Молитва шестая

из акафиста

Заступнице усердная, благоутробная Господа Мати, к Тебе прибегаю аз, окаянный и паче всех человек грешнейший; вонми гласу моления моего, вопль мой и стенание услыши, яко беззакония моя превзыдоша главу мою, и аз, якоже корабль в пучине, погружаюся в море грехов моих. Но Ты, всеблагая и милосердная Владычице, не презри мене, отчаяннаго и во гресех погибающаго; помилуй мя, кающагося в злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим, ныне и присно и во веки веков. Аминь.

Молитва седьмая,

чтомая в Нижегородском Крестовоздвиженском монастыре

О Пресвятая Госпоже Владычице Богородице! Со страхом многим и верою и любовию приносяще благодарственная пения, молимся Ти пред сею чудотворною иконою, дивными чудесы просиявшею: не затвори нам грешным щедрот Твоих, Всенепорочная, не отвержи нас, прибегающих к Тебе, Милосердая. Умоли Твоего Сына и Бога, Господа нашего Иисуса Христа, да Своею благодатию возставит, устроит и хранит обитель сию ко спасению душ, Ему унивестившихся. Сама же, яко Благая Мати Вышняго, пребуди неотступна от обители сея, сущаго достояния Твоего, и всесильными Твоими молитвами покрый и заступи зде подвизаюшияся от всех бед и нужд душевных и телесных. Не имамы бо иныя помощи, не имамы иныя надежды, разве Тебе, Пречистая Дево. Темже смиренно припадающе, молим Тя, Преблагословенная Владычице: приими милостивно молитвы, прошения и благодарения всех с верою притекающих к честному Твоему образу, избавляй их от падения греховнаго, от навета злых человек, от скорбей и бед, от внезапныя смерти и вечных мук и даруй им дух сокрушения, смирение сердца, чистоту ума и оставление прегрешений, да вси мы, благодарно Тя воспевающии, сподобимся Небеснаго Царствия, и тамо со всеми святыми да славим Пречестное и Великолепое имя Отца и Сына и Святаго Духа во веки веков. Аминь.

Молитва восьмая,

чтомая в Высокогорской пустыни Нижегородской епархии

О Всемилостивая и Премилосердая Госпоже Царице Богородице! Ты еже восхощеши, о всем упросити можеши Сына Твоего, Христа Бога нашего. Приими убо моление мое и не отрини от Твоего заступления мене паче всех человек грешнейшаго: подаждь ми свобождение от бед и скорбей, избави мене, Всепречистая, от видимых и невидимых враг и от злых человек, клевещущих на мя, не попусти мне погибнути от глада, меча, труса, потопа и огня, и буди мне помощница неоскудна, яко да под Твоим кровом всегда сохранен буду и Твоим молением в Страшный день Суда неосужден предстану Сыну Твоему и Богу нашему, Емуже подобает слава и держава, со Безначальным Отцем и Святым Духом, ныне и в безконечныя веки веков. Аминь.

Молитва девятая,

чтомая в Вознесенском соборе града Самары

О Пресвятая Владычице Богородице, Богоизбранная Отроковице, всех скорбящих Радосте! Подаждь утешение нам в скорби сущим: отжени от нас печали, болезни, искушения и всякия напасти вражия. Услыши нас грешных, припадающих пред Твоею всечестною иконою с сокрушенным сердцем, и Твоим всесильным ходатайством сподоби нескончаемыя радости во Царствии Сына Твоего и Бога нашего во веки веков. Аминь.

Молитва десятая,

чтомая в церкви села Мурзиц Симбирской епархии

Владычице, Пресвятая Богородице, Небесная Царице, преизрядная Отроковице, ненадеющимся надеяние, болящим исцеление, сирым предстательнице, странным прибежище, нагим одеяние, скорбящим утешение и радосте, обидимым покровительнице и всем сущим в бедах и напастех скорое вспоможение и заступление! О Всемилостивая Госпоже Дево Богородице! Зриши беды наша, скорби и напасти: помози нам бедным и страждущим, печальным и унылым, скорбящим и отчаянным, отими от нас всякую печаль, управи нас яко странных. Обиды наша веси, Непорочная, и помощи нам, аще волиши, можеши. Не даждь убо, Госпоже, нам во отчаяние впасти, не имамы бо иныя помощи, разве Сына Твоего, Превечнаго Бога, Спаса Христа, и иныя предстательницы и утешительницы, разве Тебе, о Владычице, о Заступнице, о Дево Богоизбранная, о Царице всея твари, Голубице Пречестная. Темже на Твой пресвятый образ взирающе, со воздыханием и сокрушением сердца преклоняем главы и колена наша и молимся сице: призри благосердием, Всепетая Богородице, услыши, Преблагая, не отрини нас, но благоволи помиловати, и не отвержи наших воздыханий; никтоже бо притекаяй к Тебе посрамлен от Тебе исходит, но просит благодати и приемлет милость. Умоли, Госпоже Царице Владычице, Дево Марие, Превечнаго Бога, Господа и Спаса нашего Иисуса Христа, о всех нас с верою Тебе покланяющихся и молящихся: соблюди же во здравии, долгоденствии и благополучнем пребывании православный народ и весь род христианский, державу нашу миром огради и плодов земных изобилием обогати. Образ же сей лица Твоего да будет нам стена, и забрало, и утверждение, врагом же нашим страх и поражение, на него мы вси людие Твои взирающе, да приимем в недузех наших исцеление. Покрый же и избави нас от всякаго нахождения скорби и печали. Тебе молимся и мили ся деем, образ Твой святый целующе: помилуй, покрый и соблюди, и огради Твоим заступлением, и настави ны на путь спасения в сем веце, в будущем вечныя изьми муки, яко благословена еси и препрославлена ныне, всегда и в безконечныя веки веков. Аминь.