Войти в систему
Войти с помощью соц. сетей:
О преславнии, святии и многострадальнии мученицы Христовы Кириче и Иулитто, цвети прекраснии и благовоннии блаженнаго рая, Ангелом собеседницы и купножителие, с нимиже удостоистеся ныне пети трисвятую песнь пред престолом Агнца, вземлющаго грех всего мира, Господа Бога и Спаса нашего Иисуса Христа, Иже нас ради на крестнем олтари волею Своею душу Свою положити благоизволил есть! Услышите ны, грешныя и недостойныя рабы, во всечестнем храме сем молящияся и святую многострадальную память вашу празднующия. Испросите нам у Господа многомощными молитвами вашими благодать, яже ко спасению, и всех грехов содеянных нами прощение, земли благоплодие, миру мирное устроение и от лютых диавольских козней свобождение, христианскую кончину жития нашего и немятежное чрез воздушныя мытарства к небеси прехождение: вы бо прияли есте благодать сию от Господа, еже молитися за ны, и аще восхощете помиловати нас, почитающих священную память вашу, вся можете сотворити. Не презрите убо нас недостойных, святии мученицы Кириче, трилетный незлобивый агнче, со многострадальною твоею материю, святою Иулиттою. Испросите от Господа вся благая и полезная душам нашим, яко да и мы удостоимся купно с вами славити и воспевати всесвятое и великолепое имя Его во премирнем Царствии Небеснем, идеже есть всех святых жилище, во веки веков. Аминь.
О преславнии и богомудрии страстотерпцы Христовы, святии мученицы Кириче и Иулитто! Вемы, яко, молитв ради ваших о нас грешных, Человеколюбец Господь, восхотев даровати людем благодать неоскудных исцелений и неизсякаемых благ духовных источник, благоволи и сию чудотворную, от лет древних сущую икону вашу пречестне прославити. Того ради и мы грешнии, к цельбоносней святыни сей припадающе, многомощное предстательство ваше, о страстотерпцы, воспеваем, и крепкое заступление о нас грешных славяще, смиренно вас молим и со слезами взываем сице: вы, истиннии ходатаи спасения нашего суще, всем нам в помощь предстаните и избавите нас от недугов и болезней, от глада и огня, от нечаянныя смерти и смертоносныя язвы и от всякаго зла; отжените от нас мысленнаго губителя змия, ищуща поглотити и свести во ад души наша; оградите нас от искушений и соблазнов мира сего; утвердите сердца наша во смирении, кротости, послушании, в безмолвии же и в воздержании, в терпении и непамятозлобии и любви, яже о Христе Иисусе Господе нашем; нас же, во обители живущих, во всех подвизех иноческих утвердите. Вы есте сосуди, благодати Божия исполненнии: осиявайте убо нас, наветы вражиими омраченных, светом благодати свыше просвещающе, да в нем ходяще, не преткнем о камень ног наших. Вы есте врачеве благодатнии, исцеляющии всяк недуг и всяку язю в людех: исцелите убо и наша недуги и телесныя язвы, да достойно прославим Бога в душах и телесех наших. Вы есте радование Вышняго: вы достославнии воини Царя Небеснаго, вы благоприятная жертва Богу, вы граждане новаго Иерусалима, вы наследницы Царствия Небеснаго. Молим убо вас усердно мы недостойнии, да и нам благое течение в пути заповедей Господних подадите и желаемая получити нас сподобите. Паче же сохраняйте в мире, здравии и долгоденствии православныя христианы, яко да благочестно и безпечально поживше на земли, с миром в вечный покой достигнем, идеже сподобимся Небеснаго Царствия Христа Бога нашего, Емуже всякая слава подобает со Отцем и Святым Духом, ныне и присно и во веки веков. Аминь.
Яко лоза благоплодная, Иулитто честная, грозд зрел принесла еси Цареви, всех Богу, сына твоего Кирика славнаго, мучением того богатно украсивши и твоею кровию навершивши, тем и дарова тебе Вышний возмездие в Вышних, идеже ликующе, помяните нас, мученицы терпеливодушнии.
Во обятиях носящи христомученица Иулитта Кирика, на подвизе мужески веселящися взываше: Христос есть мучеников Похвала.
Жертва приятна, Богови приносима, и свидетель верен Христов являемь, с материю пострадал еси Иулиттою, Кириче славне, с неюже Христа Бога молити не престай о всех нас.
Величаем вас, страстотерпцы святии Кириче и Иулитто, и чтим честная страдания ваша, яже за Христа претерпели есте.
О великий и преславный угодниче Божий, богоизбранный и богопрославленный, равноапостольный княже Владимире, святое и великодейственное орудие Всеблагаго Промысла о спасении народа Российскаго! Ты отринул еси зловерие и нечестие языческое, уверовал еси во Единаго Истиннаго Триипостаснаго Бога и, восприняв Святое Крещение, просветил еси светом божественныя веры и благочестия царство Российское. Славяще убо и благодаряще Премилосердаго Творца и Спасителя нашего, славим и благодарим и тя, великий пастырю и отче наш, яко тобою познахом спасительную веру Христову, и крестихомся во имя Пресвятыя и Пребожественныя Троицы; тоюже верою избавихомся от праведнаго осуждения Божия, вечнаго рабства диаволя и адова мучительства; тою верою восприяхом благодать всыновления Богу и надежду наследования небеснаго блаженства. Ты еси первейший наш вождь к Начальнику и Совершителю нашего вечнаго спасения, Господу Иисусу Христу; ты еси ближайший предстоятель пред престолом Царя царствующих и теплый молитвенник и ходатай о царстве Всероссийстем, о царех его, народоправителех и о всех людех; ты еси первейший виновник благословений и милостей Божиих, почивающих на нем. И что еще речем? Не может язык наш изобразити величие и высоту благодеяний твоих, излиянных на нас, недостойных. Но, о неразумия и ослепления нашего! Приемши толикия благодеяния, ни во что же вменихом я и отщетихомся спасительных плодов их. Омывшеся бо от греха в купели Крещения и облекшеся в одежду чистоты и невинности, осквернихом сию богоданную одежду студными деяньми и помышленьми нашими; отрекшеся сатаны и аггелов его, паки порабощаемся ему, служаще идолам страстей наших, миру, плоти и злым обычаем века: сочетавшеся Христу, выну оскорбляем Его беззаконьми нашими, многообразными язвами гордости, зависти, злобы, злословия, невоздержания и презорства ко святей Церкви; прилепихомся всецело к суетным благам, аки мняще вовеки пребывати на земли; не помышляем о небе, о душе, о смерти, о суде, о нескончаемей вечности. Сего ради воздвизаем на ся праведный гнев и осуждение Божие, купно же оскорбляем и преогорчеваем твою отчую любовь и попечение о нас: ты бо просветил еси нас Святым Крещением, во еже способствовати нам к получению небеснаго блаженства и земнаго благоденствия; мы же, неразумнии, злым произволением нашим сами себе подвергаем адовым мукам и временным бедствиям! Но, о всеблагий отче и просветителю наш! Милостив буди к нашим немощем, долготерпелив ко грехам и неправдам нашим: умоли Премилосердаго Царя Небеснаго, да не прогневается на ны зело и не погубит нас со беззаконьми нашими, но да помилует и спасет нас, имиже весть судьбами, да всадит в сердце наше спасительный страх Свой, да просветит Своею благодатию ум наш, во еже узрети нам бездну погибели, в нюже стремимся, оставити стези нечестия и заблуждений, обратитися же на путь спасения и истины, неуклонно исполняти заповеди Божии и уставы святыя Церкве. Моли, благосерде, Человеколюбца Бога, да явит нам великую милость Свою, да избавит нас от нашествия иноплеменников, от внутренних нестроений, мятежей и раздоров, от глада, смертоносных болезней и от всякаго зла; да подаст нам благорастворение воздуха и плодоносие земли; да сохранит в судящих и начальствующих правду и милость; да даст духовным пастырем непорочность жития и ревность о спасении пасомых, всем же людем усердие в исполнении своих обязанностей, взаимную любовь и единомыслие, стремление ко благу отечества и святыя Церкве; да распространит свет спасительныя веры в царстве нашем во всех концах его; да обратит к правоверию неверующих; да упразднит вся ереси и расколы; да, тако поживше в мире на земли, сподобимся с тобою вечнаго блаженства, хваляще и превозносяще Бога во веки веков. Аминь.
Войти с помощью соц. сетей: