Молитва восьмая,

чтомая в Высокогорской пустыни Нижегородской епархии

О Всемилостивая и Премилосердая Госпоже Царице Богородице! Ты еже восхощеши, о всем упросити можеши Сына Твоего, Христа Бога нашего. Приими убо моление мое, и не отрини от Твоего заступления мене паче всех человек грешнейшаго: подаждь ми свобождение от бед и скорбей, избави мене, Всепречистая, от видимых и невидимых враг и от злых человек клевещущих на мя, не попусти мне погибнути от глада, меча, труса, потопа и огня, и буди мне помощница неоскудна, яко да под Твоим кровом всегда сохранен буду и Твоим молением в страшный день суда неосужден предстану Сыну Твоему и Богу нашему, Емуже подобает слава и держава, со Безначальным Отцем и Святым Духом, ныне и в безконечныя веки веков. Аминь.

Молитва девятая,

чтомая в Вознесенском соборе града Самары

О Пресвятая Владычице Богородице, Богоизбранная Отроковице, всех скорбящих Радосте! Подаждь утешение нам в скорби сущим: отжени от нас печали, болезни, искушения и всякия напасти вражия. Услыши нас грешных, припадающих пред Твоею всечестною иконою с сокрушенным сердцем, и Твоим всесильным ходатайством сподоби нескончаемыя радости во Царствии Сына Твоего и Бога нашего во веки веков. Аминь.

Молитва десятая,

чтомая в церкви села Мурзиц Симбирской епархии

Владычице, Пресвятая Богородице, Небесная Царице, преизрядная Отроковице, ненадеющимся надеяние, болящим исцеление, сирым предстательнице, странным прибежище, нагим одеяние, скорбящим утешение и радосте, обидимым покровительнице и всем сущим в бедах и напастех скорое вспоможение и заступление! О Всемилостивая Госпоже Дево Богородице! Зриши беды наша, скорби и напасти: помози нам бедным и страждущим, печальным и унылым, скорбящим и отчаянным, отими от нас всякую печаль, управи нас яко странных. Обиды наша веси, Непорочная, и помощи нам, аще волиши, можеши. Не даждь убо, Госпоже, нам во отчаяние впасти, не имамы бо иныя помощи, разве Сына Твоего, Превечнаго Бога, Спаса Христа, и иныя предстательницы и утешительницы, разве Тебе, о Владычице, о Заступнице, о Дево Богоизбранная, о Царице всея твари, Голубице Пречестная. Темже на Твой пресвятый образ взирающе, со воздыханием и сокрушением сердца преклоняем главы и колена наша и молимся сице: призри благосердием, Всепетая Богородице, услыши, Преблагая, не отрини нас, но благоволи помиловати, и не отвержи наших воздыханий; никтоже бо притекаяй к Тебе посрамлен от Тебе исходит, но просит благодати и приемлет милость. Умоли, Госпоже Царице Владычице, Дево Марие, Превечнаго Бога, Господа и Спаса нашего Иисуса Христа, о всех нас с верою Тебе покланяющихся и молящихся: соблюди же во здравии, долгоденствии и благополучнем пребывании православный народ и весь род христианский, державу нашу миром огради и плодов земных изобилием обогати. Образ же сей лица Твоего да будет нам стена и забрало и утверждение, врагом же нашим страх и поражение, на него мы вси людие Твои взирающе, да приимем в недузех наших исцеление. Покрый же и избави нас от всякаго нахождения скорби и печали. Тебе молимся и мили ся деем, образ Твой святый целующе: помилуй, покрый и соблюди и огради Твоим заступлением, и настави ны на путь спасения в сем веце, в будущем вечныя изьми муки, яко благословена еси и препрославлена ныне, всегда и в безконечныя веки веков. Аминь.

Молитва одиннадцатая,

чтомая в той же церкви

О Пресвятая Госпоже, Владычице Дево Богородице, Небеснаго Царя Мати! Приими от нас приносимое Тебе сие малое похвальное пение, Ты бо еси святейшая всех святых Ангел и Архангел и всея твари честнейшая, ненадеющимся надеяние, болящим исцеление, сирым предстательница, странным прибежище, нагим одеяние, скорбящим утешение и радость, обидимым покровительница, и всем сущим в бедах и напастех скорое поможение и заступление. Темже святей Твоей иконе покланяющеся, молимся Тебе, умильно взывающе: Владычице Пресвятая, избави ны грешныя и недостойныя рабы Твоя от всяких бед, напастей, скорбей же и недугов, и настави нас на путь спасения в нынешнем веце, в будущем же изьми муки вечныя, и сподоби ны Небеснаго Царствия Сына Твоего и Бога нашего, яко благословися и прославися имя Твое во веки веков. Аминь.

Молитва двенадцатая

из книги молебных пений

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющимся пречистому и чудотворному образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных. Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и явися нам милосердая предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков. Аминь.

Молитва тринадцатая

из книги молебных пений

О Пресвятая Госпоже Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды и напасти, скорби и болезни и всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в бесконечныя веки веков. Аминь.