Молитва преподобным отцем, глаголемая при входе в пещеры или когда и где изволит Ближние пещеры (преподобного Антония)

из службы

Преподобнии и богоноснии отцы наши Печерстии, избегшии молвы житейскаго попечения и подвизавшиися в подземных (сих) жилищах, тесноту и тьму (зде) претерпевшии, и тем обретши широту небеснаго блаженнаго пространствия, и просветившиися немерцающим светом троическаго облистания, молите Бога о мне грешнем, да и аз утесняемый скорбьми, от мира сего находящими, и мраком грехов моих омраченный, получу от Него отпущение неправд моих и вселюся в вечную и блаженную жизнь в нескончаемом Его Царствии. Аминь.

Преподобне и богоносне отче наш Антоние Печерский, моли Бога о мне грешнем, да твоими молитвами спасет и помилует мя, да и просветит мя Своею благодатию.

Преподобне отче наш Прохоре, моли Бога о мне грешнем, да помилует мя недостойнаго.

Преподобне отче наш Иоанне, моли Бога о мне грешнем, да спасуся твоими молитвами.

Святая и праведная дево, княжно Иулиание, моли Бога о мне грешнем.

Преподобнии отцы наши Феодоре и Василие, молите Бога о мне грешнем, да дарует и мне вашими молитвами сию благодать, во еже подражати вашему дружелюбному житию, дабы жити ми в мире и любви со всеми ближними моими.

Преподобне отче наш Поликарпе, моли Бога о мне грешнем, да твоими молитвами сподоблюся получити от Него отпущение множества грехов моих.

Преподобне отче наш Варлааме, моли Бога о мне грешнем, во еже презрети ми вся благая и красная мира сего, да единаго Его приобрящу, сокровище живота моего неиждиваемое.

Преподобне отче наш Дамиане, моли Бога о мне грешнем, да твоими молитвами, во дни живота моего на земли избавлен буду от болезней душевных и телесных.

Преподобне отче наш Никодиме, моли Бога о мне грешнем, да сохранен буду от всякаго зла.

Преподобне отче наш Лаврентие, моли Бога о мне грешнем, да помилован буду на Страшнем Его суде.

Преподобне отче наш Афанасие, моли Бога о мне грешнем, да дарует ми покаяние во днех живота моего, да плачуся выну о гресех моих.

Преподобне отче наш Еразме, моли Бога о мне грешнем, да сподоблен буду поне при кончине живота моего принести Ему всецелое покаяние.

Преподобне отче наш Луко, моли Бога о мне грешнем, да сохранит мя Своею благодатию от всякаго навета сопротивнаго.

Преподобне отче наш Агапите, уврачуй мя твоими молитвами пред Богом, да буду здрав духом и телом моим.

Преподобнии отцы наши Иоанне и Феофиле, молите Бога о мне грешнем, да дарует ми смирение и память смертную.

Преподобне отче наш Кукшо, моли Бога о мне грешнем, да просветит мя Своею благодатию, во еже выну внимати ми Евангельским словесем.

Преподобне отче наш Нектарие, моли Бога о мне грешнем, да в чистоте сердца моего буду ходить пред Ним во вся дни живота моего.

Преподобне отче наш Алексие, моли Бога о мне грешнем, да помилует мя недостойнаго.

Преподобне отче наш Григорие, моли Бога о мне грешнем, да дарует ми выну неленостно бодрствовати духом, и поучатися в законе Его день и нощь.

Преподобне отче наш Сергие, моли Бога о мне грешнем, да сподобит мя быти тщаливым ко всякому благу и во всем послушливым божественным Его заповедем.

Преподобне отче наш Савво, моли Бога о мне грешнем, да твоими молитвами избавлюся от многих моих беззаконий.

Святителю отче наш Меркурие, моли Бога о мне грешнем, да твоими молитвами избавлюся от множества моих прегрешений.

Преподобне отче наш Пимене, моли Бога о мне грешнем, да дарует ми терпение в злостраданиих моих.

Преподобне отче наш Несторе, моли Бога о мне грешнем, да буду вписан в книгу вечнаго живота, сущаго в Царствии Небеснем.

Преподобне отче наш Евстратие, моли Бога о мне грешнем, да поможет ми распятися Ему со страстьми и похотьми моими, иже присно борют мя и выну воюют на душу мою.

Преподобне отче наш Елладие, моли Бога о мне грешнем, да помилует мя недостойнаго.

Преподобне отче наш Иеремие, моли Бога о мне грешнем, да буду яве видети моя прегрешения.

Преподобне отче наш Моисее, моли Бога о мне грешнем, да дарует ми чистоту душевную и целомудрие.

Преподобне отче наш Иоанне, моли Бога о мне грешнем, да поможет ми отвращитися от блудных страстей плоти моея, да даст ми презрети вся красная мира сего, да единаго Его возлюблю и единому Ему да послужу.

Преподобне отче наш Марко, моли Бога о мне грешнем, да дарует ми память о загробном животе моем.

Преподобне отче наш Григорие, моли Бога о мне грешнем, да сподобит мя скончати житие мое безгрешно и с покаянием.

Преподобне отче наш Онисиме, моли Бога о мне грешнем, да сохранен буду твоими молитвами от всякаго злаго обстояния.

Преподобие отче наш Матфее, моли Бога о мне грешнем, да спасуся твоими молитвами.

Преподобне отче наш Исаие, моли Бога о мне грешнем, да твоими молитвами спасет и помилует мя недостойнаго.

Преподобне отче наш Авраамие, моли Бога о мне грешнем, да возлюблю и аз трудолюбие и подвиг духовный, якоже возлюбил еси некогда ты.

Святителю отче наш Нифонте, моли Бога о мне грешнем, да сподобит мя Царствия Своего Небеснаго.

Преподобне отче наш Сильвестре, моли Бога о мне грешнем.

Преподобне отче наш Макарие, моли Бога о мне грешнем.

Преподобне отче наш Пимене, моли Бога о мне грешнем.

Преподобие отче наш Онуфрие, моли Бога о мне грешнем, да положит хранение устом моим.

Преподобие отче наш Анатолие, моли Бога о мне грешнем, да помилует мя недостойнаго.

Преподобие отче наш Спиридоне, моли Бога о мне грешнем, да простит моя согрешения.

Преподобне отче наш Сисое, моли Бога о мне грешнем, да спасуся твоими молитвами.

Преподобие отче наш Феофиле, моли Бога о мне грешнем.

Преподобие отче наш Арефо, моли Бога о мне грешнем.

Преподобие отче наш Алипие, моли Бога о мне грешнем, да обновятся во мне зраки Его образа.

Преподобие отче наш Онисифоре, моли Бога о мне грешнем.

Святителю отче наш Симоне, моли Бога о мне грешнем, да буду вписан в книгу вечныя жизни.

Преподобие отче наш Никоне, моли Бога о мне грешнем, да помилует мя недостойнаго, и сохранит мя Своею благодатию от всякаго прилога диавольскаго.

Преподобне отче наш Феофане, моли Бога о мне грешнем, да дарует ми выну приносите Ему покаяние.

Преподобне отче наш Анастасие, моли Бога о мне грешнем, да помилует мя недостойнаго, и Своею благодатию да покрыет моя согрешения.

Преподобнии отцы наши Дванадесять братии о Христе, молите Бога о мне грешнем, да сотворит мя храмом Своего обиталища и спасет мя недостойнаго.

Преподобне отче наш Авраамие, моли Бога о мне грешнем.

Преподобне отче наш Исаакие, моли Бога о мне грешнем, да сохранит мя от борителя демона, иже присно воюет на душу мою.

Преподобне отче наш Илие, моли Бога о мне грешнем, да помилует и спасет мя, недостойнаго раба Своего.

Святый мучениче, младенче Иоанне, пострадавши за Христа, моли Бога о мне грешнем, да буду и аз причастник Небесныя Славы и Царствия Его.

Преподобие отче наш Никоне, моли Бога о мне грешнем, да дарует ми благодать терпеливо переносити злострадания, от мира сего находящия.

Святителю отче наш Ефреме, выну поминай мя пред Богом, да помилует и спасет мя недостойнаго, и введет мя во ограду избраннаго Своего стада.

Преподобне отче наш Тите, моли Бога о мне грешнем, да даст ми благодать во еже не гневатися ми ни на когоже, но с любовию прощати обидевших мя.