Войти в систему
Войти с помощью соц. сетей:
О Предивная Госпоже, Владычице Богородице! Приими нас, припадающих к Твоему образу; воззри недремлющим оком Твоим на душевныя язвы наша греховныя; умоли сердцем бдящего о нас Сына Твоего, Христа Бога нашего, да избавит нас, с верою к Нему прибегающих, от тяжкаго сна греховнаго и от всех навет вражиих, да спасет души наша, яко Человеколюбец. Аминь.
О Пресвятая Госпоже, Владычице моя Богородице, Небесная Царице! Ты веси скорбь сердца моего и печаль души моея. Молюся убо Тебе усердно: спаси и избави мя, грешнаго раба Твоего, от напрасныя клеветы, от всякия беды и напасти и внезапныя смерти. Помилуй мя и во всякое время сохрани мя, во дни труждающася и на пути ходяща, и в нощных часех спяща снабди, покрый и заступи. Защити мя, Владычице Богородице, от всех враг моих, видимых и невидимых, от всякаго злаго обстояния. На всяком месте и на всякое время буди ми, Мати Преблагая, стена необоримая и заступление крепкое всегда, ныне и присно и в будущия веки веков. Аминь.
О Пресвятая и Преблагая Владычице Богородице, чистейшая Святаго Духа Приемнице и непорочное Слова Божия Святилище! Радуйся, яко Ты еси радость ангелом и человеком, сладчайшаго бо Иисуса Христа нашествием Духа Святаго родила еси плотию, и яко Младенца Того пеленами повила еси, яко возлюбленнаго Сына млеком питала еси и обимающи лобзала еси. Молим Тя, Великая Владычице: не отрини раб Твоих, сему чудотворному Твоему образу предстоящих и всю надежду свою по Бозе на Тя возложивших; Ты бо еси надежда и прибежище наше, жизнь и заступление наше, крепость наша и отрада. Умоли возлюбленнаго Сына Твоего, еже сохранитися Отечеству нашему и всякой стране христианстей в мире и безмятежии, и утвердитися державе нашей и соблюдатися же непоколебимей святей Православней Церкви нашей, неверию искоренитися, ересем и расколом упразднитися, пастырем нашим в ревности укрепитися, еже право правити слово истины. Паки умоли, Госпоже, возлюбленнаго Сына Твоего, да избавит всех нас от всякия нужды, скорби и болезни, да низпослет нам тихое и мирное житие, здравие телесное и душевное спасение, да умирит страждущая сердца наша и да исцелит сердечныя скорби, да вразумит нас на добрая дела, да очистит умы от помыслов суетных и наставит ко исполнению заповедей Своих, и от вечныя муки да избавит, и да дарует нам Небесное Царствие, в немже возвеличим Тя, Преславную Владычицу нашу, и прославим Пречестное и Великолепое имя великаго Бога, Отца и Сына и Святаго Духа, ныне и присно и в безконечныя веки веков. Аминь.
Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари, и от бед избави нас, едина вскоре предстательствующая.
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.
Пред иконой Пресвятой Богородицы «Недремлющие Око» молятся при бессоннице детей.
О Пресвятая Владычице Богородице, вышшая Херувим и честнейшая Серафим, Богоизбранная Отроковице, всех скорбящих Радосте! Подаждь утешение и нам, в скорби сущим, разве бо Тебе инаго прибежища и помощи не имамы. Ты едина еси радости нашея Ходатаица, и яко Мати Божия и Мати милосердия, предстоящи у престола Пресвятыя Троицы, можеши нам помощи; никтоже бо притекаяй к Тебе посрамлен отходит. Услыши убо и нас, ныне в день скорби пред Твоею иконою припадающих и со слезами Тебе молящихся: отжени от нас належащия на нас скорби и печали в сей временней жизни, не лишены же сотвори ны Твоим всесильным ходатайством и вечныя нескончаемыя радости во Царствии Сына Твоего и Бога нашего, Емуже подобает всякая слава, честь и поклонение, со Безначальным Его Отцем и со Пресвятым и Благим и Животворящим Его Духом, ныне и присно и во веки веков. Аминь.
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
Не имамы иныя помощи, не имамы иныя надежды, разве Тебе, Владычице: Ты нам помози, на Тебе надеемся, и Тобою хвалимся: Твои бо есмы раби, да не постыдимся.
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.
Пред иконой Пресвятой Богородицы «Мателикийская», или «Метелинская», молятся при всякой немощи телесной и душевной.
Войти с помощью соц. сетей: