Войти в систему
Войти с помощью соц. сетей:
О всесвятый, преподобный и Богоносный отче наш Кассиане, угодниче преизрядный Христов, услыши нас, ныне молящихся тебе в час сей, недостойных и многогрешных рабов твоих (имярек), верою тя призывающих и молебное приносящих тебе пение. Тя ходатая на умоление ко Христу предлагаем: скоро Владыце Небесному предстани и преподобнеи свои руце молебне к Нему простри о нас, грешных, и от Него щедротство благодати подаждь нам и приими нас во свое заступление, от всех бед и зол избавляя, и от нашествия видимых и невидимых враг освобождая, и тех всех наветы и злохитрство борющих нас погубляя и отгоняя во всей жизни нашей, дондеже есмы в житии сем. Помози нам, грешным, в настоящем сем житии и в будущем веце, отче преподобне Кассиане, и приими со воздыханием от души и сердца моление тебе приносящих, надеемся бо на твою милость: не презри нас, грешных, требующих твоея помощи и заступления. Умоли Христа Бога даровати нам оставление всех наших грехов, елико согрешихом от юности нашея во всем житии нашем делом, словом, помышлением и всеми нашими чувствы, и во исходе душ наших помози нам, грешным: умоли Христа Бога, всея твари Содетеля, избавити нас воздушных мытарств и вечнаго мучения, и спасенны ко Христу представи нас, и в век будущий Божественнаго Христова Царствия сподоби ны получити молитвами твоими, отче Кассиане, да всегда прославляем Отца, и Сына, и Святаго Духа и твое молитвенное предстательство, ныне, и присно, и во веки веков. Аминь.
Днесь град Углеч тобою хвалится в концех бо его пресветло, яко велие солнце, возсиял еси и чудесы твоими вся озарил еси, и ныне молися Господеви, Кассиане преподобне, за град Углеч и обитель сию, и всяк град, и страну, и люди, иже верою тебе почитающия, и о спасении душ наших.
Днесь пресветло красуется славнейший Углеч град, церковь же Божия Матере вельми радуется, имеющи многоцелебныя в себе мощи великаго чудотворца, преподобнаго Кассиана, возсиявшаго от Рима, якоже солнце, всему миру, издалече просвещающаго верных сердца, имже украси Бог церковь Матере Своея. Темже ныне молим тя: буди покровитель и заступник непобедимый от всяких бед граду нашему и всем верным хранилище, притекающим в дом Божия Матере и кланяющимся тебе, преподобне угодниче Христов Кассиане, моли Христа Бога спастися душам нашим.
Ветхаго Рима имея воспитание, державу отечества своего, град Мангупский, оставль, и нивочтоже вменил еси княжение и славу маловременную суетнаго века Христа ради, и паче земнаго богатства избра богатство себе Небесное и славу вечную, возвысив ум свой к Богу и житие свое со ангелы вожделел еси восприяти, промышлением Божественнаго Разума направляем, и Богоспасаемаго Углеча града достигл еси, и близ в пределах области его, над Волгою рекою, в пустыню вселився, и обитель преславну в честь Божия Матере воздвигл еси, и в ней тело свое предложив, яко дар освящен. Тем молим тя, отче Кассиане, моли Христа Бога, да спасет души наши.
Яко светозарная звезда пришел еси от востока на запад, оставль отечество и княжение твое Христа ради, и в царствующий град Москву пришел еси, и, промышлением Божественнаго Разума направляем, Углеча града достигл еси, и, близ его, над Волгою рекою, в пустыни Учме вселився, обитель сотворил еси, и церковь созда, и созва монахов во спасение; с нимиже моли о нас, чтущих память твою, да зовем ти: радуйся, преподобне отче Кассиане.
Якоже пресветлое солнце, возсия нам от Рима и к царскому граду дастигл еси, преблаженне отче Кассиане, и ангельски в Русстей земли пожил еси, и древних постник на высоту воздержания востече, и в пустыне Учме, близ Богоспасаемаго града Углеча, обитель преславну иноком во спасение сооружи, и храм благолепен Пречистей Богоматери Духом Божиим уясни, и в ней тобою Бог прославляется, и ныне молитися Господеви не престай о стаде своем, иже многими поты и труды стяжал еси избавити его от всех обстояний лукаваго, и от всяких скорбей и бед невредиму сохранитися, и нам, рабом твоим, грехов прощение молитвами твоими получити, и граду твоему Углечу от напастей всяческих и находящих падений, гневом Божиим праведным, свободитися умоли, преподобне и Богомудре отче Кассиане.
Яко многосветлая звезда, возсиял еси в Русстей земли, отче Кассиане, и яко богатство драгоценнаго бисера прииде к нам от ветхаго Рима и дошед Богоспасаемаго града Углеча, и близ его Божественным смотрением обитель всечестну возградил, и церковь Матере Божия чудновидну созда, и созва инок множества, с нимиже молися Христу Богу избавити град сей от варварскаго пленения, и междоусобныя брани, и огненнаго запаления невредима соблюди, преподобне и Богомудре отче Кассиане.
Ублажаем тя, преподобне отче Кассиане, и чтим святую память твою, наставниче монахов и собеседниче Ангелов.
О храбрый воине и избранный воеводо Небеснаго Царя Христа, победивый прелесть идолослужения силою Святаго Духа и просветивый град Муром святым крещением, святый благоверный Константине! Усердно предстояще честней раце многоцелебных мощей твоих, со слезами молим тя, просяще прияти нам твоим к Богу ходатайством грехов оставление. Предстани, святе, яко имеяй дерзновение ко Святей Троице, и подвигни с собою на молитву преудобренныя своя две отрасли, благовернаго Михаила, послушнаго тебе до смерти и кровь свою пролиявшаго за град сей и яко незлобиваго агнца заколена бывша (тщашеся бо тьмы душ обратити ко Господу спасаемых), и благовернаго князя Феодора, ревнителя благочестия. Испросите своими молитвами нам мир, здравие, долгоденствие и на враги победы и одоление. Еще со слезами смиренно просим: сохраните, блаженнии, невредим град сей, егоже возлюбисте и свободисте от работы демонския. Обитель же сию и живущия и труждающияся в ней соблюдите невредимы от всех козней и стрел демонских. Даруйте, святии, граду сему, всякому граду и стране мирное и немятежное житие и изобилие плодов земных. По морю плавающим и путешествующим, и к раце мощей ваших с верою прибегающим безбеднии правителие будите: злых свобождение, мирное и радостное в домы их возвращение молитвами вашими даруйте, да вси с радостию взываем: о благовернии наши заступницы! Соблюдите всех без напастей, да вси, прибегающе с верою к цельбоносней раце мощей ваших исцеление душам и телесем нашим приемлюще, прославляем вас, наши заступники, славяще Отца и Сына и Святаго Духа, ныне и присно, и во веки веков. Аминь.
Войти с помощью соц. сетей: