Войти в систему
Войти с помощью соц. сетей:
Днесь благовернии людие светло празднуем, осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим Покровом и избави нас от всякаго зла, молящи Сына Твоего, Христа Бога нашего, спасти души наша.
Дева днесь предстоит в церкви и с лики святых невидимо за ны молится Богу, Ангели со архиереи покланяются, апостоли же со пророки ликовствуют: нас бо ради молит Богородица Предвечнаго Бога.
Величаем Тя, Пресвятая Дево, и чтим Покров Твой святый: Тя бо виде святый Андрей на воздусе, за ны Христу молящуюся.
Величаем Тя, Пресвятая Дево, Мати Христа, Бога нашего, и всеславный славим Покров Твой.
Величаем Тя, Пресвятая Дево, Мати Христа, Бога нашего, Иже к Сыну Свои руце простирающи, и о мире молящися, и честным Своим омофором защищающи град и люди от врагов наших.
Пред иконой Пресвятой Богородицы Покрова молятся об избавлении от бед, о защите страны от врагов.
О великий угодниче, преславный чудотворче и обители твоея богодуховенный наставниче, Савво преблаженне, душею на небеси престолу всех Царя предстояй, телом же во святей обители сей почиваяй и различная чудеса повсюду молитвами твоими совершаяй! Призри милостивно на люди предстоящия и твоего ко Господу Богу ходатайства во обдержащих нуждах просящия: вси бо мы, по множеству грехов наших, не смеем ниже возвести очес наших на небо: ты же, яко стяжавый дерзновение, принеси за всех, ко честней раце твоей притекающих, теплыя молитвы ко Господу, еже избавитися нам от глада, потопа, труса, огня, меча и брани, от людей и от диавола бывающия, и от всякия душевныя и телсныя болезни: да сих избежавше и Господу, Емуже предстоиши, работающе, внидем в некончаемый покой и прославим тамо с тобою всех благих подателя Бога, всегда, ныне и присно и во веки веков. Аминь.
О преизящный и великий угодниче Господень Савво! Похваляем твоя славная чудотворения, прославляем житие твое святое. Никтоже возможет исчести терпение и подвиги твоя святыя: ты бо отечество и род твой оставил еси, в пустыню же достиг и ученики собрав, обитель святую основал еси, и в ней столп водрузив, на том подвизался еси, сохраняя словесное твое стадо: темже неправедно некогда нашедшия разбойники на обитель твою узрел еси, и единым жезла ударением сия устрашил еси. И ныне устраши, отче преподобне, вся враги возстающия на ны: помолися о христолюбивом Российском воинстве: умоли милостиваго Бога, да отпустит нам прегрешения наша и сподобит нас наслаждатися радости вечныя купно со всеми святыми, ныне и присно и во веки веков. Аминь.
От юности твоея весь Богу поработился еси, блаженне, и Того ради любве отечество и род оставил еси, в пустыню вселився и в ней жестокое житие показав, чудес дарования от Господа приял еси, Савво преподобне, моли Христа Бога спастися душам нашим.
Отечества, преподобне, удалився и вселився в пустыню, и тамо на столп вшед, идеже жестокое житие показал еси, и многих житием удивив, отнюдуже дарование чудес от Христа приял еси; поминай нас, чествующих память твою, да зовем ти: радуйся, Савво отче наш.
Ублажаем тя, преподобне отче Савво, и чтим святую память твою, наставниче монахов и собеседниче Ангелов.
Царице моя преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту, яко же волиши: яко не имам иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.
Днесь светло красуется Богоспасаемый град Псков и вся страна Российская пришествием Матери Бога Вышняго на избавление града сего от варварскаго пленения. Услыша плач и слезы раб Своих, скоро приклонися на мольбу к Сыну Своему и Богу нашему, и молением Своим гнев Божий укроти и весь мир просвети, и град сей от скорби на радость премени. О, дивному знамению, како Пресвятая Владычице прииде на воздусе в церковь Свою и на забрало града Пскова и призва угодников Своих, благоверных князей, и поноси в людех беззаконие. И Своею пречистою рукою указоваше на поганаго злаго варвара и его совет на разрушение. Возвеселися, Богоспасаемый граде Пскове и все Православие, имеюще такову Заступницу непобориму. Днесь притецем, вернии, в дом спасительный Владычицы Богородицы, светло празднуя, и ко святому Ея образу со слезами припадем, вопиюще и глаголюще: О Всемилостивая Госпоже Владычице Богородице, молися Сыну Своему Христу Богу нашему спасти православныя люди и град сей избавити от огненнаго запаления и от нахождения поганых и междоусобныя брани, и спасти души наша яко Милосердая.
Войти с помощью соц. сетей: