Войти в систему
Войти с помощью соц. сетей:
Православия наставниче, благочестия учителю и чистоты, вселенныя светильниче, архиереев богодухновенное удобрение, (имярек) премудре, ученьми твоими вся просветил еси́, цевнице духовная: моли Христа́ Бо́га спастися душам нашим.
Священноисповеднику: Величаем тя, святителю отче (имярек).
Преподобномученику: Ублажаем тя, преподобне отче (имярек).
Ирмос: Яко по суху пешешествовав Израиль, по бездне стопами, гонителя фараона видя потопляема, Бо́гу победную песнь поим вопияше.
Припев: Свя́тый священноисповедниче Бо́жий (имярек), моли Бо́га о нас.
Или: Свя́тый преподобноисповедниче Бо́жий (имярек), моли Бо́га о нас.
Всемысленно Тебе́, Спасе, возлюби священный (имярек) ко страданию приложився крепко, скорби и болезни и подвиги терпя, дондеже обрете пищу безконечную.
Кровными кроплении сланое неверствия море утолил еси́: река был еси́ Христова, напаяя воистину Це́рковь присно.
Распростертыя подвиги на земли, принесл еси́ Бо́гу славне (имярек)и Царствия Небеснаго сподобився венцы прияти, и вечнующий живот нерушимый.
Богородичен:
Украшена добротою добродетелей, Богомати Чистая, Бо́га истиннаго добродетель зачала еси́, нас Бо́жественными добродетельми просветившаго.
Ирмос: Несть свят, якоже Ты, Го́споди Бо́же мой, вознесый рог верных Твои́х, Бла́же, и утвердивый нас на камени исповедания Твое́го.
Ни веждома дремания, ни очима сна ведал еси́, преподобне отче (имярек), дондеже дом явился еси́ святыя Троицы, и премудрости сокро́вище, мир обогащая златозарными учении блаженне.
Бо́жественных повелений хранитель быв богомудре, (имярек), в темницах затворен был еси́, отверзая верным затворучительнаго пути, на широту разума вводящаго.
Силою Бо́жественною укрепився, безкрепостную дерзость беззаконных низложил еси́, исповеданием твердым, всесвященный (имярек), страдальче, я́ко оружник Бо́жественнаго полка.
Богородичен:
Премудрость и Слово О́тчее, прежде Сый всех век, в последняя лета неизреченно воплотивыйся от неискусобрачныя Тебе́ Матере, Богоро́дицу Тя содела.
Седален, глас 4:
Славное солнце, я́ко денницу на высоте постави тя своей Церкви, верныя просвещая словесы твоими, небесный таинниче (имярек), Богомудре отче наш.
Сла́ва, и ныне:
Богородичен:
Чистая всенепорочная, и неискусобрачная, едина безлетнаго Сы́на и Слова Бо́жия, в лете рождшая: Того со святыми и честными апостолы, мученики, и пророки, и преподобными, моли даровати нам очищениеивелию милость.
Крестобогородичен:
На кресте Тя воздвижена я́ко узре Пречистая Мати Твоя́, Слове Бо́жий, матерски рыдающи вещаше: что новое и странное, Сы́не Мой, чудо; како жизнь всех приближаешися смерти, оживити хотя умершия, я́ко милосерд.
Ирмос: Христо́с моя сила, Бог и Господь, честная Це́рковь боголепно поет взывающи, от смысла чиста о Господе празднующи.
Копием словесы твоими безбожие пронзил еси́, и страдании твоими я́ко мечем бесовския полки победил еси́, ихже злобы избави чтущия тя, всехвальне (имярек).
Не жру бесом, ни устрашаюся смерти, ни мук вещей, священномученик (имярек), взываше: но единаго Бо́га исповедую в Троице познаваема.
Видев Господь твоего смирения преславную высоту, свыше строения тебе слово дарует: имже ересей лютая смиришася возношения, отче.
Богородичен:
Яко дверь, приводящую к божественному входу, я́ко рай божественный, я́ко мысленное место священия, я́ко доброту Иаковлю Деву ублажаем.
Ирмос: Бо́жиим светом Твои́м, Бла́же, утренюющих Ти души любовию озари, молюся, Тя ведети Слове Бо́жий, истиннаго Бо́га, от мрака греховнаго взывающа.
Слез твоих течением, всемудре отче (имярек), сластей изсушил еси́ пучину, и излитием учений твоих ересей потоки, блаженне, заградил еси́.
Це́рковь был еси́ вместительна, отче (имярек), Троице воистину, украшен благодатию, и озарением честных добродетелей, и учительным смирением.
Терпением твоим низложив вся шатания лукаваго, того вреда мя избави, бодра всячески содевая, стезями приводящими к Бо́гу, славне (имярек).
Богородичен:
Поем, Всечистая, из Тебе́ плоть страстную и смертную нас ради приемшаго, и видимо рождество смешеною неслитною ипостасию.
Ирмос: Житейское море, воздвизаемое зря напастей бурею, к тихому пристанищу Твое́му притек, вопию Ти: возведи от тли живот мой, Многомилостиве.
Светило быв страданий твоих, светом просвещая концы, исповедал еси́ имя Христово пред мучители страстотерпче Господень всехвальне (имярек).
Язык твой я́ко трость скорописца книжника, воистину бысть, исповедая разум всечестен, в скрижалех сердец начертаяй, отче (имярек), закона духовнаго.
Твое́го плавающии поучения стяжавающе тишину, отче Богоглаголиве, пучины треволнения избавляются душевреднаго, и от иных ересей приходящии верою спасаются.
Богородичен:
Дух Свя́тый на Тя, Чистая, девства хранило нашед, содела честноеселение, Всенепорочная, Сы́на Вышняго, Всеблаженная.
Кондак, глас 2:
Насладився, богомудре воздержания, и желания плотская ты успил еси́, явився верою возращаем, и я́ко живота древо райское процвел еси́, (имярек), отче священный.
Икос:
Отверзи ми устне пресвященне, богоприятными твоими молитвами, предстоя Бо́гу всеславне преподобне мучениче, да воспою блаженное твое житие, и возглаголю достойно добродетели твоя, яже на земли теплою любовию совершил еси́: исповедник бо был еси́ крепок, воздержание верою исправив, бдение и чистоту возлюбил еси́, (имярек), отче священный.
Ирмос: Росодательну убо пещь содела ангел преподобным отроком, халдеи же опаляющее веление Божие, мучителя увеща вопити: благословен еси́, Бо́же оте́ц на́ших.
Яко пресветло житие твое бысть богомудре, пощения ради, тако явися твое страдание твердо: Христа́ бо прославил еси́ яве, вопия: благословен Бог оте́ц на́ших.
Целомудрия чистоты препоясався мужеством, богоугодный отче (имярек), и мучения венец светел воспри им благодатию, вопиял еси́: благословен Бог оте́ц на́ших.
Некланяющиися пречистей иконе Твое́й, Спасе, нечестивии слугу Твое́го многоранно оскорбляху, присно глаголюща, и вопиюща к Тебе́: благословен Бог оте́ц на́ших.
Богородичен:
Седяй в недрех родительных неописан, Пречистая, ныне же от Твои́х недр произшед седит описан, Твое́му подобяся образу, за еже спасти Адама, Адам быв.
Ирмос: Из пламене преподобным росу источил еси́ и праведнаго жертву водою попалил еси́: вся бо твориши, Христе́, токмо еже хотети. Тя превозносим во вся веки.
Светоносно показался еси́, якоже другое солнце, поучение посылая концем, тьму несветящую всякаго греха отъимая, блаженне (имярек), светом покаяния.
Струями Бо́жественных учений ограждаем, река якоже от другаго Едема изшел еси́, лице земли напояя, богоугодниче (имярек), и нечестия плевелы потопляя.
Украсовался еси́, всеблаженне, добротою словес твоих, Cвятаго бо Ду́ха явился еси́ трость, написуя верным благочестивно разум Бо́жественный, превознося Христа́ во веки.
Богородичен:
Ко Твое́му прибегаю покрову, Всенепорочная, и заступление ныне животу моему Тя предлагаю, яже паче ума Бо́га Слова рождшая: Егоже превозносим во веки.
Ирмос: Бо́га человеком невозможно видети, на Негоже не смеют чини ангельстии взирати: Тобо́ю же, Всечистая, явися человеком Слово воплощенно, Егоже величающе, с небесными вои Тя ублажаем.
Яко свет, я́ко луна, я́ко великое солнце, я́ко молния Христове Церкви возсияв, и верных мысли просветил еси́, в невечернем свете вселився, поя трисвятыми гласы Тро́ицу несозданную.
Земля святым гробом обогатися, (имярек), и священным, всехвальне, твоим телом, и праведных взыграшася дуси, ангели же, блаженне, дух твой прияша: с нимиже всех нас поминай поющих тебе.
Храм Ду́ха Пречистаго быв, и река вод животных наполняема, и Церкве основание недвижимое, степень православия, струя приснотекущая, Бо́жественнаго покаяния источник достодивный (имярек).
Богородичен:
Якоже капля небесная во Твое́ чрево, Дево, дождь сниде, и изсуши лестная течения, источив нетления и избавления всем человеком Тобо́ю, Богоблагодатная.
Освященная главо, преподобне отче, преблаженне авво (имярек), не забуди чад твоих, ихже породил еси́ богоугодными трудами и молитвенными подвиги; поминай во святы́х твоих благоприятных молитвах и назидай предстательством твоим стадо твое, еже сам упасл еси́; моли за ны, отче священный, дети твоя духовныя, я́ко имея дерзновение к Небесному Царю́; не премолчи за ны ко Христу́ и непрезри нас, верою и любовию чтущих тя. Поминай недостойных нас пред Престолом Вседержителя, тебе бо дадеся благодать молитися за ны. Аще бо телом преставился еси́ от нас, но и по смерти жив во Христе́ пребываеши. Не отступи от нас духом, сохраняй нас от стрел вражиих, от прелести бесовския и козней диавольских, пастырю наш добрый. Се бо, ракою мощей твоих пребывая с нами, святою твоею душею с Небесными Силами у Престола Вседержителева предстоя, достойно славиши Го́спода. Темже, припадающе со умилением, молимся тебе оспасении душ на́ших: испроси нам время на покаяние и невозбранно преити от земли на небо чрез мытарства горьких бесов, да, твоим предстательством вечныя муки избавльшеся, Небесное Царствие наследовати сподобимся со всеми праведными, от века угодившими Христу́ Господу нашему, Емуже подобает всякая сла́ва, честь и поклонение, ныне и в безконечныя веки веков. Ами́нь.
Войти с помощью соц. сетей: