Акафист
святителю Питириму тамбовскому
(празднование 28 июля /10 августа)
Кондак 1
Избра́нный чудотво́рче и изря́дный уго́дниче Христо́в, святи́телю о́тче Питири́ме, всем прибега́ющим к тебе́ ско́рый помо́щниче! Сподо́би нас недосто́йными усты́ воспе́ти тебе́ сия́ похва́льная. Ты же, я́ко име́яй ве́лие дерзнове́ние ко Го́споду, от вся́ких нас бед свободи́, зову́щих: Ра́дуйся, святи́телю Питири́ме, Тамбо́вский чудотво́рче.
Икос 1
А́нгелом подража́тель и челове́ков наста́вник был еси́, святи́телю о́тче Питири́ме: от ю́ности бо возлюби́л еси́ Боже́ственное уче́ние и, сему́ после́довав, до́брому житию́ поревнова́л еси́. Сего́ ра́ди тебе́, на небеси́ и на земли́ просла́вленному, вопие́м си́це: Ра́дуйся, от рожде́ния твоего́ Бо́гом избра́нный; ра́дуйся, на служе́ние апо́стольское призва́нный. Ра́дуйся, избра́ние твое́ по́двигом благоче́стия оправда́вый; ра́дуйся, о́бразом жития́ твоего́ и нам путь к небеси́ показа́вый. Ра́дуйся, от ю́ности и́го Христо́во возлюби́вый; ра́дуйся, чистоту́ се́рдца твоего́ до конца́ сохрани́вый. Ра́дуйся, я́ко, сего́ ра́ди, еще́ сый на земли́, а́нгелом уподо́бился еси́; ра́дуйся, я́ко, сего́ ра́ди, Го́спода сла́вы всегда́ зре́ти сподо́бился еси́. Ра́дуйся, святи́телю Питири́ме, Тамбо́вский чудотво́рче.
Кондак 2
Ви́дя Благопромысли́тель Госпо́дь души́ твоея́ добро́ту, напра́ви по́мысл твой ко иска́нию еди́наго на потре́бу. Ты же, сего́ возжеле́в, еще́ из де́тства навы́кл еси́ непреста́нно взыва́ти к Бо́гу: Аллилу́иа.
Икос 2
Ра́зум боже́ственный имы́й, всю суету́ привре́менныя сла́сти презре́л еси́, о́тче Питири́ме: те́мже оста́вив мир и вся я́же в нем, измла́да прия́л еси́ о́браз а́нгельский, всего́ себе́ отда́в на служе́ние еди́ному Го́споду. Таково́е у́бо изволе́ние твое́ восхваля́юще, глаго́лем ти сицева́я: Ра́дуйся, я́ко путь пра́вый в Ца́рствие Небе́сное обре́л еси́; ра́дуйся, я́ко сим путе́м невозвра́тно шел еси́. Ра́дуйся, я́ко кра́сная ми́ра сего́ ни во что́же вмени́л еси́; ра́дуйся, я́ко, земна́я отри́нув, небе́сная возлюби́л еси́. Ра́дуйся, се́рдце твое́ при́сно ко Христу́ име́вый; ра́дуйся, Тому́ еди́ному служи́ти вожделе́вый. Ра́дуйся, ра́зум твой в послуша́ние ве́ры плени́вый; ра́дуйся, в Бо́зе благоче́стно пожи́вый. Ра́дуйся, святи́телю Питири́ме, Тамбо́вский чудотво́рче.
Кондак 3
Си́лою Бо́жиею укрепля́ем, о́тче Питири́ме, вся послуша́ния монасты́рская до́бре проходи́л еси́ в Вя́земстей оби́тели свята́го Предте́чи, ему́же подража́л еси́ по́двиги твои́ми, всегда́ взыва́я к Подвигополо́жнику всех, Спа́су Христу́: Аллилу́иа.
Икос 3
Име́я по́мысл чист, и ду́шу непоро́чну, свяще́нства благода́ть, еще́ млад сый, досто́йно восприя́л еси́, о́тче Питири́ме; те́мже, во игу́мена оби́тели избра́н был еси́ и са́ном архимандри́та почте́н, ре́вностно подвиза́яся о спасе́нии Бо́гом вруче́ннаго тебе́ слове́снаго ста́да. Сего́ ра́ди вопие́м ти си́це: Ра́дуйся, я́ко вся послуша́ния и́ноческая неле́ностно проше́л еси́; ра́дуйся, я́ко сим на высоту́ доброде́телей возше́л еси́. Ра́дуйся, красото́ смиренному́дрия и воздержа́ния; ра́дуйся, о́бразе кро́тости и послуша́ния. Ра́дуйся, целому́дрия ревни́телю; ра́дуйся, де́вства и чистоты́ храни́телю. Ра́дуйся, и́ночествующих му́дрый нача́льниче; ра́дуйся, всех, благоче́стно жи́ти хотя́щих, до́брый наста́вниче Ра́дуйся, святи́телю Питири́ме, Тамбо́вский чудотво́рче.
Кондак 4
Бу́ри злосло́вия и людска́го мяте́жа не убоя́лся еси́, о́тче Питири́ме, егда́ ико́ну преподо́бнаго Арка́диа, недо́бре пи́санную, почита́ния лиши́л еси́. Те́мже, о правове́рии ревну́я, поуча́л еси́ па́ству твою́ пра́во взыва́ти к Бо́гу: Аллилу́иа.
Икос 4
Слы́шав и ви́дев премно́гую твою́ доброде́тель, блаже́нный патриа́рх Иоаки́м святи́теля тебе́ нарече́ и па́ству Тамбо́вскую смотре́нию твоему́ вручи́. Мы же, о сем веселя́щеся, глаго́лем ти сицева́я: Ра́дуйся, вся степе́ни и́ноческаго зва́ния с че́стию и сла́вою проше́дый; ра́дуйся, на престо́ле святи́тельстем досто́йно возсе́дый. Ра́дуйся, стра́же Це́ркве Христо́вы неустраши́мый; ра́дуйся, де́лателю виногра́да Христо́ва неутоми́мый. Ра́дуйся, благовре́менне и безвре́менне па́ству твою́ поуча́вый; ра́дуйся, ко Христу́ о́вцы заблу́ждшия призва́вый. Ра́дуйся, лю́ди, во тьме седя́щия, све́том Христо́вым озари́вый; ра́дуйся, сим от поги́бели их сохрани́вый. Ра́дуйся, святи́телю Питири́ме, Тамбо́вский чудотво́рче.
Кондак 5
Боготе́чное свети́ло, путь жи́зни твоея́ озаря́ющее, бысть тебе́ уго́дник Бо́жий Проко́пий, его́же и́менем во Святе́м Креще́нии нарече́н был еси́ и к нему́же при́сно с моли́твою прибега́л еси́, поя́ Бо́гу: Аллилу́иа.
Икос 5
Ви́дел еси́, о́тче Питири́ме, твои́ма очи́ма уго́дника Бо́жия Проко́пиа, предстоя́ща пред лице́м Го́спода и к Нему́ моля́щася си́це: Безсме́ртный Бо́же, хвалу́ Тебе́ воздаю́, Царь бо еди́н еси́ всем; поми́луй ду́шу его́ и сподо́би сего́ Ца́рствия Небе́снаго. Сего́ ра́ди и мы взыва́ем к тебе́: не преста́й моли́тися о всех нас ку́пно со Проко́пием блаже́нным, да и нас сподо́бит Госпо́дь дости́гнути Небе́снаго Ца́рствия. О сем воздыха́юще, похва́льная воспева́ем ти: Ра́дуйся, очеса́ твоя́ всегда́ на не́бо возводи́вый; ра́дуйся, сла́ву небе́сную па́че всего́ возлюби́вый. Ра́дуйся, непреста́нными моли́твами се́рдце твое́ освяти́вый; ра́дуйся, мысль твою́ в Бо́зе утверди́вый. Ра́дуйся, я́ко Проко́пиа свята́го, моли́твенника дерзнове́ннаго всегда́ име́л еси́; ра́дуйся, я́ко сему́ споспешеству́ющу, в ра́дость Го́спода твоего́ вшел еси́. Ра́дуйся, я́ко в ра́йских оби́телех ны́не пребыва́еши; ра́дуйся, я́ко от го́рних высо́т и нас, многогре́шных, ми́лостивно назира́еши. Ра́дуйся, святи́телю Питири́ме, Тамбо́вский чудотво́рче.
Кондак 6
Пропове́дник ве́ры правосла́вныя и ревни́тель благоче́стия сло́вом и житие́м твои́м был еси́, святи́телю Питири́ме. Те́мже духо́вная па́ства твоя́ непреста́нно па́мятует и вся Росси́йская страна́ досто́йно ны́не прославля́ет труды́ твоя́, и́миже трудился еси́, при́сно взыва́я ко Го́споду: Аллилу́иа.
Икос 6
Возсия́л еси́ во Це́ркви Тамбо́встей све́том Христо́ва уче́ния и ре́вностию твое́ю о сла́ве Бо́жией, святи́телю о́тче Питири́ме: ты бо, красоту́ Госпо́дню возлюби́в, о устрое́нии хра́мов святы́х и о благочи́нии церко́внем всеусе́рдно прилежа́л еси́. Сего́ ра́ди воспева́ем ти си́це: Ра́дуйся, сла́вы Христо́вы ревни́телю; ра́дуйся, хра́мов святы́х строи́телю. Ра́дуйся, благочи́ния церко́внаго стро́гий блюсти́телю; ра́дуйся, чте́ния и пе́ния боже́ственнаго иску́сный учи́телю. Ра́дуйся, я́ко тобо́ю Це́рковь Ру́сская благоукраси́ся; ра́дуйся, я́ко в ней ве́ра Христо́ва тобо́ю утверди́ся. Ра́дуйся, гра́да Тамбо́ва сла́во и украше́ние; ра́дуйся, всем нам защи́то и огражде́ние. Ра́дуйся, святи́телю Питири́ме, Тамбо́вский чудотво́рче.
Кондак 7
Хотя́й невозбра́нно возноси́тися ду́хом в го́рняя селе́ния, безмо́лвие пусты́ни возлюби́л еси́, о́тче Питири́ме, иде́же мно́ги дни в посте́ и моли́тве подвиза́лся еси́, о́вогда же со святи́телем Митрофа́ном, дру́гом твои́м, бесе́довал еси́, воспева́я с ним ку́пно хвале́бную песнь: Аллилу́иа.
Икос 7
Но́вую оби́тель в ме́сте пусты́ннем, я́коже ти́хую при́стань, во сла́ву Предте́чи Госпо́дня созда́в и в само́м гра́де Тамбо́ве с сестро́ю твое́ю Екатери́ною оби́тель же́нскую устро́ив, сим яви́л еси́ нам, о́тче Питири́ме, ве́лию твою́ любо́вь ко оби́телем святы́м. Сего́ ра́ди воспева́ем ти похва́льная сия́: Ра́дуйся, Предте́чу Госпо́дня возлюби́вый и тому́ в житии́ твое́м поревнова́вый; ра́дуйся, стро́гий по́двиг благоче́стия в себе́ показа́вый. Ра́дуйся, пусты́ни безмо́лвия люби́телю; ра́дуйся, поста́ и моли́твы стро́гий блюсти́телю. Ра́дуйся, Тамбо́вския де́бри и леса́ моли́твою твое́ю облагоуха́вый; ра́дуйся, оби́тель и́ноком та́мо основа́вый. Ра́дуйся, святи́теля Митрофа́на дру́же и собесе́дниче; ра́дуйся, во Ца́рствии Небе́снем тому́ сонасле́дниче. Ра́дуйся, святи́телю Питири́ме, Тамбо́вский чудотво́рче.
Кондак 8
Стра́нника и прише́льца в ми́ре сем помышля́л еси́ себе́, о́тче Питири́ме. Те́мже, небе́сная возлюби́в, сокро́вище некрадо́мое сокро́виществовал еси́, гряду́щаго гра́да взыску́я и ко Го́споду ра́достно взыва́я: Аллилу́иа.
Икос 8
Весь испо́лнь любве́ Христо́вы, ду́шу твою́ за о́вцы твоя́ положи́ти гото́в был еси́, спасе́ние всем устроя́я и всем во всем угожда́я, не иски́й своея́, но мно́гих по́льзы, да вся́ко не́кия спасе́ши. Сего́ ра́ди чтим святу́ю па́мять твою́ и усе́рдно вопие́м ти: Ра́дуйся, о́тче благосе́рдый, о спасе́нии мно́гих ревнова́вый; ра́дуйся, не свои́х си, но бли́жняго иска́вый. Ра́дуйся, па́стырю до́брый, на па́житех ту́чных ча́да твоя́ духо́вная пита́вый; ра́дуйся, стра́же неусы́пный, от волко́в хи́щных о́вцы твоя́ охраня́вый. Ра́дуйся, ни́щих корми́телю и гла́дных пита́телю; ра́дуйся, си́рых защи́тниче и оби́димых предста́телю. Ра́дуйся, я́ко и ны́не во вся́ких ну́ждах ско́ро нам помога́еши; ра́дуйся, я́ко и ны́не всех, с ве́рою к тебе́ притека́ющих, ми́лостивно утеша́еши. Ра́дуйся, святи́телю Питири́ме, Тамбо́вский чудотво́рче.
Кондак 9
Всяк во́зраст и вся́ко сосло́вие еще́ в житии́ твое́м велича́ху тя, я́ко челове́ка Бо́жия, и в час кончи́ны твоея́ вся па́ства твоя́ пла́каше о тебе́, я́ко о отце́ свое́м. Зря́щи же тя погреба́ема и но́ваго предста́теля на небеси́ име́ти упова́ющи, с рыда́нием, ку́пно же и благода́рным се́рдцем, возглаша́ше о тебе́ надгро́бную песнь: Аллилу́иа.
Икос 9
Вети́йство челове́ческое не довле́ет ко прославле́нию мно́гих чуде́с твои́х, святи́телю Питири́ме: но́вая бо купе́ль Силоа́мская откры́ся всем стра́ждущим во исто́чнице твое́м, рука́ма твои́ма ископа́ннем; та́же и ри́за твоя́ честна́я, на не́дужныя полага́ема, да́рует им исцеле́ние, и гроб твой святы́й яви́ся вои́стину неоску́дная враче́бница: никто́же бо, с ве́рою к нему́ притека́яй, тощ и неуте́шен отхо́дит. Сего́ ра́ди гла́сы хвале́бными тя сла́вим: Ра́дуйся, врачу́ безме́здный, ту́не врачева́ния всем подава́яй; ра́дуйся, сосу́де драгоце́нный, целе́бное ми́ро всем ве́рным бога́тно излива́яй. Ра́дуйся, глухи́х слы́шание и слепы́х прозре́ние; ра́дуйся, хромы́х хожде́ние и сляче́нных исправле́ние. Ра́дуйся, разсла́бленных укрепи́телю; ра́дуйся, беснова́тых от наси́лия диа́вольскаго свободи́телю. Ра́дуйся, лише́нным смы́сла ум здра́вый подава́яй; ра́дуйся, в со́ниих и виде́ниих по́мощь твою́ явля́яй. Ра́дуйся, святи́телю Питири́ме, Тамбо́вский чудотво́рче.
Кондак 10
Спасти́ хотя́ па́ству твою́, о́тче Питири́ме, не суди́л еси́ ве́дети в ней и́но что, то́чию Иису́са Христа́, и Сего́ ра́спята. Сего́ ра́ди поста́вил еси́ о́браз распя́тия Го́спода, зна́мение на́шего спасе́ния, на врате́х гра́да, да вси мимоходя́щии покланя́ются ему́, воспева́юще хвале́бную песнь: Аллилу́иа.
Икос 10
Стены́ необори́мыя и Засту́пницы ро́да христиа́нскаго ико́ну ди́вную гра́ду Тамбо́ву дарова́л еси́, о́тче Питири́ме, от нея́же додне́сь всем с ве́рою приходя́щим то́ки чуде́с изливаются. Сего́ ра́ди благода́рне взыва́ем ти си́це: Ра́дуйся, все упова́ние твое́ на Ма́терь Бо́жию возложи́вый; ра́дуйся, и град твой покро́ву Тоя́ вручи́вый. Ра́дуйся, ико́ну Ея́ святу́ю в щит и огражде́ние гра́ду поста́вивый; ра́дуйся, зало́г любве́ твоея́ ико́ну Богома́тере па́стве оста́вивый. Ра́дуйся, я́ко ико́ною то́ю чудеса́ мно́га содева́ются; ра́дуйся, я́ко ми́лости Бо́жия от нея́ непреста́нно излива́ются. Ра́дуйся, Богоро́дицу нам указа́вый от всех бед избавле́ние; ра́дуйся, я́ко ми́лостию Ея́ ты еси́ на́ша ра́дость и утеше́ние. Ра́дуйся, святи́телю Питири́ме, Тамбо́вский чудотво́рче.
Кондак 11
Пе́ние немо́лчное да́же додне́сь соверша́ется у святе́й ико́ны твое́й, уго́дниче Бо́жий Питири́ме: мно́зи бо, в ну́ждах су́щии, ве́дят тя помо́щника благопоспешли́ва и моли́твенника благоуве́тлива. Те́мже ны́не вся Росси́йская земля́ благода́рне вопие́т просла́вльшему тя Бо́гу: Аллилу́иа.
Икос 11
Свети́льник светоза́рен был еси́ в земне́м житии́ твое́м, о́тче наш Питири́ме, благода́тно озаря́я ду́ши ве́рных. Просвети́ у́бо моли́твами твои́ми о́чи душе́вныя и нам, в пучи́не греха́ погиба́ющим, да благода́рне вопие́м ти: Ра́дуйся, вели́кий уго́дниче Бо́жий, благоче́стную жизнь на земли́ возлюби́вый; ра́дуйся, ве́ру, наде́жду и любо́вь да́же до конца́ сохрани́вый. Ра́дуйся, свети́льниче многосве́тлый, све́том и́стиннаго богопозна́ния нас озаря́яй; ра́дуйся, луче́ Со́лнца пра́вды, теплото́ю Боже́ственныя любве́ ду́ши на́ша согрева́яй. Ра́дуйся, би́сере честны́й, сия́нием небе́сныя сла́вы сердца́ на́ша увеселя́яй; ра́дуйся, ка́меню драги́й, страну́ на́шу правосла́вную украша́яй. Ра́дуйся, я́ко тобо́ю бе́здну милосе́рдия Бо́жия призыва́ем; ра́дуйся, я́ко тобо́ю спасе́ние ве́чное получи́ти упова́ем. Ра́дуйся, святи́телю Питири́ме, Тамбо́вский чудотво́рче.
Кондак 12
Благода́ть от Бо́га ти да́нную ве́дяще, ны́не приле́жно мо́лим тя, святи́телю Питири́ме: проле́й те́плую о нас моли́тву ко Го́споду, да сохрани́т Це́рковь Свою́ Святу́ю неврежде́ну от е́ресей и раско́лов и вся правосла́вныя да поми́лует и спасе́т, вопию́щия Ему́: Аллилу́иа.
Икос 12
Пою́ще твое́ богоуго́дное житие́, о́тче Питири́ме, и на небеси́ от Бо́га прославле́ние, велича́ем безчи́сленная чудеса́ и исцеле́ния твоя́, и на неусы́пныя моли́твы твоя́ упова́юще, взыва́ем ти сицева́я: Ра́дуйся, храм Преображе́ния Госпо́дня благоле́пен устро́ивый; ра́дуйся, ве́чное поко́ище себе́ в нем предугото́вавый. Ра́дуйся, житие́ твое́ земно́е благоче́стне сконча́вый; ра́дуйся, от Царя́ Небе́снаго вене́ц сла́вы прие́мый. Ра́дуйся, апо́столов собесе́дниче; ра́дуйся, святи́телей сопресто́льниче и сонасле́дниче. Радуйся, арха́нгелов и а́нгелов сослужи́телю; ра́дуйся, всех Небе́сных Сил сожи́телю. Ра́дуйся, святи́телю Питири́ме, Тамбо́вский чудотво́рче.
Кондак 13
О пресла́вный чудотво́рче, уго́дниче Бо́жий Питири́ме! Приими́ сие́ от любве́ на́шея приноси́мое тебе́ благохвале́ние и твои́м благоприя́тным хода́тайством изба́ви нас от вся́ких бед и зол, от внеза́пныя сме́рти и бу́дущия му́ки, да сподо́бимся ку́пно с тобо́ю во ве́ки пе́ти: Аллилу́иа.
Этот кондак читается трижды, затем 1-й икос «А́нгелом подража́тель…» и 1-й кондак «Избра́нный чудотво́рче…»
Молитва
О великий уго́дниче Бо́жий и пресла́вный чудотво́рче, святи́телю Питири́ме! К тебе́ смире́нно припа́даем и усе́рдно мо́лимся: яви́ нам, гре́шным, любо́вь твою́ оте́ческую и многомо́щное твое́ заступле́ние. Ве́руем бо, я́ко ве́лие дерзнове́ние и́маши ко Го́споду и я́ко мно́го мо́жет предста́тельство твое́ пред Престо́лом бла́гости Его́. Сохрани́ моли́твами твои́ми Це́рковь Святу́ю от е́ресей и раско́лов, от суеве́рия и неве́рия. Испроси́ нам ве́ру пра́ву, наде́жду несомне́нну, любо́вь нелицеме́рну, в до́брых де́лех преспе́яние, во искуше́ниих му́жество, в злострада́ниих терпе́ние, в моли́твах постоя́нство, мир и благоустрое́ние стране́ на́шей, здра́вие же и спасе́ние лю́дем ея́. При́зри ми́лостивно на предстоя́щия и моля́щияся пред свято́ю ико́ною твое́ю и вся проше́ния их во бла́го испо́лни, и всем вся в жи́зни вре́менней и ве́чней потре́бная да́руй, во сла́ву ди́внаго во святы́х Свои́х Бо́га, в Тро́ице сла́вимаго и покланя́емаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
