Молитва третья

из древней рукописной службы

Всечестная Владычице Богородице! Ты непрестанно руце Твои к Рождшемуся из Тебе плотию нашего ради спасения простираеши. Мы же грешнии Тя всегда воспеваем, и Заступницу всему миру исповедуем, и Твое рождество славим. Днесь убо Тебе молимся и к Тебе прибегаем, иныя Помощницы паче Тебе, Владычице, не ведуще. Дерзновение имущи всегда, моли, Госпоже, о нас Сына Твоего, Христа Бога нашего, да покровени будем десницею Вышняго Содетеля и Промыслителя и Спасителя нашего всегда, ныне и присно и во веки веков. Аминь.

Молитва четвертая,

чтомая пред чудотворною иконою Пресвятой Богородицы Боголюбскою, яже в Зимарове Рязанской епархии

О великое ангельское удивление, пророков исполнение, апостольская проповедь, мучеников веселие, и всех святых всежелательное и сладостное зрение, Преблагословенная Госпоже, Дево Богородице, Мария Боголюбивая! Воздвигни руце Твои к Сыну Твоему и Богу нашему Иисусу Христу, молящися Ему о нас грешных и недостойных рабех Твоих; удержи праведный Его гнев на нас движимый, и не даждь нам погибнуть со беззаконьми нашими, умоли Его неизреченную благость, Дево Боголюбивая. Се бо плоть и кровь есмы и дело пречистых рук Его; аще и согрешихом, но инаго Бога разве Сына Твоего не знаем. Призри убо, о Владычице Госпоже, на люди Твоя, пред святою Твоею иконою предстоящия, и умильно на ню, яко на Самую Тя Матерь Бога нашего, взирающия, и просящия от Тебе великия и богатыя милости. О Мати чадолюбивая! Испроси у Сына Твоего, Христа Бога нашего, жития нашего исправление: се бо исчезаем от гнева Божия, понеже преогорчихом Его благость и многое милосердие, непрестанно распинающе Его скверными делы, завистию враждебною, гневом друг друга снедающе, убогия и сирыя обидяще, презирающе страх Божий; еще же блудом и нечистотами и пиянством вси осквернихомся, яко же безсловесная животная в тине смрадней валяющеся и боготканную одежду, приятую от Святаго Крещения, в конец раздирающе. Темже Твоего заступления честною ризою нас покрый, от гнева Божия нас спасающи, да не огнь сошед сожжет нас окаянных во гресех наших. Но паче со всеми праведными пророки и апостолы и мученики и всеми святыми Твоим светлым призрением неизреченныя святыни Твоея нас утеши, да вси Тебе со страхом зовем: радуйся, Благодатная, Господь с Тобою, Благословенная Надеждо душ наших. О Боголюбивая Царице! Сподоби и ны, грешныя рабы Твоя, одесную стати во Втором пришествии Сына Твоего и наследники быти Царствия Небеснаго и жизни вечныя со всеми святыми, яко Едина Его держава благословена и препрославлена во веки веков. Аминь.

Молитва пятая

из акафиста

Царице моя преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту, яко волиши: яко не имам иныя помощи, разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.

Тропарь Божией Матери ради иконы Ее «Боголюбская», глас 1

Боголюбивая Царице, Неискусомужная Дево, Богородице Марие! Моли за ны Тебе Возлюбившаго и Рождшегося от Тебе Сына Твоего, Христа Бога нашего, подати нам оставление прегрешений, мирови мир, земли плодов изобилие, пастырем святыню и всему человечу роду спасение. Грады наша и всю землю Российскую от нахождения иноплеменных заступи и от междоусобныя брани сохрани. О Мати, Боголюбивая Дево! О Царице всепетая! Ризою Своею покрый нас от всякаго зла, от видимых и невидимых враг защити и спаси души наша.

Ин тропарь, глас тойже

Всепетая и Всеславная Царице Богородице, Мати всея твари Содетеля, христианская Надеждо и Заступнице, печальных Утешение, ненадеющихся и отчаявшихся скорое Надеяние! Молим Тя, милостива буди нам, грешным, и не остави раб Своих, и не отрини моления верных, в скорбех и бедах пред честным образом Твоим избавления требующих. О Владычице, благая Помощнице! Ризою Твоею честною нас защити и от зол избави, молящи Сына Твоего, Христа Бога нашего, да спасет души наша, яко Милосерд.

Кондак, глас 3

Дева днесь предстоит Сыну, руце Свои к Нему простирающи, святый князь Андрей радуется, и с ним Российская страна торжествует, нас бо ради молит Богородица Превечнаго Бога.

Величание

Величаем Тя, Пресвятая Дево, и чтим образ Твой святый, егоже благоверный князь Андрей даде нам на враги в победу и всем верным во спасение.

Пред иконой Пресвятой Богородицы «Боголюбская» молятся об избавлении от эпидемии и чумы, от моровых поветрий, холеры.

Молитва ко Пресвятой Богородице пред Ее иконою «Свято-Крестовская»

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющимся пречистому и чудотворному образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных. Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков. Аминь.