Войти в систему
Войти с помощью соц. сетей:
О, свята́я уго́днице Бо́жия, преподобному́ченице Евдоки́е! По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал е́сть Госпо́дь все́м лю́бящим Его́. Те́мже взира́юще на святы́й тво́й о́браз, ра́дуемся о пресла́внем сконча́нии жи́тельства твоего́ и чте́м святу́ю па́мять твою́. Ты́ же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти на́м вся́кое прегреше́ние и по́мощи на́м ста́ти проти́ву ко́знем диа́вольским, да изба́вльшеся от скорбе́й, боле́зней, бе́д и напа́стей и вся́каго зла́, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Го́споди Иису́се Христе́ Бо́же наш, от преве́чнаго Отца́ рожде́нный Сы́не пре́жде век, и в после́дния дни, благоволе́нием и соде́йствием Свята́го Ду́ха, изво́ливый рожде́ну бы́ти от Пресвяты́я Де́вы я́ко младе́нцу, повие́ну и положе́ну во я́сли, сам Го́споди, в нача́ле сотвори́вый челове́ка и жену́ спряги́й ему, за́поведь дав им: расти́теся и мно́житеся и напо́лните зе́млю, поми́луй меня́ по вели́цей ми́лости Твое́й, рабу́ Твою́ (имя), готовящуюся роди́ти по за́поведи Твое́й. Прости́ мне во́льныя и нево́льныя грехи́, благода́тию Твое́ю да́руй мне си́лу благополу́чно разреши́тися от бре́мене своего́, сохрани́ меня́ и младе́нца во здра́вии и благомо́щии, огради́ я́ а́нгелы Твои́ма и сохрани́ от неприя́зненнаго де́йствия лука́вых духо́в и от вся́кия ве́щи злы́я. Ами́нь.
Бо́же вели́кий, жи́зни Пода́тель и Храни́тель! Благодарю́ Тебя́, ибо ми́лостью Твое́й и меня́, смире́нную рабу́ Твою́, прича́стной сде́лал благода́ти чадоро́дия, и́бо име́ю плод чре́ва. То́лько бою́сь, Го́споди, что пострада́ю, рожда́я, по греха́м мои́м, и того́ ра́ди к милосе́рдию Твоему́ прибега́ю. Не молю́ Тебя́ изба́вить меня́ у́части ро́да на́шего же́нского, ко́ему определи́л Ты в боле́знях рожда́ть ча́да, о́бщий ибо зако́н есть нам, согреши́вшим. О сем же молю́ Тебя́: когда́ приде́т час мой, дай мне осла́бу и разреше́ние нетру́дное, изба́вь от боле́зней непоси́льных. Испо́лни, Го́споди, жела́ние се́рдца моего́, вку́пе же и жела́ние супру́га моего́, ко́его дал мне Ты. Да́руй нам ра́дость рожде́ния но́вого челове́ка в мир Твой, да я́вится младе́нец цел, здрав и кре́пок, и да к тому́ не по́мним ско́рби за ра́достью, благода́тью и щедро́тами Единоро́дного Сы́на Твоего́, Кото́рый нас ра́ди воплоти́лся от пречи́стых крове́й Мари́и Де́вы, в ложесна́х носи́м был и пло́тью рожде́ние воспри́нял, Ему́же сла́ва подоба́ет со Святы́м Ду́хом во ве́ки. Ами́нь.
Молитва 1-я
О, Пресла́вная Ма́терь Бо́жия, поми́луй меня́, рабу́ Твою́, и прииди́ ко мне на по́мощь во вре́мя мои́х боле́зней и опа́сностей, с кото́рыми рожда́ют чад все бе́дные дще́ри Е́вы. Вспо́мни, о, Благослове́нная в жена́х, с како́ю ра́достью и любо́вию Ты́ шла поспе́шно в го́рнюю страну́ посети́ть сро́дницу Твою́ Елисаве́ту во вре́мя ее́ бере́менности, и како́е чуде́сное де́йствие произвело́ благода́тное посеще́ние Твое́ и в ма́тери и в младе́нце. И по неисчерпа́емому благосе́рдию Твоему́ да́руй и мне, уни́женнейшей ра́бе Твое́й, разреши́ться от бре́мени благополу́чно; да́руй мне сию́ благода́ть, что́бы дитя́, поко́ящееся тепе́рь под мои́м се́рдцем, прише́дши в чу́вство, с ра́достным взыгра́нием, подо́бно свято́му младе́нцу Иоа́нну, поклоня́лось Боже́ственному Го́споду Спаси́телю, Кото́рый из любви́ к на́м, гре́шным, не возгнуша́лся и Сам стать младе́нцем. Неизглаго́ланная ра́дость, кото́рою преиспо́лнилось де́вственное Твое́ се́рдце при воззре́нии на новорожде́нного Твоего́ Сы́на и Го́спода, да услади́т ско́рбь, предстоя́щую мне среди́ боле́зней рожде́ния. Жизнь ми́ра, мой Спаси́тель, рожде́нный Тобо́ю, да спасе́т меня́ от сме́рти, пресека́ющей жизнь мно́гих матере́й в час разреше́ния, и да причте́т плод чре́ва моего́ к числу́ избра́нных Бо́жиих. Услы́шь, Пресвята́я Цари́ца Небе́сная, смире́нную мольбу́ мою́ и при́зри на меня́, бе́дную гре́шницу, о́ком Твоея́ благода́ти; не постыди́ моего́ упова́ния на Твое́ вели́кое милосе́рдие и осени́ меня́. Помо́щница христиа́н, Исцели́тельница боле́зней, да сподо́блюсь и я́ испытать на себе́, что Ты Ма́терь милосе́рдия, и да просла́влю всегда́ Твою́ благода́ть, не отве́ргшую никогда́ моли́твы бе́дных и избавля́ющую все́х призыва́ющих Тебя́ во вре́мя ско́рби и боле́зни. Ами́нь.
Молитва 2-я
Пресвята́я Де́во, Ма́ти Го́спода на́шего Иису́са Христа́, я́же ве́си рожде́ние и естество́ ма́тере и ча́да, поми́луй рабу́ Твою́ (имя) и помози́ в час сей да разреши́тся бре́мене своего́ благополу́чно. О, всеми́лостивая Влады́чице Богоро́дице, я́же не потре́бовала еси́ по́мощи в рожде́нии Сы́на Бо́жия, пода́ждь по́мощь сей ра́бе твое́й по́мощи тре́бующей, наипа́че же от Тебе́. Да́руй ей благомо́щие в час сей, и младе́нца и́же и́мать роди́тися и вни́ти в свет ми́ра сего́ сподо́би в благопотре́бное вре́мя и у́мнаго све́та во святе́м креще́нии водо́ю и Ду́хом. Тебе́ припа́даем, Ма́ти Бо́га вы́шняго, моля́щеся: Бу́ди ми́лостива ма́ти сей, е́йже прии́де вре́мя бы́ти ма́ти, и умоли́ воплоти́вшагося из Тебе́, Христа́ Бо́га на́шего, да укрепи́т ю́ си́лою свое́ю свы́ше. Ами́нь.
Войти с помощью соц. сетей: