Войти в систему
Войти с помощью соц. сетей:
Святый великомучениче, целителю и чудотворче Пантелеимоне, всеизрядный угодниче Божий и молитвенниче присный христиан православных! Достойно наречен еси Пантелеимоном, еже есть всемилостивый, – яко, приняв от Бога благодать молитися за ны и болезни целити, ты богатно подаеши всем, к тебе притекающим, различная исцеления и вся к жизни временней и ко спасению потребная: сего ради и мы, недостойнии, сподобився твоея милости, паки пред святою твоею иконою прибегаем к тебе, и прославляюще тя, яко искренняго угодника Божия, нашего же вернаго молитвенника и исцелителя, усердне благодарим тя и Подателя всех благ Господа Бога нашего о великих благодеяниих, от Него тобою нам бывших. Приими убо милостивно малое сие молитвенное благодарение наше, зане не имамы ино что по достоянию воздати тебе, и прочее время живота нашего не лиши нас, немощных и грешных, твоея помощи и молитвеннаго ходатайства у Господа Бога нашего, Емуже подобает всякая слава, благодарение и поклонение, Отцу и Сыну и Святому Духу, ныне и присно и во веки веков. Аминь.
Святый великомучениче и целебниче Пантелеимоне! Моли Бога о нас и не допусти долее оставаться в нас тем болезням, коими болим душою и телом! Исцели те язвы и струпы, кои причинены нам страстями нашими.
Болим мы леностию и расслаблением – исцели ны. Болим влечением и пристрастием к земным предметам – исцели ны. Болим, о святый Пантелеимоне! Болим забывчивостию: о деле спасения, о наших грехах и немощах, о наших обязанностях – исцели ны. Болим злопомнением, гневливостию, ненавистничеством – исцели, о целебниче Свято-Афонский и всемирный. Болим завистью, гордостью, надменностью, превозношением, при всей скудости и непотребстве – исцели ны. Болим многими и разными припадками плотоугодия: чревоизлишеством, невоздержностию, многоядением, сластолюбием – исцели ны. Болим сонливостью, многословием, празднословием, осудливостью – исцели ны, о святый Пантелеимоне! Болят наши очи греховными воззрениями, болят наши уши слушанием пустословия, злоречия, наветов – исцели ны. Болят руки нерасположением к молитвенному воздеянию и к подаянию милостыни – исцели ны. Болят наши ноги нежеланием поспешно идти в храм Господень и стремлением к хождениям по стогнам и к посещениям домов мирских – исцели ны. Болит, зело болит язык наш, уста наши: пустословием, празднословием, злоречием, отвращаясь от молитвословий и славословий, или произнося их небрежно, рассеянно, без внимания, без понятия – исцели ны, о милостиве! От главы до ног болим мы: болит в нас разум непонятливостию, неразумностию и безумием; болит в нас воля, отвращаясь от святых занятий и стремясь к делам вредным и богопротивным; болит в нас воображение, не умея и не желая живо представить нам нашу смерть, вечную муку грешных, блага Царствия Небеснаго, Божий гнев, крестные страдания Христовы, его распятие – исцели ны, о святый Пантелеимоне!
Все в нас болит. Немощствует и душа наша вся со всеми ея силами и способностями. Немощствует и тело наше все со всеми его членами. Исцели ны, о святый Пантелеимоне, целебниче безмездный и любвеобильный врачеватель, слуга Пресвятыя Богородицы, и не оставь наше окаянство в толицех недугах и в толицей немощи: да исцелясь твоею благодатию, прославлю Пресвятую Троицу, Отца и Сына и Святаго Духа, и Пресвятую Богородицу, тебе на служение болящим посылающую, и возблагодарю твою, о святый Пантелеимоне, цельбоносную святыню во веки. Аминь.
Страстотерпче святый и целебниче Пантелеимоне, моли Милостиваго Бога, да прегрешений оставление подаст душам нашим.
Подражатель сый Милостиваго и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоняя присно борца соблазны от вопиющих верно: спаси ны, Господи.
Величаем тя, страстотерпче святый, великомучениче и целебниче Пантелеимоне, и чтим честная страдания твоя, яже за Христа претерпел еси.
Святому великомученику и целителю Пантелеимону молятся об исцелении от глазной болезни, об исцелении от головной боли, от разных недугов и болезней вообще, об исцелении детей от «родимца», об исцелении от чревных болезней, о покровительстве православным воинам и армии, о покровительстве русскому флоту.
О предивный угодниче Божий, преподобне отче наш Германе, ты подвигом добрым подвизался еси во стране сей, среди суровыя природы, явил еси себе в малом верно во служении твоем Богу, по глаголу Его: о малем был еси верен, над многими поставлю тя. И ныне, егда исполнися слово сие Господне на тебе постави тя Господь над всею Церковию Американскою, яко Небеснаго покровителя, все мы взываем ти теплою молитвою: молися за Церковь нашу святую, да сохранит ю Господь в чистоте и Православии, да явит ю украшение страны нашея, да оградит ю от темных сил вражиих, да изженет супостаты и да дарует всем чистоту веры и благочестие. Всем же нам испроси дух мира и любве, духа кротости и смирения, гордыни отгнание, от самопревозношения ограждение, болящим помощь и исцеление, скорбящим утешение, алчущим правды духовныя пищу Небесную. Да, уличивше желаемая, обрящем праведное воздаяние в день Страшнаго Суда и со всеми святыми воспоем и прославим Живоначальную Троицу, Отца Непостижимаго, Истиннаго и Единароднаго Сына и Святаго Утешителя Духа, во веки. Аминь.
Войти с помощью соц. сетей: