Молитва вторая

из тойже службы

О святителю Германе, великий угодниче Христов, обители сея богомудрый основателю, монашествующих наставниче и града сего недремлемый блюстителю, святою душею твоею на небеси престолу Святыя Троицы предстояй, нетленным же телом зде во обители твоей почиваяй и многоразличная чудеса молитвами твоими совершаяй! Призри на ны и на вся люди, к цельбоносному твоему гробу притекающия и твоего ко Господу ходатайства во обдержащих нуждах просящия. Понеже мы, по множеству грехов наших, не точию недостойни принести со дерзновением молебный глас, но ниже возвести очес наших на небо: ты же, яко стяжавый дерзновение, принеси за всех, к честней раце твоей приходящих, теплыя молитвы ко Господу, еже избавитися нам от глада, потопа, труса, огня, меча, брани, от людей и диавола бывающия, и от всякия душевныя и телесныя болезни: да избавльшеся сих и работающе Господу, Емуже предстоиши, внидем в некончаемый покой и вкупе с тобою прославим всех благих Подателя Бога, всегда, ныне и присно и во веки веков. Аминь.

Молитва третья

из той же службы

О великий угодниче Христов, Германе, теплый о нас ко Господу молитвенниче, всем притекающим к тебе во скорбех предстателю, испроси нам помощь в немощех, утешение в скорбех, здравие в недузех душевных и телесных; умоли Господа даровати нам оставление во всех, елика согрешихом от юности нашей в житии сем делом, словом, помышлением и всеми нашими чувствы, и при кончине нашей испроси нам время покаяния, да, предваривше искренним исповеданием грехов и очищением совести исход душ наших, безбедно прейдем воздушныя мытарства и избавимся осуждения и муки, милостию Безначальнаго Отца, благодатию Собезначальнаго Сына и освящением Присносущаго Духа. Аминь.

Молитва четвертая,

чтомая при несправедливых гонениях, притеснениях

О великий угодниче Христов Германе! Испроси нам, рабам Божиим (имена), у Господа помощь в немощех, утешение в скорбех, здравие в недузех душевных и телесных; умоли Его даровати нам оставление всех, елика согрешихом от юности нашея в житии сем, и при кончине нашей испроси нам время покаяния, да искренним исповеданием грехов сию предваривше, безбедно прейдем воздушныя мытарства и избавимся от осуждения и муки, милостию Безначальнаго Отца, благодатию Собезначальнаго Сына и освящением Присносущнаго Духа, во веки веков. Аминь.

Тропарь святителю Герману, архиепископу Казанскому, глас 4

От юности иго Христово усердно восприим, бденными подвиги поста и молитвы прославился еси. Отонудуже призывающу тя Богу на служение Церкви в новопросвещеннем царстве Казанстем, вкупе со святителем Гурием воззван был еси, идеже яко первоначальник созданной тобою во граде Свияжске обители и достойный первосвятителю преемник явился еси. Духом предстоя престолу Владычню, молися, святителю Германе, со святителем Гурием православней пастве во благочестии преспевати, тме иноверия светом веры разгнатися.

Ин тропарь, глас тойже

Яко великим пастырем единонравна и учителем вселенныя единомысленна, Церкве Божия служителя усердна, и строителя таин Христовых благоговейна, стекшеся благовернии людие Свияжския обители Богомудраго основателя и Казанския новопросвещенныя паствы святителя Германа песньми и пении восхвалим, глаголюще: не престай присещати молитвами твоими на всю паству твою, в вере и благочестии блюди невредимо.

Кондак, глас тойже

Доблестями преподобия и правды, врученное тебе словесное стадо озаряя, и на злачных слова Христова пажитях питая, на правый путь заповедей Господних силою духа твоего наставлял еси е. Темже и ныне осеняемой цельбоносными чудотворении твоими, в святую память, зовем тебе: не престай, святителю, предстательствовати пред Пастыреначальником о стаде твоем, яко паствы твоея утверждение и сущим по тебе святителем удобрение.

Величание

Величаем тя, святителю отче Германе, и чтим святую память твою, ты бо молиши за нас Христа Бога нашего.

Молитва ко Пресвятой Богородице пред Ее иконою «Умиление» Псково-Печерской

из акафиста

О Преблагословенная Дево Богородице! Мати всех страждущих и болезнующих сердцем! Страны нашея и града Защитнице! Обители Псково-Печерския красото и славо! Призри на нас, смиренных, обремененных грехми многими, отягченных скорбьми и печалями, и с сокрушением и слезами взирающих на пречистый лик Твой, в чудотворней иконе явленный. Сохрани от всякаго зла святую обитель сию, юже преподобный Корнилий со старцы Марком и Ионою Тебе вручи и всех в вере и надежде подвизающихся в ней. Спаси и град сей, и вся люди, правоверно живущия и к Тебе прибегающия, от нашествия иноплеменных, от всякаго страха и труса, от мора и глада, от злых человек и всяческой скорби. Приникни к нам милосердием Твоим, яко ликом Твоим Божественным любезно приникла еси к ланите Богомладенца. Согрей нас дыханием Твоея любве и никогдаже отступай от нас, ни в сей жизни, ни в будущей, да чающе Твою всесильную Материнскую помощь, сподобимся безбедно дойти вечныя жизни и прославлять Небеснаго Отца и Сына и Святаго Духа в Троице славимаго Бога, во веки веков. Аминь.

Тропарь Божией Матери ради иконы Ее «Умиление» Псково-Печерской, глас 4

Днесь светло красуется обитель сия, яко зарю солнечную восприимши, Владычице, чудотворную Твою икону, к нейже мы ныне притекающе и молящеся Тебе, взываем сице: о Пречудная Владычице Богородице! Молися из Тебе воплощенному Христу Богу нашему, да избавит обитель сию и вся грады и страны христианския невредимы от всех навет вражиих и спасет души наша, яко Милосерд.