Войти в систему
Войти с помощью соц. сетей:
Величаем тя, святителю отче Леонтие, и чтим святую память твою, ты бо молиши за нас Христа Бога нашего.
О преподобная и приснопамятная, всехвальная мати Евфросиние, Ангеле во плоти, Богоизбранный сосуде Святаго Духа, Церкве Христовы похвало и украшение, монашествующих славо и утверждение, отечеству, обители твоей и всей стране помоще, покрове и защитнице! Ты еси, яко древо, насажденное при исходищих вод, плоды добродетелей твоих и благодатными даровании Святаго Духа украшенная, наставнице делом и словом, избранная, непорочная и добрая. Услыши ны, молящияся тебе и призывающия имя твое, имаши бо дерзновение у Господа. Испроси нам преспеяние в жизни добродетельней, огради сердца наша верою, надеждою и любовию и страхом Божиим. Подай нам помощь в трудех и скорбех наших и, якоже попечение имела еси в житии твоем о обители твоей и иночествующих, тако и ныне потшися о нас, благопоспешити нам во всем: обитель твою огради миром и защити от враг видимых и невидимых, да преуспевает и процветает в добродетелех. Изми ны от всякия нужды и тесноты, от лютых болезней и от нечаянныя смерти и приведи ны ко истинному покаянию при исходе из жизни сея; испроси нам у Господа Бога кончину мирну, безболезненну, непостыдну, святых Таин причастну и преведи ны чрез мытарства воздушная, да не похитят нас истязателие грознии по грехом нашим, но да твоим заступлением и помощию возможем безбедно проити истязание воздушное, и милость получити, и предстати неосужденно страшному престолу, и на страшнем судищи сподобитися одесную стати Праведнаго Судии, и наследовати праведных часть. Ей, госпоже, всечестная мати, преподобная Евфросиние, помози нам молитвами твоими, огради нас и заступи от всяких козней вражиих, да сподобимся прейти время жизни сея непреткновенно и спасение получити молитвами твоими у Христа Господа, Егоже и сподобимся пети и славословити со Безначальным Отцем и со Святым Духом во веки веков. Аминь.
О преподобная и богоносная мати наша Евфросиние! Предстоящи престолу Пресвятыя Троицы, молися выну о стране нашей, о Святейшем Правительствующем Синоде и епископе нашем (имярек), о всем священнем и иночестем чине, игумении же и сестрах обители твоея: о военачальницех и градоначальницех и всех православнех христианех: да ходим кийждо достойно звания нашего, в немже звани быхом, и да будет земля наша земля добрая, и вси живущии на ней род избран, царское священие, язык свят, людие обновления, ныне и присно и во веки веков. Аминь.
О преподобная мати Евфросиние! Услыши ны, молящияся тебе; испроси нам, рабом Божиим (имена), преспеяние в жизни добродетельней, огради сердца наша верою, надеждою и любовию, и страхом Божиим, подай нам помощь во трудех и скорбех наших, изми ны от всякия нужды и тесноты, от лютых болезней и от нечаянныя смерти, и приведи ны ко истинному покаянию при исходе от жизни сея; испроси нам у Господа Бога кончину мирну, безболезненну, непостыдну, Святых Таин причастну, и проведи ны чрез мытарства воздушная. Ей, преподобная Евфросиние, помози нам молитвами твоими, огради нас и заступи от всяких козней вражиих, да сподобимся спасение получити у Христа Господа, Егоже и сподобимся славословити, со Безначальным Отцем и со Святым Духом, во веки веков. Аминь.
Подражающи дванадесятолетна дванадесятолетну Христу, учившему во святилищи, Божию слову последовала еси, Евфросиние, славу временную и земнаго обручника оставльши, и вся мирская презревши, краснейшему паче всех Христу себе уневестила еси, крест вземши, путем ангельскаго жития шествующи, и многия к Нему наставляющи, во благоухании мира в Небесный чертог востекла еси, идеже моли, Егоже возлюбила еси, о чтущих благочестно память твою.
Богатство свое нищим расточивши, и славу княжескую нивочтоже вменивше, обручника временнаго, красная дево, возгнушалася еси и, уневестившися Жениху Христу, Тому, якоже вено, чистоту душевную и телесную принесла еси, Евфросиние, Емуже ныне в веселии предстоя, поминай нас, чтущих память твою.
Веселися земле Полотская, красуйся и ликуй, обитель Спасова, се бо Господь исполни желание сердца вашего: духовная мати ваша и предстательница, Евфросиния богомудрая, яко птица возлете от града Киева, и яко горлица обреете гнездо свое во обители древняго удела своего, идеже собирает птенцы своя под криле свои, сохранити и утвердити я в правоверии, пришествием многоцелебных мощей своих просветити омраченная, собрати расточенная, разогнати тьму искушений и бед от вопиющих верно: спасай нас молитвами твоими, яко предстательница наша, преподобная мати Евфросиние.
Избранней Богом от самаго рождения, и призванней на служение Ему, в чине ангельстем Господеви послужившей свято, и преподобно пожившей, и ныне с небесными силами Господа восхваляющей, о нас же грешных пред Господем ходатайствующей, с радостию и любовию воззовем: радуйся, Евфросиние, невесто Христова всечестная.
Войти с помощью соц. сетей: