Молитва вторая

из акафиста

О святии праведницы, Богоотцы Иоакиме и Анно! Молите Милосердаго Господа, яко да отвратит от нас гнев Свой, по делом нашим праведно на ны движимый, и да безчисленная прегрешения наша презрев, обратит нас, раб Божиих (имена), на путь покаяния, и на стезе заповедей Своих да утвердит нас. Таже молитвами вашими в мире жизнь нашу сохраните, и во всех благих благое поспешение испросите, вся к животу и благочестию потребная нам от Бога дарующе, от всяких напастей и бед и внезапныя смерти предстательством вашим нас избавляюще и от всех враг видимых и невидимых защищающе, и тако в мире временное сие житие прешедше, в вечный достигнем покой, идеже вашим святым умолением да сподобимся Небеснаго Царствия Христа Бога нашего, Емуже, со Отцем и Пресвятым Духом, подобает всякая слава, честь и поклонение во веки веков. Аминь.

Тропарь Богоотцам Иоакиму и Анне, глас 2

Праведных Твоих Иоакима и Анны, Господи, память празднующе, теми молим Тя: спаси души наша.

Ин тропарь, глас 1

Иже в законней благодати праведни бывше, Младенца богоданнаго породиша нам, Иоаким и Анна. Темже днесь светло торжествует, весело празднующи, Божественная Церковь, честную вашу память, славящи Бога, воздвигшаго рог спасения нам в дому Давидове.

Кондак, глас 2

Радуется ныне Анна, неплодства разрешившися соуз, и питает Пречистую, созывающи вся воспети Даровавшаго от чрева ея человеком едину Матерь и Неискусомужную.

Величание

Величаем вас, святии праведнии Иоакиме и Анно, и чтим святую память вашу, вы бо молите за нас Христа Бога нашего.

Праведным Иоакиму и Анне молятся о разрешении от бесчадия и неплодства, о покровительстве посевам и о плодородии.

Молитвы святителю Феодосию, архиепископу Черниговскому

Молитва первая

из книги молебных пений

О священная главо, крепкий наш молитвенниче и заступниче, святителю Феодосие! Услыши нас, с верою призывающих тя и усердно припадающих к раце честных и многоцелебных мощей твоих (или: ко святей иконе твоей), поминай нас у престола Вседержителева и не престай моляся о нас ко Христу Богу: тебе бо дадеся благодать молитися за ны. Испроси предстательством твоим у Всемилостиваго Бога нашего мир Церкви Его, пастырем ея силу ревностно подвизатися о спасении людей. Умоли Небеснаго Отца и всем нам подати дар коемуждо благопотребен, веру истинную, надежду твердую и любовь неоскудевающую, градов наших утверждение, мира умирение, от глада и пагубы избавление, от нашествия иноплеменников сохранение, юным и младенцем благое в вере возрастание, старым и немощным утешение и подкрепление, болящим исцеление, сиротам и вдовицам милость и заступление, заблуждшим исправление, бедствующим благовременную помощь, и всех управи в мире и покаянии непостыдно скончати житие свое и Царствия Небеснаго наследники быти, идеже ты ныне водворяешися со ангелы и всеми святыми, прославляя Бога в Троице славимаго, Отца и Сына и Святаго Духа, во веки веков. Аминь.

Молитва вторая,

чтомая в Разрытовском Свято-Троицком Покровском монастыре Черниговской епархии

Пастырю добрый стада Христова, святителю отче наш Феодосие! Припадающе ко святым и многоцелебным мощем твоим (или: ко святей иконе твоей), молим тя с верою и любовию: буди нам помощник и покровитель в житии сем земнем многоскорбнем и многомятежнем, руководствуя нас невидимо к верному исполнению заповедей Христовых и стяжанию добродетелей евангельских, нужных ко спасению душевному нашему. Буди заступник и хранитель отечеству нашему. Буди предстатель и граду твоему, в немже святыми мощами твоими почивати благоизволил еси, и всем нам к тебе усердно притекающим и тя на помощь призывающим, ограждая нас покровом молитв твоих от всяких бед и скорбей и болезней и даруя нам вся яже на пользу душ и телес наших. Ей, чудотворче святый и милостивый! Веруем несомненно, яко вся сия можеши нам испросити у Великодаровитаго Бога нашего и яко мощно есть предстательство твое пред лицем Его. Сего ради просим тя: умоли Его благость за ны грешныя и недостойныя, и подаждь нам твое святое архипастырское благословение, да оным осеняеми, тихое и богоугодное житие поживем, благую христианскую кончину получити сподобимся и вкупе с тобою Царствие Небесное наследуем, славяще великое милосердие Отца и Сына и Святаго Духа, в Троице славимаго и покланяемаго Бога, и твое святое заступление, во веки веков. Аминь.

Тропарь святителю Феодосию, архиепископу Черниговскому, глас 4

Преудобрен во архиереех, святителю Феодосие, был еси светило своему стаду, таже преставился еси в вечныя обители. Умоли у престола Царя Славы избавитися нам от находящих на ны зол и спастися душам нашим, святе, молитвами твоими.

Кондак, глас 4

Пастырей Начальнику Христу трудился еси, святителю Феодосие, на пажити духовней словесныя твоя овцы питая, и целебен дар от Христа Спаса приял еси, во еже немощи душевныя и телесныя целити всех с верою к тебе приходящих. Темже и ныне, святе, молися всем имя твое призывающим от наветов вражиих спастися и помиловатися душам нашим.