Акафист
святой равноапостольной великой княгине российской Ольге
(празднование 11/24 июля)
Кондак 1
Первоизбра́нней от всего́ росси́йскаго ро́да, сла́вней и равноапо́стольней уго́днице Бо́жией О́льге соста́вим похвалу́, я́ко заре́, во тьме идолопоклоне́ния све́том ве́ры возсия́вшей и путь ко Христу́ всем россиа́ном показа́вшей. Ты же, я́ко иму́щая дерзнове́ние к просла́вльшему тя Го́споду, огражда́й нас от вся́ких бед моли́твами твои́ми, да зове́м ти: Ра́дуйся, свята́я равноапо́стольная княги́не О́льго богому́драя.
Икос 1
А́нгелов и челове́ков Творе́ц, времена́ и ле́та во Свое́й вла́сти положи́вый и судьбы́ царств и наро́дов по Свое́й во́ли управля́яй, егда́ восхоте́ род росси́йский Святы́м Креще́нием просвети́ти, тогда́, ви́дя благо́е изволе́ние се́рдца твоего́, призва́ тя пе́рвее в позна́ние Себе́, да бу́деши всем россиа́ном о́браз и наста́вница в христиа́нстей ве́ре. Сего́ ра́ди восхваля́ем тя си́це: Ра́дуйся, росси́йскаго небесе́ у́тренняя звездо́, от первозва́ннаго апо́стола на гора́х Ки́евских предвозвеще́нная; ра́дуйся, заре́, во мра́це неве́дения све́тло возблиста́вшая. Ра́дуйся, до́брая лозо́ виногра́да Христо́ва, от ди́вия язы́ческаго ко́рене прозя́бшая; ра́дуйся, пречу́дная летора́сле, из нея́же ве́лие правове́рия дре́во на земли́ на́шей возрасте́. Ра́дуйся, первоучи́тельнице и просвети́тельнице на́ша; ра́дуйся, я́ко тобо́ю позна́хом поклоня́тися в Тро́ице Творцу́. Ра́дуйся, я́ко тебе́ ра́ди пресвято́е и́мя Госпо́дне от всех россиа́н прославля́ется; ра́дуйся, я́ко и твое́ пресла́вное и́мя вку́пе с равноапо́стольным Влади́миром во всех преде́лех ми́ра восхваля́ется. Ра́дуйся, страны́ на́шея Росси́йския духо́вное сокро́вище; ра́дуйся, всея́ Христо́вы Це́ркве пресла́вное украше́ние. Ра́дуйся, градо́в Ки́ева и Пско́ва изря́дная добро́то; ра́дуйся, лю́дем на́шим на враги́ блага́я помо́щнице. Ра́дуйся, свята́я равноапо́стольная княги́не О́льго богому́драя.
Кондак 2
Ви́дяще тя, свята́я О́льго, я́ко крин в те́рнии прозя́бший: ты бо а́ще и в ро́де язы́честем рожде́на была́ еси́, оба́че зако́н Бо́жий в се́рдце твое́м напи́сан всегда́ име́ла еси́ и целому́дрие твое́ я́ко зе́ницу о́ка блюла́ еси́; благода́рно пое́м ди́вному во святы́х Свои́х Бо́гу: Аллилу́иа.
Икос 2
Разумо́м твои́м вся до́бре ве́дящи, позна́ла еси́, богому́драя О́льго, я́ко и́доли, рука́ма челове́ческима сотворе́ннии, не суть бо́зи; те́мже, отве́ргши ты́я, потща́лася еси́ позна́ти Бо́га и́стиннаго. Сего́ ра́ди, похваля́юще сицево́е твое́ благоразу́мие, вопие́м ти си́це: Ра́дуйся, до́брая жено́, пе́рвее всех заблужде́ние россиа́н позна́вшая и тще́ту идолопоклоне́ния разуме́вшая; ра́дуйся, и́стиннаго богопозна́ния и пра́выя ве́ры усе́рдно иска́вшая. Ра́дуйся, еще́ не ве́дущи и́стиннаго Бога, я́коже Корни́лий со́тник, до́брыми де́лы Тому́ угожда́вшая; ра́дуйся пре́жде разуме́ния зако́на Бо́жия по зако́ну со́вести пра́ведно жи́вшая. Ра́дуйся, пре́жде прия́тия христиа́нския ве́ры дела́, христиа́ном подоба́ющая, твори́вшая; ра́дуйся, держа́ву твою́ от наше́ствия супоста́т му́жественно защити́вшая. Ра́дуйся, в подчине́нных ти лю́дех суды́ пра́ведныя твори́вшая; ра́дуйся, прему́дростию от Бо́га одаре́нная. Ра́дуйся, ца́рственною сла́вою на земли́ и на небеси́ почте́нная; ра́дуйся, я́ко равноапо́стольная от Бо́га просла́вленная. Ра́дуйся, свята́я равноапо́стольная княги́не О́льго богому́драя.
Кондак 3
Си́лою благода́ти Бо́жией дви́жима, потща́лася еси́, богому́драя О́льго, дости́гнути Царьгра́да, иде́же зря́щи красоту́ церко́внаго благоле́пия и послу́шающи уче́ния слове́с Боже́ственных, распала́лася еси́ всем се́рдцем твои́м в любо́вь Христо́ву, благода́рственно вопию́щи Ему́: Аллилу́иа.
Икос 3
Име́ющи се́рдце я́ко до́брую зе́млю, удо́бь восприя́ла еси́, О́льго, се́мя святы́я ве́ры, позна́вши Христа́ Бо́га и́стиннаго. Те́мже и Креще́ние Свято́е прия́ла еси́ от руку́ патриа́рха Царьгра́да, и́же и предрече́ ти, я́ко отны́не блажи́ти тя и́мут росси́йстии сы́нове. Испо́лнити у́бо хотя́ще прорече́ние сие́, взыва́ем ти си́це: Ра́дуйся, тьму идолослуже́ния оста́вльшая; ра́дуйся, свет богопозна́ния взыска́вшая. Ра́дуйся, безконе́чныя па́губы ве́рою избежа́вшая; ра́дуйся, жизнь ве́чную во Христе́ стяжа́вшая. Ра́дуйся, в купе́ли Свята́го Креще́ния от скве́рны грехо́вныя омы́вшаяся; ра́дуйся, благода́тию Свята́го Ду́ха духо́вно роди́вшаяся. Ра́дуйся, разу́мная го́рлице, от когте́й душепа́губнаго вра́на излете́вшая; ра́дуйся, под криле́ Орла́ Небе́снаго прилете́вшая. Ра́дуйся, мно́жество душ креще́нием с собо́ю ко Христу́ приве́дшая; ра́дуйся, сего́ ра́ди сугу́бое воздая́ние от Бо́га получи́вшая. Ра́дуйся, с ве́рою несумне́нною приходя́щих све́том от честны́х твои́х моще́й осиява́ющая; ра́дуйся, душа́м и телесе́м тех, я́же на по́льзу, подава́ющая. Ра́дуйся, свята́я равноапо́стольная княги́не О́льго богому́драя.
Кондак 4
Ка́ко не диви́мся благоразу́мию твоему́, О́льго преблаже́нная, ты бо предложе́ние царя́ е́ллинов о бра́це с ним разу́мно отве́ргла еси́, ре́кши тому́: «Не бра́ка ра́ди приидо́х се́мо и не соца́рствования ра́ди с тобо́ю, но да уневе́щуся креще́нием Безсме́ртному Жениху́ Христу́ Бо́гу: Его́же па́че всего́ возлюби́ душа́ моя́ и Ему́ же отны́не во ве́ки не преста́ну воспева́ти: Аллилу́иа».
Икос 4
Слы́шавши от крести́вшаго тя патриа́рха напу́тственное сло́во о чистоте́, посте́, моли́тве и о всех доброде́телех, христиа́ном подоба́ющих, слага́ла еси́ сия́ в се́рдцы твое́м, де́лы вся та исполня́ти обеща́ющи. Те́мже у́бо по до́лгу воспева́ем ти си́це: Ра́дуйся, усе́рдная слы́шательнице слове́с Боже́ственных; ра́дуйся, ре́вностная исполни́тельнице зако́на христиа́нскаго. Ра́дуйся, ни́ву се́рдца твоего́ от те́рния душевре́дных страсте́й очи́стившая; ра́дуйся, слеза́ми покая́ния ороси́вшая ю́. Ра́дуйся, я́ко се́мя сло́ва Бо́жия в се́рдцы твое́м, я́ко на земли́ до́брей, укорени́ся; ра́дуйся, я́ко се́мя сие́ прозябе́ и стори́чный плод благи́х дел принесе́. Ра́дуйся, вдо́вственную твою́ чистоту́ непоро́чно сохрани́вшая; ра́дуйся, воздержа́нием и моли́твою Бо́гу угоди́вшая. Ра́дуйся, ми́лостынею Творца́ уми́лостивившая, ни́щия и убо́гия потре́бами снабди́вшая; ра́дуйся, просвеще́ние земли́ Росси́йския све́том Христо́ва уче́ния прови́девшая. Ра́дуйся, свята́я равноапо́стольная княги́не О́льго богому́драя.
Кондак 5
Боготка́нною оде́ждою Свята́го Креще́ния обле́кшися и нетле́нною пи́щею Пречи́стаго Те́ла и Кро́ве Христо́вы духо́вно укре́пльшися, О́льго преблаже́нная, не убоя́лася еси́ потещи́ к неве́рным сооте́чественником твои́м, пре́дком на́шим, пропове́дати им Еди́наго И́стиннаго Бо́га, Ему́же ны́не вся Росси́а, я́ко еди́неми усты́, воспева́ет: Аллилу́иа.
Икос 5
Ви́девши, свята́я О́льго, вся лю́ди земли́ Росси́йския во тьме идолослуже́ния погруже́нныя, усе́рдно потща́лася еси́ просвети́ти ты́я све́том Христо́вы ве́ры и сотвори́ти я́ сы́ны дне и насле́дники Ца́рствия Небе́снаго. Помина́юще у́бо сицево́е твое́ попече́ние о них, благода́рственно зове́м ти: Ра́дуйся, прему́драя власти́тельнице наро́да росси́йскаго; ра́дуйся, до́брая наста́вница вве́реннаго ти ста́да. Ра́дуйся, пе́рвей христиа́нстей цари́це Еле́не в ре́вности Боже́ственней подража́вшая; ра́дуйся, и и́мя тоя́ во Святе́м Креще́нии прия́вшая. Ра́дуйся, честны́й Крест Христо́в и святы́я ико́ны из Царьгра́да во град Ки́ев прине́сшая; ра́дуйся, иере́и и кли́рики с собо́ю в Росси́ю приве́дшая. Ра́дуйся, му́дрыми твои́ми глаго́лы поуча́вшая лю́ди оста́вити тьму язы́ческаго нече́стия и восприя́ти свет христиа́нскаго благоче́стия; ра́дуйся, мно́гия россиа́ны све́том ве́ры Христо́вы просвети́вшая. Ра́дуйся, нача́ло просвеще́ния всея́ земли́ Росси́йския положи́вшая; ра́дуйся, гра́ды росси́йския пропове́данием Христо́ва уче́ния огласи́вшая. Ра́дуйся, пе́рвая от земли́ Росси́йския ли́ку святы́х причте́нная. Ра́дуйся, свята́я равноапо́стольная княги́не О́льго богому́драя.
Кондак 6
Пропове́дником духоно́сным апо́столом подража́вши, О́льго богому́драя, обходи́ла еси́ гра́ды и ве́си держа́вы твоея́, приводя́щи, ели́ко мо́щно бе, лю́ди к ве́ре Христо́вой и науча́ющи их воспева́ти Еди́ному в Тро́ице сла́вимому Бо́гу: Аллилу́иа.
Икос 6
Утвержда́я в держа́ве твое́й нача́ток ве́ры христиа́нския, создала́ еси́ хра́мы Бо́жии во гра́де Ки́еве и в стране́ рожде́ния твоего́, при реце́ Вели́цей у гра́да Пско́ва. И та́ко нача́ша россиа́не прославля́ти повсю́ду Христа́ Бо́га на́шего, тебе́ же, просвети́тельнице свое́й, похва́льная воспева́ти: Ра́дуйся, я́ко от чи́стаго исто́чника Святы́я Собо́рныя и Апо́стольския Це́ркве чи́стое уче́ние прия́ла еси́; ра́дуйся, я́ко тем нас научи́ла еси́ позна́ти Еди́наго и́стиннаго Бо́га. Ра́дуйся, и́дольских тре́бищ и куми́ров низложи́тельнице; ра́дуйся, святы́х Бо́жиих хра́мов созда́тельнице. Ра́дуйся, я́коже и первозва́нный апо́стол, с про́поведию Ева́нгелия зе́млю Ру́сскую обходи́вшая; ра́дуйся, Вели́кому Новугра́ду и про́чим росси́йским градо́м Христо́во в мир прише́ствие благовествова́вшая. Ра́дуйся, на месте́х про́поведи твоея́ Честны́я Кресты́ водрузи́вшая; ра́дуйся, от ни́хже мно́гая зна́мения и чудеса́, увере́ния ра́ди неве́рных, си́лою Бо́жиею содева́хуся. Ра́дуйся, я́ко тобо́ю Всеблаги́й Госпо́дь сыново́м росси́йским позна́ние Свое́ яви́л есть; ра́дуйся, я́ко чрез них и про́чия мно́гия наро́ды све́том ве́ры просвети́л есть. Ра́дуйся, я́ко от ко́рене твоего́ честна́го Госпо́дь свята́го равноапо́стольнаго кня́зя Влади́мира показа́л нам есть; ра́дуйся, я́ко о́бразом жити́я твоего́ святы́й князь Влади́мир подви́гся прия́ти христиа́нскую ве́ру. Ра́дуйся, свята́я равноапо́стольная княги́не О́льго богому́драя.
Кондак 7
Хотя́щи изба́вити сы́на твоего́ Святосла́ва от па́губы ве́чныя, приле́жно увещева́ла еси́ его́ оста́вити почита́ние и́долов и ве́ровати в Бо́га и́стиннаго. Но той не внят ма́тернему наказа́нию твоему́ и не восхоте́ нече́стие свое́ премени́ти на благоче́стие. Те́мже, я́ко неве́рный, отчужди́ся жи́зни ве́чныя и не сподо́бися с тобо́ю в Го́рнем Ца́рствии воспева́ти: Аллилу́иа.
Икос 7
Но́вое зна́мение благоволе́ния Своего́ яви́ тебе́ Госпо́дь, егда́, во о́браз Пресвяты́я Тро́ицы, три пресве́тлыя луча́ с небесе́ облиста́ на ме́сте дубра́вне, и́хже не то́чию еди́на ты зре́ла еси́, но и вси су́щии та́мо лю́дие ви́деша, и вку́пе с тобо́ю просла́виша Триеди́наго Бо́га. Мы же, ве́дуще сбы́тие прорече́ния твоего́ о созда́нии на ме́сте о́ном хра́ма Живонача́льныя Тро́ицы и гра́да, ублажа́ем тя си́це: Ра́дуйся, вели́кая Бо́жия уго́днице; ра́дуйся, да́ра проро́чествия от Него́ сподо́бльшаяся. Ра́дуйся, трисия́ннаго небе́снаго све́та зри́тельнице; ра́дуйся, всеблаги́я во́ли Бо́жией о просвеще́нии наро́да ру́сскаго пе́рвая исполни́тельнице. Ра́дуйся, гра́да Пско́ва нача́льная основа́тельнице; ра́дуйся, всея́ Росси́йския держа́вы засту́пнице и покрови́тельнице. Ра́дуйся, я́ко изволе́нием Бо́жиим держа́ва Росси́йская ны́не от мо́ря до мо́ря распространи́ся; ра́дуйся, я́ко вся гра́ды и ве́си ея́ мно́жеством хра́мов Бо́жиих украси́шася. Ра́дуйся, я́ко в хра́мех сих святи́тели и иере́и Безкро́вную Же́ртву о лю́дех Бо́гу прино́сят; ра́дуйся, я́ко со́нмы и́ночествующих по всему́ лицу́ земли́ Росси́йския единоду́шно хвалу́ Святе́й Тро́ице воспева́ют. Ра́дуйся, я́ко обита́телие гра́да Ки́ева и Пско́ва сугу́бо тя превозно́сят и ублажа́ют; ра́дуйся, я́ко и вси правосла́внии россиа́не с лет дре́вних тя почита́ют и прославля́ют. Ра́дуйся, свята́я равноапо́стольная княги́не О́льго богому́драя.
Кондак 8
Стра́нствия земна́го тече́ние скончава́я, те́пле Го́спода моли́ла еси́, О́льго блаже́нная, да не оста́вит Он зе́млю Росси́йскую по преставле́нии твое́м во тьме неве́дения пребыва́ти, но да просвети́т ю́ све́том святы́я ве́ры и вся сыны́ росси́йския да научи́т воспева́ти: Аллилу́иа.
Икос 8
Вся объя́та бы́вши благода́тию Боже́ственною, достохва́льная О́льго, мы́сленными очесы́ зре́ла еси́ просвеще́ние всего́ наро́да твоего́ и проро́чески предрекла́ еси́, я́ко мно́зи вели́ции уго́дницы Бо́жии, я́ко звезды́ све́тлыя, в земли́ Росси́йстей возсия́ют, е́же и сбы́стся изволе́нием и благода́тию Всемогу́щаго Бо́га. Сего́ ра́ди по до́лгу воспева́ем ти си́це: Ра́дуйся, духо́вная на́ша ма́ти, испроси́вшая у Бо́га просвеще́ние пра́отцем на́шим; ра́дуйся, я́ко Всеблаги́й Госпо́дь, зря добро́ту души́ твоея́, тебе́ ра́ди вся лю́ди ру́сския возлюби́. Ра́дуйся, я́ко тя обре́те Христо́с досто́ин сосу́д, чрез него́же нача́ излива́ти благода́ть Свою́ земли́ Росси́йстей; ра́дуйся, я́ко ты предугото́вала еси́ лю́ди твоя́ к прия́тию ве́ры и благода́ти Христо́вы. Ра́дуйся, я́ко прозорли́во предзре́ла еси́ вели́чие и сла́ву держа́вы твоея́; ра́дуйся, я́ко весели́лася еси́ о предви́денном тобо́ю благоче́стии сыно́в росси́йских. Ра́дуйся, я́ко по прорече́нию твоему́, мно́зи святи́и от ро́да на́шего возсия́ша; ра́дуйся, до́ма Живонача́льныя Тро́ицы, устрои́тельнице. Ра́дуйся, моли́твами твои́ми в ско́рбех и напа́стех нас заступа́ющая; ра́дуйся, во обстоя́ниих злых Оте́чество на́ше сохраня́ющая и от враго́в избавля́ющая. Ра́дуйся, свята́я равноапо́стольная княги́не О́льго богому́драя.
Кондак 9
Вся́ких доброде́телей испо́лнена бы́вши, О́льго блаже́нная, с моли́твою во усте́х предала́ еси́ дух твой в ру́це Бо́жии, И́же всели́ тя в небе́сныя оби́тели и пе́рвую от россиа́н сопричте́ ли́ку равноапо́стольных уго́дников Свои́х. Те́мже испроси́ и нам у Го́спода ми́рную христиа́нскую кончи́ну, да предади́м ду́ши на́ша в ру́це Христа́ Бога́ на́шего, пою́ще Тому́ хвале́бную песнь: Аллилу́иа.
Икос 9
Вети́и многовеща́ннии не мо́гут досто́йно восхвали́ти тя, О́льго богому́драя: ка́ко ты, ники́им же от челове́к учи́ма и увещева́ема, позна́ла еси́ тщету́ идолослуже́ния, пра́выя же ве́ры взыска́ла еси́ и, я́коже равноапо́стольная Еле́на, обрела́ еси́ безце́нный би́сер, Христа́, Его́же лицезре́ния на небеси́ наслажда́яся ны́не, не забу́ди нас, пре́лестьми ми́ра сего́ омрача́емых и о бла́гах ве́чных забыва́ющих, да, тобо́ю на путь пра́вый наставля́еми, взыва́ем ти ра́достно: Ра́дуйся, до́брыми твои́ми де́лы и пра́вым ума́ и се́рдца изволе́нием приугото́вившая себе́ в жили́ще Боже́ственныя благода́ти; ра́дуйся, я́ко Сам Дух Святы́й учи́тель тебе́ бысть к позна́нию Христа́ Сы́на Бо́жия. Ра́дуйся, ники́ихже зна́мений и чуде́с ви́девшая и во Христа́ ве́ровавшая; ра́дуйся, таково́ю ве́рою твое́ю мно́гих гони́телей и мучи́телей, ви́девших зна́мения и чудеса́ и не ве́ровавших, посрами́вшая. Ра́дуйся, води́тельству Свята́го Ду́ха себе́ преда́вшая; ра́дуйся, соверше́нную поко́рность во́ле Бо́жией показа́вшая. Ра́дуйся, зва́вшему тя гла́су благода́ти послу́шна яви́вшаяся; ра́дуйся, с единонаде́сятаго часа́ в вертогра́де Госпо́днем потруди́вшаяся и мзду с пе́рвыми получи́вшая. Ра́дуйся, я́ко умудри́ тя Госпо́дь честь ца́рскую, бога́тство и сла́ву сочета́ти со смире́нием христиа́нским; ра́дуйся, я́ко сим о́бразом я́ве нам показа́вшая, я́ко бла́га земны́я не суть препя́тие души́ боголюби́вей к достиже́нию благ небе́сных. Ра́дуйся, добро́тою целому́дрия и све́тлостию разуме́ния просла́вившаяся; ра́дуйся, кре́постию ве́ры и целому́дренною чистото́ю жития́ твоего́ проро́чества дар от Бо́га восприя́вшая. Ра́дуйся, свята́я равноапо́стольная княги́не О́льго богому́драя.
Кондак 10
Путь спасе́ния сыново́м росси́йским устроя́я и предсме́ртное проше́ние твое́ исполня́я, Всеблаги́й Госпо́дь возрасти́ во вну́це твое́м Влади́мире все́янное тобо́ю се́мя ве́ры и чрез него́ всю зе́млю Росси́йскую просвети́ Святы́м Креще́нием. Те́мже у́бо прославля́ем тя, О́льго блаже́нная, я́ко пе́рвую вино́вницу просвеще́ния на́шего све́том святы́я ве́ры, и уми́льно пое́м Христу́ Спаси́телю на́шему: Аллилу́иа.
Икос 10
Прия́в Свято́е Креще́ние, внук твой Влади́мир, потща́ся изъя́ти из земли́ нетле́нныя мо́щи твоя́, чу́днаго благоуха́ния испо́лненныя, и со святи́телем Лео́нтием и всем мно́жеством наро́да поста́ви я́ в це́ркве Пречи́стыя Богома́тери, и отто́ле нача́ша источа́тися от них цельбы́ вся́ким неду́гом, притека́ющим с ве́рою. Сего́ ра́ди восхваля́ем тя си́це: Ра́дуйся, я́ко благода́ть Свята́го Ду́ха, в тя все́льшаяся, подаде́ нетле́ние моще́м твои́м; радуйся, я́ко сотвори́ в моще́х твои́х цельбопода́тельный исто́чник на вся́кия неду́ги. Ра́дуйся, чу́дное сия́ние от моще́й твои́х испуска́вшая; ра́дуйся, с малове́рием к ним приходя́щих ви́дети я́ не попуска́вшая. Ра́дуйся, явле́нием моще́й твои́х младе́нствовавшую Це́рковь Росси́йскую возвесели́вшая; ра́дуйся, прославле́нием их вну́ка твоего́ Влади́мира зело́ обра́довавшая. Ра́дуйся, я́ко и до ны́не благочести́вии лю́дие земли́ Росси́йския сла́вною па́мятию твое́ю услажда́ются; ра́дуйся, я́ко твои́м к Бо́гу хода́тайством ве́рнии россиа́не мно́гих благ от Го́спода сподобля́ются. Ра́дуйся, моли́твами твои́ми о просвеще́нии земли́ Росси́йския Бо́га умоли́вшая; ра́дуйся, вско́ре мно́гим вели́ким святы́м яви́тися на земли́ Росси́йстей проре́кшая. Ра́дуйся, свята́я равноапо́стольная княги́не О́льго богому́драя.
Кондак 11
Пе́ние умиле́нное прино́сим ти, уго́днице Бо́жия, и смире́нно тя мо́лим: моли́ о нас Еди́наго Человеколю́бца Бо́га, да не отврати́т лица́ Своего́ от нас, недосто́йных, при́сно согреша́ющих и преогорчева́ющих бла́гость Его́, но да нака́жет нас зде, я́ко Оте́ц чадолюби́вый, о́наможе, в бу́дущем ве́це, да спасе́т и поми́лует, я́ко Судия́ и Мздовоздая́тель пра́ведный, да та́ко, изба́вльшеся ве́чнаго муче́ния, сподо́бимся с тобо́ю в ра́йских оби́телех воспева́ти Ему́: Аллилу́иа.
Икос 11
Трисия́нным све́том осиява́ема, со все́ми святы́ми предстои́ши ны́не на небеси́ Престо́лу Царя́ ца́рствующих, О́льго всеблаже́нная, и отту́ду, я́ко светоза́рное свети́ло, просвеща́еши всю страну́ Росси́йскую, разгоня́я мрак заблужде́ний и показу́я путь к и́стинному просвеще́нию, к небе́сному блаже́нству. Сего́ ра́ди, прославля́юще тя, глаго́лем: Ра́дуйся, луно́ просвеще́нная от незаходи́маго Со́лнца пра́вды; ра́дуйся, путеводи́тельнице, пра́вую стезю́ к ве́чному спасе́нию нам показу́ющая. Ра́дуйся, мо́щная споспе́шнице и укрепи́тельнице пропове́дников правосла́вныя веры; ра́дуйся, при́сная покрови́тельнице благи́х наста́вников ю́ношества и всех, благотрудя́щихся на по́льзу о́бщую. Ра́дуйся, законода́телей страны́ Росси́йския наста́внице и покрови́тельнице; ра́дуйся, народоправи́телей и нача́льников страны́ сея́ му́драя и до́брая советопода́тельнице. Ра́дуйся, крамо́л и раздо́ров потреби́тельнице; ра́дуйся, всех оби́димых и неправе́дно гони́мых засту́пнице. Ра́дуйся, скорбя́щих ско́рая уте́шительнице; ра́дуйся, боля́щих ми́лостивая исцели́тельнице. Ра́дуйся, лю́дем на́шим по́мощь моли́твами твои́ми от Бо́га подава́ющая; ра́дуйся, всея́ страны́ Росси́йския предста́тельнице и засту́пнице. Ра́дуйся, свята́я равноапо́стольная княги́не О́льго богому́драя.
Кондак 12
Благода́ть Пресвята́го Ду́ха испроси́ нам, наста́внице на́ша, от Всеще́драго Бо́га и Спа́са на́шего, вразумля́ющую и укрепля́ющую нас в де́ле спасе́ния, да не безпло́дно бу́дет в нас все́янное тобо́ю се́мя святы́я ве́ры, но да прозя́бнет и плод сотвори́т, и́мже бы возмощи́ нам пита́ти ду́ши на́ша в бу́дущей ве́чней жи́зни, иде́же вси святи́и воспева́ют Бо́гу: Аллилу́иа.
Икос 12
Пою́ще твоя́ мно́гая и пресла́вная благодея́ния, явле́нная стране́ Росси́йстей в просвеще́нии той све́том ве́ры Христо́вой, благода́рственная прино́сим ти, с любо́вию зову́ще сицева́я: Ра́дуйся, богоизбра́нная и богопросла́вленная самоде́ржице земли́ Ру́сския; ра́дуйся, несокруши́мое огражде́ние ея́, покро́в и защище́ние. Ра́дуйся, де́вам росси́йским о́бразе целому́дреннаго жития́; ра́дуйся, ма́терем наста́внице зако́ннаго супру́жества и до́браго чад воспита́ния. Ра́дуйся, вдови́цам пра́вило богоуго́днаго жития́; ра́дуйся, всем россиа́ном учи́тельнице и о́бразе всех доброде́телей. Ра́дуйся, соуча́стнице на небеси́ жре́бия пропове́дников ве́ры Христо́вы; ра́дуйся, соприча́стнице ве́чнаго блаже́нства пра́ведных. Ра́дуйся, те́плая о нас пред Бо́гом моли́твеннице; ра́дуйся, усе́рдная о спасе́нии на́шем хода́таице. Ра́дуйся, в час сме́рти на́шея о нас к Бо́гу моли́твеннице; ра́дуйся, по исхо́де на́шем от сме́ртнаго сего́ телесе́ по́мощь и утеше́ние подаю́щая. Ра́дуйся, свята́я равноапо́стольная княги́не О́льго богому́драя.
Кондак 13
О свята́я равноапо́стольная вели́кая княги́не О́льго, приими́ ми́лостивно от нас хвале́бное благодаре́ние сие́ о всех, я́же тобо́ю воздаде́ Госпо́дь нам, отце́м и пра́отцем на́шим и всей держа́ве Росси́йстей, и моли́ Всеблага́го Бо́га умно́жити ми́лость Свою́ на ны и на ро́ды родо́в на́ших, утверди́ти ны в правове́рии и благоче́стии, храни́ти же от всех напа́стей, бед и зол, да сподо́бимся с тобо́ю, я́ко ча́да с ма́терию, во ве́ки воспева́ти Бо́гу: Аллилу́иа.
Этот кондак читается трижды. Затем 1-й икос «А́нгелов и челове́ков Творе́ц…» и 1-й кондак «Первоизбра́нней от всего́ росси́йскаго ро́да…»
Молитвы
О свята́я равноапо́стольная вели́кая княги́не О́льго, первоуго́днице росси́йская, те́плая о нас пред Бо́гом хода́таице и моли́твеннице. К тебе́ прибега́ем с ве́рою и мо́лимся с лю́бовию: бу́ди нам во всем ко бла́гу помо́щница и споспе́шница и, я́коже во вре́менной жи́зни тща́лася еси́ просвети́ти пра́отцы на́ша све́том святы́я ве́ры и наста́вити я́ твори́ти во́лю Госпо́дню, та́ко и ны́не, в небе́сней пребыва́я све́тлости, благоприя́тными твои́ми к Бо́гу моли́твами вспомоществу́й нам в просвеще́нии ума́ и се́рдца на́шего све́том Ева́нгелия Христо́ва, да преспева́ем в ве́ре, благоче́стии и любви́ Христо́ве. В нищете́ и ско́рби су́щия уте́ши, бе́дствующим пода́ждь ру́ку по́мощи, оби́димыя и напа́ствуемыя заступи́, заблу́дшия от пра́выя ве́ры и е́ресьми ослепле́нныя вразуми́, и испроси́ нам у Всеще́драго Бо́га вся блага́я и поле́зная в жи́зни вре́менной и ве́чней, да та́ко благоуго́дне зде пожи́вше, сподо́бимся насле́дия благ ве́чных в безконе́чнем Ца́рствии Христа́ Бо́га на́шего, Ему́же со Отце́м и Святы́м Духом подоба́ет вся́кая сла́ва, честь и поклоне́ние всегда́, ны́не и при́сно и во ве́ки веко́в. Ами́нь.
О велика́я уго́днице Бо́жия, богоизбра́нная и богопросла́вленная, равноапо́стольная вели́кая княги́не О́льго! Ты отри́нула еси́ злове́рие и нече́стие язы́ческое, уве́ровала еси́ во Еди́наго И́стиннаго Триипоста́снаго Бо́га, и восприя́ла еси́ Свято́е Креще́ние, и положи́ла еси́ нача́ло просвеще́нию земли́ Росси́йския све́том ве́ры и благоче́стия. Ты еси́ духо́вная родонача́льница на́ша, ты по Христе́ Спаси́теле на́шем пе́рвая ви́новница просвеще́ния и спасе́ния ро́да на́шего. Ты еси́ те́плая моли́твенница и хода́таица о оте́честве Всеросси́йстем, во́инстве и всех лю́дех. Сего́ ра́ди смире́нно мо́лим тя: при́зри на не́мощи на́ша и умоли́ Премилосе́рднаго Царя́ Небе́снаго, да не прогне́вается на ны зело́, я́ко по не́мощем на́шим по вся дни согреша́ем, да не погуби́т нас со беззако́ньми на́шими, но да поми́лует и спасе́т нас по ми́лости Свое́й, да всади́т в сердца́ на́ша спаси́тельный страх Свой, да просвети́т Свое́ю благода́тию ум наш, во е́же разуме́ти нам пути́ Госпо́дни, оста́вити стези́ нече́стия и заблужде́ний, примета́тися же во путя́х спасе́ния и и́стины, неукло́ннаго исполне́ния за́поведей Бо́жиих и уста́вов Святы́я Це́ркве. Моли́, блаже́нная О́льго, Человеколю́бца Го́спода, да проба́вит нам вели́кую ми́лость Свою́, да изба́вит нас от наше́ствия иноплеме́нных, от вну́тренних нестрое́ний, мяте́жей и раздо́ров, от гла́да, смертоно́сных боле́зней и от вся́каго зла, да пода́ст нам благорастворе́ние возду́ха и плодоно́сие земли́, да сохрани́т страну́ на́шу от всех ко́зней и наве́т вра́жиих, да соблюде́т в судия́х и прави́телех пра́вду и ми́лость, да даст па́стырем ре́вность о спасе́нии пасо́мых, всем же лю́дем споспеше́ние, о е́же усе́рдно слу́жбы своя́ исполня́ти, любо́вь между́ собо́ю и единомы́слие име́ти, на бла́го Оте́чества и Святы́я Це́ркве ве́рне подвиза́тися, да возсия́ет свет спаси́тельныя ве́ры в стране́ на́шей во всех конце́х ея́, да обратя́тся к ве́ре неве́рующии, да упраздня́тся вся е́реси и раско́лы. Да, та́ко пожи́вше в ми́ре на земли́, сподо́бимся с тобо́ю ве́чнаго блаже́нства на небеси́, хва́ляще и превознося́ще Бо́га во ве́ки веко́в. Ами́нь.
