Акафист
святому апостолу и евангелисту Иоанну Богослову
(празднование 8/12 мая, 20 июня/3 июля, 30 июня/13 июля и 26 сентября/9 октября)
Кондак 1
Избра́нный Го́сподем от мре́жей ры́барских на про́поведь Ева́нгелия и от ло́вли рыб на уловле́ние челове́ков во свет и́стиннаго богове́дения, вели́кий апо́столе, учениче́, дру́же и напе́рсниче Христо́в, моли́ еди́наго и́стиннаго Человеколю́бца, Его́же ты прии́скренне возлюби́л еси́, да поми́лует нас, и́щущих твоего́ к Нему́ предста́тельства и зову́щих ти: Ра́дуйся, Иоа́нне апо́столе, напе́рсниче Христо́в и Богосло́ве.
Икос 1
А́нгельских сил и вся́кия тва́ри Творца́, Влады́ку и Го́спода, восприе́мшаго плоть на́шу и я́вльшагося на земли́ спасе́ния на́шего ра́ди, узре́в ходя́ща при мо́ри Галиле́йстем и взыва́юща тя со бра́том твои́м, Иоа́нне блаже́нне, в зва́ние апо́стольства, оста́вль мре́жи ры́барския и отца́ твоего́ в корабли́, неукло́нно отто́ле после́довал еси́ стопа́м Спаси́телевым. Сего́ ра́ди вопие́м ти си́це: Ра́дуйся, любве́ ра́ди ко Христу́ отца́ по пло́ти оста́вивый; ра́дуйся, Христо́м Небе́снаго Отца́ обреты́й. Ра́дуйся, мир и вся его́ пре́лести презре́вый; ра́дуйся, небе́сная блага́я в воздая́ние получи́вый. Ра́дуйся, плоть ду́ху соверше́нно порабо́тивый; ра́дуйся, дух твой Сладча́йшему твоему́ Учи́телю Иису́су покори́вый. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 2
Ви́дя Христо́с Госпо́дь непоро́чную чистоту́ твоего́ се́рдца, плотски́ми сластьми́ не омраче́нную, суди́ тебе́ досто́йна бы́ти зре́ния та́инственных открове́ний, я́ко да, проница́я во глубину́ богосло́вия, возмо́жеши пропове́дати то́е во услы́шание всего́ ми́ра. Сего́ ра́ди «сын гро́мов» от Го́спода нарече́н был еси́ и Тому́ возопи́л еси́: Аллилу́иа.
Икос 2
Разу́мом и́стиннаго богопозна́ния озаря́я твою́ ду́шу, ше́ствовал еси́ восле́д блага́го Учи́теля твоего́, поуча́яся из уст Его́ исходя́щей прему́дрости, и соверше́ннаго ра́ди твоего́ незло́бия и де́вственнаго целому́дрия был еси́ возлю́блен Христо́м Го́сподем твои́м. Услы́ши у́бо ны, воспева́ющия ти си́це: Ра́дуйся, незло́бия рачи́телю; ра́дуйся, де́вства и чистоты́ храни́телю. Ра́дуйся, любве́ к Бо́гу и бли́жним учи́телю; ра́дуйся, до́брых нра́вов наста́вниче. Ра́дуйся, смиренному́дрия зерца́ло; ра́дуйся, Боже́ственныя благода́ти свети́ло. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 3
Си́лу Божества́ Христо́ва, сокры́тую под о́блаком немощна́го челове́ческаго естества́, позна́л еси́ я́вно, егда́ Госпо́дь наш, воскреша́я дщерь Иаи́рову и последи́ преобража́яся на Фаво́ре, сподо́би тя со ине́ма двема́ ученико́ма свиде́теля бы́ти таковы́х пресла́вных чуде́с. Уве́дев же, я́ко Христо́с есть Бог и́стинный, из глубины́ се́рдца твоего́ воззва́л еси́ Ему́: Аллилу́иа.
Икос 3
Име́я ве́лие дерзнове́ние к возлюби́вшему тя Христу́ Сы́ну Бо́жию, возле́гл еси́ на пе́рсех Его́ при соверше́нии Та́йныя Ве́чери, и егда́ прорица́ше Госпо́дь о преда́теле Свое́м, тогда́ еди́н ты дерзну́л еси́ вопроси́ти о и́мени его́. Сего́ ра́ди вопие́м ти: Ра́дуйся, возлю́бленный Христо́в учениче́; ра́дуйся, при́сный Его́ дру́же. Ра́дуйся, невозбра́нно на пе́рсех Госпо́дних возлежа́вый; ра́дуйся, дерзнове́нно о и́мени предаю́щаго вопроси́вый. Ра́дуйся, па́че и́ных ко Христу́ ближа́йший; ра́дуйся, словеса́ Госпо́дня, я́коже сокро́вище многоце́нное, слага́вый в се́рдце свое́м. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 4
Бу́ря я́рости и зло́бнаго неи́стовства жестокосе́рдых и неблагода́рных иуде́ев, егда́ воста́ на Христа́ Сы́на Бо́жия, тогда́ вси ученицы́ Его́, стра́хом объя́ти бы́вше, бежа́ша; но ты, любо́вь кре́пльшую к Нему́ име́я, да́же до Креста́ и сме́рти не отступи́л еси́ от Него́, на вся му́ки Христо́вы взира́я и соболе́знуя се́рдцем Де́ве Ма́тери Бо́жией, пла́чущей и рыда́ющей. Удивля́яся же кра́йнему милосе́рдию и долготерпе́нию Бо́жию, взыва́л еси́ к Пострада́вшему за род челове́ческий: Аллилу́иа.
Икос 4
Ви́ся на Кресте́ пригвожде́нный за грехи́ на́ша Спас ми́ра и ви́дев тя и Ма́терь Свою́ предстоя́щия, сы́на тя Преблагослове́нней Де́ве Богоро́дице вдал есть, глаго́ля Ей: «Же́но, се сын Твой, – и тебе́ па́ки: – Се Ма́ти твоя́». Мы же, дивя́щеся любви́ Христо́ве, на тебе́ явле́нней, воспева́ем си́це: Ра́дуйся, сын Бо́жия Ма́тере бы́ти сподо́бивыйся; ра́дуйся, того́ ра́ди наипа́че ко Христу́, я́ко не́киим духо́вным родство́м, присво́ивыйся. Ра́дуйся, Ма́тери Бо́жией досто́йно послужи́вый; ра́дуйся, Сию́, я́коже ма́терь свою́, во вся́кой че́сти у себя́ име́вый. Ра́дуйся, и во успе́нии честно́е и свято́е Ея́ те́ло ко гро́бу проводи́вый; ра́дуйся, со блиста́ющеюся ра́йскою ве́твию, арха́нгелом Гаврии́лом принесе́нною, одру́ Ея́ предше́дый. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 5
Боготе́чная звезда́ яви́лся еси́ во Аси́и, отше́д в ню на пропове́дание сло́ва Бо́жия, я́коже жре́бием указа́ся тебе́. Но на пути́ твое́м попусти́ Госпо́дь бы́ти тебе́ вве́ржену в мо́ре: благода́ть же Бо́жия, всегда́ с тобо́ю пребыва́ющая, сохрани́ тя в вода́х морски́х жива́, и по четы́ренадесятих днех повеле́ волне́ морсте́й, да воспе́нившися изве́ржет тя на брег. Егда́ же узре́ сия́ учени́к твой Про́хор, уже́ мно́го пла́кавый о кончи́не твое́й, ве́лиим гла́сом воззва́ чудоде́йствующему Бо́гу: Аллилу́иа.
Икос 5
Ви́девше ефе́сстии жи́телие пресла́вное чу́до, тобо́ю сотворе́нное, егда́ о́трока До́мна, умерщвле́ннаго от бе́са, моли́твою твое́ю воскреси́л еси́, воспе́ша велегла́сно си́лу Бо́га, тобо́ю им пропове́даннаго, и изба́вльшеся от гну́снаго идолослу́жения, взыва́ху тебе́ си́це: Ра́дуйся, и́стиннаго Бо́га служи́телю; ра́дуйся, бесо́в прогони́телю. Ра́дуйся, мертвецы́ си́лою Христо́вою оживля́яй; ра́дуйся, то́ю жизнь и здра́вие лю́дем возвраща́яй. Ра́дуйся, помраче́нныя умо́м к све́ту и́стины призыва́яй; ра́дуйся, пра́выя ве́ры просвеще́нием к доброде́тели наставля́яй. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 6
Пропове́дник богоно́сный сло́ва Бо́жия во Ефе́се был еси́ и, усе́рдствуя о распростране́нии благода́ти ева́нгельския, утвержда́л еси́ твое́ уче́ние зна́меньми вели́кими и чу́дными, ка́пище же Артеми́дино еди́ною моли́твою низпрове́ргл еси́, да зря́ще сие́, язы́чницы позна́ют Еди́наго Бо́га, Ему́же мы вопие́м: Аллилу́иа.
Икос 6
Воссия́ во Ефе́се, я́коже со́лнце, свет ве́ры Христо́вы, тобо́ю пропове́данныя, егда́ злочести́вый Дометиа́н воздви́же гоне́ние на христиа́ны; тогда́ и тебе́, я́ко усе́рднаго испове́дника и́мене Христо́ва, посла́ епа́рх в Рим свя́зана, иде́же и претерпе́л еси́ стра́шная муче́ния. Тех ра́ди благоче́стно возглаша́ем ти сицева́я: Ра́дуйся, Христо́ва ра́ди испове́дания бие́нный; ра́дуйся, ча́шу смертоно́снаго я́да невре́дно испи́вый. Ра́дуйся, в котле́ еле́а кипя́щаго не свари́выйся; ра́дуйся, си́лою Христо́вою в лю́тых муче́ниих цел сохрани́выйся. Ра́дуйся, твои́м неврежде́нием ке́саря, му́чащаго тя, устраши́вый; ра́дуйся, сим же наро́д о вели́чествии Бо́га, от христиа́н почита́емаго, уве́ривый. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 7
Егда́ узре́ мучи́тель, я́ко и люте́йшия му́ки, я́же от него́ претерпе́л еси́, не возмого́ша умертви́ти тебе́, тогда́, возмне́в тя безсме́ртна бы́ти, во о́стров Па́тмос на изгна́ние осужда́ет. Ты же, повину́яся Про́мыслу Бо́жию, та́ко благоволи́вшему, благода́рственно воспева́л еси́ Бо́гу, вся во благо́е устроя́ющему: Аллилу́иа.
Икос 7
Но́вая чудеса́ показа́л еси́ язы́чником, ища́ обрати́ти их ко спаси́тельной ве́ре Христо́ве, егда́ плыву́щу ти во изгна́ние твое́, повеле́нием твои́м о́трока уто́пшаго мо́ре на кора́бль жи́ва изве́рже, бу́ря укроти́ся, вода́ сла́ная в сла́дкую претвори́ся, во́ин от чре́внаго неду́га исцели́ся, и по прише́ствии твое́м в Па́тмос, бес пытли́вый, бу́дущая прорица́вый, из одержи́маго им изгна́ся. Тогда́ вси зря́щии такова́я ди́вная зна́мения, тобо́ю соверша́емая, прихожда́ху к позна́нию Триипоста́снаго Бо́га и креща́хуся. Мы же тя ублажа́ем та́ко: Ра́дуйся, мо́рю и бу́ри повелева́яй; ра́дуйся, сатани́нския ду́хи от челове́к изгоня́яй. Ра́дуйся, боле́зни еди́ным сло́вом исцеля́яй; ра́дуйся, всем в ну́ждах по́мощь подава́яй. Ра́дуйся, чудесы́ твои́ми идолопокло́нники удиви́вый; ра́дуйся, уче́нием твои́м неве́рныя во и́стенней ве́ре утверди́вый. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 8
Стра́нно бе ви́дети жреце́м Аполло́новым, я́ко храм бо́га их и вся бы́вшия в нем и́долы ты еди́ным сло́вом на зе́млю низпрове́ргл еси́. Чудя́щеся у́бо о сем и я́рящеся на таково́е твое́ дерзнове́ние, идо́ша к волхву́ не́коему, ве́лию си́лу от сатаны́ в себе́ име́вшему, прося́ще его́, да отмсти́т безче́стие бо́га их; он же, слеп сый душе́ю, не ве́дая си́лы, в тебе́ обита́ющия, покуша́шеся привиде́нии разли́чными тебе́ устраши́ти и на тя наро́д подви́гнути: оба́че сам окая́нный погрузи́ся в мо́ре и та́мо поги́бе, безси́льным бы́вшим бесо́м спасти́ его́, ты бо воспрети́л еси́ им и́менем Иису́са Христа́ Сы́на Бо́жия, Его́же просла́ви наро́д, чудесе́ свиде́тель, воспе́в: Аллилу́иа.
Икос 8
Весь испо́лнен быв любве́ боже́ственныя, яви́лся еси́ вмести́лище даро́в Свята́го Ду́ха: бу́дущая прорица́л еси́, отстоя́щая, я́ко близ су́щая, возвеща́л еси́, неду́жныя исцеля́л еси́, жене́ иге́мона на о́строве Па́тмосе, в боле́зни рожде́ния стра́ждущей, едва́ на праг до́му ея́ вступи́в, облегче́ние дарова́л еси́. Приими́ у́бо от нас, гре́шных, похвалы́ сицевы́я: Ра́дуйся, благода́ти Бо́жия вмести́лище; ра́дуйся, Ду́ха Свята́го обита́лище. Ра́дуйся, реко́ чудото́чная цельбоно́сныя в боле́знех си́лы; ра́дуйся, исто́чниче наставле́ний, приводя́щих к позна́нию пра́выя ве́ры. Ра́дуйся, кова́рства лука́ваго сатаны́ облича́яй; ра́дуйся, ве́рныя от ко́зней его́ защища́яй. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 9
Вся́кое беззако́ние истребля́я ре́вностно от среды́ люде́й, к ни́мже посла́н был еси́, обличи́л еси́ прельще́ние идолопокло́нников, и́же почита́ху бе́са, во о́бразе во́лка превели́ка лю́дем явля́вшагося, и мно́гия от них к ве́ре Христо́ве приве́л еси́: та́же ка́пище Ва́кхово моли́твою твое́ю разруши́л еси́, и волхва́ Нукиа́на вку́пе с дома́шними его́ к покая́нию чудесы́ твои́ми обрати́л еси́. Ти́и же, от греха́ ко спасе́нию обрати́вшеся, немо́лчно взыва́ху Бо́гу: Аллилу́иа.
Икос 9
Вети́йство му́дрости челове́ческия не возмо́жет изрещи́, ниже́ ум плотска́го челове́ка пости́гнути, я́же ты возвести́л еси́ нам о безнача́льнем бытии́ Триипостаснаго Бо́га: подо́бно бо Моисе́ю, во гро́мех и блиста́ниих на горе́ прия́л еси́ от Бо́га та́йну богосло́вия и возгласи́л еси́ ми́ру, я́ко в нача́ле бе Сло́во, Отцу́ искони́ неразлу́чное и всему́ су́щему вино́вное, иму́щее Свет жи́зни, Его́же тьма не мо́жет объя́ти. Озаря́еми таковы́м облиста́нием све́та Боже́ственныя И́стины, почита́ем тя я́ко таи́нника Безнача́льныя Тро́ицы и воспева́ем тя я́ко Богосло́ва соверше́ннейшаго: Ра́дуйся, орле́, воспари́вый до са́маго огнеобра́знаго престо́ла Бо́жия; ра́дуйся, трубо́, возвести́вшая ми́ру предве́чнаго и безнача́льнаго Бо́га. Ра́дуйся, челове́чество и Божество́ Христо́во нам изъясня́яй; ра́дуйся, ди́вная словеса́ и наставле́ния Госпо́дня во Ева́нгелии твое́м нам возвеща́яй. Ра́дуйся, любви́ де́лом и и́стиною нас науча́яй; ра́дуйся, пребыва́ющим в любви́ пребыва́ние в них Бо́га обещава́яй. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 10
Спасти́ хотя́ ду́ши челове́ческия, вся́ко поуча́л еси́ лю́ди веровати во Христа́ Сы́на Бо́жия, име́ти со́весть незазо́рну и лю́бити друг дру́га, да возмо́гут не то́кмо зде, но и в селе́ниих пра́ведных воспе́ти ле́потно Всемогу́щему Бо́гу: Аллилу́иа.
Икос 10
Сте́ны Го́рняго Иеруса́лима узре́в во открове́нии, возвести́л еси́ нам, я́же та́мо ви́дел еси́ и я́же и́мут бы́ти до сконча́ния ми́ра, сказу́я нам сие́ иносказа́тельными словесы́, я́же мо́жет разуме́ти то́лько ум, име́яй му́дрость. Удивля́ющеся таково́му да́ру проро́чествия, тебе́ от Бо́га дарова́нному, воспева́ем тя си́це: Ра́дуйся, позна́нием Су́щаго и и́же бе и гряду́щаго превозше́дый естество́ челове́ческое; ра́дуйся, вмести́лище та́инств, невмести́мых челове́ческим умо́м, бы́вый. Ра́дуйся, неизрече́нная Бо́жия открове́ния узре́вый; ра́дуйся, сия́ ве́рным препода́вый. Ра́дуйся, ра́дости святы́х еще́ в жи́зни сей позна́вый; ра́дуйся, о́ными ны́не в преизбы́точествии наслажда́яйся. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 11
Пе́ние благода́рственное принесе́ тебе́, святы́й апо́столе Иоа́нне, христиани́н, и́же в нищету́ прише́д и не имы́й чим возда́ти свои́м заимода́вцем, во отча́яние впаде́ и иска́ше сам себе́ умертви́ти; ты же, пропове́дник любве́ ко бли́жним сый, жела́я изба́вити того́ от вре́менныя и ве́чныя сме́рти, кре́стным зна́мением се́но во зла́то претвори́л еси́ и сие́ тому́ вручи́л еси́, да сим зла́том и до́лги отда́ст заимода́вцем, и дом свой пропита́ет, Бо́гу же, тобо́ю его́ облагоде́тельствовавшему, да пое́т: Аллилу́иа.
Икос 11
Светоза́рная душа́ твоя́, дости́гши в ме́ру во́зраста соверше́ннаго, позна́ла есть приближе́ние вре́мене, егда́ подоба́ет тле́нному насле́дити обеща́нное нетле́ние и сме́ртному обеща́нное безсме́ртие. Скончава́я у́бо земно́е житие́ твое́, повеле́л еси́ ученико́м твои́м земле́ю покры́ти до ве́рха те́ло твое́; слы́шавше же о сем, су́щии во гра́де бра́тия приидо́ша ко гро́бу твоему́ и, откопа́вше, ничто́же в нем обрето́ша. Те́мже позна́вше, я́ко измене́ние твое́ сотвори́ся не обы́чным челове́ческим сме́ртным успе́нием, воспе́ша тебе́ та́ко: Ра́дуйся, орле́, обнови́вый ю́ность твою́ приближе́нием к Со́лнцу сла́вы Бо́жия; ра́дуйся, таковы́м измене́нием превозше́дый вся уста́вы естества́ челове́ческаго. Ра́дуйся, по обетова́нию блага́го Учи́теля твоего́ возсе́дый на еди́нем от двана́десяти престо́лов; ра́дуйся, творя́й на том суд и пра́вду посреде́ люде́й Бо́жиих Изра́иля. Ра́дуйся, наслажда́яйся лицезре́нием Сладча́йшаго Иису́са, к Нему́же на пе́рси пре́жде Его́ стра́сти и Воскресе́ния возле́гл еси́; ра́дуйся, от Его́ милосе́рдия хода́тайствуяй нам вся блага́я. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 12
Благода́ть дана́ бысть от Бо́га ме́сту тому́, иде́же те́ло твое́ земли́ пре́дано бя́ше, да испуска́ет в день погребе́ния твоего́ то́нкий прах на исцеле́ние боля́щим, показу́я сим чу́дом, ка́ко прославля́ет Бог лю́бящия Его́, да вси, зря́ще сие́, непреста́нно се́рдцем и усты́ во дни и в нощи́ вопие́м Ему́: Аллилу́иа.
Икос 12
Пою́ще труды́ твоя́ во апо́стольстве и чудеса́ и исцеле́ния, я́же источа́л еси́ и источа́еши благода́тию Ду́ха Свята́го, в тебе́ обита́юшаго, восхваля́ем Бо́га, дарова́вшаго нам такова́го путеводи́теля, наставля́ющаго нас на путь спасе́ния и милосе́рдующаго о не́мощех на́ших. Приими́ у́бо от нас, святы́й апо́столе, похвалы́ сицевы́я: Ра́дуйся, благове́стниче ве́ры Христо́вы усе́рднейший; ра́дуйся, учи́телю Це́ркве Христо́вы изря́днейший. Ра́дуйся, богосло́вов нача́ло и основа́ние; ра́дуйся, Боже́ственных Та́ин возвести́телю. Ра́дуйся, де́вствующих о́бразе и целому́дрия пра́вило; ра́дуйся, всех ве́рных, ко твоему́ заступле́нию прибега́ющих, ско́рый помо́щниче и покрови́телю. Ра́дуйся, Иоа́нне апо́столе, напе́рсниче Христо́в и Богосло́ве.
Кондак 13
О пресла́вный и всехва́льный апо́столе и евангели́сте, напе́рсниче Христо́в возлю́бленный Иоа́нне! Твои́м всеси́льным хода́тайством ко Всеблаго́му твоему́ Учи́телю и на́шему Влады́це и Го́споду испроси́ нам вся блага́я вре́менная и ве́чная и христиа́нскую кончи́ну жития́ на́шего, да с тобо́ю и со а́нгельскими ли́ки в селе́нии пра́ведных воспое́м Триипоста́сному Бо́гу: Аллилу́иа.
Этот кондак читается трижды, затем 1-й икос «А́нгельских сил…» и 1-й кондак «Избра́нный Го́сподем…»
Молитва
О вели́кий апо́столе, евангели́сте громогла́сный, Богосло́ве изя́щнейший, тайнове́дче неизрече́нных открове́ний, де́вственниче и возлю́бленный напе́рсниче Христо́в Иоа́нне! Приими́ нас, гре́шных, под твое́ си́льное заступле́ние прибега́ющих. Испроси́ у всеще́драго человеколю́бца Христа́ Бо́га на́шего, И́же пред очесы́ твои́ми Кровь Свою́ за ны, непотре́бныя рабы́ Своя́, излия́л есть, да не помяне́т беззако́ний на́ших, но да поми́лует нас и сотвори́т с на́ми по ми́лости Свое́й: да да́рует нам здра́вие душе́вное и теле́сное, вся́кое благоде́нствие и изоби́лие, наставля́я нас обраща́ти о́ная во сла́ву Его́, Творца́, Спаси́теля и Бо́га на́шего, по кончи́не же вре́менныя жи́зни на́шея от немилосе́рдных истяза́телей на возду́шных мыта́рствах да изба́вит нас, и та́ко да дости́гнем, тобо́ю води́мии и покрыва́емии, Го́рняго о́наго Иерусали́ма, его́же сла́ву ты во открове́нии зрел еси́, ны́не же несконча́емыя ра́дости наслажда́ешися. О вели́кий Иоа́нне! Сохрани́ вся гра́ды и страны́ христиа́нския, храм сей, служа́щих и моля́щихся в нем от гла́да, губи́тельства, тру́са и пото́па, огня́ и меча́, наше́ствия иноплеме́нных и междоусо́бныя бра́ни; изба́ви нас от вся́кия беды́ и напа́сти и моли́твами твои́ми отврати́ от нас пра́ведный гнев Бо́жий, и Его́ милосе́рдие нам испроси́, да вку́пе с тобо́ю сподо́бимся прославля́ти в невече́рнем дни пресвято́е и́мя Отца́ и Сы́на и Свята́го Ду́ха во ве́ки веко́в. Ами́нь.
