Войти в систему
Войти с помощью соц. сетей:
От святы́я ико́ны Твоея́, о Влады́чице Богоро́дице, исцеле́ния и цельбы́ подаю́тся оби́льно с ве́рою и любо́вию приходя́щим к ней, та́ко и мою́ не́мощь посети́, и ду́шу мою́ поми́луй, Блага́я, и те́ло исцели́ благода́тию Твое́ю, Пречи́стая.
Аще и в мо́ре вве́ржена бысть свята́я ико́на Твоя́, Богоро́дице, от вдови́цы, не могу́щия спасти́ сию́ от враго́в, но яви́лася есть храни́тельница Афо́на и врата́рница оби́тели Иверския, враги́
устраша́ющая и в правосла́вней Росси́йстей стране́ чту́щия Тя от всех бед и напа́стей избавля́ющая.
Почерпе́м, челове́цы, цельбы́ душа́м и те́лом моли́твою, Река́ бо всем предтече́т Пречи́стая Цари́ца Богоро́дица, источа́ющи нам чу́дную во́ду и измыва́ющи серде́ц че́рности, грехо́вные стру́пы очища́ющи, ду́ши же освяща́ющи ве́рных Боже́ственною благода́тию.
От неистощи́мыя Ты, Исто́чниче Богоблагода́тный, подае́ши ми, точа́щи во́ды Твоея́ благода́ти, приснотеку́щий па́че сло́ва. Яко бо Сло́во ро́ждшая па́че смы́сла, молю́ Ти ся, ороси́ мя благода́тию, да зову́ Ти: ра́дуйся, Водо́ спаси́тельная.
Днесь све́тло красу́ется оби́тель сия́, я́ко зарю́ со́лнечную восприи́мши, Влады́чице, чудотво́рную Твою́ ико́ну, к не́йже мы ны́не притека́юще и моля́щеся Тебе́, взыва́ем си́це: о Пречу́дная Влады́чице Богоро́дице! Моли́ся из Тебе́ воплоще́нному Христу́ Бо́гу на́шему, да изба́вит оби́тель сию́ и вся гра́ды и страны́ христиа́нския невреди́мы от всех наве́т вра́жиих и спасе́т ду́ши на́ша, я́ко Милосе́рд.
Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.
Восприе́мши ду́ши челове́ческия и утоли́вши злый сове́т, сокруши́, Богома́ти Влады́чице, и разгони́ тьму прегреше́ний, и нас наста́ви на путь смире́ния, я́ко да и мы бу́дем во све́те дел ходи́ти, и Твоея́ ико́ны явле́нию торжествова́ти, и на по́мощь Твою́ упова́ти, и уми́льным гла́сом звати́, Влады́чице, из глубины́: помози́, еди́на Благослове́нная.
Око се́рдца моего́ смуща́ют, и злый сове́т разоря́ет мя, сих сокруши́, Де́во Чи́стая, и не пре́зри мое воздыха́ние, и супоста́ты на нас умягчи́, Преблагослове́нная Влады́чице.
Яко необори́мую сте́ну и исто́чник чуде́с стяжа́вше Тя раби́ Твои́, Богоро́дице Пречи́стая, сопроти́вных ополче́ния низлага́ем: те́мже мо́лим Тя, мир гра́ду Твоему́ да́руй и душа́м на́шим ве́лию ми́лость.
Честна́го о́браза Твоего́ зна́мение пра́зднующе лю́дие Твои́, Богороди́тельнице, и́мже ди́вную побе́ду на сопроти́вных гра́ду Твоему́ дарова́ла еси́, те́мже Тебе́ ве́рою взыва́ем: ра́дуйся, Де́во, христиа́н похвало́.
Велича́ем Тя, Пресвята́я Де́во, Богоизбра́нная Отрокови́це, и чтим о́браз Твой честны́й, и́мже показа́ла еси́ пресла́вное зна́мение.
Без се́мене от Боже́ственнаго Ду́ха, во́лею же Отчею зачала́ еси́ Сы́на Бо́жия, от Отца́ без ма́тере пре́жде век су́ща, нас же ра́ди из Тебе́ без отца́ бы́вша, пло́тию родила́ еси́ и Младе́нца млеко́м пита́ла еси́, те́мже не преста́й моли́ти изба́витися от бед душа́м на́шим.
Душ на́ших чу́вствия очи́стивше, у́зрим на ико́не та́инство пресла́вное, Творца́ Вселе́нныя и Го́спода вы́шних сил, во объя́тиих держи́ма и от сосцу́ Твое́ю я́ко Младе́нца пита́ема, и, со стра́хом и ра́достию покланя́ющеся Тебе́ и ро́ждшемуся от Тебе́ Спа́су на́шему, воззове́м: ра́дуйся, Влады́чице, жи́зни на́шея Пита́тельнице.
Велича́ем Тя, Пресвята́я Де́во, Млекопита́тельнице Спа́са на́шего, и чтим о́браз Твой святы́й, от него́же благода́ть исцеле́ния нам при́сно подае́ши.
Утоли́ боле́зни многовоздыха́ющия души́ моея́, утоли́вшая вся́ку сле́зу от лица́ земли́: Ты бо челове́ком боле́зни отго́ниши и гре́шных ско́рби разруша́еши, Тебе́ бо вси стяжа́хом наде́жду и утвержде́ние, Пресвята́я Ма́ти Де́во.
Не вве́ри мя челове́ческому предста́тельству, Пресвята́я Влады́чице, но приими́ моле́ние раба́ Твоего́, скорбь бо обдержи́т мя, терпе́ти не могу́ де́монскаго стреля́ния, покро́ва не и́мам, ниже́ где прибе́гну, окая́нный всегда́ побежда́емь, и утеше́ния не и́мам, ра́зве Тебе́, Влады́чице ми́ра, упова́ние и предста́тельство ве́рных, не пре́зри моле́ние мое́, поле́зно сотвори́.
Ра́дуйся, Благода́тная Богоро́дице Де́во, во объя́тиях Cвои́х Предве́чнаго Младе́нца и Бо́га носи́вшая. Проси́ Его́ да́ти ми́ру умире́ние и душа́м на́шим спасе́ние. Сын бо Тебе́, Богома́ти, веща́ет, я́ко вся проше́ния Твоя́ во благо́е испо́лнит. Сего́ ра́ди и мы, припа́дающе, мо́лимся и, наде́ющиися на Тя, да не поги́бнем, и́мя Твое́ имену́ем: Ты бо еси́, Влады́чице Взыска́ние поги́бших.
Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.
Ангелов ли́цы благогове́йно Тебе́ слу́жат, и вся Небе́сныя Си́лы немо́лчными гла́сы Тя ублажа́ют, Богоро́дице Де́во; усе́рдно мо́лим Тя, Влады́чице, да пребу́дет Боже́ственная благода́ть на честне́й ико́не Твое́й Держа́вней, и светоза́рный луч сла́вы чуде́с Твои́х да нисхо́дит от нея́ на всех с ве́рою Тебе́ моля́щихся и вопию́щих Бо́гу: Аллилу́ия.
Взбра́нной Воево́де победи́тельныя пе́сни прино́сим, я́ко дарова́ся нам держа́ва Твоя́, и ничесо́же устраши́мся, не от ми́ра бо спасе́ние на́ше, но Превознесе́нныя Влады́чицы милосе́рдием огражда́емся и тому́ днесь ра́дуемся, я́ко прии́де Засту́пница на стра́жу земли́ Своея́.
Велича́ем Тя, Пресвята́я Де́во, Богоизбра́нная Отрокови́це, и чтим Держа́вный о́браз святы́ни Твоея́, и́мже подае́ши ве́лию ми́лость всем, с ве́рою к нему притекающим.
Непобеди́мая Побе́до, Влады́чица Ченстохо́вская, дре́вняго и́же о нас благоволе́ния Самозри́тельнице, бу́дущаго спасе́ния Храни́тельнице, покая́нием соде́лай ны но́выя гряду́щему Царю́.
Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.
Умолка́ет ны́не вся́кое уны́ние и страх отча́яния исчеза́ет, гре́шницы в ско́рби се́рдца обрета́ют утеше́ние и небе́сною любо́вию озаря́ются све́тло. Днесь бо Ма́терь Бо́жия простира́ет нам спаса́ющую ру́ку и от пречи́стаго о́браза Своего́ веща́ет, глаго́ля: Аз Спору́чница гре́шных к Моему́ Сы́ну, Сей дал Мне за них ру́це слы́шати Мя вы́ну. Те́мже, лю́дие, обремене́ннии грехи́ и скорбьми́ мно́гими, припади́те к подно́жию ико́ны Ея́ со слеза́ми, вопию́ще: Засту́пнице ми́ра, гре́шным Спору́чнице! Умоли́ Ма́терними Твои́ми моли́твами Изба́вителя всех, да Боже́ственным всепроще́нием покры́ет грехи́ на́ша и све́тлыя две́ри ра́йския отве́рзет нам, Ты бо еси́ предста́тельство и спасе́ние ро́да христиа́нскаго.
Честно́е жили́ще бы́вшее неизрече́ннаго естества́ Боже́ственнаго вы́ше сло́ва и па́че ума́, и гре́шным еси́ Спору́чница, подава́еши благода́ть и исцеле́ния, я́ко Ма́ти всех Ца́рствующаго, моли́ Сы́на Твоего́ получи́ти нам ми́лость в День Су́дный.
Днесь све́тло красу́ется преимени́тый град Кострома́ и вся Ру́сская страна́, созыва́ющи к весе́лию вся боголюби́выя наро́ды христиа́нския, на пресла́вное торжество́ Бо́жия Ма́тере, прише́ствия ра́ди чудотво́рнаго Ея́ и многоцеле́бнаго о́браза, днесь бо яви́ся нам пресве́тлое вели́кое со́лнце; прииди́те, вси богоизбра́ннии лю́дие, но́вый Изра́иль, ко исто́чнику цельбоно́сному, источа́ет бо нам неоску́дныя ми́лости Пресвята́я Богоро́дица и избавля́ет вся гра́ды и страны́ христиа́нския невреди́мы от всех наве́т вра́жиих. Но, о Всеми́лостивая Госпоже́, Де́во Богоро́дице, Влады́чице, спаси́ страну́ на́шу, и архиере́и, и вся лю́ди Твоего́ достоя́ния от всех бед по вели́цей Твое́й ми́лости, да зове́м Ти: ра́дуйся, Де́во, христиа́ном похвало́.
Притеце́м, лю́дие, вси к ти́хому и до́брому приста́нищу, в дом Бо́жия Ма́тере, чу́дному о́бразу Цари́цы и Богоро́дицы, за неизрече́нную ми́лость Ея́ явле́нному, ве́рно припа́дающе и вопию́ще: о Всеми́лостивая Влады́чице, за спаси́тельное Твое́ смотре́ние, чу́днаго о́браза к нам прише́ствие, посети́ нас, гре́шных, све́тло сотворя́ющих пра́зднество Твое́, укрепи́ страну́ на́шу, ди́вно на враги́ побе́ду подаю́щи, и ве́ру утверди́, Це́рковь Сы́на Твоего́ непоколеби́му соблюди́, притека́ющих к Тебе́ спаси́, от вся́ких напа́стей изба́ви, сохраня́ющи в ми́ре все Правосла́вие, да зове́м Ти: ра́дуйся, Неве́сто Неневе́стная.
Богора́дованная Влады́чице, Препросла́вленная Ма́ти щедро́т и человеколю́бия, Всеми́лостивая о всем ми́ре Хода́таице!́ Приле́жно, раби́ Твои́, к Боже́ственному предста́тельству прибега́юще и пречу́дному о́бразу Твоему́ со умиле́нием припа́дающе, мо́лимся: моли́тву те́плую к Сы́ну Твоему́ и Бо́гу на́шему сотвори́, о Всепе́тая Цари́це Богоро́дице, да вся́ких боле́зней и печа́лей нас Тебе́ ра́ди изба́вит и от грехо́в вся́ких свободи́т, Ца́рствия Своего́ Небе́снаго насле́дники ны пока́жет; ве́лие бо неизрече́нное, я́ко Ма́ти, и́маши дерзнове́ние к Нему́ и вся мо́жеши, Еди́на во ве́ки Преблагослове́нная.
Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти, раби́ Твои́, Богоро́дице. Но, я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.
Днесь све́тло красу́ется град Му́ром, я́ко зарю́ со́лнечную, восприе́мше, Влады́чице, чудотво́рную Твою́ ико́ну, к не́йже ны́не мы притека́юще и моля́щеся, Тебе́ взыва́ем си́це: о Пречу́дная Влады́чице Богоро́дице, моли́ся из Тебе́ воплоще́нному Христу́ Бо́гу на́шему, да изба́вит град сей и вся гра́ды и страны́ христиа́нския невреди́мы от всех наве́т вра́жиих и спасе́т ду́ши на́ша, я́ко Милосе́рд.
Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.
Возсия́ нам со́лнце светоза́рное от восто́ка в велеле́пии, Твоя́, Влады́чице, ико́на, озаря́ющи чуде́с сия́нием пресла́вно всех, приходя́щих к ней с ве́рою и любо́вию и моля́щихся усе́рдно к Твоему́, е́же о Сы́не Твое́м и Бо́зе, величию. Сла́ва Бо́гу, Евфроси́ном сию́ да́вшему нам! Сла́ва Приве́дшему ю́ от Царьгра́да! Сла́ва Даю́щему то́ю всем исцеле́ния.
Препросла́вленная Вы́шняго Ма́терь созыва́ет к песнопе́нию нас Своего́ о́браза прише́ствием от Царьгра́да и возбужда́ет зре́нием того́ на по́двиг, побежда́ти сопроти́вных си́лу, и к Ней, я́ко на́шея ра́дости вино́вней, пе́ти: ра́дуйся, Неве́сто Неневе́стная.
Днесь, ве́рнии лю́дие, духо́вно торжеству́ем, прославля́юще Засту́пницу усе́рдную ро́да христиа́нскаго, и, притека́юще к пречи́стому Ея́ о́бразу, взыва́ем си́це: о Преми́лостивая Влады́чице Богоро́дице, пода́ждь нам неча́янную ра́дость, обремене́нным грехи́ и скорбьми́ мно́гими, и изба́ви нас от вся́каго зла, моля́щи Сы́на Твоего́, Христа́ Бо́га на́шего спасти́ ду́ши на́ша.
Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты нам помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.
Днесь притеце́м, ве́рнии, к Боже́ственному и пречу́дному о́бразу Пресвяты́я Богома́тери, напая́ющей ве́рных сердца́ небе́сною Неупива́емою Ча́шею Своего́ милосе́рдия и лю́дем ве́рным чудеса́ показу́ющей. Яже мы ви́дяще и слы́шаще, духо́вно пра́зднуем и те́пле вопие́м: Влады́чице Преми́лостивая, исцели́ на́ша неду́ги и стра́сти, моля́щи Cы́на Твоего́ Христа́ Бо́га на́шего спасти́ ду́ши на́ша.
Бысть чре́во Твое́ святая трапе́за, иму́щая Небе́снаго Хлеба, Христа́ Бо́га на́шего, от Него́же всяк яды́й не умирает, я́коже рече́ всех, Богороди́тельнице, Питатель.
Днесь све́тло красу́ется сла́внейший град Москва́, я́ко зарю́ со́лнечную восприе́мши, Влады́чице, чудотво́рную Твою́ ико́ну, к не́йже ны́не мы притека́юще и моля́щеся, Тебе́ взыва́ем си́це: о, пречу́дная Влады́чице Богоро́дице! Моли́ся из Тебе́ воплоще́нному Христу́ Бо́гу на́шему, да изба́вит град сей и вся гра́ды и стра́ны христиа́нския невреди́мы от всех наве́т вра́жиих, и спасе́т ду́ши на́ша, я́ко Милосе́рд.
Взбра́нной Воево́де победи́тельная, я́ко изба́вльшеся от злы́х прише́ствием Твоего́ честна́го о́браза, Влады́чице Богоро́дице, све́тло сотворя́ем пра́зднество сре́тения Твоего́ и обы́чно зове́м Ти́: ра́дуйся, Неве́сто Неневе́стная.
О Преди́вная Госпоже́, Влады́чице Богоро́дице! Приими́ нас, припа́дающих к Твоему́ о́бразу; воззри́ недре́млющим о́ком Твои́м на душе́вныя я́звы на́ша грехо́вныя; умоли́ се́рдцем бдя́щаго о нас Сы́на Твоего́, Христа́ Бо́га на́шего, да изба́вит нас, с ве́рою к Нему́ прибега́ющих, от тя́жкаго сна грехо́внаго и от всех наве́т вра́жиих, и спасе́т ду́ши на́ша, я́ко Человеколю́бец.
Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.
Яко неруши́мую сте́ну и всемо́щный покро́в стяжа́хом Тя, раби́ Твои́, Влады́чице Богоро́дице, мрак грехо́в и скорбе́й отгоня́ющую. Те́мже вопие́м Ти: мир ми́рови да́руй и душа́м на́шим свет и спасе́ние.
Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты нам помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.
Притеце́м, ве́рнии, со дерзнове́нием к Ми́лующей Цари́це Богоро́дице и уми́льно воззове́м к Ней: ниспосли́ на ны ми́лости Твоя́ бога́тыя: Це́рковь на́шу сохрани́, лю́ди во благоде́нствии соблюди́, зе́млю на́шу изба́ви от вся́каго обстоя́ния, мир да́руй ми́рови и спасе́ние душа́м на́шим.
Арха́нгельский глас вопие́м Ти, Всецари́це: досто́йно есть, я́ко вои́стину, блажи́ти Тя, Богоро́дицу, Присноблаже́нную и Пренепоро́чную, и Ма́терь Бо́га на́шего.
Боголюби́вая Цари́це, Неискусому́жная Де́во Богоро́дице Мари́е! Моли́ за ны Тебе́ Возлюби́вшаго и Ро́ждшагося от Тебе́ Сы́на Твоего́ Христа́ Бо́га на́шего, пода́ти нам оставле́ние прегре́шений, ми́рови мир, земли́ плодо́в изоби́лие, па́стырем святы́ню и всему́ челове́чу ро́ду спасе́ние. Гра́ды на́ша и страны́ Росси́йския от нахожде́ния иноплеме́нных заступи́ и от междоусо́бныя бра́ни сохрани́. О Ма́ти, Боголюби́вая Де́во! О Цари́це Всепе́тая! Ри́зою Твое́ю покры́й нас от вся́каго зла, от ви́димых и неви́димых враг защити́, и спаси́ ду́ши на́ша.
Де́ва днесь предстои́т Сы́ну, ру́це Свои́ к Нему́ простира́ющи, святы́й князь Андре́й ра́дуется, и с ним Росси́йская страна́ торжеству́ет, нас бо ра́ди мо́лит Богоро́дица Преве́чнаго Бо́га.
Велича́ем Тя, Пресвята́я Де́во, и чтим о́браз Твой святы́й, его́же благове́рный князь Андре́й даде́ нам на враги́ в побе́ду и всем ве́рным во спасе́ние.
Дне́сь, я́ко со́лнце пресве́тлое, возсия́ нам на возду́се всечестна́я ико́на Твоя́, Влады́чице, луча́ми ми́лости мир просвеща́ющи, ю́же вели́кая Росси́я, я́ко не́кий дар боже́ственный свы́ше благогове́йне восприи́мши, прославля́ет Тя, Богома́ти, всех Влады́чицу, и от Тебе́ ро́ждшагося Христа́ Бо́га на́шего велича́ет ра́достно. Ему́же моли́ся, о Госпоже́ Цари́це Богоро́дице, да сохрани́т вся гра́ды и страны́ христиа́нския невреди́мы от всех наве́т вра́жиих и спасе́т ве́рою покланя́ющихся Его́ Боже́ственному и Твоему́ пречи́стому о́бразу, Де́во Неискусобра́чная.
Притеце́м, лю́дие, к Де́ве Богоро́дице Цари́це, благодаря́ще Христа́ Бо́га, и к Тоя́ чудотво́рней ико́не, уми́льно взира́юще, припаде́м и возопие́м Ей: о Влады́чице Мари́е! Присети́вши страну́ сию́ Твоего́ честна́го о́браза явле́нием чуде́сно, спаса́й в ми́ре и благовре́менстве оте́чество на́ше и вся христи́аны, насле́дники показу́ющи небе́сныя жи́зни. Тебе́ бо ве́рно зове́м: ра́дуйся, Де́во, ми́ра спасе́ние.
Днесь всеми́рная ра́дость возсия́ нам ве́лия, дарова́ся Святе́й Горе́ Афо́нстей цельбоно́сная Твоя́, Влады́чице Богоро́дице, ико́на, со изображе́нием тричи́сленно и неразде́льно пречи́стых рук Твои́х, в прославле́ние Святы́я Тро́ицы, созыва́еши бо ве́рных и моля́щихся Тебе́ о сем позна́ти, я́ко двема́ Сы́на и Го́спода держи́ши, тре́тию же яви́ на прибе́жище и покро́в чту́щих Тя, от вся́ких напа́стей и бед избавля́ти, да вси, притека́ющии к Тебе́ ве́рою, прие́млют неоску́дно от всех зол свобожде́ние, от враго́в защище́ние. Сего́ ра́ди и мы вку́пе с Афо́ном вопие́м: ра́дуйся, Благода́тная, Госпо́дь с Тобо́ю.
Де́ва днесь благоволе́ние к нам явля́ет, гора́ же Афо́н благодаре́ние Ей прино́сит, Ангели и и́ноцы славосло́вят, Троеру́чица из Се́рбии чуде́сно путеше́ствует: нас бо ра́ди прии́де и всели́ся во святу́ю оби́тель Хиленда́рскую.
Велича́ем Тя, Пренепоро́чная Де́во, и чтим чудеса́ о́браза свята́го Твоего́, трех пречи́стых рук Твои́х явле́ние в сла́ву Божества́, в Тро́ице Бо́га на́шего.
Преблагослове́нная Де́во, Богороди́тельнице Чи́стая, у Креста́ Сы́на Твоего́ и Бо́га на́шего предстоя́щи, скорбь ве́лию претерпе́ла еси́ и благода́ть от Него́ прия́ла еси́ су́щия в ско́рбех утеша́ти. Те́мже на пречи́стый о́браз Твой благогове́йно взира́юще и изображе́нную Тя на нем пред Кресто́м Спа́са на́шего ви́дяще, умиле́нно к Тебе́ вопие́м: Засту́пнице усе́рдная, блага́я и ми́лостивая! Ускори́ изба́вити ны от вся́кия ско́рби, ну́жды и боле́зни и спаси́ ду́ши на́ша, да Тя со благодаре́нием сла́вим во ве́ки.
Притеце́м, ве́рнии, к благода́тному ми́лостей и щедро́т исто́чнику – чудотво́рному Пречи́стыя Де́вы о́бразу: сей бо нам свы́ше дарова́ся, душа́м и телесе́м во спасе́ние, ему́же покланя́ющеся с любо́вию, возопие́м к Богоро́дице: о Всепе́тая Ма́ти, о Цари́це Всеми́лостивая, покры́й и соблюди́ нас от вся́каго зла Твои́м к Бо́гу Ма́терним предста́тельством.
Предста́тельство стра́шное и непосты́дное, не пре́зри, Блага́я, моли́тв на́ших, Всепе́тая Богоро́дице, ми́лостивая ве́рных Домострои́тельнице, утверди́ правосла́вных жи́тельство, спаси́ страну́ на́шу и всех правосла́вно живу́щих в ней защити́, зане́ родила́ еси́ Бо́га, Еди́на Благослове́нная.
Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти, раби́ Твои́, Богоро́дице. Но, я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.
Пред свято́ю Твое́ю ико́ною, Влады́чице, моля́щиися исцеле́ний сподобля́ются, ве́ры и́стинныя позна́ние прие́млют и ага́рянская наше́ствия отража́ют. Те́мже и нам, к Тебе́ припа́дающим, грехо́в оставле́ние испроси́, по́мыслы благоче́стия сердца́ на́ша просвети́, и к Сы́ну Твоему́ моли́тву вознеси́ о спасе́нии душ на́ших.
Исто́чник исцеле́ний и ве́ры Правосла́вныя утвержде́ние Поча́евская Твоя́ ико́на, Богоро́дице, яви́ся; те́мже и нас, к ней притека́ющих, от бед и искуше́ний свободи́, Ла́вру твою́ невреди́му сохрани́, Правосла́вие во окре́ст стоя́щих стра́нах утверди́, и грехи́ разреши́ моли́твенник Твои́х: ели́ка бо хо́щеши, мо́жеши.
Велича́ем Тя, Пресвята́я Де́во, и почита́ем честну́ю ико́ну Твою́, ю́же от лет дре́вних на горе́ Поча́евстей просла́вила еси́.
К Богоpо́дице с умиле́нием пpипаде́м, вси гpехми́ обpемене́ннии, чудотво́pную Ея́ ико́ну
Умиле́ние облобыза́юще и вопию́ще со слеза́ми: Влады́чице, пpиими́ моле́ние недосто́йных pаб Твои́х и пода́ждь нам, пpося́щим, ве́лию Твою́ ми́лость.
Юже подража́я непло́дную смоко́вницу, аз, окая́нный, умиле́ния плода́ отню́д не приношу́ и посече́ния страшу́ся, но, взира́я к чудотво́рней ико́не Твое́й Умиле́ния, Влады́чице, стеню́ от се́рдца и вопию́: умили́ся, Благосе́рдая, и мне, окамене́нному се́рдцем, благоволи́ пода́ти душе́вное и серде́чное умиле́ние.
Днесь све́тло сия́ет на То́лге о́браз Твой, Пречи́стая Де́во Богоро́дице, и, я́ко со́лнце незаходи́мое, всегда́ ве́рным подаде́ся, его́же ви́дев на возду́се, неви́димо Ангелы, я́ко ники́м, держи́ма, преосвяще́нный епи́скоп гра́да Росто́ва Три́фон тече́ ко явле́нному светя́щемуся столпу́ о́гненну, и по вода́м, я́ко по су́ху, пре́йде, и моля́шеся Ти ве́рно о па́стве и о лю́дех. И мы, к Тебе́ притека́юще, зове́м: Пресвята́я Де́во Богоро́дице, ве́рно Тя сла́вящих спаса́й, страну́ на́шу, архиере́ев и вся Росси́йския наро́ды от всех бед избавля́й по вели́цей Твое́й ми́лости.
Чу́дное и богоприя́тное светоно́снаго зра́ка Твоего́ явле́ние, Пречи́стая Де́во, с ве́рою взира́ющим быва́ет изве́стное ча́яние спасе́ния, столпо́м бо о́гненным явля́ющи предста́тельство, неусы́пное и те́плое за ны к Бо́гу возсыла́еши моле́ние, и́мже страну́ Росси́йскую от вся́ких бед изба́ви, мо́лимся, да ра́достными усты́ вопие́м Ти вси́: ра́дуйся, Предводи́тельнице ве́чнаго блаже́нства.
На дре́ве кре́стнем яви́лася еси́, Пренепоро́чная Отрокови́це, от Царьгра́да и Ки́ева богоспаса́емому гра́ду Ми́нску ми́лость показа́вши.
Просвети́ нас, гре́шных, сия́нием Свои́м, яви́, я́ко при́сно, си́лу Свою́, спаси́ нас предста́тельством Свои́м и избавля́й от наве́т вра́жиих, Тя бо Необори́мую Сте́ну и еди́ну Наде́жду и́мамы.
Благода́рственная принося́ще Ти, раби́ Твои́, Богороди́тельнице, о всех, и́миже благоде́яла еси́ гра́ду на́шему, из глубины́ души́ взыва́ем Тебе́: не преста́ни, Влады́чице, Ма́терними к Сы́ну Твоему́ и Бо́гу на́шему моли́твами подава́ти вся блага́я и спаси́тельная всем, с ве́рою и любо́вию вопию́щим Ти: ра́дуйся, Де́во, христиа́н похвало́.
Умягчи́ на́ша злая сердца́, Богоро́дице, и напасти ненави́дящих нас угаси́ и вся́кую тесноту́ души́ на́шея разреши́, на Твой бо святы́й о́браз взира́юще, Твои́м сострада́нием и милосе́рдованием о нас умиля́емся и ра́ны Твоя́ лобыза́ем, стрел же на́ших, Тя терза́ющих, ужаса́емся. Не даждь нам, Ма́ти Благосе́рдая, в жестосе́рдии на́шем и от жестосе́рдия бли́жних поги́бнути, Ты бо еси́ вои́стину злых серде́ц умягче́ние.
Благода́тию Твое́ю, Влады́чице, умягчи́ сердца́ злоде́ев, низпосли́ благоде́телей, соблюда́ющи их от вся́каго зла, благомоля́щимся Ти усе́рдно пред честны́ми ико́нами Твои́ми.
Образом радостотво́рным честны́я Всецари́цы, жела́нием те́плым взыска́ющих благода́ти Твоея́, спаси́, Влады́чице; изба́ви от обстоя́ний к Тебе́ прибега́ющих; от вся́кия напа́сти огради́ ста́до Твое́, к заступле́нию Твоему́ взыва́ющее при́сно.
Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.
Засту́пнице ве́рных Преблага́я и Ско́рая, Пречи́стая Богоро́дице Де́во! Мо́лим Тя пред святы́м и чудотво́рным о́бразом Твои́м, да, я́коже дре́вле от него́ заступле́ние Твое́ гра́ду Москве́ дарова́ла еси́, та́ко и ны́не нас от вся́ких бед и напа́стей ми́лостивно изба́ви, и спаси́ ду́ши на́ша, я́ко Милосе́рдая.
В небе́сныя оби́тели пресели́вшаяся с пло́тию, су́щия на земли́ ника́коже оста́вила еси́, Богоро́дице, о́браз Боже́ственный и многочуде́сный пречи́стаго лица́ Твоего́ зре́ти лю́бящим Тя и покланя́тися дарова́ла еси́, я́ко зна́мение Твоея́ благода́ти; чтим его́, лобыза́юще.
Днесь све́тло красу́ется оби́тель Красного́рская, и с не́ю ликовству́ет Раи́фская пу́стыня, я́ко зарю́ со́лнечную, от восто́ка возсия́вшую, восприи́мши, Влады́чице, чудотво́рную Твою́ ико́ну, е́юже разгоня́еши мглу искуше́ний и бед от вопию́щих ве́рно: изба́ви оби́тель на́шу и вся страны́ христиа́нския от всех наве́т вра́жиих и спаси́ ду́ши на́ша, я́ко Милосе́рдная Засту́пница ро́да христиа́нскаго.
Тебе́, Избра́нней от всех ро́дов, Бо́жией Ма́тери, благода́рственная пе́ния прино́сим, прише́ствием честны́я Твоея́ ико́ны, раби́ Твои́, Богоро́дице, озаря́еми, но я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.
Засту́пнице от враг иноплеме́нных Необори́мая Калу́жския земли́, и Изба́вительнице от смертоно́сныя я́звы Ми́лостивая! Изба́ви рабы́ Твоя́ от вся́ких бед и боле́зней, с ве́рою и любо́вию прибега́ющия к чудотво́рней ико́не Твое́й, и спаси́ ду́ши на́ша.
Не и́мамы пе́сней, ниже́ слове́с, ка́ко досто́йно восхваля́ти Тя, Ма́ти Христа́ Бо́га на́шего, явле́ния ра́ди чудотво́рныя ико́ны Твоея́ земли́ Калу́жстей, то́кмо мо́жем вопи́ти Тебе́: не отврати́ ми́лости Твоея́ от нас, и ниспосли́ ю́ всем притека́ющим к цельбоно́сней ико́не Твое́й.
Иже во огни́ купины́ неопали́мыя, дре́вле Моисе́ем ви́денныя, та́йну воплоще́ния Своего́ от Неискусобра́чныя Де́вы Мари́и Прообразова́вый, Той и ны́не я́ко чуде́с Творе́ц и всея́ тва́ри Созда́тель ико́ну Ея́ святу́ю чудесы́ мно́гими просла́ви, дарова́в ю́ ве́рным во исцеле́ние неду́гом и в защище́ние от о́гненнаго запале́ния. Сего́ ра́ди вопие́м к Преблагослове́нней: Наде́ждо христиа́н, от лю́тых бед, огня́ и гро́ма изба́ви на Тя упова́ющия, и спаси́ ду́ши на́ша, я́ко Милосе́рда.
Предочи́стим чу́вствия душ и теле́с на́ших, да ви́дим та́инство Боже́ственное, о́бразно явле́нное дре́вле вели́кому во проро́цех Моисе́ю купино́ю, горе́вшею огне́м и не сгара́вшею, в не́йже Твоего́ безсе́меннаго рождества́, Богоро́дице, предвозвеще́ние испове́дуем и, благогове́йно покланя́ющеся Тебе́ и Ро́ждшемуся от Тебе́ Спа́су на́шему, со стра́хом вопие́м: ра́дуйся, Влады́чице, Покро́ве, и Прибе́жище, и Спасе́ние душ на́ших.
Яко Матери́нское благослове́ние дарова́ла еси́, Пречи́стая Де́во, пречу́дную ико́ну Твою́ правосла́вным отце́м на́шим на го́ру Хо́лмскую, та́ко и ны́не, презира́юще мно́жество грехопаде́ний на́ших, не оста́ви нас, о Всепе́тая Ма́ти, но пребу́ди с на́ми до сконча́ния ве́ка и отве́рзи нам ра́йския две́ри.
Пресвяте́й Де́ве Богоро́дице, ди́вными ико́нами Свои́ми, я́ко зве́здами, Це́рковь Правосла́вную украси́вшей и правосла́вным лю́дем земли́ Хо́лмския пречу́дный о́браз Свой дарова́вшей, благода́рственное воспева́ем пе́ние; Ты же, Пречи́стая, укрепи́ нас в Правосла́вной ве́ре, да зове́м Ти: ра́дуйся, Цари́це небесе́ и земли́, и лю́бящая Ма́ти всех, с ве́рою чту́щих Тя.
Необори́мая стена́ о́браз Твой и исто́чник чуде́с, я́коже дре́вле от него́ заступле́ние Твое́ гра́ду Пско́ву дарова́ла еси́, та́ко и ны́не нас от всех бед и скорбе́й ми́лостивно изба́ви и спаси́ ду́ши на́ша я́ко любвеоби́льная Ма́ти.
Пренепоро́чная Де́во, отображе́ние ли́ка Твоего́ чту́щих благода́рныя да́ры прие́млеши, живы́м и ме́ртвым помога́еши, град и страну́ на́шу спаса́еши, и пред Сы́на Твоего́ моли́твы прино́сиши, и спаса́еши всех нас.
Яко пресве́тлая звезда́, просия́ Боже́ственными чудесы́ святы́й Твой о́браз, Цели́тельнице, пода́ждь у́бо и нам, Богоро́дице Мари́е, исцеле́ние неду́гов душе́вных и теле́сных, спасе́ние и ве́лию ми́лость.
Избра́нной от всех родо́в Пресвяте́й Де́ве Богоро́дице, яви́вшейся иногда́ кли́рику боля́щу, во е́же исцели́ти его́ от боле́зни лю́тыя, похва́льная прино́сим пе́ния: Ты же, Всеми́лостивая Влады́чице, я́ко иму́щая де́ржаву непобеди́мую, от вся́ких бед и скорбе́й и боле́зней свободи́ ны, зову́щия Ти: ра́дуйся, Благода́тная, Цели́тельница душ и теле́с на́ших.
Твоего́ предста́тельства увере́ние и милосе́рдия Твоего́ явле́ние ико́на Иерусали́мская нам, Влады́чице, показа́ся. Пред не́ю же ду́ши на́ша в моли́тве излива́ем и ве́рою Тебе́ вопие́м: воззри́, Милосе́рдая, на лю́ди Твоя́, вся ско́рби на́ша и печа́ли утоли́, утеше́ние благо́е в сердца́ на́ша низпосли́ и спасе́ние ве́чное душа́м на́шим, Пречи́стая, испроси́.
Не отри́ни, о Милосе́рдая Ма́ти, слез и воздыха́ний на́ших, но, проше́ния на́ша ми́лостивно прии́мши, пред Иерусали́мскою ико́ною Твое́ю моля́щихся люде́й ве́ру укрепи́, умиле́нием сердца́ их испо́лни и крест земна́го жития́ нести́ им помози́, ели́ка бо хо́щеши, мо́жеши.
О, Пречи́стая Де́во Мари́е, Ма́ти Царя́ небеси́ и земли́, благоутро́бно призира́еши на лю́бящих Сы́на Твоего́, Христа́ Бо́га на́шего, и тружда́ющихся во и́мя Его́ ве́чнаго ра́ди спасе́ния, и подае́ши им вся оби́льно к наслажде́нию. Спори́тельнице су́щи хлебо́в им, избавля́я их вся́кия ну́жды и утесне́ния и устроя́я им, рабо́м Твои́м су́щим, избавле́ние ве́чныя му́ки и жизнь ве́чную.
Честно́е Жили́ще бы́вши неизрече́ннаго естества́ Боже́ственнаго, вы́ше сло́ва и па́че ума́, и гре́шным еси́ Спору́чница, подава́еши благода́ть и исцеле́ния я́ко Ма́ти всех Ца́рствующаго, моли́ Сы́на Твоего́ получи́ти нам ми́лость в День Су́дный.
Засту́пнице усе́рдная, Ма́ти Го́спода Вы́шняго, за всех мо́лиши Сы́на Твоего́, Христа́ Бо́га на́шего, и всем твори́ши спасти́ся, в держа́вный Твой покро́в прибега́ющим. Всех нас заступи́, о Госпоже́, Цари́це и Влады́чице, и́же в напа́стех и ско́рбех, и в боле́знех, обремене́нных грехи́ мно́гими, предстоя́щих и моля́щихся Тебе́ умиле́нною душе́ю и сокруше́нным се́рдцем пред пречи́стым Твои́м о́бразом со слеза́ми, и невозвра́тно наде́жду иму́щих на Тя, избавле́ния всех зол, всем поле́зная да́руй и вся спаси́, Богоро́дице Де́во: Ты бо еси́ Боже́ственный Покро́в рабо́м Твои́м.
Притеце́м, лю́дие, к ти́хому сему́ и до́брому приста́нищу, ско́рой Помо́щнице, гото́вому и те́плому спасе́нию, покро́ву Де́вы, ускори́м на моли́тву и потщи́мся на покая́ние: источа́ет бо нам неоску́дныя ми́лости Пречи́стая Богоро́дица, предваря́ет на по́мощь и избавля́ет от вели́ких бед и зол благонра́вныя и богобоя́щияся рабы́ Своя́.
Велича́ем Тя, Пресвята́я Де́во, и чтим о́браз Твой святы́й, от него́же истека́ет благода́тная по́мощь всем, с ве́рою притека́ющим к нему́.
Всех скорбя́щих Ра́досте, и оби́димых Засту́пнице, и а́лчущих Пита́тельнице, стра́нных Утеше́ние, обурева́емых Приста́нище, больны́х Посеще́ние, немощны́х Покро́ве и Засту́пнице, Же́зле ста́рости, Ма́ти Бо́га Вы́шняго Ты еси́, Пречи́стая: потщи́ся, мо́лимся, спасти́ся рабо́м Твои́м.
Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты нам помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.
К Богоpо́дице пpитеце́м, су́щии в беда́х, и святе́й ико́не Ея́ ны́не пpипаде́м, с ве́pою зову́ще из глубины́ души́: ско́pо на́ше услы́ши моле́ние, Де́во, я́ко Скоpопослу́шница наpе́кшаяся, Тебе́ бо pаби́ Твои́ в ну́ждах гото́вую Помо́щницу и́мамы.
В мо́ри жите́йстем обурева́емии, треволне́нию подпа́даем страсте́й и искуше́ний. Пода́ждь у́бо нам, Госпоже́, ру́ку по́мощи, я́коже Петро́ви Сын Твой, и ускори́ от бед изба́вити ны, да зове́м Ти: ра́дуйся, всеблага́я Скоропослу́шнице.
Войти с помощью соц. сетей: