Молитва третья

из книги молебных пений

О Пресвятая Владычице Богородице! Призри с благосердием на моления нас грешных и смиренных рабов Твоих, и умоли Бога Сына Твоего, да низпослет нам и всем притекающим к Тебе здравие душевное и телесное и вся к вечней и временней жизни потребная, да простит нам всякое прегрешение вольное и невольное, да избавит нас от всяких скорбей и болезней, и напастей, и всякаго злаго обстояния. Ей, Царице наша Преблагая, Надеждо наша несокрушимая и Заступнице необоримая! Не отврати лица Твоего от нас за множество прегрешений наших, но простри нам руце Матерняго милосердия Твоего и сотвори с нами знамение во благо. Яви нам богатую помощь Твою и благопоспеши во всяком деле блазе, от всякаго же начинания греховнаго и помышления лукаваго отврати нас, да всегда славим Пречестное имя Твое, и благодарне честному и чудотворному образу Твоему покланяющеся, величаем Бога Отца, и Единароднаго Сына Его, Господа нашего Иисуса Христа, и Святаго Духа, со всеми святыми, во веки веков. Аминь.

Молитва четвертая,

чтомая в Новгородском Знаменском соборе

Пресвятая Дево, Мати Господа нашего, Царице Небесе и земли! С верою и любовию пречистому образу Твоему покланяющеся, молим Тя: якоже отцем нашим многажды в скорбех и напастех помощь Твою явила еси, тако и нас грешных сподоби Твоего Матерняго покрова и заступления. Се вси мы, страстьми обуреваеми и грехми потопляеми, вечныя казни достойни есмы. Но на милость Твою уповающе, со слезами взываем Ти, о Мати всех скорбящих и обремененных, избави нас от падений греховных, от козней лукаваго, от навета злых человек и всяких бед, утоли наша скорби и печали, болезни наша уврачуй, даруй нам прочее время жития нашего в мире и покаянии скончати, и на страшнем суде Сына Твоего явися нам милосердая Заступница, да вси поем и величаем Тя со всеми благоугодившими Богу всегда, ныне и присно и во веки веков. Аминь.

Молитва пятая,

чтомая в том же соборе

О Пресвятая Госпоже Владычице Богородице! С верою и любовию припадающе пред чудотворною и многоцелебною иконою Твоею, еюже дивную победу на сопротивныя граду Твоему даровала еси, молим Тя: якоже древле отцем нашим на помощь ускорила еси, тако и нас немощных и грешных сподоби Твоего Матерняго заступления. Не отврати лица Твоего от притекающих к Тебе, умоли, Премилосердая Мати, Сына Твоего и Бога нашего, да сохранит под кровом Своим страну нашу, тишину и благочестие, Церковь же Свою Святую непоколебиму да соблюдет, и от неверия, ересей и раскола да избавит. Не имамы бо иныя помощи, не имамы инаго предстательства, разве Тебе, Пресвятая Дево. Темже град Твой и всю страну православную и вся ны сохрани от глада, губительства, труса, потопа, огня, междоусобныя брани, от тлетворных ветр и от смертоносныя язвы, даруй нам воздуха благорастворение и земли плодоносие. Спаси и помилуй, Госпоже, во всякой беде и нужде сущия, скорбящия утеши, малодушныя укрепи, страждущия различными недуги уврачуй, стужаемыя от духов нечистых свободи, обидимыя от обид избави. Помяни рабы Твоя и не презри слез и воздыхания нашего. Умилостивися, Владычице, на немощныя люди Твоя, рассеянныя собери, заблуждшия на путь правый настави, старость поддержи, юныя уцеломудри. Изряднее же спаси и защити нас, Владычице, от всех козней лукаваго и от всех навет вражиих, укрепи немощную волю нашу к деланию Заповедей Божиих, умягчи окаменение сердец наших, даруй нам дух сокрушения, смирение сердца, чистоту помышлений и греховныя жизни исправление, да от греховныя скверны очистившеся, сподобимся мирныя христианския кончины и добраго ответа на страшнем суде Сына Твоего. Ей, Всемилостивая Госпоже! И в страшный час смерти яви нам многомощное Твое заступление, ускори тогда на помощь нам безпомощным и державною рукою Твоею исхити нас из власти лютаго миродержца, преставльшияся же во благочестии от жития сего отцы и братию нашу в вечней жизни со агнелы и со всеми святыми жити сотвори. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе и Твоея святыя помощи просящих. Темже на чудный образ Твой благоговейно взирающе, и пред ним яко живей Ти сущей, со умилением припадающе, Тебе всю жизнь нашу по Христе Бозе предаем, ныне и присно и во веки веков. Аминь.

Молитва шестая,

чтомая в Симеоновской церкви града Рязани

О Пресвятая Владычице Богородице, Небеснаго Царя Мати, Богоизбранная Отроковице, ненадежных надеяние, больных исцеление, сирым предстательнице, скорбящим утешение и радость, обидимым покровительнице и всем в бедах и напастех сущим скорое поможение и заступление! Помози, о Мати Божия, и нам грешным в скорби нашей, возвесели радостию сердца людей Твоих, управи в мире и тишине жизнь нашу, и не даждь нам во отчаяние впасти. Ты бо едина еси паче всех святых и паче всех горних умов Предстательница наша к Богу, яко Всеблагаго Царя Благая Мати. Темже мы грешнии, на пречистый Твой образ знамения взирающе, умиленно преклоняем колена, и благоговейно лобызающе, молим Тя, Благосердая Мати: не отрини смиреннаго моления нашего и яви нам знамение милости Твоея, никтоже бо, к Тебе прибегая со упованием, исходит от Тебе посрамлен, но просит благодати и преемлет дар к полезному прошению, прославляя Сына Твоего и Бога, и Тебе с Ним, во веки веков. Аминь.

Молитва седьмая

из Часослова

О Пресвятая Госпоже Владычице Богородице! Вышши еси всех Ангел и Архангел и всея твари честнейши, помощница еси обидимых, ненадеющихся надеяние, убогих заступница, печальных утешение, алчущих кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй страну нашу, преосвященныя митрополиты, архиепископы и епископы, и весь священнический и иноческий чин, военачальники, градоначальники и христолюбивое воинство, и доброхоты, и вся православныя христианы ризою Твоею честною защити, и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным Христианом, и просвети им ум и очи сердечныя, еже ко спасению, и сподоби ны, грешныя рабы Твоя, Царствия Сына Твоего, Христа Бога нашего, яко Держава Его благословена и препрославлена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.