Тропарь, гл. 3-й

Праведнаго Лазаря Боголюбивыя сестры, Марфо и Мария преславныя, чистым сердцем Христа в житии вашем возлюбили есте, мироносиц вземши чин Его́, яко Сын Бо́жия, безбоязненно исповедали есте: сего ради ныне во обителех Отца́ Небеснаго со А́нгелы и всеми святыми славно царствуете. Умолите, Егоже возлюбили есте, и нам грешным в вере и любви Христовой утвердитися и Царствия Небеснаго сподобитися.

4 июня, преподобному Мефодию, игумену Пешношскому, чудотворцу

Молитва первая

О, священная главо, земный Ангеле и небесный человече, преподобне и богоносне отче наш Мефодие! Припадаем к тебе с верою и любовию, и молимся прилежно: яви нам, смиренным и грешным, святое отеческое твое заступление: се бо грех ради наших не имамы свободы чад Божиих, просити о потребах наших Го́спода и Владыку нашего, но тебе, молитвенника благоприятнаго к Нему предлагаем, и просим тя со усердием многим, испроси нам у благости Его́ благопотребныя дары душам и телесем нашим: веру праву, надежду спасения несомненну, любовько всем нелицемерну, в искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину и добрый ответ на страшном суде Христове. Испроси, угодниче Бо́жий, у Царя́ царствующих и Го́спода господствующих, Богохранимей стране нашей мир, тишину и благостроение. Не забуди, святче Бо́жий, и обитель твою святую, тобою созданную и присно тя чтущую, но соблюди ю и все́х живущих и подвизающихся в ней и на поклонение в ню приходящих невредимыми от искушений диавольских и всякаго зла. Ей, преподобне отче! не лиши нас помощи твоея небесныя, но молитвами твоими все́х нас приведи в пристанище спасения и наследники яви нас быти всесветлаго царствия Христова: да поем и славим неизреченныя щедроты человеколюбца Бо́га, Отца́ и Сы́на и Свята́го Ду́ха и твое святое отеческое заступление во веки веко́в. Ами́нь.

Молитва вторая

О, великий угодниче Христов и преславный чудотворче, преподобне отче наш Мефодие! Призри́ на ны грешныя, обуреваемыя треволнением житейских страстей и к тебе вопиющия: мы бо, чада твоя духовная и ограды твоея словесныя овцы, на тя, по Бозе и Богоро́дице, упование наше возлагаем, и тя со умилением просим: твоим ходатайством ко Господу Бо́гу испроси нам мир, здравие, долгоденствие, воздуха благорастворение, земли плодоносие, дожди благовременны, и вся ны избави от всяких бед: града, глада, потопа, огня, меча, вредоноснаго червия снедающаго плоды земныя, тлетворных ветров, смертоносныя язвы и напрасныя смерти, и во всяких скорбех и печалех наших буди нам утешитель благий и помощник скорый, сохраняя нас молитвами твоими от падений греховных и сподобляя наследники быти Царствия Небеснаго: да прославляем вкупе с тобою все́х благ подателя, в Тро́ице славимаго и покланяемаго Бо́га, Отца́ и Сы́на и Свята́го Ду́ха, во веки веко́в.

Ами́нь.

Тропарь, гл. 8-й

Божественною любовию от юности распаляем, вся я́же в мире красная возненавидев, Христа единаго возлюбил еси, и сего ради в пустыню вселився, в ней обитель сотворил еси, и собрав инок множество, приял еси́ от Бо́га чудес дар, отче Мефодие, и был еси́ о Христе́ собеседник и спостник преподобному Сергию, с нимже у Христа Бо́га испроси душам нашим велию милость.

5 июня (12 июня – обретение мощей)

Преподобным Вассиану и Ионе Пертоминским, Соловецким чудотворцам

Молитва

О, преподобнии и всечестнии отцы, Вассиане и Ионо, угодницы Христо́вы блаженнии и чудотворцы преславнии! Постничеством Бо́гу первее угодивше и делы благочестно на земли подвизавшеся, яко светила светлая по смерти в мире возсиявше, просвещающе верных чудес светлостию, вы заступницы теплии показастеся. Многих, в скорбех и бедах страждущих и погибнути имущих, здравы сохранисте, непослушавших же завещания вашего и маловерующих отмстительне наказасте и прежде заблуждшей жены путевожди бысте, и ослепшему паки прозрение даровасте. Дерзностне же коснувшагося целебных мощей ваших внезапно отринусте и, разслаблением наказавше, помиловасте. К сим же и иная преславная соделасте, и бывше оскудение во обители вашей сугубо исполнисте, и доныне неразориму ю соблюдосте. Мо́лимся убо ныне вам, о, преблаженнии отцы, услышите моление наше, не презрите нас, в бедах и скорбех призывающих вас верою, будите помощницы нам скории и покровители, сохраните же нас недостойных во здравии и тишине. К сим же и духовнаго о вас собрания не оставите до конца, посещающе е всегда, о, преподобнии, изобилованием всяцем, и молитеся присно о нас ко Господу: да молитвами вашими грехов прощение получим и Царствия Небеснаго сподобимся благодатию Его: яко Тому подобает всякая слава, честь и поклонение, ныне и присно и во веки веко́в. Ами́нь.

Тропарь, гл. 8-й

Прежде отвержением мира, яко морскаго треволнения, избегосте, отцы преподобнии: послежде же изволением Божиим в водах морских кончину блаженную приясте, и к неболезненному покою представистеся от земли радующеся. Тем и по кончине от Христа Бо́га прославистеся чудесы обильно, теплии в бедах верным помощницы показастеся, и, ныне на небесех предстояще престолу Христову, Вассиане преблаженне и Ионо преславне, молитеся присно о душах наших.