́й Нико́лае, иера́рше равноапо́стольне, моли́ся Живонача́льней Тро́ице о всем твое́м ста́де и о всем ми́ре.
Тве́рдаго и Боговеща́ннаго пропове́дателя Ева́нгелия Твоего́, Господи, возме́здил еси́ боголе́пно, труды́ бо его и боле́зни прия́л еси́ па́че всех жертв зако́нных и всесожже́ний. Того́ моли́твами соблюди́ нас от неприя́зни.
От младе́нства яви́лся еси́, правове́рный кня́же Рома́не, избра́н от Бо́га благоче́стия столп необори́м, ве́ру непоро́чну соблю́л еси́, моли́твами и ми́лостынею и посто́м Бо́гу угоди́л еси́; те́мже и по сме́рти яви́ся све́тлость жития́ твоего́, исцеля́еши бо неду́ги немощству́ющих, ве́рою притека́ющих ко свято́му твоему́ гро́бу. Сего́ ра́ди вопие́м ти: ра́дуйся, уго́дниче Бо́жий Рома́не, гра́да Углича похвало́ и утвержде́ние.
Красоту́ ми́ра сего́, княже́ние и сла́ву, я́ко вре́менно помышля́я, и сего́ ра́ди благоче́стно в ми́ре пожи́л еси́, блаже́нне кня́же Рома́не, ми́лостынею и моли́твами Бо́гу угоди́в, и по преставле́нии свое́м чуде́с дар прии́м от Христа́́ Бо́га и свети́льник яви́ся пресве́тлый, просвеща́я свои́ми чудесы́, приходя́щим к тебе́ с ве́рою здра́вие подае́ши и от бед избавля́еши. Те́мже Христо́ва Це́рковь пе́сньми сла́вит тя, благочести́вый кня́же Рома́не, гра́ду своему́ Угличу вели́кий побо́рниче.
Преудобре́н во архиере́ех, святи́телю Феодо́сие, был еси́ свети́ло своему́ ста́ду, та́же преста́вился еси́ в ве́чныя оби́тели. Умоли́ у Престо́ла Царя́ сла́вы изба́витися нам от находя́щих на ны зол, и спасти́ся душа́м на́шим, свя́те, моли́твами твои́ми.
Па́стырей Нача́льнику Христу труди́лся еси́, святи́телю Феодо́сие, на па́жити духо́вней пита́я слове́сныя твоя́ о́вцы, и прия́л еси́ от Христа́ Спа́са целе́бный дар цели́ти от не́мощи душе́вныя и теле́сныя вся́каго с ве́рою приходя́щаго к целе́бным твои́м моще́м. Моли́, свя́те, о призыва́ющих и́мя твое́, от наве́тов вра́жиих спасти́ся душа́м на́шим.
Воинствосло́вием и́стинным, страстоте́рпче, Небе́снаго Царя́ воево́да предо́брый был еси́, Фео́доре, ору́жиями бо ве́ры ополчи́лся еси́ му́дренно и победи́л еси́ де́монов полки́, и победоно́сный яви́лся еси́ страда́лец. Те́мже тя ве́рою при́сно ублажа́ем.
Му́жеством души́ в ве́ру оболки́йся, и глаго́л Бо́жий, а́ки копие́, в ру́ку взем, врага́ победи́л еси́, му́чеников преве́лий Фео́доре, с ни́ми Христу́ Бо́гу моля́ся не преста́й о всех нас.
Свы́ше от Бо́га, преподо́бне, благода́ть прия́л еси́ духо́вную, и от Него́ у́бо позна́лся еси́, блаже́нне, того́ ра́ди и ты ду́хом позна́л еси́ лу́чшая Его́, бу́дущаго ве́ка пребыва́ние, по́стнически испыта́вся во свои́х оби́телех. И ны́не со Ангели ликовству́я, Спа́су всех за ны моли́ся, свя́те Дими́трие, да вси вопие́м: сла́ва Да́вшему ти кре́пость, сла́ва Венча́вшему тя, сла́ва Де́йствующему тобо́ю всем исцеле́ния.
От ю́ности, преподо́бне, крест твой взем, Христу́ после́довал еси́, в моли́твах и поще́ниих, во бде́ниих же и злострада́ниих плоть твою́ изнуря́я. Те́мже и Всеви́дящее Око твоя́ труды́ ви́дев, чудесы́ тя прославля́ет и всех зва́ти тебе́ науча́ет: ра́дуйся, преподо́бне о́тче Дими́трие, по́стников удобре́ние.
Яко апо́столом сопресто́льна и врача́ предо́бра, и служи́теля благоприя́тна, к ра́це твое́й честне́й притека́юще, святи́телю Алекси́е, богому́дре чудотво́рче, соше́дшеся любо́вию в па́мять твою́, све́тло пра́зднуем, в пе́снех и пе́ниих ра́дующеся и Христа́ сла́вяще, такову́ю благода́ть тебе́ дарова́вшаго исцеле́ний и гра́ду твоему́ вели́кое утвержде́ние.
Боже́ственнаго и пречестна́го святи́теля Христо́ва, но́ваго чудотво́рца Але́ксия, верно вси пою́ще, лю́дие, любо́вию да ублажи́м, я́ко па́стыря вели́каго, служи́теля же и учи́теля прему́дра земли́ Росси́йстей. Днесь, в па́мять его прите́кше, ра́достно возопие́м песнь Богоно́сному: я́ко име́я дерзнове́ние к Бо́гу, многообра́зных нас изба́ви обстоя́ний, да зове́м ти: ра́дуйся, утвержде́ние гра́ду на́шему.
От пеле́н приле́жно прему́дрость сестру́ себе́ сотвори́в, Богогла́се, пресве́тлую ви́дев, я́ко деви́цу чи́сту, ю́же прие́мь, приведе́, я́ко мони́сты златы́ми, се́ю украси́в свою́ ду́шу и ум, и обре́теся я́ко други́й Кири́лл, блаже́нне, ра́зумом и и́менем, му́дре.
Тве́рдым и богодохнове́нным уче́нием просвеща́я мир пресве́тлыми заря́ми, обтече́, я́ко мо́лния вселе́нную, Кири́лле блаже́нне, разсева́я пресве́тлое Бо́жие сло́во, на за́паде и се́вере и ю́зе, мир просвеща́я чудесы́.
Росси́йския земли́ первопресто́льниче и неусы́пный о ней Богу моли́твенниче! За ве́ру Христо́ву и па́ству твою́ ду́шу свою́ положи́в, страну́ на́шу от нече́стия изба́вил еси́. Те́мже вопие́м ти: спаса́й нас моли́твами твои́ми, священному́чениче Ермоге́не, о́тче наш.
Темни́цею и гла́дом изнуря́ем, да́же до сме́рти ве́рен пребы́л еси́, блаже́нне Ермоге́не, малоду́шие от серде́ц люде́й твои́х отгоня́я и на о́бщий по́двиг вся призыва́я. Те́мже и нечести́вых мяте́ж низложи́л еси́ и страну́ на́шу утверди́л еси́, да вси зове́м ти: ра́дуйся, засту́пниче Росси́йския земли́.
Удали́вся мира и водвори́вся в пусты́ни, до́брым по́двигом подвиза́ся, злострада́нием, и внима́нием, и моли́твами, отоню́дуже и по сме́рти источа́еши исцеле́ния, Севастиа́не, отче наш, моли́ Христа́ Бо́га спасти́ся душа́м на́шим.
Сия́нием Ду́ха Пресвята́го, му́дре Севастиа́не, просве́щся, оста́вил еси́ я́же в житии́ молвы́, пусты́ню же дости́гл еси́, преподо́бне о́тче, возвесели́л еси́ и́же над все́ми Бо́га и Зижди́теля. Сего́ ра́ди прославля́ет тя Христос, блаже́нне,
Вели́кий Дарода́тель.
Посто́м предочи́стився, прему́дрости пости́гл еси́ разуме́ние, от пусты́нных же Богоно́сных оте́ц научи́лся еси́ страсте́й обузда́нию. Того́ ра́ди пода́ждь нам твои́ми моли́твами пло́ти на́шея ду́ху послуша́ние: еси́ бо наста́вник, Кассиа́не преподо́бне, всем пою́щим о Христе́ твою́ па́мять.
Преподо́бен быв, Богу возложи́лся еси́ и, просвеща́я до́брыми ви́ды, Кассиа́не, я́ко солнце облиста́л еси́ сиянием Боже́ственных твоих учений, сердца́ всех чту́щих тя всегда просвеща́я. Но прилежно моли́ Христа́ о и́же любо́вию те́пле восхваля́ющих тя.
Благоче́стно пожи́в во святи́тельстве, лю́ди просвети́л еси́ уче́нием твои́м, и о хра́ме Пречи́стыя вельми́ подвиза́вся, и люби́тель мона́хов быв, сего́ ра́ди от Христа́ па́ствы твоея́ вене́ц прия́л еси́. Те́мже, я́ко апо́стольскаго престо́ла наме́стника и святи́теля вели́каго чту́ще тя, мо́лим, ча́да твоя́, блаже́нне: от всех бед изба́ви нас я́же ко Христу моли́твами твои́ми, святи́телю Христо́в Арсе́ние, о́тче наш.
Восприе́мши ра́достно честны́я твоя́ мо́щи, пречи́стая це́рковь, в ню́же че́стно вноси́ми мно́жеством священномона́хов, и кня́зи благове́рными, и я́же прие́мши я́ко сокро́вище многоце́нное. Те́мже и мы ны́не, твоея́ огра́ды слове́сныя о́вцы, о́крест ра́ки твоея́ предстоя́ще, любе́зно вопие́м ти: не забу́ди чад твои́х, о́тче, и́хже му́дре собра́л и возлюби́л еси́, я́ко да зове́м ти: ра́дуйся, святи́телю Арсе́ние, па́стырю и учи́телю наш.
Аще и сме́ртию ну́ждною у́мерл еси́, а́ще и сме́ртная сень внеза́пу на́йде на тя, оба́че, я́ко деву му́друю, ду́шу твою́ обре́те Христо́с и в черто́г Свой Небе́сный введе́, и со святы́ми всели́, чудесы́ возвели́чив и́мя твое́, Адриа́не му́чениче преподо́бне, Ему́же моли́тву о нас сотвори́, па́мять твою́ почита́ющих.
Христа́́ ра́ди до́блественне претерпе́л еси́ и вене́ц от Не́го восприя́л еси́ страда́ния твоего́, приходя́щим же к тебе́ с ве́рою от честна́го гро́ба подае́ши цельбы́, о преподо́бне му́чениче Адриа́не приснопа́мятне, моли́твенниче о душа́х на́ших.
Показа́вый о́браз доброде́телей, весь стра́ха Бо́жия и Ду́ха Свя́та испо́лнен бысть, преподо́бне о́тче Иове, безмо́лвия и́стинный рачи́тель яви́лся еси́, страсте́м Госпо́дним покланя́яся, и́мже и оби́тель воздви́гл еси́ во ото́це Анзерстем; пустынножи́телей наста́вниче, моли́ Христа́ Бо́га спасти́ся душа́м на́шим.
Любо́вь Христо́ву в се́рдце стяжа́в, ея́же ра́ди мно́ги ско́рби претерпе́вый, приста́нище обре́л еси́ в морсте́м ото́це, преподо́бнаго Елеаза́ра заве́тов ве́рный прее́мник яви́лся еси́, покро́вом Бо́жия Ма́тере осеня́емый: достоблаже́нне о́тче Иове, помина́й нас, чту́щих святу́ю па́мять твою́.
Страстоте́рпцы Христо́вы четы́редесяте, во гра́де Севасти́йстем му́жественно пострада́вшии, чрез огнь и во́ду проше́дшии, в поко́й ве́чный вше́дшии, моли́теся о нас ко Го́споду да жизнь ми́рну сохрани́т и ду́ши на́ша спасе́т, я́ко Человеколю́бец.
Все во́инство ми́ра оста́вльше, на Небесе́х Влады́це прилепи́стеся, страстоте́рпцы Госпо́дни четы́редесять, сквозе́ огнь бо и во́ду проше́дше, блаже́ннии, досто́йно восприя́сте сла́ву с Небе́с и венце́в мно́жество.
Велича́ем вас, страстоте́рпцы святи́и четы́редесяте, в Севасти́йстем е́зере му́чившиися, и чтим честна́я страдания ва́ша, я́же за Христа́ претерпе́ли есте́.
Иже от Бо́га свы́ше Боже́ственную благода́ть восприе́мь, сла́вне Григо́рие, и Того́ си́лою укрепля́емь, ева́нгельски ше́ствовати изво́лил еси́. Отону́дуже у Христа́ возме́здие трудо́в прия́л еси́, всеблаже́нне, Его́же моли́, да спасе́т ду́ши на́ша.
Подобонача́льник показа́ся еси́ Нача́льника па́стырем Христа́́, и́ноков чреды́, о́тче Григо́рие, ко огра́де Небе́сней наставля́я, и отту́ду научи́л еси́ ста́до Христо́во за́поведем Его́, ны́не же с ни́ми ра́дуешися и лику́еши в Небе́сных кро́вех.
Боже́ственное озаре́ние, Симео́не о́тче, восприя́в в души́ твое́й, свети́ло в ми́ре показа́лся еси́ светле́йшее, разгоня́я того мракобе́сие и всех уверя́я иска́ти, ю́же погуби́ша, благода́ть Ду́ха, Его́же приле́жно моли́ дарова́ти нам ве́лию ми́лость.
Светом просвеще́н Трисо́лнечным, богому́дре, Богосло́в яви́лся еси́ Пребоже́ственныя Тро́ицы. Свы́ше прему́дростию слове́с обогати́вся, источи́л еси́ богому́дрия Боже́ственныя струи́, от ни́хже пию́ще, вопие́м: ра́дуйся, треблаже́нне Симео́не Богонауче́нне.
Возвы́сився на доброде́тель и ум очи́стив, к жела́нному и кра́йнему дости́гл еси́, безстра́стием же украси́в житие́ твое́ и поще́ние изря́дное воспри́им со́вестию чи́стою, в моли́твах, я́ко безпло́тен, пребыва́я, возсия́л еси́, я́ко со́лнце, в ми́ре, преблаже́нне Алекси́е.
Дом роди́телей твои́х я́ко чужд име́в, водвори́лся еси́ в нем нищеобра́зно, и по преставле́нии вене́ц прие́м сла́вы, ди́вен на земли́ яви́лся еси́, Алекси́е, челове́че Бо́жий, Ангелом и челове́ком ра́дование.
Плотска́я мудрова́ния, о́тче Мака́рие, воздержа́нием и бде́нием умертви́л еси́, ме́сто бо, на не́мже по́ты твоя́ излия́л еси́, я́ко труба́, вопие́т к Бо́гу, пове́дающи твоя́ исправле́ния, и по сме́рти честны́я твоя́ мо́щи источа́ют исцеле́ния. Те́мже вопие́м ти: моли́ Христа́ Бо́га, да спасе́т ду́ши на́ша.
Вы́шних жела́я, воздержа́нием и труды́, и по́ты наслади́вся, жела́ние пло́ти твоея́ обузда́в, чуде́с дар прие́м от Христа́ Бо́га, свети́льник яви́лся еси́ пресве́тлый. Те́мже Христо́ва Це́рковь пе́сньми сла́вит тя, преподо́бне Мака́рие, о́тче наш.
Агница Твоя́, Иису́се, Фоти́ния, зове́т ве́лиим гла́сом: Тебе́, Женише́ мой, люблю́, и Тебе́ и́щущи страда́льчествую, и сраспина́юся и спогреба́юся Креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя, да и живу́ с Тобо́ю, но я́ко же́ртву непоро́чную приими́ мя, с любо́вию поже́ршуюся Тебе́. Тоя́ моли́твами, я́ко ми́лостив, спаси́ ду́ши на́ша.
Храм твой всечестны́й, я́ко цельбу́ душе́вную обре́тше вси ве́рнии, велегла́сно вопие́м ти, де́во му́ченице Фоти́ния, великоимени́тая: Христа́ Бо́га моли́ непреста́нно о всех нас.
Яко пресве́тлая звезда́ Росси́йския земли́, возсия́л еси́ в ве́си Вы́рицстей, преподо́бне Серафи́ме, и, си́лою Свята́го Ду́ха наставля́емь, све́том чуде́с твои́х страну́ на́шу озари́л еси́ духо́вно. Те́мже и мы, притека́юще ко гро́бу твоему́, уми́льно глаго́лем: моли́ Христа́ Бо́га спасти́ся душа́м на́шим.
Уподо́бился еси́ дре́вним отце́м и по́двигом до́брым подвиза́лся еси́, благода́тию Христо́вою просвети́вся, от Него́же прие́м дарова́ния чуде́с неду́гующих исцеля́ти, печа́льных и скорбя́щих утеша́ти, оби́димых и гони́мых защища́ти и всем в ну́ждах су́щим отра́ду и ско́рое избавле́ние подава́ти. Сего́ ра́ди, я́ко вели́каго чудотво́рца чту́ще, мо́лим тя, ча́да твоя́, преподо́бне Серафи́ме, от всех бед изба́ви нас моли́твами твои́ми.
Му́чеников дво́ица единонра́вная, Стефа́не и Пе́тре сла́внии, неве́рие соплеме́нников обличи́вше, Христу после́довали есте́, во Святу́ю Тро́ицу ве́ровати всех науча́юще, Ея́же ра́ди вели́кия страда́ния прие́мше, моли́теся о нас ко Го́споду, да, изба́вившеся тьмы грехо́вныя, Све́та яви́мся о́бщницы невече́рняго.
Святи́и страстоте́рпцы Стефа́не и Пе́тре, Тро́ицы побо́рницы преизря́днейшии, мук треволне́ния и стра́шную смерть на ве́чную жизнь премени́вшии, во гра́де Каза́ни страда́льчествовавшии, ны́не же в Небе́сных черто́зех Всецарю́ предстоящии, от вся́ких нас грехопаде́ний изба́вити Христа́́ Бо́га моли́те, Той бо есть ве́рных утвержде́ние.
Апо́стольских преда́ний ревни́теля и Христо́вой Це́ркви па́стыря до́браго, ду́шу свою́ за о́вцы положи́вшаго, жре́бием Божиим избра́ннаго, Всеросси́йскаго патри́арха Ти́хона восхва́лим и к нему́ с ве́рою и упова́нием возопи́им: предста́тельством святи́тельским ко Го́споду Це́рковь Ру́сскую в тишине́ соблюди́, расточе́нная ча́да ея́ во еди́но ста́до собери́, отступи́вшия от пра́выя ве́ры к покая́нию обрати́, страну́ на́шу от междоусо́бныя бра́ни сохрани́, и мир Бо́жий лю́дям испроси́.
Ти́хостию нра́ва украше́н, кро́тость и милосе́рдие ка́ющимся явля́яй, во испове́дании правосла́вныя ве́ры и любве́ ко Го́споду тверд и непрекло́нен пребы́л еси́, святи́телю Христо́в Ти́хоне, моли́ся о нас да не разлучи́мся от любве́ Бо́жия, я́же о Христе́ Иису́се, Го́споде на́шем.
От ю́ности твоея́ весь сам себе́ Го́сподеви возложи́в, в моли́твах и труде́х, и в посте́х, о́браз быв доброде́тели, отону́дуже ви́дев Бог твое́ благо́е произволе́ние, архиере́я тя и па́стыря Це́ркви Свое́й устроя́ет. Те́мже и по преставле́нии честно́е те́ло твое́ це́ло и нетле́нно соблюде́ся, Ио́но святи́телю: моли́ Христа́ Бога, да спасе́т ду́ши на́ша.
Яко от младе́нства Го́сподеви поработи́в себе́, му́дре, посто́м и бде́нием тело твое́ удруча́я. Те́мже сосу́д чист и дом Ду́ху Пресвято́му яви́лся еси́: сего́ ра́ди и Це́ркви Свое́й тебе́ архиере́я и па́стыря устроя́ет, ю́же до́бре упа́сл, ко Го́споду отхо́диши, Его́же возлюби́л еси́. Тем мо́лим тя: помина́й нас, ве́рою чту́щих святу́ю па́мять твою́, да вси зове́м ти: ра́дуйся, о́тче Ио́но, святи́телю всечестны́й.
Во вся́ страны́ полу́нощныя изы́де веща́ние твое́, я́ко прие́мшия сло́во твое́, и́хже боголе́пно научи́л еси́, неве́дущия Христа́ све́том Ева́нгелия просвети́л еси́, челове́ческия обы́чаи украси́л еси́, Росси́йская похвало́, святи́телю о́тче наш Инноке́нтие, моли́ Христа́ Бо́га спасти́ся душа́м на́шим.
Истинный и нело́жный учи́тель был еси́: запове́данная бо Го́сподем сам сотвори́в, и́мже учи́л еси́ и наказа́л еси́ ко благоче́стию приходя́щая ча́да, неве́рныя вразумля́л еси́ позна́ти веру и́стинную, просвеща́я их святы́м Креще́нием. Сего́ ра́ди со апо́столы ра́дуешися, прие́мля по́честь благове́стника Христо́ва.
Безнача́льнаго о́наго и ти́хаго ме́ста, иде́же несть печа́ли, ни воздыха́ния, дости́гнути, преподо́бне, жела́я, не дал еси́ себе́ зде поко́я нима́ло, но при́сно день и нощь в де́лех вся́ких и жесто́ком жити́и трудолю́бно подвиза́яся, пребыва́еши, тем жела́емого получи́л уже́, Ипа́тие, моли́ся о душа́х на́ших.
Труды́ ко трудо́м вы́ну ра́ди Господа прилага́я, никогда́же обре́лся еси́ пра́зден, Ипа́тие. Те́мже и в ле́поту трудолюби́в нарече́ся, зва́ние прие́мь от дел.
В тебе́, ма́ти, изве́стно спасе́ся, е́же по о́бразу: прии́мши бо крест, после́довала еси́ Христу́, и де́ющи учи́ла еси́ презира́ти у́бо плоть, прехо́дит бо, прилежа́ти же о души́, ве́щи безсме́ртней. Те́мже и со Ангелы сра́дуется, преподо́бная, дух твой.
Греха́ мглы избежа́вши, покая́ния све́том озари́вши твое́ се́рдце, сла́вная, пришла́ еси́ ко Христу́; Сего́ Всенепоро́чную и Святу́ю Ма́терь моли́твенницу ми́лостивную принесла́ еси́. Отону́дуже и прегреше́ний обрела́ еси́ оставле́ние, и со Ангелы при́сно сра́дуешися.
Яко светоза́рная звезда́ прише́л еси́ от восто́ка на за́пад, оста́вив оте́чество твое́, Ни́жний Но́вград, и, доше́д богоспаса́емаго града Су́ждаля, в нем оби́тель сотвори́л еси́, и собра́л еси́ мона́хов мно́жества, и, прие́м дар чуде́с от Бо́га, о́тче Евфи́мие, был еси́ о Христе́ собесе́дник и спо́стник преподо́бному Се́ргию. С ни́мже у Христа́ Бо́га испроси́ нам здра́вие и спасе́ние и душа́м на́шим ве́лию ми́лость.
Волне́ний множество невла́жно преходя́, безпло́тныя враги́ струя́ми слез твоих погрузи́л еси́, богому́дре Евфи́мие преподо́бне, тем и чуде́с дар прия́л еси́, моли́ непрестанно о всех нас.
Чу́до яви́ся, извеще́нием и де́лы возсия́в, Ду́ха Свята́го произбра́нием святи́тельства па́ству прии́м, открове́нием Бо́жиим Це́рковь разобра́ и велича́йшую воздви́же, всече́стне Фили́ппе, святи́телю вели́кий, мир гра́ду да́руй на́шему Москве́ и ве́лию ми́лость.
Во успе́нии твое́м обрето́ша на телеси́ твое́м сокро́вище некра́домое: два креста́ и тяжча́йшая желе́за, е́же есть вери́ги, посто́м и моли́твами Бо́гу угоди́л еси́, святи́телю Фили́ппе, моли́ Христа́́ Бо́га о всех нас.
Святи́теля Твоего́, Христе́, творя́щим све́тло торжество́ успе́ния, ми́лость Твою́ свы́ше пода́ждь, отве́рзи же Ца́рствия две́ри, разреши́ же у́зы на́ша мно́гих грехо́в, хода́тайством свята́го Твоего́ ученика́, отца́ на́шего.
Боже́ственна и ве́рна Мефо́дия вси́ воспои́м, лю́дие, и любо́вию ублажи́м, я́ко па́стыря вели́каго слове́ном, служи́теля Тро́ицы че́стна, прогони́теля е́реси, мо́лит бо ся о всех нас.
Яко сый нра́вом правосла́вных Восто́чныя Це́ркве преда́ний и́стинный защи́тник, сподо́бился еси́ вели́каго во отце́х Феодо́сия ви́дети по сме́рти я́ко жи́ва, возвеща́юща тебе́ Ца́рствия Небе́снаго насле́дие, его́же неизрече́нных добро́т ны́не с ним неразлу́чно наслажда́яся, моли́ и о нас, ча́дех свои́х, Ни́фонте прехва́льне.
Ре́вности дре́вних оте́ц в тве́рдом и́стинных догма́т хране́нии подо́бяся, крепкоу́мне Ни́фонте, не восхоте́л еси́ восхи́тившему самово́льне престо́л митропо́лии Кли́му сослужи́тель бы́ти, избра́нному же на се от всех, поко́рся, священноле́пне с ним служи́л еси́ и, жизнь свою́ сконча́в, обре́л еси́ безконе́чное Ца́рство Христо́во.
Идольския ле́сти упраздни́л еси́, Анти́по и, диа́вольскую попра́в си́лу, пред богобо́рцы дерзнове́нно Христа́́ испове́дал еси: те́мже со Ангельскими чи́ны в вы́шних водворя́яся, Влады́це всех славосло́вие принося́, и о нас моле́бное благодаре́ние предлага́еши, благода́ть цельбы́ да́руя. Сего́ ра́ди тя чтим, священному́чениче Анти́по: моли Христа́ Бога, да спасе́т ду́ши на́ша.
Апо́столов сопресто́льник и святи́телей украше́ние был еси́, блаже́нне; му́ченически просла́вився, возсия́л еси́, я́коже со́лнце, всех просвеща́я, Анти́по свяще́нне, разруши́л еси́ безбо́жия нощь глубо́кую: сего́ ра́ди тя почита́ем, я́ко Боже́ственнаго су́ща священному́ченика и целе́б пода́теля.
Небе́снаго жела́я, земна́я возненави́дел еси́ и, взем крест свой, после́довал еси́ Христу́ и от Него́ прие́м дарова́ния чуде́с, исцеля́ти неду́жныя; но, я́ко име́я дерзнове́ние ко Святе́й Троице, испроси́ правосла́вным христиа́ном здра́вие и спасе́ние, на враги́ же побе́ду и не забу́ди, посеща́я чад свои́х, припа́дающих к цельбоно́сному гро́бу твоему́, Иа́кове, преподо́бне о́тче наш.
Серде́чная о́чи, досточу́дне, ко Господу впери́в и теле́сныя стра́сти из ко́рене исторга́я, неболе́зненную жизнь в боле́знех восприя́л еси́, преподо́бне, боле́знем же лю́тым дае́ши исцеле́ние просящим с ве́рою у тебе. Те́мже мо́лим тя, досточу́дне, исцели́ на́ша боле́зни душе́вныя и теле́сныя, да зове́м ти: ра́дуйся, Иа́кове богому́дре, о́тче наш.
Истинных повеле́ний устне́ распространи́л еси́, уче́нии Боже́ственными вся просвети́л еси́, злове́рие низложи́л еси́, богому́дре Марти́не, святи́телю всече́стне, помина́й нас, уго́дниче Христо́в, е́же к Нему́ хода́тайствы твои́ми, да в ми́ре устро́иши живо́т наш.
Боже́ственный гром, труба́ духо́вная, ве́ры насади́телю и отсека́телю е́ресей, Тро́ицы уго́дниче, вели́кий святи́телю, со Ангелы предстоя́ при́сно, моли́ непреста́нно о всех нас.
Изволе́нием Боже́ственнаго Ра́зума всели́лся еси́ в пусты́ню, и та́мо впери́в ум твой в небе́сныя оби́тели, ра́вно Ангелом житие́ на земли́ пожи́в, в моли́твах и труде́х и поще́ниих о́браз был еси́ твои́м ученико́м. Отону́дуже Бог, ви́дя твое́ благо́е изволе́ние, умно́жи тебе́ ча́да в пусты́ни, слез твои́х тече́ньми напая́емей. Но, я́ко име́яй дерзнове́ние к Бо́гу, помина́й ста́до, е́же собра́л еси́, му́дре, и не забу́ди, я́коже обеща́лся еси́, посеща́я чад твои́х, Зоси́мо, преподо́бне о́тче наш.
Христо́вою любо́вию уязви́вся, преподо́бне, и Того́ крест сла́вный на ра́мо взем, поне́сл еси́, боже́ственне вооружи́вся, и непреста́нныя моли́твы, я́ко копие́ в руце́, имы́й, кре́пко ссекл еси́ бесо́вская ополче́ния. Тем зове́м ти: ра́дуйся, преподо́бне о́тче Зоси́мо, мона́хов удобре́ние.
Бо́гом умудре́нную блаже́нную ста́рицу Матро́ну, земли́ Ту́льския процвете́ние и гра́да Москвы́ пресла́вное украше́ние, восхва́лим днесь, ве́рнии. Сия́ бо, све́та дневна́го не позна́вши, све́том Христовым просвети́ся и да́ром прозре́ния и исцеле́ния обогати́ся. Пресе́льница же и стра́нница на земли́ бы́вши, ны́не в черто́зех Небесных Престолу Божию предстои́т и мо́лится о душа́х на́ших.
Еще́ ды́шит свя́тостию многострада́льная
Росси́я, земля́ Ру́сская, я́ко осьмы́й столп, плодоно́сит, та́ко тебе́, блаже́нная ма́ти Матро́но, пра́ведный па́стырь Иоа́нн Кроншта́дтский возно́сит, ты яви́лася еси́ ди́вное излия́ние Свята́го Ду́ха, и боря́сь за ка́ждую приходя́щую к тебе́ ду́шу, претерпе́ла еси́ мно́жество гоне́ний и страда́ний, и по преставле́нии не оставля́еши в боле́знех и ско́рбех су́щих.
Яко пле́нных свободи́тель и ни́щих защи́титель, немощству́ющих врач, правосла́вных побо́рниче, Победоно́сче великому́чениче Гео́ргие, моли́ Христа́ Бо́га спасти́ся душа́м на́шим.
К возбра́нному и ско́рому заступле́нию твоему́ прибе́гше ве́рнии, мо́лим изба́витися, страстоте́рпче Христо́в, от собла́зн вра́жиих, воспева́ющим тя, и вся́ких бед и озлобле́ний, да зове́м: ра́дуйся, му́чениче Гео́ргие.
У верхо́внаго Петра́ научи́вся, апо́стол Христо́в был еси́ и, я́ко со́лнце, страна́м возсия́л еси́, Александри́ом удобре́ние быв, блаже́нне. Тобо́ю Еги́пет от пре́лести свободи́ся; ева́нгельским твои́м уче́нием просве́щ вся, я́ко свет, столп церко́вный. Сего́ ра́ди твою́ па́мять чту́ще, све́тло пра́зднуем, Ма́рко богогла́се: моли́ тобо́ю благовести́маго Бо́га, да согреше́ний оставле́ние пода́ст душа́м на́шим.
С высоты́ прии́м благода́ть Ду́ха, ри́торская плете́ния разруши́л еси́, апо́столе и, язы́ки вся улови́в, Ма́рко всесла́вне, твоему́ Влады́це приве́л еси́, Боже́ственное пропове́дав Ева́нгелие.
Боже́ственным жела́нием от ю́наго во́зраста, Стефа́не прему́дре, разже́гся, яре́м Христо́в взял еси́, и люде́й олядене́вшая дре́вле неве́рием сердца́, Боже́ственное се́мя в них се́яв, ева́нгельски духо́вне породи́л еси́. Те́мже пресла́вную твою́ па́мять почита́юще, мо́лим тя: моли́, Его́же пропове́дал еси́, да спасе́т ду́ши на́ша.
Самозва́нен не и́щущим тебе́, святи́телю, обре́лся еси́, лю́ди от и́дольския ле́сти свободи́в, ко Христо́ве ве́ре приве́л еси́ и волхва́ пансо́тника посрами́л еси́, те́мже и пе́рвый епи́скоп и учи́тель Пе́рми был еси́. Сего́ ра́ди духо́вная твоя́ ча́да, я́ко тобо́ю изба́вльшеся от и́дол, благода́рная теб́е́ возопие́м: ра́дуйся, Стефа́не, учи́телю прему́дрый.
Благоче́стия ревни́телю и рачи́телю, и́ноков и сто́лпников похвало́, святи́телю Ту́ровския па́ствы, пресла́вне, златослове́сный учи́телю, све́тлым уче́нием богоразу́мия своего́ просвети́вый концы́ ру́сския, в моли́тве к Богу благода́тный гре́шников споспе́шниче, Кири́лле богому́дре, моли́ Христа́ Бога утверди́тися нам, сооте́чественником твои́м, во Правосла́вии, благоче́стии и единомы́слии.
Боже́ственный гром, труба́ духо́вная, ве́ры насади́телю и отсека́телю е́ресей, Тро́ицы уго́дниче, вели́кий святи́телю, со Ангелы предстоя́ при́сно, моли́ непреста́нно о всех нас.
Велича́ем тя, Ту́ровский подви́жниче и святи́телю Кири́лле, златослове́сный Российский учи́телю, и чтим святую па́мять твою́, ты бо еси́ усе́рдный пред Бо́гом предста́тель за род наш и те́плый моли́твенник о спасе́нии душ на́ших.
Святи́и девяточи́слении му́ченицы, от разли́чных градо́в во еди́н лик совокупи́вшеся ма́нием Боже́ственным, му́жественно за Христа́́ пострада́сте, неви́димаго врага́ победи́сте, злове́рныя кня́зи и мучи́тели посрами́сте ва́шим терпе́нием, огне́м же любве́ Бо́жия разжиза́еми, веще́ственно вас огнь му́чащий в хлад преложи́сте, те́мже даде́ся вам от Христа́ Бо́га благода́ть тряса́вичную исцеля́ти боле́знь, от нея́же и многови́дных страсте́й ми́лостивно спаса́йте и нас предста́тельством ва́шим, мо́лимся.
Тве́рдый и всесве́тлый лик му́ченик девяти́, Трисо́лнечнаго Божества́ испове́дницы, на суди́щи Тому́ нача́льно взыва́ху: кровь и ду́ши на́ша с телесы́, я́ко непоро́чную же́ртву, прино́сим Тебе́, Влады́ко, в лице́х Небе́сных Твои́х сопричти́, я́ко
Бог Ми́лостивый.
Апо́стол Христо́в был еси́ избра́нный, и Бого сло́ву возлю́бленному брат единоро́дный, всехва́льне Иа́кове, пою́щим тя грехо́в оставле́ние испроси́ и душа́м на́шим ве́лию ми́лость.
Глас Боже́ственный слы́шав, призыва́ющ тя, любо́вь отца́ презре́л еси́ и прите́кл еси́ ко Христу́, Иа́кове, с сро́дником твои́м, сла́вне, с ни́мже сподо́бился еси́ ви́дети Госпо́дне Боже́ственное Преображе́ние.
Правосла́вия побо́рниче, покая́ния и моли́твы де́лателю и учи́телю изря́дный, архиере́ев богодухнове́нное украше́ние, мона́шествующих сла́во и похвало́, писа́нии твои́ми вся ны уцелому́дрил еси́. Цевни́це духо́вная, Игна́тие богому́дре, моли́
Сло́ва Христа́ Бога, Его́же носи́л еси́ в се́рдце твое́м, дарова́ти нам пре́жде конца́ покая́ние.
Аще и соверша́л еси́ стезю́ жития́ земна́го, святи́телю Игна́тие, оба́че непреста́нно зрел еси́ зако́ны бытия́ ве́чнаго, сему́ поуча́я ученики́ словесы́ мно́гими, и́мже после́довати и нам, свя́тче, помоли́ся.
Жития́ све́тлостию просвети́в твое́ оте́чество, в моли́твах и посте́х дарова́ний Боже́ственнаго Ду́ха испо́лнился еси́, и во вре́менней сей жи́зни до́бре подвиза́вся, ми́лость благоутро́бия всем скорбя́щим отве́рзл еси́ и ни́щим был еси́ засту́пник. Тем мо́лим тя, о́тче Пафну́тие, моли́ Христа́ Бога, да спасе́т ду́ши на́ша.
Бо́жиим светоли́тием просвеще́н, о́тче, по́стническое стяжа́л еси́ жи́тельство, преподо́бне, и́ноком предо́брый наста́вниче и по́стником благо́е украше́ние. Сего́ ра́ди Госпо́дь, труды́ твоя́ ви́дев, чуде́с да́ром обогати́ тя, источа́еши бо исцеле́ния. Мы же, ра́дующеся, вопие́м ти: ра́дуйся, о́тче Пафну́тие.
Вы́шния красоты́ жела́я, ни́жния сла́сти теле́сныя дале́че от себе́ отгна́ла еси́ и, в черто́зе ца́рском пребыва́ющи, а́нгельское житие́ препровожда́ла еси́, цари́це Тама́ро блаже́нная, моли́ Христа́ Бо́га спасти́ся душа́м на́шим.
Столп был еси́ Правосла́вия, Боже́ственными догма́ты подтвержда́я Це́рковь, священнонача́льниче Афана́сие: Отцу́ бо Сы́на Единосу́щна пропове́дав, посрами́л еси́ Ария. Отче преподо́бне, Христа́ Бо́га моли́ дарова́ти нам ве́лию ми́лость.
Правосла́вия насади́в уче́ния, злосла́вия те́рние изсе́кл еси́, умно́жив се́мя веры одожде́нием Духа, преподо́бне: те́мже тя пое́м, Афана́сие.
Испо́лнен стра́ха Бо́жия и Креще́нием святы́м просвеще́н, был еси́ жили́ще Свята́го Ду́ха, благове́рный царю́ Бори́се. Утверди́в же ве́ру Правосла́вную на земли́ Бо́лгарстей и жезл Ца́рствия оста́вив, всели́лся еси́ в пусты́ню, процве́л еси́ в по́двизех и обре́л еси́ благода́ть пред Го́сподем. Ны́не же предстоя́ Престо́лу Всевы́шняго, моли́ дарова́ти нам, моля́щимся тебе́, спасе́ние душ на́ших.
Взбра́нный воево́до Бо́га Вы́шняго, силою Креста́ победи́вый воста́ние тьмы́ и насади́вый благоче́стие на земли́ твое́й, име́яй же дерзнове́ние ко Го́споду, сохраня́й моли́твами твои́ми достоя́ние твое́, да зове́м ти: ра́дуйся, равноапо́стольне царю́ Бори́се, крести́телю земли́ Бо́лгарския.
Возвы́сився на доброде́тель, измла́да возлюби́в мона́шеское житие́, к жела́нию до́блественне дости́г, всели́лся еси́ в пеще́ру и, украси́в житие́ твое́ поще́нием и све́тлостию, в моли́твах, я́ко безпло́тен, пребыва́л еси́, в Росси́йстей земли́, я́ко све́тлое свети́ло, проси́яв, о́тче Феодо́сие: моли́ Христа́ Бога спасти́ся душа́м на́шим.
Звезду́ росси́йскую днесь почти́м, от восто́ка возсия́вшую и на за́пад прише́дшую, всю бо страну́ сию́ чудесы́ и добро́тою обогати́вшую и вся ны соде́янием и благода́тию мона́шескаго уста́ва, блаже́ннаго Феодо́сия.
Агница Твоя́, Иису́се, Ирина зове́т ве́лиим гла́сом: Тебе́, Женише́ мой, люблю́, и Тебе́ и́щущи страда́льчествую, и сраспина́юся и спогреба́юся Креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя, да и живу́ с То бо́ю, но я́ко же́ртву непоро́чную приими́ мя, с любо́вию поже́ршуюся Тебе́. Тоя́ моли́твами, я́ко ми́лостив, спаси́ ду́ши на́ша.
Де́вства добро́тами преиспещре́нна, де́во, страда́льчеством была́ еси́ красне́йшая, Ири́но, кровьми́ твои́ми исте́кшими обагре́на, пре́лесть же низложи́вшая безбо́жия; сего ради и прия́ла еси́ по́чести побе́ды руко́ю Созда́теля твоего́.
Удали́вся, бе́гая Дави́дски, ми́ра, и вся, я́же в нем, я́ко уме́ты вмени́в, и, в ме́сте безмо́лвне всели́вся, духо́вныя ра́дости испо́лнился еси́, о́тче наш Ни́ле; и, Еди́ному Богу изво́лив служи́ти, процве́л еси́, я́ко фи́никс, и, я́ко лоза́ благопло́дна, умно́жил еси́ ча́да пусты́ни. Те́мже благода́рственно вопие́м: сла́ва Укре́пльшему тя в по́двизе пустынножи́тельства, сла́ва Избра́вшему тя в Росси́и отше́льником уставополо́жника изря́дна, сла́ва моли́твами твои́ми и нас Спаса́ющему.
Любве́ ра́ди Христо́вы удали́вся мирски́х смуще́ний, ра́достною душе́ю всели́лся еси́ в пусты́ни, в не́йже подвиза́вся до́бре, я́ко Ангел на земли́, о́тче Ни́ле, пожи́л еси́: бде́нием бо и посто́м те́ло свое́ изнури́л еси́ ве́чныя ра́ди жи́зни. Ея́же ны́не сподо́бився, во све́те неизрече́нныя ра́дости Пресвяте́й Тро́ице со святы́ми предстоя́, моли́, мо́лимтися, припа́дающе, ча́да твоя́, сохрани́тися нам от вся́каго наве́та и злых обстоя́ний ви́димых и неви́димых враг и спасти́ся душа́м на́шим.
Апо́столе, Христу Богу возлю́бленне, ускори́ изба́вити лю́ди безотве́тны, прие́млет тя припа́дающа, Иже па́дша на пе́рси прие́мый: Его́же моли́, Богосло́ве, и належа́щую мглу язы́ков разгна́ти, прося́ нам ми́ра и ве́лия ми́лости.
Вели́чия твоя́, де́вственниче, кто пове́сть? То́чиши бо чудеса́, и излива́еши исцеле́ния, и мо́лишися о душа́х на́ших, я́ко Богосло́в и друг Христо́в.
(перенесение мощей из Мир Ликийских в Бари)
Приспе́ день све́тлаго торжества́, град Ба́рский ра́дуется, и с ним вселе́нная вся ликовству́ет пе́сньми и пе́ньми духо́вными: днесь бо свяще́нное торжество́, в пренесе́ние честны́х и многоцеле́бных моще́й святи́теля и чудотво́рца Никола́я, я́коже со́лнце незаходи́мое, возсия́ светоза́рными луча́ми, разгоня́я тьму искуше́ний же и бед от вопию́щих ве́рно: спаса́й нас, я́ко предста́тель наш, вели́кий Нико́лае.
Взы́де, я́ко звезда́, от вост́ока до за́пада твоя́ мо́щи, святи́телю Нико́лае, мо́ре же освяти́ся ше́ствием твои́м, и град Ба́рский прие́млет тобо́ю благода́ть: нас бо де́ля яви́лся еси́ чудотво́рец изя́щный, преди́вный и ми́лостивый.
Апо́столе святы́й Си́моне, моли́ Ми́лостиваго Бо́га, да прегреше́ний оставле́ние пода́ст душа́м на́шим.
Изве́стно прему́дрости уче́ния в душа́х благоче́ствующих поло́жшаго во хвале́нии ублажи́м, я́ко богоглаго́ливаго вси Си́мона: Престо́лу бо Сла́вы ны́не предстои́т и со безпло́тными весели́тся, моля́ся непреста́нно о всех нас.
Яко апо́столом единонра́внии и слове́нских стран учи́телие, Кири́лле и Мефо́дие богому́дрии, Влады́ку всех моли́те вся язы́ки слове́нския утверди́ти в Правосла́вии и единомы́слии, умири́ти мир и спасти́ ду́ши на́ша.
Свяще́нную дво́ицу просвети́телей на́ших почти́м, Боже́ственных Писа́ний преложе́нием исто́чник богопозна́ния нам источи́вших, из него́же да́же додне́сь неоску́дно почерпа́юще, ублажа́ем вас, Кири́лле и Мефо́дие, Престо́лу Вы́шняго предстоя́щих и те́пле моля́щихся о душа́х на́ших.
Велича́ем вас, святи́и равноапо́стольнии Мефо́дие и Кири́лле, вся слове́нския страны́ уче́ньми свои́ми просвети́вшия и ко Христу приве́дшия.
Земна́я, прельща́ющая очеса́ миролю́бцев, возненави́дел еси́, о́тче Богоно́сне Диони́сие, за уме́ты та́ вмени́в, ше́ствуя путе́м ско́рбным, и в терпе́нии добр воин Христо́в яви́лся еси́, победи́в стра́сти мира, был еси́ до кончи́ны непоколеби́мый благоче́стия побо́рник. Те́мже мы днесь, соверша́я свяще́нную па́мять твою́, духо́вными тя пе́сньми ублажа́ем и смире́нно мо́лим, да, предстоя́ Престо́лу Го́спода Бо́га, хода́тайствуеши о спасе́нии душ на́ших.
Свет Трисия́нный, всели́выйся в ду́шу твою́, сосу́д избра́н показа́ тя, веща́юща Боже́ственная лю́дем, испове́дник Бо́жия сло́ва яви́лся еси́, и прилага́ющих Божеству́ веще́ственный огнь я́вственно обличи́л еси́, и злосло́вных смы́слы, я́ко паучи́ное пряде́ние, растерза́л еси́, благоче́стия столп и забра́ло тве́рдое ми́рови показался еси́ и сего́ ра́ди от Вселе́нскаго Патриа́рха ди́вне похвале́н был еси́. Мы же благода́рными гла́сы, веселя́щеся, вопие́м ти: ра́дуйся, о́тче наш, Диони́сие преподо́бне.
Слез твои́х тече́ньми пусты́ни безпло́дное возде́лал еси́, и я́же из глубины́ воздыха́ньми во сто трудо́в уплодоноси́л еси́, и был еси́ свети́льник вселе́нной, сия́я чудесы́, Пахо́мие отче наш, моли́ Христа́ Бо́га спасти́ся душа́м на́шим.
Свети́льник све́тел показа́лся еси́ в конце́х, пусты́ню же гра́ды сотвори́л еси́ мно́жествы мона́шескими, сам себе́ распе́н, крест твой на ра́мо взем и воздержа́нием те́ло изнури́л еси́, моля́ непреста́нно о всех нас.
В и́ноцех святы́я Лавры Пече́рския благоиску́сен пока́завыйся и во архиере́йстем са́не добр па́стырь своему́ стаду, боголюбе́зне Иса́ие, бы́вый, моли́ о нас пастыренача́льника Христа́
Бога да поми́лует и спасе́т ду́ши на́ша.
Яко гром, возгреме́л еси́ Боже́ственными твои́ми уче́нии в Росси́йстей земли́ и яви́лся еси́ свети́льник пресве́тел, осия́я све́том богоразу́мия, Иса́ие блаже́нне. Те́мже вопие́м ти: Христа́́ Бо́га моли́ непреста́нно о всех нас.
Ца́рскую диади́му обагри́л еси́ кро́вию твое́ю, богому́дре му́чениче, за скиптр крест в руку́ прии́м, яви́лся еси́ победоно́сец, и же́ртву непоро́чну Влады́це прине́сл еси́ себе́, я́ко бо а́гнец незло́бив, от раба́ заколе́н еси́, и ны́не, ра́дуяся, предстои́ши Святе́й Тро́ице. Моли́ся о держа́ве сро́дников твои́х богоуго́дней бы́ти и сыново́м росси́йским спасти́ся.
Возсия́ днесь в сла́вней па́мяти твое́й ве́рным весе́лие, я́ко бо доброра́сленный грезн, прозя́бл еси́ и Христу кра́сен плод прине́сл еси́ себе́. Те́мже и по убие́нии твое́м соблюде́ те́ло твое́ нетле́нно, страда́льчески обагре́нное кро́вию, благоро́дне свя́те Дими́трие, соблюда́й Оте́чество твое́ и град твой невреди́м, тому́ бо еси́ утвержде́ние.
Жите́йских молв, преподо́бне, отве́ргся и, я́ко птищ, обре́те себе́ в пусты́ни безмо́лвие, в моли́твах и бде́нии прилежа́ Бо́гови, преподо́бне о́тче Пахо́мие, и оста́ви дре́внее пребыва́ние, и оты́де в пусты́ню, и в ней водвори́ся, и соста́ви оби́тель во и́мя Пресвяты́я Тро́ицы, и процве́л еси́, аки фи́никс, и бысть о́браз утеше́ния духо́внаго. Те́мже, преподо́бне Пахо́мие, моли́ Пресвяту́ю Тро́ицу спасти́ся душа́м на́шим.
В пусты́ни безмо́лвствуя, еди́нствующу ти, Богоно́се, взыска́л еси́ Го́спода; Бо́гу же тебе́ не оста́вльшу еди́ному бы́ти в пусты́ни, и Того́ повеле́нием снидо́шася к тебе́ неколи́ко бра́тии, с ни́миже ти моля́щуся Го́сподеви, Тро́ице прече́стен храм воздви́же, в не́мже предстоя́ще, преподо́бне Пахо́мие, моли́ся о спасе́нии душ на́ших.
Христо́вою любо́вию подвиза́емь благовести́ти ве́ру и́стинную прише́л еси́ наро́дам алта́йским, преподо́бне о́тче наш Мака́рие. Сло́вом и житие́м тех наставля́я, приве́л еси́ мно́гих ко спасе́нию, его́же сподо́би и нас моли́твами твои́ми.
Язы́ческаго злове́рия избе́гши, про́поведию твое́ю Творца́ све́тов позна́хом, Ему́же в Тро́ице поклоня́шеся, мо́лим тя, равноапо́стольне Мака́рие, сохраня́й ча́да твоя́ во Правосла́вии предста́тельством твои́м пред Бо́гом.
По земне́м вдовстве́ Небе́сному Жениху́ себе́ уневе́стивши и в кня́жестем черто́зе подви́жнически пожи́вши, по́слежде и черто́г, и чад твои́х Бо́га ра́ди оста́вила еси́, преподо́бная Евфроси́ние, и вше́дши во оби́тель, тобо́ю созда́нную, во и́ноческом о́бразе мно́ги по́двиги показа́ла еси,́ и свято́е житие́ по благода́ти Бо́жией блаже́нною кончи́ною увенча́ла еси́. И ны́не, предстоя́щи Христу Бо́гу, моли́ спасти́ся душа́м на́шим.
Вся кра́сная ми́ра сего́ я́ко су́етная презре́вши, и те́ло твое́ посто́м и бде́нием изнури́вши, непреста́нными моли́твами Богу угоди́ла еси́, преподо́бная Евфроси́ние, и, дар исцеле́ний от Него́ прия́ти сподо́бльшися, слепо́му прозре́ние и мно́гим неду́жным исцеле́ние дарова́ла еси́. Те́мже ра́достно взывае́м, глаго́люще: сла́ва Бо́гу, прославля́ющему святы́я Своя́.
Ублажа́ем тя, преподо́бне ма́ти Евфроси́ние, и чтим святу́ю па́мять твою́, ты бо мо́лиши о нас Христа́ Бо́га на́шего.
Вели́ка обре́те в беда́х тя побо́рника земля́ Ру́сская, язы́ки побежда́юща, я́коже на До́не Мама́еву низложи́л еси́ горды́ню, на по́двиг сей прия́в благослове́ние преподо́бнаго Се́ргия. Та́ко, кня́же Дими́трие, Христу Богу моли́ся дарова́ти нам ве́лию ми́лость.
По́двиги твои́ми, свя́те Дими́трие, страну́ на́шу Бог сохрани́, да́вый тебе́ си́лу непобеди́мую. И ны́не, предста́телю кре́пкий, соблюда́й моли́твами святы́ми град твой Москву́ невреди́м от всех наве́т вра́жиих.
От ю́ности горя́щим жела́нием Боже́ственныя любве́ разжига́емь, жите́йския молвы́ оста́вил еси́, преподо́бне, ревни́тель Анто́нию Вели́кому бысть, безмо́лвием и жесто́ким пребыва́нием после́дуя Христу́, бде́нием и моли́твами и посто́м о́браз быв свои́м ученико́м. Те́мже моли́ся Го́сподеви, Корни́лие блаже́нне, спасти́ся душа́м на́шим.
Го́сподеви, от Святы́я Де́вы возсия́вшу ми́рови, и Тому́ измла́да я́ко Ангел послужи́л еси́, блаже́нне, и си́лою Его́ пусты́ню я́ко град сотвори́л еси́, мно́жество же учени́к в ней собра́л еси́, и́хже богодохнове́нными уче́ньми просвети́л еси́. Тем вопие́м ти: ра́дуйся, о́тче наш Корни́лие, и́ноком Боже́ственное удобре́ние.
Креста́ Твоего́ о́браз на Небеси́ ви́дев и, я́коже Па́вел, зва́ние не от челове́к прие́м, в царе́х апо́стол Твой, Го́споди, ца́рствующий град в руце́ Твое́й положи́, его́же спаса́й всегда́ в ми́ре, моли́твами Богоро́дицы, Еди́не Человеколю́бче.
Константи́н днесь с ма́терию Еле́ною Крест явля́ют всечестно́е Дре́во, всех у́бо иуде́ев посрамле́ние су́ще, ору́жие же на проти́вныя ве́рных люде́й: нас бо ра́ди яви́ся зна́мение ве́лие и во бране́х гро́зное.
Велича́ем вас, святи́и благове́рнии и равноапо́стольнии ца́рие Константи́не и Еле́но, и чтим святу́ю па́мять ва́шу, вы бо святы́м Кресто́м всю вселе́нную просвети́ли есте́.
Апо́столом соприча́стник и к Богу моле́бник ве́рен, доброде́тельми возше́д на небе́сная, и любо́вь возложи́л еси́ к Лю́бящему тя, и неве́рныя лю́ди обрати́л еси́ в ве́ру. Тем ны́не, со Ангелы лику́я, предстои́ши Престо́лу сла́вы всех Царя́ Христа́ Бога. Моли́ся, святи́телю Лео́нтие, да спасе́т ду́ши на́ша.
Жития́ ра́ди чистоты́, Всеви́дец Госпо́дь, свет Свой насади́ в души́ твое́й, вразуми́ти лю́ди мно́гия твои́ми уче́нии, Лео́нтие преподо́бне.
Подража́ющи дванадесятоле́тна дванадесятоле́тну Христу́, учи́вшему во святи́лищи, Бо́жию сло́ву после́довала еси́, Евфроси́ние, сла́ву вре́менную и земна́го обру́чника оста́вльши и вся мирска́я презре́вши красне́йшему па́че всех Христу себе́ уневе́стила еси́, крест взе́мши, путе́м а́нгельскаго жития́ ше́ствующи и мно́гия к нему́ наставля́ющи, во благоуха́нии ми́ра в Небе́сный Черто́г востекла́ еси́, иде́же моли́,
Его́же возлюби́ла еси́, о чту́щих благоче́стно па́мять твою́.
Избра́нней Богом от самаго́ рожде́ния, и призва́нней на служе́ние Ему́, в чи́не а́нгельстем Го́сподеви послужи́вшей свя́то, и преподо́бно пожи́вшей, и ны́не с Небе́сными си́лами Го́спода восхваля́ющей, о нас же, гре́шных, пред Го́сподем хода́тайствующей, с ра́достию и любо́вию воззове́м: ра́дуйся, Евфроси́ние, неве́сто Христо́ва всечестна́я.
Правосла́вным смы́слом ю́ношеская возжеле́ния возненави́дев и до́блественныя нра́вы восприи́м, врага́ победи́л еси́, и во благоразу́мии Богу угоди́л еси́, и свы́ше от Него́ прие́м дар чуде́с, бе́сы прогоня́ти, неду́ги исцеля́ти, Ники́то пресла́вне, моли́ Христа́ Бога, да спасе́т ду́ши на́ша.
Христа́́ ра́ди от твои́х рабо́в ну́ждную смерть претерпе́л еси́, и вене́ц нетле́ния от Него́ восприя́л еси́, приходя́щим же с ве́рою от честна́го твоего́ гро́ба подае́ши цельбы́, о Ники́то преподо́бне, моли́твенниче о душа́х на́ших.
На небеси́ предстоя́ Святе́й Тро́ице, пра́ведне блаже́нне Иоа́нне, земны́й а́нгеле, Бо́жий челове́че, с безпло́тными ли́ки славосло́виши Любо́вь Неизрече́нную, в Це́ркви перворо́дных со святы́ми водворя́яся, о нас, су́щих на земли́, возно́сиши моли́твы к Соде́телю всех и Спа́су, да пода́ст мир всему́ ми́ру, Це́рквам на земли́ благостоя́ние и соедине́ние всех, чту́щих Сы́на Бо́жия, во пло́ти прише́дша, во святе́м Те́ле Христа́ Иису́са, е́же есть Це́рковь Бо́га Жива́го, во спасе́ние ро́да челове́ческаго.
Ева́нгельския любве́ служи́теля, пра́вды Бо́жия ревни́теля, чистоты́ душе́вныя и теле́сныя храни́теля, ве́ру Христо́ву испове́давша в страда́ниих, пра́веднаго Иоа́нна ублажа́ем и почита́ем днесь, и, житие́м его́ назида́ющеся, пое́м: ра́дуйся, моли́твенниче наш, от Бо́га просла́вленный.
Житие́м чи́стым просвети́вся, в моли́твах и посте́х пусты́ни яви́лся еси́ до́брое прозябе́ние и, духо́вному твоему́ учи́телю после́дствуя, ум свой к небе́сным упра́вль, ста́ду твоему́ наста́вник был еси́, тем тя мо́лим, о́тче Ферапо́нте: моли́ Христа́ Бо́га спасти́ся душа́м на́шим.
Преблаги́й Спас наш Христо́с умно́жил есть ми́лость Свою́ к нам, дарова́в нам в засту́пника и цели́теля преподо́бнаго отца́ на́шего Ферапо́нта, и́же просвеща́ет нас о́бразом свята́го жития́ своего́ и ны́не моли́твами свои́ми огражда́ет храм свой от враго́в и разруше́ния, страну́ сию́ от гла́да и напра́сныя сме́рти, чту́щих же па́мять его́ всех от боле́зней и от лю́тых страсте́й.
Благове́рия просве́щся уче́нии, святи́тельства прие́м па́ству и апо́столов насле́дник быв, тем прия́л еси́ от Бо́га дар чуде́с, святи́телю о́тче Игна́тие, моли́ Христа́ Бога, да спасе́т ду́ши на́ша.
Яви́ся днесь пресве́тлая память твоя, святи́телю преблаже́нне Игна́тие, в мире све́тло сия́ющи и явля́ющи всем Боже́ственное сия́ние.
Возвести́телю пути́ спаси́тельнаго, испове́дниче и архипа́стырю Кры́мския земли́, и́стинный храни́телю оте́ческих преда́ний, сто́лпе непоколеби́мый, Правосла́вия наста́вниче, врачу́ богому́дрый святи́телю Луко́, Христа́ Спа́са непреста́нно моли́, в́еру непоколеби́му правосла́вным дарова́ти и спасе́ние, и ве́лию ми́лость.
Якоже звезда́ всесве́тлая, доброде́тельми сия́ющи, был еси́ святи́телю, ду́шу же равноа́нгельну сотвори́л, сего́ ра́ди святи́тельства са́ном поче́тся, во изгна́нии же от безбо́жных мно́го пострада́л и непоколеби́м ве́рою пребы́в, враче́бною му́дростию мно́гия исцели́л еси́. Те́мже ны́не честно́е те́ло твое́, от земе́льных недр обрете́нное ди́вно, Госпо́дь просла́ви, да вси ве́рнии вопие́м ти: ра́дуйся, о́тче святи́телю Луко́, земли́ Кры́мстей похвало́ и утвержде́ние.
Боже́ственною любо́вию от ю́ности распаля́емь, Диони́сие преподо́бне, вся, я́же в ми́ре кра́сная, возненави́дев, Христа́ еди́наго возлюби́л еси́, и сего́ ра́ди во вну́треннюю пусты́ню всели́лся еси́, со зверьми́ живы́й, весь Христо́ви. Отону́дуже и Всеви́дящее Око твоя́ труды́
ви́дев, да́ром чуде́с и по преставле́нии обогати́л тя есть. Те́мже вопие́м ти: моли́ непреста́нно о всех нас, честну́ю па́мять твою́ при́сно в пе́снех почита́ющих.
Все́ твое́ у́мное жела́ние к Богу впери́в, То му́ невозвра́тно от души́ после́довал еси́, в пусты́ню всели́вся, и та́мо а́нгельски пожи́в, мно́гим путь был еси́ ко спасе́нию, сего́ ра́ди и Христос тебе́ просла́ви и да́ром чуде́с обогати́. Те́мже вси вопие́м ти: ра́дуйся, Диони́сие преподо́бне, пусты́нный жи́телю.
Богоно́снаго Анто́ния ревну́я смиренному́дрию, а́ки не́киим врачество́м, зе́лием сне́дным исцеля́л еси́ боля́щия, преподо́бне Ага́пите, тем и врача́ неве́рна уве́рив, наста́вил еси́ на путь спасе́ния. Уврачу́й и на́ша боле́зни и моли́ся Го́сподеви о воспева́ющих тя.
Врач сый изря́ден, чу́дне, явля́я несумне́нную твою́ ве́ру, облича́я же армени́ново неве́рие и приводя́ его́ к благоче́стию, себе́, близ сме́рти бы́вшу, испроси́л еси́ от Бо́га продолже́ние живота́ и, сим чу́дом того́ уве́рив, приве́л еси́ Христо́ви, Ему́же в весе́лии предстоя́, моли́ся о нас, преподо́бне.
Житие́ на земли́ до́бре окормля́я, страда́льче, ми́лостынями и ча́стыми моли́твами и слеза́ми, па́ки же ко страда́нию му́жески устреми́вся, пе́рсское обличи́л еси́ нече́стие. Те́мже Це́ркве был еси́ утвержде́ние и христиа́н похвало́, Иоа́нне приснопа́мятне.
Морску́ю пла́вая пучи́ну ку́плею, от восто́ка тща́лся еси́ к се́веру, но Богу призва́вшу тя, я́коже Матфе́й мы́тницу, ты же ку́плю оста́вль и Тому́ после́довал еси́ кро́вию муче́ния, вре́менными искупи́в непроходи́мая, и вене́ц прия́л еси́
непобеди́мый.
Боже́ственною любо́вию от ю́ности распаля́емь, вся, я́же в ми́ре кра́сная, возненави́дев, Христа́ Еди́наго возлюби́л еси́, и, сего́ ра́ди в пусты́ню всели́вся, в ней оби́тель сотвори́л еси́, и, собра́в и́нок мно́жество, прия́л еси́ от Бо́га чуде́с дар, о́тче Мефо́дие, и был еси́ о Христе́ собесе́дник и спо́стник преподо́бному Се́ргию, с ни́мже у Христа́ Бо́га испроси́ правосла́вным христиа́ном здра́вие, и спасе́ние, и душа́м на́шим ве́лию ми́лость.
Послуша́ния до́брый рачи́тель быв, безпло́тныя враги сле́зными моли́твами твои́ми крепко посрами́л еси́ и яви́лся еси́ Пресвяты́я Тро́ицы жили́ще, Юже зря, блаже́нне, ясно, богому́дре Мефо́дие преподо́бне, чуде́с дар от Нея́ прия́л еси́. Те́мже исцеля́еши с ве́рой приходя́щим недуги, утоля́еши ско́рби, и мо́лишися непреста́нно о всех нас.
Правосла́вия наста́вниче, благоче́стия учи́телю и чистоты́, вселе́нныя свети́льниче, архиере́ев богодухнове́нное удобре́ние, Кири́лле прему́дре, уче́ньми твои́ми вся просвети́л еси́, цевни́це духо́вная. Моли́ Христа́ Бо́га спасти́ся душа́м на́шим.
Бе́здну нам уче́ний богосло́вия источи́л еси́ я́ве, от и́сточник Спа́совых, е́реси погружа́ющую, блаже́нне Кири́лле, и стадо невреди́мо от треволне́ний спаса́ющую: страна́м бо всем наста́вник, преподо́бне, я́ко Боже́ственная явля́я.
Яко крин, в пусты́ни Дави́дски процве́л еси́, о́тче Кири́лле, злостра́стия те́рние искореня́я, и собра́л еси́ в ней учени́к мно́жество, стра́хом Бо́жиим и уче́нием твои́м наставля́емых, и́хже и до конца́ я́ко чадолюби́вый оте́ц не оста́вил еси́ посеща́я, да вси вопие́м: сла́ва Да́вшему ти кре́пость, сла́ва Венча́вшему тя, сла́ва Де́йствующему тобо́ю всем исцеле́ния.
Яко преоби́дев тле́нная и до́лу влеку́щая мудрова́ния, о́тче, к вы́шнему тече́нию ра́достно устреми́лся еси́, и та́мо со святы́ми Пресвяте́й Тро́ице предстоя́, моли́ от враг сохрани́тися ста́ду твоему́, я́ко да свято́е твое́ успе́ние пра́зднующе, вопие́м: ра́дуйся, преблаже́нне Кири́лле, о́тче наш.
Помози́ в беда́х, уте́ши в ско́рбех, па́стырю до́брый о́тче Алекси́е, по́двигом бо ста́рчества ми́ру просия́вый, ве́ру и любо́вь Христо́ву во мра́це беззако́ния испове́дал еси́, боле́знуя се́рдцем о всех, притека́ющих к тебе́. И ны́не за ны Бо́га моли́, любо́вию чту́щия тя.
Ве́лия труды́ любве́ и милосе́рдия подъя́л еси́, па́стырю до́брый о́тче Алекси́е, от свята́го па́стыря Кроншта́дтскаго благослове́ние на по́мощь стра́ждущим прия́в, бе́ды и ско́рби людски́я, я́ко вери́ги, на ра́мо свое́ возложи́. Мы же, ве́дуще тя моли́твенника дерзнове́нна ко Го́споду, со умиле́нием зове́м ти: моли́ Христа́ Бо́га спасти́ся душа́м на́шим.
Наста́вниче благоче́стия, сиро́тствующих пита́телю, скорбя́щих уте́шителю, неду́гующих врачу́ безме́здный, душе́ю стра́ждущим ско́рый помо́щниче, те́плый моли́твенниче о всех ко Го́споду, святи́телю о́тче Иоа́нне, моли́ Христа́ Бога спасти́ся душа́м на́шим.
Яви́лся еси́ во тьме́ неве́дения пребыва́ющим просвети́тель, вдов и сиро́т уте́шитель, ди́вный врач немощству́ющих, младе́нцев и отроко́в наста́вник, роди́телем же пресве́тлое ра́дование, святи́телю о́тче Иоа́нне, моли́ Христа́ Бога пода́ти стране́ на́шей в ве́ре утвержде́ние, во́инству на́шему на враги́ побе́ду и одоле́ние, лю́дем же Свои́м ве́лию ми́лость.
Днесь восхваля́ем тя, преподо́бная ма́ти, вели́кая княги́не и́нокине Анно: я́ко бо лоза́ плодови́та посреде́ те́рния, процвела́ еси́ во гра́де Ка́шине твои́ми доброде́тельми, и всех удиви́ла еси́ чу́дным твои́м житие́м, те́мже Христу Богу угоди́ла еси́, и ны́не, ра́дующися и веселя́щися, пребыва́еши с ли́ки преподо́бных жен, наслажда́ющися ра́йския красоты́ и весе́лия. Мо́лим у́бо тя: моли́ о нас Человеколю́бца, Христа́ Бо́га на́шего дарова́ти нам мир и ве́лию ми́лость.
Яко пресве́тлая звезда́ яви́лася еси́ в Росси́йстей земли, во гра́де Ка́шине, преподо́бная ма́ти Анно: во всех благочести́вых и ве́рных жена́х а́ки крин, процвела́ еси́ чи́стым и непоро́чным твои́м житие́м, во и́нокинях же соверше́нными твои́ми труды́ и по́двиги, и возшла́ еси́ к вы́шнему гра́ду, ра́дующися и веселя́щися, я́ко до́бре соверши́вши твое́ тече́ние. И ны́не честны́я твоя́ мо́щи, а́ки би́серие драго́е яви́шася на исцеле́ние всем приходя́щим с ве́рою. Тем и вопие́м ти: ра́дуйся, всекра́сная душе́ю, и моли́ Христа́ Бога о спасе́нии душ на́ших.
Ублажа́ем тя, преподо́бная ма́ти, вели́кая княги́не Анно, и чтим святу́ю па́мять твою́, наста́внице иноки́ням и собесе́днице Ангелом.
Ду́хом Бо́жиим наставлямый, возлюби́л еси́ безмо́лвие, в не́мже ева́нгельски подвиза́ющуся, пречу́дный Афо́нский дар – Богома́тере ико́на, дарова́ся ти, всеблаже́нне; и, о́браз доброде́телей быв ста́ду твоему́, Арсе́ние о́тче наш, к Го́рнему торжеству́ возше́л еси́, иде́же со Ангелы ликовству́я, моли́ Христа́ Бога спасти́ся душа́м на́шим.
Трисия́тельнаго Божества́ сия́нием просвети́в се́рдце твое́, преподо́бне, светови́ден весь яви́лся еси́ доброде́тельми, я́ко и Го́ру Афо́нскую свет трудолю́бия твоего́ озари́, иде́же святу́ю ико́ну Со́лнца и́стиннаго, Христа́́, и Его́ Пречи́стыя Ма́тере в дар прии́м, на о́стров Нева́ е́зера прише́д, оби́тель устро́ил еси́, всеблаже́нне. Тем, ве́рою и любо́вию к тебе́ притека́юще, ра́достно вопие́м: ра́дуйся, пресве́тлый свети́льниче, Арсе́ние о́тче наш.
Вели́ка имеет тя предста́теля, богому́дре, правосла́вных собра́ние, я́коже у́бо преподо́бных еси́ собесе́дник и Боже́ственныя прему́дрости соприча́стник, та́ко, пречу́дне Иерони́ме, Христу Богу моли́ся дарова́ти нам ве́лию ми́лость.
В преподо́бных преподо́бнейшаго и в блаже́нных блаже́ннейшаго учи́теля, пе́сньми восхва́лим
Иерони́ма достохва́льнаго, ве́рных наста́вника и засту́пника, любо́вию тому́ зову́ще: ра́дуйся, о́тче богому́дре.
Христо́ва тя сро́дника, о Иу́до, ве́дуще и му́ченика тве́рда, свяще́нно восхваля́ем, пре́лесть попра́вша и ве́ру соблю́дша. Те́мже, днесь всесвяту́ю твою́ па́мять пра́зднующе, грехо́в разреше́ние моли́твами твои́ми прие́млем.
Тве́рдым умо́м избра́н ученик ты яви́лся еси́ и столп необори́м Це́ркве Христо́вы, язы́ком пропове́дал еси́ сло́во Христо́во, ве́ровати глаго́ля во Еди́но Божество; от Него́же просла́вився, прия́л еси́ дар исцеле́ний, цели́ти неду́ги притека́ющих к тебе, апосто́ле Иу́до всехва́льне.
Да торжеству́ет Це́рковь Христо́ва и да ра́дуется град Москва́, я́ко возсия́ свети́льник земли́ Росси́йской во испове́дании Истины непоколеби́мый Иов Патриа́рх, его́же моли́твами, Го́споди, вся собла́зны ми́ра сего́ и е́ресь искорени́, лю́ди во благоче́стии наста́ви и утверди́ в Правосла́вии.
Свети́льник Це́ркве Ру́сския и па́стырь до́брый яви́лся еси́, святи́телю о́тче Иове, моли́твою твое́ю ко Го́споду храни́ зе́млю Росси́йскую и спаси́ ду́ши на́ша.
Вы́шняго повеле́нием, тучено́сным о́блаком, не́бо помрачи́вшим, и мо́лниям блиста́ющим, гро́му же восшуме́вшу с преще́нием, испусти́л еси́ ду́шу твою́ в ру́це Го́сподеви, прему́дре Арте́мие, и ны́не предстои́ши Престо́лу Влады́ки всех, о и́же ве́рою и любо́вию приходя́щим тебе́, подая́ исцеле́ние всем неотло́жно, и моля́ся Христу Бо́гу спасти́ся душа́м на́шим.
Возсия́ днесь пресве́тлая па́мять прему́драго Арте́мия, богода́нная благода́ть, я́ко ре́ки излива́ет от целе́бных моще́й его́ ди́вная исцеле́ния, и́миже от многоразли́чных неду́г избавля́емся, с ве́рою прие́млюще я́ и взыва́юще: ра́дуйся, Арте́мие богому́дре.
Велича́ем тя, страстоте́рпче Христо́в Арте́мие, и чтим святу́ю па́мять твою, ты бо мо́лиши за нас Христа́ Бо́га на́шего.
Яко благочести́ваго ко́рене пречестна́я о́трасль был еси́, до́бре во благоче́стии пожи́в, блаже́нне Пе́тре, та́ко и с супру́жницею твое́ю, прему́дрою Февро́ниею, в ми́ре Богу угоди́вше, и преподо́бных житию́ сподо́бистеся: с ни́миже моли́теся Го́сподеви сохрани́ти без вре́да Оте́чество ва́ше, да вас непреста́нно почита́ем.
Ми́ра сего́ княже́ние и сла́ву вре́менну помышля́я, сего́ ра́ди благоче́стно в ми́ре пожи́л еси́, Пе́тре, ку́пно и с супру́жницею твое́ю прему́дрою Февро́ниею, ми́лостынею и моли́твами Богу угоди́вше. Те́мже, и по сме́рти неразлу́чно во гро́бе лежа́ще, исцеле́ние неви́димо подава́ете. И ны́не Христу моли́теся сохрани́ти град же и лю́ди, и́же вас сла́вящих.
Ублажа́ем вас, святи́и чудотво́рцы Пе́тре и Февро́ние, и чтим святу́ю па́мять ва́шу, вы бо мо́лите за ны Христа́, Бо́га на́шего.
Правосла́вия ревни́телю, благоче́стия наста́вниче, и́щущим спасе́ния до́брый ко́рмчий, мона́шествующих Богодухнове́нное украшение, Богоно́снаго Евфи́мия собесе́дниче, святи́телю Диони́сие, уче́ньми и доброде́тельми Оте́чество твое́ просвети́л еси́, не забу́ди нас, чту́щих тя, но в ми́ре упра́ви живо́т наш.
Звезду́ Российскую, от Киева возсия́вшую чрез Нижний Но́вгра́д в Су́ждаль дости́гшую, и всю страну́ сию́ уче́нием озари́вшую, ублажи́м богому́драго Диони́сия, той бо мо́лится Го́споду спасти́ся душа́м на́шим.
Тя́жким неду́гом стра́ждущий и людьми́ забы́тый, моли́л еси́ жа́жду утоли́ти, преподо́бне Марти́не, те́мже Христос посла́ с Небесе́ благове́рных Бори́са и Гле́ба тебе́ послужи́ти и неду́г исцели́ти, моли́ся ны́не ко Го́споду спасти́ся душа́м на́шим.
Чистото́ю душе́вною боже́ственно вооружи́вся, и непреста́нныя моли́твы я́ко копие́ вручи́в кре́пко, пробо́л еси́ бесо́вская ополче́ния, Марти́не о́тче наш, моли́ непреста́нно о всех нас.
Ева́нгелия Христо́ва и́стиннии послу́шницы яви́стеся, преподо́бнии, мир и вся, я́же в нем, я́ко не су́щая, преоби́девше любве́ ра́ди Христо́вы и в морски́й о́стров всели́стеся, и трудолю́бно в нем проти́ву ко́зней неви́димых враго́в подвиза́стеся, посто́м, бде́нием же и всено́щным стоя́нием пло́ти своя́ ду́ху му́дру повину́ли есте́: сего́ ра́ди от Вседержи́тельныя десни́цы досто́йныя венцы́ прия́ли есте́. И ны́не Пресвяте́й Тро́ице предстоя́ще, моли́теся, всеблаже́ннии отцы́ Се́ргие и Ге́рмане, спасти́ся душа́м на́шим.
От мирска́го жития́ изше́дше, отверже́нием ми́ра Христу после́довасте, и достиго́сте вели́каго Нева́ е́зера, и, в нем на о́строве Валаа́ме все́льшеся, равноа́нгельное житие́ пожи́ли есте́, отону́дуже, веселя́щеся, прешли́ есте́ к Небе́сным черто́гом. И ны́не со Ангелы Влады́чню Престо́лу предстоя́ще, помина́йте нас, чад свои́х, я́же собра́ли есте́, богому́дрии, да ра́достно от души́ вопие́м: ра́дуйтеся, Се́ргие и Ге́рмане, отцы́ преблаже́ннии.
Оте́чества своего́, блаже́нне Пе́тре, удали́вся и богоме́рзкую ве́ру отню́д возненави́дев, и от мглы грехо́вныя изше́д, от тьмы во свет прии́де, и всели́ся во сла́вный и многонаро́дный град Росто́в, в не́мже житие́ че́стно пожи́в, и Христо́ву це́рковь во и́мя святы́х апо́стол Петра́ и Па́вла воздви́г Христо́вою благода́тию, и сию́ чу́дными ико́нами, я́ко неве́сту, украси́в, святи́теля же и кня́зя и вся лю́ди житие́м свои́м удиви́в. Те́мже и по сме́рти твое́й Христо́с да́ром чуде́с обогати́ тя: помина́й нас, чту́щих пресве́тлую па́мять твою́, преподо́бне о́тче Пе́тре, и моли́ Христа́ Бога спасти́ся душа́м на́шим.
Яви́ся ве́лие со́лнце Христо́вой Це́ркви, просвеща́я уче́ния светлостьми́, всече́стне, я́ко черпа́лом златы́м, от кла́дязя неиско́паннаго чуде́с поче́рпл еси́, от исто́чника неистощи́маго, на па́мять успе́ния твоего́ прише́дшим, всеблаже́нне Пе́тре, ны́не всем подава́еши грехо́в проще́ние, сла́во преподо́бным.
Святи́и безсре́бреницы и чудотво́рцы Космо́ и Дамиа́не, посети́те не́мощи на́ша: ту́не прия́сте, ту́не дади́те нам.
Благода́ть прии́мше исцеле́ний, простира́ете здра́вие су́щим в ну́ждах, вра́чеве, чудотво́рцы пресла́внии; но ва́шим посеще́нием ра́тников де́рзости низложи́те, мир исцеля́юще чудесы́.
Велича́ем вас, чудотво́рцы сла́внии, Космо́ и Дамиа́не, и чтим святу́ю па́мять ва́шу, наста́вницы заблу́ждшим, исцели́тели боля́щим и собесе́дницы Ангелом.
Слове́с ева́нгельских послу́шателю и Боже́ственных уче́ний рачи́телю, прему́дрый наказа́телю, всегда́ стра́ху Госпо́дню поуча́яйся, в моли́твах к Богу простира́яйся, загради́телю уст кривоглаго́лющим сло́во пра́выя ве́ры, апо́столом соприча́стниче, ве́ре Христо́вой утверди́телю, проро́чески веща́телю, святи́телю Фо́тие, моли́ Христа́ Бога́ умири́ти мир и спасти́ ду́ши на́ша.
Тро́ице сосу́д яви́ся честны́й твои́м житие́м, святи́телю Фо́тие, всегда́ зря́й Святую Тро́ицу, Ейже предстои́ши, моли́ся непреста́нно о всех нас.
Пе́рвее в Му́роме святи́тельством почте́н был еси́, из него́же непра́ведно изгоня́емь, на ма́нтию, я́ко на ле́гкий кора́бль, возше́л еси́, на не́йже па́че естества́, я́ко беспло́тен, по вода́м ше́ствие творя́, промышле́нием Вы́шняго и заступле́нием Богома́тере управля́емь, богоспаса́емаго гра́да Ряза́ни дости́гл еси́ и, в нем архиере́йства престо́л восприи́м, богода́нную па́ству Ряза́нскую до́бре упа́сл еси́. Святи́телю о́тче наш Васи́лие, моли́ Христа́ Бога спасти́ся душа́м на́шим.
Яко многосве́тлая звезда́, от града Му́рома возсия́л еси́, святи́телю Васи́лие, по вода́м же доше́д до гра́да на́шего Ряза́ни, Це́рковь Бо́жию до́бре упа́сл еси́, просвеща́я лю́ди уче́нием и житие́м твои́м. Помина́й и ны́не ча́да твоя́, молим тя, наста́вниче наш до́брый, и за ны Христу Богу и Пречи́стей Его Ма́тери моли́ся да благода́рною душе́ю зове́м ти: ра́дуйся, уго́дниче Христо́в и те́плый к Богу о нас моли́твенниче.
Иже Христа́ ра́ди во́лею оста́вив твое́ оте́чество, град Во́логду, и вся кра́сная мира сего́ возненави́дев, жела́нием духо́вным вселился еси́ во град Росто́в, я́ко в пусты́ни, скита́яся в нем, гла́дом и жа́ждею и безме́рною тягото́ю плоть твою́ изнуря́я и рабо́тая Го́сподеви день и нощь, в посте́ и моли́тве пребыва́я в притво́ре церко́внем, власы́ же главы́ твоея́ пеплом и смоло́ю удруча́я, и, ревну́я Васи́лию блаже́нному, прише́л еси́ в ца́рствующий град Москву и, в целому́дрии и терпе́нии тече́ние до́бре сконча́в, пресели́лся еси́ к ве́чным оби́телем, чуде́с лучи́ испуща́я, преблаже́нне Иоа́нне, о́тче наш, моли́ Христа́ Бо́га спа́стися душа́м на́шим.
Свято́е и пренепоро́чное поне́сл еси́ самово́льное мучение, яко ве́но пречестно́е, прине́сл еси́ те́ло твое́ к Пресвяте́й Тро́ице и Пречи́стей Богородице и ту́ сотвори́л еси́ честное твое́ преставле́ние. Терпе́нием твои́м и смире́нием А́нгельския лики удивил еси́ и диа́вола мучителя посрами́л еси́, от челове́к отгоня́еши ду́хи те́мныя, разли́чная исцеле́ния подава́я. Ра́дуйся, благоюро́де Иоа́нне, с блаже́нным Васи́лием, и печа́ль на́шу на ра́дость преложи́, моли́ся приле́жно стране́ Росси́йстей от междоусо́бныя бра́ни и от безбо́жных язык изба́витися. Ра́дуйся, земли́ Росси́йския удобре́ние и гра́да на́шего Москвы́ вели́кое утвержде́ние.
Яко благове́рен и пра́веден, за любо́вь Христа́ Бо́га от свои́х смерть прия́л еси́, кровь свою́ проли́яв, я́коже пре́жде сро́дницы твои́ и страстоте́рпцы Бори́с и Глеб, и́хже кро́вем совопие́т и тво́я кровь, свя́те, к Бо́гу, я́коже Авеля и Заха́рии пра́ведных, благове́рный страстоте́рпче, вели́кий кня́же Андре́е, с ни́миже Христа́ Бо́га моли́ о стране́ на́шей, е́же Богоуго́дней бы́ти и сыново́м росси́йским спасти́ся.
В ми́ре сем благоче́стно и пра́ведно пожи́в, моли́твою, ми́лостынею и благострада́нием Богу угоди́л еси́, сего́ ра́ди и Бог по убие́нии твое́м просла́ви тя нетле́нием и чудесы́, Его́же, свя́те Андре́е, моли́ сохрани́ти Оте́чество твое́ и всех люде́й, благоче́стно тебе́ почита́ющих.
Ца́рства земна́го лише́ние, у́зы и страда́ния многоразли́чныя кро́тко претерпе́л еси́, свиде́тельствовав о Христе́ да́же до сме́рти от богобо́рцев, страстоте́рпче вели́кий Боговенча́нный царю́ Нико́лае, сего́ ра́ди му́ченическим венце́м на Небесе́х венча́ тя с цари́цею и ча́ды и слу́ги твои́ми Христос Бог, Его́же моли́ поми́ловати страну́ Росси́йскую и спасти́ ду́ши на́ша.
Избра́ннии Царе́м Ца́рствующих и Го́сподем Госпо́дствующих от ро́да царе́й Росси́йских, благове́рнии му́ченицы, му́ки душе́вныя и смерть теле́сную за Христа́ прии́мшии и венцы́ небе́сными увенча́вшиися, к вам, я́ко покрови́телем на́шим ми́лостивым, с любо́вию благода́рне вопие́м: ра́дуйтеся, ца́рственнии страстоте́рпцы, за Русь Святу́ю пред Бо́гом усе́рднии моли́твенницы.
Боже́ственнаго све́та луча́ми облиста́емый, преподо́бне Андре́е, Христа́ позна́л еси́ Бо́жию прему́дрость и си́лу, и ико́ною Святы́я Тро́ицы всему́ ми́ру пропове́дал еси́ еди́нство во Святе́й Тро́ице. Мы же со удивле́нием и ра́достию вопие́м ти: име́яй дерзнове́ние ко Пресвяте́й Тро́ице, моли́ просвети́ти ду́ши на́ша.
От ю́ности к боже́ственней красоте́ устремля́яся, чу́дный иконопи́сец в земли́ Росси́йстей был еси́, и, богоно́сным твои́м учи́телем поревнова́в, сия́нием доброде́телей украси́лся еси́, преподо́бне Андре́е, те́мже и яви́ся Це́ркве на́ шея похвала́ и ра́дование.
Смире́нием досто́инство кня́жеское сокры́вши, богому́драя Елисаве́то, сугу́бым служе́нием Ма́рфы и Мари́и Христа́ почти́ла еси́. Милосе́рдием, терпе́нием и любо́вию себе́ предочи́стивши, я́ко же́ртва пра́ведная Богу принесла́ся еси́. Мы же, чту́ще доброде́тельное житие́ и стра́дания твоя́, я́ко и́стинную наста́вницу усе́рдно про́сим тя: свята́я му́ченице вели́кая княги́не Елисаве́то, моли́ Христа́ Бо́га спасти́ и просвети́ти ду́ши на́ша.
От сла́вы ца́рственныя, взе́мши крест Христо́в, прешла́ еси́ к сла́ве небе́сней, моля́щи враго́в, и обрела́ еси́ ра́дость ве́чную, свята́я му́ченице княги́не Елисаве́то, с Варва́рою му́ченицею. Те́мже мо́лим вас: моли́те о душа́х на́ших.
Еже во пло́ти житию́ твоему́ удиви́шася Ангельстии чи́ни, ка́ко с те́лом к неви́димым спле те́нием изше́л еси́, присносла́вне, и уязви́л еси́ де́монския полки́. Отону́дуже, Афана́сие, Христос тебе́ воздаде́ бога́тыми дарова́ньми: сего́ ра́ди, о́тче, моли́ спасти́ся душа́м на́шим.
Яко невеще́ственных суще́ств зри́теля изря́дна, и де́ятельна сказа́теля всеи́стинна, взыва́ет тя ста́до твое́, богоглаго́льниче: не оскуде́й моля́ о рабе́х твои́х, изба́витися напа́стей и обхожде́ний, вопию́щим ти: ра́дуйся, о́тче Афана́сие.
Просвети́вся Боже́ственною благода́тию, богому́дре, и весь ра́зум и се́рдце от су́етнаго ми́ра сего́ к Зижди́телю неукло́нно возложи́в, целому́дрием и мно́гим терпе́нием, во вре́менней жи́зни тече́ние до́бре сконча́л еси́ и ве́ру соблю́л еси́ непоро́чну. Те́мже и по сме́рти яви́ся све́тлость жития́ твоего́: источа́еши бо чудесе́м исто́чник неисчерпа́емый, ве́рою притека́ющим ко свято́му твоему́ гро́бу, Проко́пие всеблаже́нне, моли́ Христа́ Бога, да спасе́т ду́ши на́ша.
Христа́ ра́ди юро́дством возду́шная мыта́рства на рука́х а́нгельских неприкоснове́нно преше́д, Ца́рскаго дости́гл еси́ Престо́ла, и от Царя́ всех Христа́ Бо́га дар прие́м, благода́ть исцеле́ний: мно́гими бо чудесы́ твои́ми и зна́мением стра́шным удиви́л еси́ град твой, Вели́кий Устю́г: лю́дем твои́м ми́лость испроси́в, ми́ро от честна́го о́браза Пресвяты́я Богоро́дицы моли́твою́ изве́л еси́ и неду́жным по́дал еси́
цельбы́. Те́мже мо́лим тя, чудоно́сче Проко́пие, моли́ Христа́ Бо́га непреста́нно, пода́ти грехо́в на́ших проще́ние.
От мирска́го мяте́жа изше́д, отверже́нием же ми́ра ева́нгельски Христу после́довал еси́ и, равноа́нгельное житие́ пожи́в, в ти́хое приста́нище Святы́я Горы́ Афо́на дости́гл еси́. Отону́дуже благослове́нием отце́в в го́ру Ки́ева прише́д и та́мо трудолю́бно жизнь соверши́в, Оте́чество твое́ просвети́л еси́, и мно́жеству мона́шествующих стезю́, веду́щую к Небе́сному Ца́рствию, показа́в, Христу сия́ приве́л еси́, Его́же моли́, Анто́ние преподо́бне, да спасе́т ду́ши наша.
Возложи́в себе́ Бо́гу, па́че всех возлю́бленному от ю́ности, преподо́бне, Тому́ от всея́ души́ любо́вию после́довал еси́; ми́ра же тле́нная ни во что́же вмени́в, в земли́ пеще́ру соде́лал еси́, и в ней до́бре проти́ву неви́димаго врага́ ко́зней подвиза́вся, я́ко светоза́рное со́лнце, во вся концы́ земли́ возсия́л еси́, отону́дуже, веселя́ся, преше́л еси́ к Небе́сным черто́гом. И ны́не со Ангелы Влады́чню Престо́лу предстоя́, помина́й нас, чту́щих па́мять твою́, да зове́м ти: ра́дуйся, Анто́ние, о́тче наш.
Крила́ми богоразу́мия впери́вши твой ум, возлете́ла еси́ превы́ше ви́димая тва́ри, взыска́вши Бо́га и Творца́ вся́ческих, и, Того́ обре́тши, па́ки рожде́ние Крещением прия́ла еси́: дре́ва живо́тнаго наслажда́ющися, нетле́нна во ве́ки пребыва́еши, Ольго присносла́вная.
Воспое́м днесь Благоде́теля всех Бо́га, просла́вльшаго в Росси́и Ольгу богому́друю: да моли́твами ея́ пода́ст душа́м на́шим грехо́в
оставле́ние.
Велича́ем тя, свята́я равноапо́стольная княги́не Ольго, я́ко зарю́ у́треннюю, в земли́ на́шей возсия́вшую и свет ве́ры правосла́вныя наро́ду своему́ предвозвести́вшую.
Уподо́бился еси́ купцу́, и́щущему до́браго би́сера, славнодержа́вный Влади́мире, на высоте́ стола́ седя́ ма́тере градо́в, богоспаса́емаго Ки́ева, испыту́я же и посыла́я к Ца́рскому Гра́ду уве́дети правосла́вную ве́ру, обре́л еси́ безце́нный би́сер, Христа́́, избра́вшаго тя, я́ко втора́го Па́вла, и оттря́сшаго слепоту́ во святе́й купе́ли, душе́вную вку́пе и теле́сную. Те́мже пра́зднуем твое́ успе́ние, лю́дие твои́ су́ще: моли́ спасти́ся держа́вы Росси́йския нача́льником и мно́жеству владо́мых.
Подо́бствовав вели́кому апо́столу Па́влу, в седи́нах, всесла́вне Влади́мире, вся я́ко младе́нческая мудрова́ния, я́же о и́долех тща́ния оста́вль, я́ко муж соверше́нный украси́лся еси́ Боже́ственнаго Крещения багряни́цею. И ны́не Спа́су Христу в весе́лии предстоя́, моли́ спасти́ся держа́вы Росси́йския нача́льником и мно́жеству владо́мых.
Велича́ем тя, святы́й равноапо́стольный вели́кий кня́же Влади́мире, и чтим святу́ю па́мять твою́, и́долы попра́вшаго и всю Росси́йскую зе́млю святы́м Креще́нием просвети́вшаго.
Яко зарни́ца небе́снаго огня́ возсия́ в ряза́нстей стране́ блаже́нная ста́рица Матро́на, ея́же па́мять днесь творя́ще, воспои́м Христа́ Бо́га, моля́ще Его́ дарова́ти нам тоя́ предста́тельством в боле́знех, беда́х и ско́рбех терпе́ние, и душа́м на́шим ве́лию ми́лость.
В не́мощех си́лу, в слепоте́ о́чи нетле́нныя обрела́ еси́, пребыва́ющи на о́дре боле́зни, всю́ду я́ко птица, ду́хом носи́лася еси́, младе́нствующи те́лом, была́ еси́ ма́ти скорбя́щим и обурева́емым. Те́мже чту́щих твою́ па́мять не оста́ви в моли́твах, и помози́ нам изба́витися от грехо́в покая́нием, и улучи́ти с тобо́ю Ца́рство Небе́сное.
Во пло́ти а́нгел, проро́ков основа́ние, вторы́й предте́ча прише́ствия Христо́ва Илия́ сла́вный, свы́ше посла́вый Елисе́еви благода́ть неду́ги отгоня́ти и прокаже́нныя очища́ти, те́мже и почита́ющим его́ то́чит исцеле́ния.
Проро́че и прови́дче вели́ких дел Бо́га на́шего, Илие́ великоимени́те, веща́нием твои́м уста́вивый водото́чныя о́блаки, моли́ о нас Еди́наго Человеколю́бца.
Велича́ем тя, святы́й сла́вный проро́че Бо́жий Илие́, и чтим, е́же на небеса́ на колесни́це о́гненней, пресла́вное восхожде́ние твое́.
Пра́вдивая страстоте́рпца и и́стинная Ева́нгелия Христо́ва послу́шателя, целому́дренный Рома́не с незло́бивым Дави́дом, не сопроти́в ста́ста врагу́ су́щу бра́ту, убива́ющему телеса́ ва́ша, душа́м же косну́тися не могу́щу. Да пла́чется у́бо злый властолю́бец, вы же ра́дующеся с ли́ки Ангельскими, предстоя́ще Святе́й Тро́ице, моли́теся о держа́ве сро́дников ва́ших, богоуго́дней бы́ти, и сыново́м росси́йским спасти́ся.
Возсия́ днесь пресла́вная па́мять ва́ша, благоро́днии страстоте́рпцы Христо́вы, Рома́не и Дави́де, созыва́ющи нас к похвале́нию Христа́ Бо́га на́шего. Тем притека́юще к ра́це моще́й ва́ших, исцеле́ния дар прие́млем моли́твами ва́шими, святи́и: вы бо боже́ственнии вра́чеве есте́.
Днесь град твой Га́лич тобо́ю хва́лится, в конце́х бо его́ пресве́тло, я́ко ве́лие солнце, возсия́л еси́ и чудесы́ твои́ми, преподо́бне Мака́рие, вся озари́л еси́. И ны́не моли́ся Го́сподеви изба́витися душа́м на́шим от пре́лести вра́жия и спасти́ся гра́ду Твоему́ от пога́нскаго наи́тия.
Вторы́й Моисе́й яви́лся еси́, преподо́бне: он бо жезло́м мо́ре раздели́, ты же стра́сти, я́ко Амали́ка, победи́л еси́, и непрохо́дную пусты́ню немяте́жным умо́м прошел еси́, в не́йже моли́твами твоими ве́лие чудо сотвори́л еси́: гла́дныя люди до изоби́лия прекорми́л еси́. И ныне моли́ся Го́сподеви пода́ти всем печа́льным утеше́ние, Мака́рие, о́тче приснопа́мятне, и́же Га́личестей стране́ и всей Росси́йстей земли́ похвала́ и утвержде́ние.
Друга́го тя Ио́сифа, вели́кий чистоты́ и целому́дрия рачи́телю, всече́стне и равноа́нгельне Моисе́е, свяще́нными пе́сньми восхваля́юще, гре́шнии, мо́лимтися приле́жно: моли́ Христа́ Бога, я́ко да исцели́т вся на́ша стра́сти и пода́ст ве́лию ми́лость.
В Вы́шних Еди́наго Бо́га ища́ земна́я вся презре́л еси́, о телеси́ свое́м неради́в, на му́ки му́жески себе́ вдал еси́, глад, жа́жду, у́зы, в темни́це затворя́емь, до́блественно претерпе́л еси́, бие́ния, кро́ве излия́ние и удо́в отре́зание, чи́стаго ра́ди де́вства твоего́, му́жески поне́сл еси́. И ны́не с де́вственными ли́ки предстоя́ Пресвяте́й Тро́ице, от всех искуше́ний моли́ изба́витися вопию́щим ти: ра́дуйся, Моисе́е, о́тче блаже́ннейший.
Страстоте́рпче святы́й и целе́бниче Пантелеи́моне, моли́ ми́лостиваго Бо́га, да прегреше́ний оставле́ние пода́ст душа́м на́шим.
Подража́тель сый Ми́лостиваго, и исцеле́ний благода́ть от Него́ прие́м, страстоте́рпче и му́чениче Христа́ Бога, моли́твами твои́ми душе́вныя на́ша неду́ги исцели́, отгоня́я при́сно борца́ собла́зны от вопию́щих ве́рно: спаси́ ны, Го́споди.
Велича́ем тя, страстоте́рпче святы́й, великому́чениче и целе́бниче Пантелеи́моне, и чтим честна́я страда́ния твоя́, я́же за Христа́́ претерпе́л еси́.
Звездо́ пресве́тлая Це́ркве Христо́вы, на се́вере просия́вшая, вся к Ца́рствию Небе́сному путеводя́щая, учи́телю и апо́столе и́стинныя ве́ры, предста́телю и засту́пниче гони́мых, украше́ние изя́щное Святы́я Це́ркве во Аме́рице, преподо́бне о́тче Ге́рмане Аля́скинский, моли́ся ко Го́споду Спа́су на́шему, спасти́ся душа́м на́шим.
Свет ве́чный Христа́ Спа́са на́шего тя на путь ева́нгельский во Аме́рику наста́ви, возвести́ти весть о ми́ре ева́нгельскую. Днесь Престо́лу Сла́вы предстоя́, моли́ся о стране́ твое́й и лю́дех ея́, о ми́ре всего́ ми́ра и спасе́нии душ на́ших.
Ве́ры и благоче́стия наста́вниче, Це́ркве свети́льниче, мона́шествующих о́бразе, святи́телю Питири́ме прему́дре, ста́до твое́ благоче́стно упа́сл еси́ и ко Христу приве́л еси́; те́мже в Вы́шних венце́м сла́вы украше́н, с на́ми на земли́ ду́хом пребыва́еши, сия́я чудесы́. Моли́ Христа́ Бога спасти́ся душа́м на́шим.
Мона́хов наста́вника изря́дна и святи́теля всем лю́дем ми́лостива, чудотво́рца преди́вна и моли́твенника о нас неусы́пна, соше́дшеся, воспои́м Питири́ма, Тамбо́вския земли́ похвалу́.
(рождество)
Чу́дное и сла́вное рождество́ твое́, святи́телю Нико́лае, Це́рковь днесь правосла́вных све́тло пра́зднует, ибо стоя́нием ногу́ твое́ю яви́ тя Госпо́дь и провозвести́ бы́ти свети́льника и учи́теля миря́ном, весь мир обогаща́юща и просвеща́юща чудесы́. Тем вопие́м ти: моли́ Христа́ Бо́га спасти́ся душа́м на́шим.
В Ми́рех ро́ждься, свя́те Нико́лае, от благоро́дна ко́рене, я́ко благопло́дна ветвь, прозя́бл еси́, испо́лнь бо быв Боже́ственных даро́в, я́ко со́лнце заря́ми, весь мир чудесы́ просвети́л еси́. Сего́ ра́ди прославля́ем тя, я́ко ученика́ и таи́нника Бо́жия благода́ти.
Всеблага́го Бо́га и Царя́ благове́рный раб и во́ин яви́лся еси́, Иоа́нне чудоде́телю, постра́дав бо ра́ди ве́ры му́жески, блаже́нно же сконча́в тече́ние, зри́ши Всетворца́ Го́спода в небесе́х светле́йше. От Него́же прие́м дарова́ние чуде́с, стра́ждущим челове́ком во вся́ких напа́стех помога́еши, укрепля́еши во́ины в ра́тех, от враго́в плене́ния, ран же и внеза́пных смерте́й и от бед лю́тых изыма́еши. Те́мже моли́ Влады́ку Христа́́, приснопа́мятне, да во вся́ком обстоя́нии сотвори́т нам ми́лость, и не введе́т нас во искуше́ния, но спасе́т ду́ши на́ша, я́ко Человеколю́бец.
Благочести́ваго во́ина Христо́ва, победи́вшаго враги́ душе́вныя и теле́сныя богому́дренно, Иоа́нна му́ченика достодо́лжно пе́сньми восхва́лим: чудоде́йствуя бо, подае́т оби́льная исцеле́ния стра́ждущим лю́дем и мо́лится Го́споду
Бо́гу от вся́ких бед спасти́ правове́рныя.
Жела́нием духо́вным от ю́ности распаля́емь, преподо́бне Ге́рмане, Христу те́сным жития́ путе́м после́довал еси́, и в морски́й пусты́нный о́стров а́ки в ти́хое приста́нище всели́вся, в нем мно́га ле́та по́стнически пожи́л еси́, иде́же блаже́нным отце́м Зоси́ме и Савва́тию сожи́тель был еси́. С ни́миже моли́ Христа́ Бо́га о нас, любо́вию чту́щих святу́ю па́мять твою́.
Вы́шних жела́я, вся до́лу влеку́щая возненави́дел еси́ и, отече́ство свое́ оста́вль, в помо́рие пусты́нное отше́л еси́, та́же в морски́й о́стров удали́вся, в нем мно́га ле́та Го́сподеви порабо́тал еси́. Те́мже, па́мять твою́ пра́зднующе, любо́вию вопие́м ти: ра́дуйся, Ге́рмане богому́дре, о́тче наш.
Свети́льник всесве́тлый во гра́де свята́го Петра́ яви́лся еси́, священному́чениче о́тче Вениами́не. Любо́вь и милосе́рдие в сердца́х ве́рных насажда́я, благотвори́ти призыва́л еси́ терпя́щим глад и нищету́. Сего́ ра́ди и мы к тебе́, па́стырю до́брый, прибега́ем и с ве́рою вопие́м: моли́ ми́лостиваго Бо́га Оте́чество на́ше в Правосла́вии и благоче́стии утверди́ти, Це́ркви мир дарова́ти и душа́м на́шим ве́лию ми́лость.
От ю́ности и́го Христо́во на ра́мо взем, и́стинный страж Правосла́вныя Це́ркве яви́лся еси́, священному́чениче Вениами́не. Клевету́, у́зы, страда́ния и суд непра́ведный от беззако́нных му́жественно претерпева́я, святы́ню церко́вную на поруга́ние не преда́л еси́. Те́мже и Христос да́ром терпе́ния и любве́ тя испо́лни, во е́же пред му́ченическою кончи́ною со благодаре́нием взыва́ти: за вся, Го́споди, сла́ва Тебе́.
Ве́тхий Рим оте́чество твое́ оста́вив, на ка́мень, я́ко на ле́гкий кора́бль возше́л еси́, и на нем па́че естества́, а́ки беспло́тен, по вода́м ше́ствовал еси́, промышле́нием Боже́ственнаго Ра́зума направля́емь, Вели́каго Нова́гра́да дости́гл еси́, и, оби́тель в нем сотвори́в, те́ло твое́ в ней предложи́л еси́, я́ко дар освяще́н. Тем мо́лим тя, о́тче Анто́ние, моли́ Христа́ Бога, да спасе́т ду́ши на́ша.
Ри́мское воспита́ние, вели́кому же Новугра́ду благода́тное процвете́ние, мно́гими бо труды́ и по́двиги в нем Богу угоди́л еси́: сего́ ра́ди чуде́с дарова́ний от Него́ сподо́бился еси́, и те́ло твое́ мно́гими ле́ты соблюде́ нетле́нно. Мы же, сие́ лобыза́юще, ра́достно от души́ вопие́м ти: ра́дуйся, о́тче Анто́ние.
Ве́лия ве́ры чудесе́, в пеще́ре, я́ко в черто́зе ца́рском, святи́и седмь о́троцы пребы́ша, и умро́ша без тли, и по мно́зех вре́менех воста́ша, я́ко от сна, во увере́ние воскресе́ния всех челове́ков. Тех моли́твами, Христе́ Бо́же, поми́луй нас.
Ми́ра су́щая тле́нная презре́вше и нетле́нныя да́ры прие́мше, уме́рше, кроме́ тле́ния пребы́ша. Те́мже востаю́т по мно́гих ле́тех, все погре́бше лю́тых неве́рие; я́же во хвале́нии днесь ве́рнии, восхваля́юще, Христа́ воспои́м.
Пра́вило ве́ры и о́браз кро́тости сло́вом и житие́м па́стве твое́й, о́тче смиренному́дре Митрофа́не, был еси́, те́мже и во све́тлостех святы́х, со́лнца светле́йше возсия́л еси́, венце́м нетле́ния и сла́вы украша́емь; моли́ Христа́ Бога, всей стране́ на́шей и гра́ду твоему́ в ми́ре спасти́ся.
Воздержа́нием те́ло ду́ху порабо́тив, ду́шу же равноа́нгельну сотвори́в, святи́тельскою оде́ялся еси́ оде́ждею, я́ко вене́ц свяще́нства; и ны́не всех Влады́це предстоя́, моли́, всеблаже́нне Митрофа́не, умири́ти и спасти́ ду́ши на́ша.
От ю́ности возлюби́л еси́ Христа́́, блаже́нне, о́браз всем был еси́ сло́вом, житие́м, любо́вию, ду́хом, ве́рою, чистото́ю и смире́нием. Те́мже и всели́лся еси́ в Небе́сныя оби́тели, иде́же предстоя́ Престо́лу Пресвяты́я Тро́ицы, моли́, святи́телю Ти́хоне, спасти́ся душа́м на́шим.
Апо́столов прее́мниче, святи́телей украше́ние, Правосла́вныя Це́ркве учи́телю, Влады́це всех моли́ся, мир вселе́нной дарова́ти и душа́м на́шим ве́лию ми́лость.
Зра́ки изобразу́я святы́х на дщи́цах, сих благодея́ния спе́шно, я́ко иску́сен худо́жник, всехва́льне Али́пие, написова́л еси́ на скрижа́лех твоего́ се́рдца, и сего́ ра́ди а́ки о́браз, благоле́пне укра́шен, свяще́нства благода́тию, а́ки зла́том, обложи́лся еси́ от Христа́ Бо́га и Спа́са душ на́ших.
От ю́ности боже́ственное в себе́ име́я начерта́ние, вдан был еси́ в науче́ние ико́ннаго писа́ния, и внегда́ небеси́ подо́бная Богоро́дицы писа́шеся це́рковь, ты та́можде посо́бствовал, и ви́дел еси́ Ду́ха Свята́го осия́ние, от Него́же прия́л еси́ чуде́с де́йство, я́ко ико́ны твоя́ чудотворя́ху, тем тя чтим и ублажа́ем, чу́дне Али́пие.
Преудо́бренную и богому́друю дво́ицу пресве́тлую восхва́лим, ве́рнии, по достоя́нию, Фло́ра преблаже́ннаго и Ла́вра всечестна́го, и́же усе́рдно Тро́ицу Несозда́нную я́сно пропове́даста всем. Те́мже постра́давше до кро́ве и венцы́ пресве́тлыми увязо́стася: моли́теся Христу Бо́гу, да спасе́т ду́ши на́ша.
Яко благоче́стия му́ченики и страда́льцы Христо́вы богому́дренны, вселе́нная пресла́вно почита́ет Фло́ра и Ла́вра днесь: я́ко да улучи́м благода́ть и ми́лость моли́твами их, и изба́вимся бед и напа́стей, гне́ва же и ско́рби в День Су́дный.
Покая́ния основа́ние, прописа́ние умиле́ния, о́браз утеше́ния, духо́внаго соверше́ния, равноа́нгельное житие́ твое́ бысть, преподо́бне: в моли́твах у́бо и поще́ниих, и в слеза́х пребыва́я, о́тче Иоа́нне, моли́ Христа́ Бо́га о душа́х на́ших.
Ангельскому житию́ поревнова́в, преподо́бне, вся земна́я оста́вив, ко Христу прите́кл еси́, и Того́ за́поведьми огражда́яся, яви́лся еси́ столп непоколеби́мь от вра́жиих нападе́ний. Тем зове́м ти: ра́дуйся, о́тче Иоа́нне, свети́ло пресве́тлое.
Земна́го са́на сла́ву оста́вив, Небе́сное Ца́рство насле́довал еси́: кро́вными ка́плями, я́ко пречу́дным ка́мением, нетле́нныя венцы́ украси́л еси́, и ко Христу приве́л еси́ собо́р страстоте́рпец. С ли́ки а́нгельскими в невече́рнем све́те незаходи́маго Со́лнца Христа́ обре́л еси́, свя́те Андре́е Стратила́те. Его́же моли́ с пострада́вшими с тобо́ю при́сно, да спасе́т ду́ши на́ша.
В моли́твах Го́сподеви предстоя́, я́коже звезда́ со́лнцу предтеки́й, и жела́емое сокро́вище Ца́рствия узре́л еси́, ра́дости неизрече́нныя исполня́яся, Безсме́ртному Царю́ в безконе́чныя ве́ки, от Ангел безпреста́ни хвали́мому, пое́ши, Андре́е Стратила́те: с ни́миже моли́ся непреста́нно о всех нас.
Днесь возсия́ нам па́мять твоя́, сла́вне, я́ко со́лнце, светоза́рно луча́ми озаря́ющая мир и тьму но́щи злых духо́в от нас отгоня́ющая. Днесь Небе́сныя си́лы святы́х Ангел и ду́ши пра́ведных мы́сленно торжеству́ют, ра́дующеся. Днесь и мы, гре́шнии, припа́дающе, мо́лимся: о́тче преподо́бне Авраа́мие, Христа́ Бо́га моли́ непреста́нно спасти́ град и лю́ди, любе́зно тебе́ почита́ющия.
Возсия́, Господи, гра́ду Твоему́ память Твоего уго́дника, я́ко светлое солнце, радостно всех, я́ко лучами, озаря́ющи, па́че же молитвы Пречи́стыя Твоея Ма́тере от всех бед избавляют нас и упраждня́ют ва́рварская шата́ния. Тем мы, лю́дие Твои, и град наш вельми́ хва́лимся и спаса́емся молитвами Твоего уго́дника Авраа́мия, препо́добнаго отца́.
Удали́вся ми́ра, и водвори́вся в пусты́ню, и ту́ подвиза́вся до́брым по́двигом, посто́м, и моли́твами, и мно́гим терпе́нием, и жив показа́л еси́ мно́гая чудеса́, и по преставле́нии свое́м источа́еши разли́чная исцеле́ния с ве́рою приходя́щим к честно́му гро́бу твоему́, Арсе́ние, о́тче наш, моли́ Христа́ Бога спасти́ся душа́м на́шим.
Жите́йския молвы́ отбе́г, в пусты́ню всели́лся еси́, и та́мо житие́м жесто́ким пожи́л еси́, и зве́ря свире́паго а́ркуда моли́твами укроти́л еси́ и мно́гим был еси́ наста́вник ко спасе́нию, и того́ ра́ди получи́л еси́ жизнь ве́чную на Небесе́х. Всегда́ зря Святу́ю Тро́ицу, моли́ изба́витися нам от бед, да зове́м ти: ра́дуйся, о́тче наш Арсе́ние, пусты́нный жителю.
Бога́тство неиждиву́щее вмени́л еси́ ве́ру спасе́нную, треблаже́нне, оста́вль оте́ческое нече́стие и Влады́ки стопа́ми ше́ствуя, Боже́ственными дарова́нии обогати́лся еси́, Адриа́не сла́вне; Христа́ Бо́га моли́ спасти́ся душа́м на́шим.
Му́ченик возсия́ Боже́ственная па́мять, и земны́я озари́ вся концы све́тло, с весе́лием зову́щих: Ты еси́ му́чеников, Христе́, ра́дование.
Му́ченическою кро́вию, свяще́нне Ку́кше, в про́поведи Ева́нгелия со ученико́м ти блаже́нным Ни́коном че́стне украси́выйся, и Пи́мене, в по́стничестве светоза́рно просия́вый, в еди́н день и час вни́досте в свет незаходи́мый, иде́же моли́теся Го́сподеви, да пода́ст нам ве́лию ми́лость.
Свети́ла разу́мная, соше́дшеся, хвала́ми воспое́м, лю́дие, просия́ли бо суть в ми́ре сем Пи́мен мно́гими по́двиги, Ку́кша же со ученико́м Ни́коном про́поведию Сло́ва и си́и трие́, единоу́мно предстоя́ще Святе́й Тро́ице, я́ко со́лнце сия́ют и просвеща́ют любо́вию па́мять их восхваля́ющих.
Яви́лся еси́ в стране́ на́шей, я́ко звезда́ пресве́тлая, благове́рный кня́же Дании́ле, луча́ми све́та твоего́ озаряя́ град твой и оби́тель твою́, лю́дем правосла́вным побо́рник еси́, пле́нным свободи́тель и ни́щим защи́титель. Моли́ Христа́ Бога держа́ве Росси́йстей дарова́ти мир и спасти́ ду́ши на́ша.
Еже по о́бразу соблю́д непрело́жно, и я́же в ми́ре тле́нная оста́вив, со Ангельскими ли́ки предстои́ши Христу́, преподо́бне кня́же Дании́ле, ника́коже забыва́я чад твои́х, но ми́лостивно посеща́я и глаго́ля им: аз есмь с ва́ми и никто́же на вы.
От ю́ности, богому́дре, жела́нием духо́вным в пусты́ню всели́вся, еди́наго Христа́ возжела́л еси́ усе́рдно стопа́м вслед ходи́ти. Те́мже и Ангельстии чи́ни, зря́ще тя, удиви́шася, ка́ко, с пло́тию к неви́димым ко́знем подвиза́вся, прему́дре, победи́л еси́ полки́ страсте́й воздержа́нием, и яви́лся еси́ равноа́нгелен на земли́, Алекса́ндре, преподо́бне. Моли́ Христа́ Бога, да спасе́т ду́ши на́ша.
Яко многосве́тлая звезда́, днесь в страна́х Росси́йских возсия́л еси́, о́тче, всели́вся в пусты́ню, Христо́вым стопа́м после́довати усе́рдно возжеле́л еси́ и, Того́ свято́е и́го на ра́мо твое́ взем, честны́й крест, умертви́л еси́ труды́ по́двиг твои́х теле́сная взыгра́ния. Те́мже вопие́м ти: спаси́ ста́до твое́, е́же собра́л еси́, му́дре, да зове́м ти: ра́дуйся, преподо́бне Алекса́ндре, о́тче наш.
Терпе́ния столп был еси́, ревнова́вый пра́отцем, преподо́бне: Иову во страсте́х, Ио́сифу во искуше́ниих, и безпло́тных жи́тельству, сый в телеси́, Симео́не о́тче наш, моли́ Христа́ Бога спасти́ся душа́м на́шим.
Вы́шних ища́й, ни́жним совокупля́яйся, и колесни́цу о́гненную столп соде́лавый: тем собесе́дник Ангелом был еси́, преподо́бне, с ни́ми Христу Богу моля́ся непреста́нно о всех нас.
Дво́ицу нача́льных Росси́йских свети́л почти́м: Анто́ния, Бо́гом посла́ннаго, и Феодо́сия, Бо́гом дарова́ннаго. Ти́и бо пе́рвии, равноа́нгельным в Росси́и житие́м просия́вше от гор Ки́евских, освети́ша Оте́чествия на́шего вся концы́, и путь к небеси́ пра́вый мно́гим показа́ша и, первоотцы́ и́ноком бы́вше, ли́ки спаса́емых Бо́гови приведо́ша, и ны́не, предстоя́ще в Вы́шних немерца́емому Божества́ Све́ту мо́лятся о душа́х на́ших.
Дво́ицу вели́ких оте́ц и пра́вило и́ноков све́тлое, у́мныя зари́, онебе́сившии Росси́йскую Це́рковь, кто по достоя́нию хвала́ми воспое́т, ти́и бо Престо́лу Бо́жию предстоя́т: но я́ко иму́щии дерзнове́ние к Святе́й Тро́ице, Анто́ние преблаже́нне и Феодо́сие приснопа́мятне, моли́теся о моле́бная к вам принося́щих, и любо́вию пе́сньми вас ублажа́ющих.
Явился еси́ во гра́де, я́ко в пусты́ни, в смиренному́дрии, чистоте́ и в труде́х, и по́двизех, и в терпе́нии мно́зе, преблаже́нне о́тче Иоа́нне. Взем бо Крест Христо́в, после́дова Ему́ и бе в моли́твах и псалмопе́нии день и нощь, иноязы́чнаго рече́ния о спасе́нии всего́ ми́ра христиа́нскаго ро́да и пресели́лся еси́ к Невече́рнему Све́ту. Ны́не же ко гро́бу твоему́ ве́рнии приходя́щии, моля́ся Го́сподеви, Богоро́дице и Предте́чи, прие́млют исцеле́ния моли́твами твои́ми. Но при́сно за ны моли́ся, блаже́нне о́тче Иоа́нне, спасти́ся душа́м на́шим.
Христо́вою любо́вию уязви́вся, о́тче Иоа́нне блаже́нне, вы́шния красоты́ жела́я, земна́я же презре́ и ни во что́же вмени́, и на земли́ а́нгельское житие́ препроводи́, в вечный поко́й дости́же, иде́же глас пра́зднующих, с ни́миже моли́ся за ны, и душа́м на́шим проще́ние и телесе́м исцеле́ние да́руй.
На высоту́ доброде́телей возше́л еси́, проро́че Моисе́е; и сего́ ра́ди сподо́бился еси́ ви́дети сла́ву Бо́жию. Скрижа́ли благода́тныя Зако́на прия́т, и начерта́ний благода́ть в себе́ нося́, и пророко́в был еси́ честна́я похвала́ и благоче́стия вели́кое та́инство.
Лик проро́ческий с Моисее́м и Ааро́ном весе́лием днесь весели́тся, я́ко коне́ц проро́чествия их на нас испо́лнися; днесь сия́ет Крест, и́мже нас спасл еси́. Тех моли́твами, Христе́ Бо́же, поми́луй нас.
Святи́телю, Христу Богу возлю́бленне, пра́вило ве́ры и о́браз милосе́рдия лю́дем был еси́, бде́нием же, посто́м и моли́твою, я́ко свети́льник пресве́тлый, просия́л еси́, и просла́влен от Бо́га яви́лся еси́: те́лом у́бо в нетле́нии почива́я, ду́хом же Престо́лу Бо́жию предстоя́, чудеса́ пресла́вная источа́еши. Моли́ Христа́ Бога, да утверди́т нас в Правосла́вии и благоче́стии и спасе́т ду́ши на́ша.
Свяще́нства оде́ждею обложе́н, прему́дре, по зако́ну Бо́жию всесожже́ния прия́тна священноле́пно приноси́л еси́, Заха́рие, и был еси́ свети́льник и зри́тель та́йных, зна́мения в тебе́
благода́ти нося́ я́вственно, всему́дре, и мече́м убие́н быв в хра́ме Бо́жии, Христо́в проро́че, с Предте́чею моли́, спасти́ся душа́м на́шим.
Проро́к днесь и свяще́нник Вы́шняго, Заха́рия, предложи́ Предте́чев роди́тель трапе́зу своея́ па́мяти, ве́рныя пита́я: питие́ бо пра́вды всем раствори́в, сего́ ра́ди скончава́ется, я́ко Боже́ственный таи́нник Бо́жия благода́ти.
Блаже́н еси́, отче наш Афана́сие, я́ко ве́рно пожи́л еси́, стоя́ бо́дренно за святу́ю Правосла́вную ве́ру, со умиле́нием при́сно поя́ неседа́льное Пречи́стей, запове́дуя никому́же наруша́ти Правосла́вныя ве́ры святы́я, пострада́в за свиде́тельство и́стины да́же до сме́рти. Мы же, чту́ще святы́ню твою, со дерзнове́нием взыва́ем ти: о́тче наш, преподобному́чениче Афана́сие, похвало́ и украше́ние на́ше.
Мона́шескаго жития́ украше́ние и му́чеников красоту́ яви́л себе́ житие́м твои́м, Афана́сие, и я́ко со́лнце пресве́тлое лю́дям правосла́вным возсия́л еси́. Те́мже и Христо́с да́ром чуде́с обогати́ тя; да чту́ще пресве́тлую па́мять твою́, зове́м ти: помина́й ста́до твое́ моли́твами твои́ми,
преподо́бне.
Христу́, нас ра́ди с Небе́с соше́дшему, после́довал еси́ в по́двизех твои́х, Мака́рие, о́тче наш. Его́же моли́ о нас, ублажа́ющих тя, проще́ние прегреше́ний дарова́ти нам, любо́вию же и смире́нием сердца́ на́ша озари́ти и спасти́ ду́ши на́ша.
По́стническое и равноа́нгельское житие́ твое́ страда́льческими уясни́л еси́ по́двиги и Ангелом совсе́льник, Богоблаже́нне, яви́лся еси́, Мака́рие, с ни́миже Христу́ Бо́гу моля́ся не преста́й о всех нас.
Пра́ведных Твои́х Иоаки́ма и Анны, Го́споди, па́мять пра́зднующе, те́ми мо́лим Тя, спаси́ ду́ши на́ша.
Ра́дуется ны́не Анна, непло́дства разреши́вшися соу́з, и пита́ет Пречи́стую, созыва́ющи вся воспе́ти Дарова́вшаго от чре́ва ея́ челове́ком еди́ну Матерь и Неискусому́жную.
Яко по́стников удобре́ние и отце́в красоту́, ми́лости пода́теля, разсужде́ния свети́льника, вси ве́рнии, соше́дшеся, восхва́лим, кро́тости учи́теля и ересе́й посрами́теля, прему́драго Ио́сифа, Росси́йскую звезду́, моля́щася Го́споду поми́ловатися душа́м на́шим.
Жития́ треволне́ния и мяте́ж мирски́й, и стра́стная взыгра́ния в ничто́же вмени́в, пусты́нный граждани́н показа́лся еси́, мно́гих быв наста́вник, Ио́сифе преподо́бне, мона́хов собра́тель, и моле́бник ве́рен, чистоты́ рачи́тель. Моли́ Христа́ Бога спасти́ся душа́м на́шим.
Послуша́нию Христо́ву подража́вый, и имени Его́ ра́ди во вся́ком послуша́нии, терпели́вне, да́же до сме́рти, Па́вле всече́стне, потруди́выйся, мзду же ны́не послуша́ния своего́ трудолю́бно от Го́спода прием, к Нему́ всегда́ моли́ся о нас, пою́щих тя.
Послушника и́стинна и преподо́бным равноче́стна, всеблаже́ннаго отца́ на́шего Па́вла, прииди́те, люби́мицы, усе́рдне ублажи́м, я́ко моля́щася непреста́нно о всех нас.
Христа́́ Учи́теля, в пути́ смире́нне помоли́вся, прия́л еси́ свиде́тельствующу Ду́ху в се́рдце твое́м спасе́ние. Сего́ ра́ди веселя́тся ны́не лю́дие вси о па́мяти твое́й на упова́ние зва́нии, преподо́бне о́тче Силуа́не, моли́ Христа́ Бо́га спасти́ся душа́м на́шим.
Смиренному́дрия испове́дниче преди́вный, и человеколю́бия Ду́хом Святы́м согрева́емая добро́то, Богу возлю́бленне Силуа́не, о по́двизе твое́м Це́рковь Росси́йская ра́дуется, и́ноцы же горы́ Афо́нския и вси христиа́нстии лю́дие, веселя́щеся, сыно́внею любо́вию к Богу устремля́ются. Его́же моли́ о нас, равноа́нгельне богове́дче, во е́же спасти́ся нам, в горе́нии любве́ тебе́ подража́ющим.
Оста́вльши тьму идолослуже́ния и с горя́чей любо́вию прия́в свет Правосла́вныя ве́ры Христо́вы, яви́ся ты, свята́я Людми́ло, я́ко звезда́ у́тренняя, и све́том свя́тости твоея́ и́стинный день богопочита́ния в Че́шстей земли́ нача́в.
Храм твой всечестны́й, я́ко цельбу́ душе́вную обре́тше вси ве́рнии, велегла́сно вопие́м ти, де́во му́ченице, великоимени́тая: Христа́ Бо́га моли́ непреста́нно о всех нас.
Торжеству́ет Це́рковь перворо́дных, и свесели́тся, прие́мля ма́терь, о ча́дех веселя́щуюся, я́же я́ко му́дрости тезоимени́тая тро́йственным богосло́вским доброде́телем равночи́сленныя породи́. Ты́я с му́дрыми де́вами зрит уневе́стившияся Жениху́ Бо́гу Сло́ву, с не́ю и мы духо́вне в па́мяти их свесели́мся, глаго́люще: Тро́ицы побо́рницы, Ве́ро, Любве́ и Наде́ждо, в ве́ре, любви́ и наде́жде утвержда́йте нас.
Софи́и честны́я свяще́ннейшия ве́тви, Ве́ра и Наде́жда и Любо́вь, показа́вшеся, му́дрость обуи́ша е́ллинскую благода́тию, и пострада́вше, и победоно́сицы яви́вшеся, венце́м нетле́нным от всех Влады́ки Христа́ увязо́шася.
От ю́ности ва́шея Христо́ве любви́ прилепи́вшеся, святи́и, усе́рдно зако́н и оправда́ния Того́ сохрани́сте: отону́дуже и чуде́сными дарова́ньми обогати́вшеся, исцеле́ния источа́ете, Фео́доре, Дави́де и Константи́не, о ве́рою вас почита́ющих моли́те Христа́ Бога спасти́ся душа́м на́шим.
Яви́стеся свети́льницы всесве́тлии, во пло́ти я́ко Ангели, и я́ко жи́зни древеса́ ра́йская, поще́нием, бде́нием и ве́рою возраща́еми, процвели́ есте́ моли́твами ва́шими, небе́сныя благода́ти прие́мше. Вра́чеве кре́пцы я́вльшеся, исцеля́ете неду́гующих ду́ши, с ве́рою прибега́ющих к вам, чудотво́рцы сла́внии, Фео́доре, Дави́де и Константи́не. Моли́те Христа́ Бога грехо́в оставле́ние дарова́ти, ве́рою и любо́вию чту́щим па́мять ва́шу.
Яко звезда́ путево́дная, уте́шитель Росси́йский яви́лся еси в годи́ну лю́тых испыта́ний, затво́рниче преди́вный, огне́м бо ве́ры распаля́ем, Боже́ственныя любве́ дости́гл еси́, восприя́в от благода́ти Духа Свята́го ста́до правосла́вное. Просия́вший Духом Пребоже́ственным, избира́я Патриа́рха Российскаго, святи́теля вели́каго, преподо́бне о́тче Алекси́е, моли́ Пресвятую Троицу за землю Русскую и спасе́ние душ на́ших.
Благочести́ваго ко́рене жезл святы́й, от ю́ности живот свой на служе́ние Богу преда́л еси́, в пу́стынь же Зоси́мову всели́вся, любо́вию Христо́вою уязвле́нный, стяжа́л сию́ доброде́тель я́ко вы́шшую ве́чную, и ве́рным благода́ти исто́чник неоску́дный показа́лся еси́, ми́лости всем излива́я и немощны́я врачу́я. Преподо́бне ста́рче Алекси́е, моли́ всеще́драго Бога дарова́ти нам мир и ве́лию милость.
От ю́ности возлюби́в Христа́ всем се́рдцем, преподо́бне, сла́ву земну́ю я́ко преходя́щу оста́вил еси́ и, ца́рство земно́е в ничто́же вмени́вше, ли́ку и́нок ра́достно приче́лся еси́ и труды́ мно́гими град Брянск, а́ки со́лнце пресве́тло, озари́л еси́; тем, быв Тро́ицы украше́ние, моли́, кня́же Оле́же, Христа́ Бо́га спасти́ся душа́м на́шим.
Уподо́бился еси́ плодоно́сней ле́торасли от ко́рене честна́го, Оле́же благоро́дне, и́стину возлюби́в и нетле́нный Христо́в живо́т. Те́мже моли́твою, бде́нием и поще́нием свети́льник вели́кий быв твои́м ученико́м, просвети́, блаже́нне, Оте́чество твое́ и спаси́ ду́ши на́ша.
Ублажа́ем тя, благове́рне кня́же Оле́же, и чтим святу́ю па́мять твою́, ты бо мо́лиши за нас Христа́ Бо́га на́шего.
Жизнь ва́шу му́ченически соверши́вше, испове́дания венцы́ украси́вшеся, к небе́сным востеко́сте, Михаи́ле прему́дре с до́блим Фео́дором, моли́те Христа́ Бога сохрани́ти Оте́чество ва́ше, град же и лю́ди, по вели́цей Его́ ми́лости.
Ца́рство земно́е в ничто́же вмени́в, сла́ву я́ко преходя́щую оста́вил еси́, самозва́н прише́д к по́двигом, Тро́ицу пропове́дал еси́ пред нечести́вым мучи́телем, страстоте́рпче Михаи́ле, с до́блим Фео́дором, Царю́ сил предстоя́ще, моли́те без вреда́ сохрани́ти Оте́чество ва́ше, град же и лю́ди, да вас непреста́нно почита́ем.
Велича́ем тя, благове́рный кня́же Михаи́ле, и с боля́рином твои́м Фео́дором, и чтим святу́ю па́мять ва́шу, и́же за Христа́ кровь свою́ излия́сте, и ны́не мо́лите за нас Христа́ Бо́га на́шего.
Проро́ка Твоего́ Ио́ны па́мять, Го́споди, пра́зднующе, тем Тя мо́лим: спаси́ ду́ши на́ша.
Проро́к ди́вен показа́ся, Бо́жие повеле́ние прие́м во о́браз тридне́внаго Воскресе́ния. В ки́те тридне́вен быв, неврежде́н от зве́ря изы́де и яви́ся све́тел пропове́дник Ниневи́и, вели́кому гра́ду. Сего́ ра́ди тя ра́достно, Ио́но, почита́ем, я́ко человеколю́бия Бо́жия провозве́стника.
Пе́рвее неражда́ющая непло́ды возвесели́ся: се бо зачала́ еси́ со́лнца свети́льника я́ве, просвеща́ти иму́ща всю вселе́нную, слепото́ю неду́гующую: лику́й, Заха́рие, вопия́ со дерзнове́нием: проро́к Вы́шняго есть хотя́й роди́тися.
Весели́тся све́тло Заха́рия великий со всесла́вною Елисаве́тою сопру́жницею, достойно зачина́юще Иоа́нна Предте́чу, его́же Архангел благовести́, ра́дуяся, и челове́цы достодо́лжно почти́м, я́ко таи́нника благода́ти.
Словесе́м Па́вловым научи́вшися, богоневе́стная Фе́кло, и ве́рою утверди́вшися от Петра́, богозва́нная первому́ченица яви́лася еси́ и первострада́льница в жена́х; возшла́ еси́ на пла́мень, я́ко на ме́сто благоцвету́щее, зве́ри и юнцы́ устраши́шася тебе́, вооружи́ся бо кресто́м. Тем моли́, всехва́льная, Христа́ Бога, спасти́ся душа́м на́шим.
Уязви́вши твое́ се́рдце, доброде́во, любо́вию Христо́вою, обру́чника вре́меннаго я́ко небрего́ма преоби́дела еси́ и на огнь дерзну́ла еси́; звере́й же уста́ загради́ла еси́, и, спа́сшися от них, прилежа́ше Па́вла и́щущи, Фе́кло первострада́льная.
Иже доброде́телей подви́жник, я́ко и́стинный во́ин Христа́ Бога, на стра́сти вельми́ подвиза́лся еси́ в жи́зни вре́менней, в пе́ниих, бде́ниих же и поще́ниих о́браз быв твои́м ученико́м; те́мже и всели́ся в тя Пресвяты́й Дух, Его́же де́йствием све́тло укра́шен еси́. Но я́ко име́я дерзнове́ние ко Святе́й Тро́ице, помина́й ста́до, е́же собра́л еси́, му́дре, и не забу́ди, я́коже обеща́лся еси́, посеща́я чад твои́х, Се́ргие преподо́бне, о́тче наш.
Христо́вою любо́вию уязви́вся, преподо́бне, и Тому́ невозвра́тным жела́нием после́довав, вся́кое наслажде́ние плотско́е возненави́дел еси́, и, я́ко со́лнце, Оте́честву твоему́ возсия́л еси́; тем и Христо́с да́ром чуде́с обогати́ тя. Помина́й нас, чту́щих пресве́тлую па́мять твою́, да зове́м ти: ра́дуйся, Се́ргие богому́дре.
Свята́я твоя́ па́мять Су́ждальскую страну́ весели́т, ве́рных же вся созыва́ет во всечестны́й храм твой, иде́же ны́не соверша́ется всесла́вная па́мять твоя́, Евфроси́ние преподо́бная: моли́ Христа́ Бога спасти́ся душа́м на́шим.
Де́вства чи́стый сосу́д еле́ем моли́твы и любве́ испо́лнивши, неугаси́мый свети́льник в се́рдце своем возжгла́ еси́, преподо́бная, с ни́мже бо́дренно в сре́тение Небе́снаго Жениха́ изше́дши, в черто́г Того́ пресве́тлый прия́та была́ еси́, иде́же ны́не водворя́яся с ли́ки Ангелов и святы́х, моли́ся, мо́лимся, Христу́ Бо́гу, ча́сти дев юро́дивых изба́витися нам.
Бо́жиим смотре́нием к святи́тельскому служе́нию святы́м патриа́рхом Ти́хоном призва́нный, ста́ду Христо́ву яви́лся еси́ страж неусы́пный и защи́тник небоя́зненный, священному́чениче Пе́тре. Жесто́кая заточе́ния и да́льняя изгна́ния, страда́ния и смерть от богобо́рцев претерпе́л еси́. Вене́ц му́ченический прия́в, на Небеси́ ны́не ра́дуешися. Моли́ ми́лостиваго Бо́га, да сохрани́т Це́рковь на́шу от нестрое́ний, единомы́слие и мир лю́дем Свои́м да́рует и спасе́т ду́ши на́ша.
Дух ми́рен и кро́ток стяжа́в, тве́рдое упова́ние на милосе́рдие Бо́жие име́я, блюсти́тель ве́рный Це́ркве на́шея и испове́дник Христо́в яви́лся еси́, священному́чениче Пе́тре, при́сный о нас пред Бо́гом предста́телю и моли́твенниче о душа́х на́ших.
Удали́вся ми́ра и водвори́вся в пусты́ню, до́брым по́двигом подвиза́лся еси́, злострада́нием и внима́нием и моли́твами: отону́дуже и по сме́рти источа́еши исцеле́ния, Савва́тие о́тче наш, моли́ Христа́ Бога спасти́ся душа́м на́шим.
Жите́йския молвы́ отбе́г, всели́лся еси́ в морски́й о́стров, му́дре, и крест твой взем, Христу после́довал еси́, в моли́твах, и во бде́ниих, и в поще́ниих злострада́ньми плоть твою́ изнуря́я.
Тем был еси́ преподо́бных удобре́ние: сего́ ра́ди любо́вию па́мять твою́ пра́зднуем, преподо́бне Савва́тие, моли́ Христа́ Бо́га непреста́нно о всех нас.
Днесь Ангели с челове́ки ра́дуются вку́пе о́бщим весе́лием, не́бо и земля́ све́тло лику́ют в па́мять ти, свя́те. И мы, гре́шнии, приле́жно ти вопие́м: помоли́сь к Влады́це о нас, изба́вити ны от напа́сти, ви́димых и неви́димых враг, чту́щих пресве́тлую ти па́мять.
С ли́ки Ангельскими предстоя́, блаже́нне кня́же Вячесла́ве, наслажда́ешися Боже́ственныя и неизрече́нныя добро́ты, и отту́ду благоде́тельныя да́ры поче́рп чуде́с, всем притека́ющим ве́рою под твою́ святы́ню источа́еши цельба́м дарова́ние.
Слез твои́х тече́ньми пусты́ни безпло́дное возде́лал еси́, и я́же из глубины́ воздыха́ньми во сто трудо́в уплодоноси́л еси́, и был еси́ свети́льник вселе́нной, сия́я чудесы́, Харито́не о́тче наш, моли́ Христа́ Бо́га спасти́ся душа́м на́шим.
Наслади́вся, богому́дре, воздержа́ния, и пло́ти твоея́ вожделе́ния обузда́в, яви́лся еси́, ве́рою возраща́емь, и я́ко жи́зни дре́во посреде́ рая́ процве́л еси́, Харито́не всеблаже́нне, свяще́ннейший.
И нра́вом прича́стник, и престо́лом наме́стник апо́столом быв, дея́ние обре́л еси́, богодухнове́нне, в виде́ния восхо́д. Сего́ ра́ди сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Григо́рие, моли́ Христа́ Бо́га спасти́ся душа́м на́шим.
Благосла́внаго и священнонача́льника вси, я́ко страда́льца и́стины, днесь ве́рнии в пе́снех и песнопе́ниих восхва́лим, бо́драго па́стыря и учи́теля Григо́рия, всеми́рнаго свети́льника и побо́рника: Христу бо мо́лится, е́же спасти́ся нам.
Днесь проро́чествие во апо́столех первозва́ннаго испо́лнися: се бо на сих гора́х возсия́ благода́ть и ве́ра умно́жися: и и́же неве́рием обветша́вшии, Боже́ственною купе́лию отроди́шася, и бы́ша лю́дие обновле́ния, ца́рское свяще́ние, язык свят, Христо́во ста́до: ему́же ты пе́рвый па́стырь яви́лся еси́, я́ко пе́рвее Крещением послужи́вый. И ны́не, предстоя́ Влады́це Христу Бо́гу, моли́ всем сыно́м Росси́йским спасти́ся: и́маши бо дерзнове́ние я́ко иера́рх Бо́жий и священнослужи́тель.
Моисе́й вторы́й Росси́и яви́лся еси́, о́тче, пренесы́й мы́сленный виногра́д от еги́петскаго идолослуже́ния в зе́млю проро́чествием предуви́денну. Бу́дет, рече́, утвержде́ние ве́ры на земли́, и на версе́х гор Ки́евских превознесе́тся па́че лива́на плод, пита́ющ ми́ра всего́: от него́же вкуси́вше, ублажа́ем тя, Михаи́ле, Бо́жий святи́телю.
По́двигом поста́, моли́твы и бде́ния, глубино́ю ве́ры и смиренному́дрия от ю́ности совле́клся еси́ ве́тхаго челове́ка, равноа́нгельному житию́ уподо́бився, преподо́бне Рома́не Сладкопе́вче, досто́ин был еси́ явле́ния Богоро́дицы, Яже повеле́ ти ди́вный сви́ток съе́сти, и тем препода́ ти дар песнотворе́ния; а́бие воспе́л еси́, я́ко Ангели небе́снии, сла́ву Воплоти́вшемуся из Нея́ Сы́ну Бо́жию. Моли́ся за ны ко Го́споду, дарова́ти всем воспева́ющим Христа́ Жизнода́вца согла́сное пе́ние, мир и ве́лию ми́лость.
Боже́ственными доброде́тельми ду́ха измла́да украси́вся, Рома́не прему́дре, Це́ркви Христо́ве пречестно́е украше́ние был еси́, пе́нием бо прекра́сным украси́в ю́, блаже́нне. Тем мо́лим тя: пода́ждь жела́ющим Боже́ственнаго дарова́ния твоего́, я́ко да вопие́м ти: ра́дуйся, о́тче преблаже́нне, красото́ церко́вная.
От ю́ности твоея́ весь Богу порабо́тился еси́, блаже́нне, и Того́ ра́ди любве́ Оте́чество и род оста́вил еси́, в пусты́ню всели́вся и в ней жесто́кое житие́ показа́в, чуде́с дарова́ния от Го́спода прия́л еси́, Са́вво преподо́бне: моли́ Христа́ Бога спасти́ся душа́м на́шим.
Отече́ства, преподо́бне, удали́вся и всели́вся в пусты́ню, и та́мо на столп вшед, иде́же жесто́кое житие́ показа́л еси́, и мно́гих житие́м удиви́в, отню́дуже дарова́ние чуде́с от Христа́ прия́л еси́.
Помина́й нас, честву́ющих па́мять твою́, да зове́м ти: ра́дуйся, Са́вво, о́тче наш.
По вся́ дни́ умервщля́ем был еси Бо́га ра́ди, святи́телю и испове́дниче Христо́в Агафа́нгеле, во вре́мя безбо́жных гоне́ний лю́тых попече́ние о Це́ркви Ру́сской от Патриа́рха Ти́хона прияв, кова́рные ко́зни слу́г диа́вола разори́л еси и кора́бль церко́вный му́дре упра́вил еси си́лою возлюби́вшего тя Го́спода, Его́ же моли́ дарова́ти нам ми́р и ве́лию ми́лость.
Боже́ственный гром, труба́ духо́вная, ве́ры насади́телю и отсека́телю е́ресей, Тро́ицы уго́дниче, вели́кий святи́телю, со Ангелы предстоя́ при́сно, моли́ непреста́нно о всех нас.
Войти с помощью соц. сетей: